Mateo 15

1Sangaw, hinnian/asan dudduma/karruan nga Fariseo en mestru ira kan ya dorob nga naggafu kan Jerusalem nga minang kan y Jesus, en kunda nga namovut, 2"Ka-am ta mari vulunan ya disipulom ira ya kustumbre ya ginafu tera ira? Mari ra baggawan ya ima ra kallie ra nga mangan." 3Kunna y Jesus nga siminabbag nga namovut kan ira, "Ka-am ta turiyan nu pay ya dorob y Afu Dios megafu laman kan ya kustumbre nu? 4Yaw ya ikayat ku nga kayan, nemandu y Afu Dios kan ittera, 'Ikakuam ya amam en ya inam,' en nemandu na peba, 'Mapatay ya innia laman nga mergo kan narakat/napot kan ya ama na onu kan ya ina na pe laman.' 5"Ngam yaw ya isa nga kustumbre nu nga ituttuldu nu. Nu hinnian tolay nga makkahi kan ya ama na onu ya ina na pe laman, 'Ya uffun nga alakan nu zinan kan yakan, neddan kan y Afu Dios,' 6mari mawag gafen ngin kan ikakua na ya manak na. Megafu kan yan nga kustumbre nu, awan nga pangikuentan nu kan ya dorob y Afu Dios. 7Ikayu nga appen napia/aginpipia, kurug ya nepeturak y Afu Dios kattun nga neturak y Isaias nga profeta nga me-annung kan ikayu nga kunna: 8'Ira yaw nga totolay, ikakua rak laman kan ya gissimukan da, ngam ararayyu ya giffutuan da kan yakan. 9Awan nga serbi ya addayarayaw ra kan yakan, gafu ta ituttuldu ra nga dorob ku ya reglamento ira nga pinanday ra pe laman.' " 10Inakkulan y Jesus ya aru nga totolay, en kunna nga nakkahi kan ira, "Ginan dak en antindian nu ya kayan ku. 11Bakkan kan ya tumallung kan ya simuk ya innia laman nga tolay ya mamabbalin kan iggina kan mari narenu, nu azzi ya mallawan kan ya simuk na." 12Sangaw, minang ya disipulo na ira kan iggina, en kunda nga nakkahi, "Afu, marim kazze/pano ammu nga napatakitan ya ginnonotan ya Fariseo ira kattu nagina ra yan nga kinahim?" 13Kunna y Jesus nga siminabbag, "Ngammin nga mula nga mari nemula y Amak nga nelangitan, mabantul nattaruk. 14Porrian nu ira. Kuenta vulaw ra nga mangigiya kan ya totolay, en nu igiya ya isa nga vulaw ya kagitta na nga vulaw, matanag/makabok da nga dua kan avvut." 15Ngam y Pedro, kunna nga nakkahi kan y Jesus, "Ipakanawag mu bitan kan ikami yan nga pangngarrian mu." 16Y Jesus, kunna nga nakkahi kan ira, "Maski ikayu pay, mari nu kazze peba mantindian ya kinahik? 17Mari nu kazze ammu nga ya hanna laman nga tumallung kan ya simuk, umang kan ya sinay, en mallawan balalaman? 18Ngam ya mallawan ira kan ya simuk, maggafu kan ya futu, en yan ya mamabbalin kan mari narenu ya tolay. 19Kurug yan gafu ta ya futu ya paggafanan ya narakat ira nga appanapanonot nga kegafanan ya ammatay, ammabay, akkilalaki, addallaw, akkokot, attestigu kan laddud/busid, en ammaraparakat. 20Ira yaw ya mamabbalin kan mari narenu ya innia laman. Ngam ya innia laman nga mari na baggawan ya ima na kallie na nga mangan, bakkan kan yan ya mamabbalin kan iggina kan mari narenu." 21Napanaw ra Jesus kannay, en minang da kan ya isa nga lugar nga aranni kan ya siudad ya Tiro en ya siudad ya Sidon. 22Hinnian babay nga maddian kan yan nga lugar nga Cananeo ya ginafu na ira nga minang kan ira, en kunna nga nangikullet nga nakimemallak kan y Jesus, "O, Afu nga Gaka y David, kazzen ta ikallak nak! Hinnian narakat nga espiritu nga minafun kan ya anak ku nga babay, en nelot/nafulotan ya ziyat na." 23Ngam mari sinabbag y Jesus iggina. Minang ya disipulo na ira kan iggina, en kunda nga nangikiddaw, "Papanawan mu iggina, gafu ta tumunutunud nga ikukkullet na kan ittera ya ikiddaw na." 24Y Jesus, kunna nga siminabbag kan ira, "Nabon nak laman kan ya Israelita ira nga kuenta karneru nga nakkawawan." 25Minang ya babay kan iggina en nappalentud kan ya atubang na, en kunna nga nakimemallak, "Afu, kazzen ta uffunan nak." 26Y Jesus, kunna nga siminabbag, "Mari mepangngat nga malak ya kanan ya anak ira en mepattu kan ya atu ira." 27Kunna nga siminabbag kan iggina, "Afu, kurug yan, ngam maski ya atu ira, kanan da ya vutta/piripiri nga makkatanag/makkakabok nga maggafu kan ya lamesa ya amo ra." 28Kunna y Jesus nga siminabbag, "O babay, nasikan ya angngurug mu! Mesimmu ya ikiddom." Mismu kan yan nga orat, nammapia ya anak na. 29Kabalin na yan, napanaw ra Jesus kan nay nga lugar. en nanalan da kan ya dappit ya dakal nga danum ya Galilea. Naggadang da kan ya isa nga bakulud, en nanuttud da kannay. 30Napakaru ya totolay nga minang kan iggina, en nevulun da ya dudduma nga pilay, pukul, vulaw en umal ira, en aru peba, en ne-angay ra kan iggina, en pinammapia na ira. 31Nakakergo ngin ya umal ira, ya napukulan ira, netoli kan ya negagangay, nakadalan ngin ya pilay ira, en nakasingan ngin ya vulaw ira. Nakkapalat ya totolay kattu nasingan da ira yan, en zinayarayaw ra y Afu nga Dios ya Israelita ira. 32Sangaw, inakkulan y Jesus ya disipulo na ira, en kunna nga nakkahi, "Ikakkallak ku ya totolay, gafu ta tallu algaw ngin nga hinnian da kan yakan, en awan dan nga kanan. Marik ikayat nga palabbetan ira nga nabisin, gafu ta narakat nu makkafakafi ra en makkatomba ra kan ya dalan." 33Ya disipulo na ira, kunda nga namovut kan iggina, "Be tiaw ya pangalakan tera gafen kan ipakan tera nga makalannat kan ira yaw nga napakaru nga totolay kan yaw nga lugar nga awan mamba nga gibbalayan?" 34Y Jesus, kunna pay nga namovut kan ira, "Pia kazze nga pan ya hinnian kan ikayu?" Kunda nga siminabbag, "Pitu, en pilippipia nga bibbisang/bibbisut nga manangat/isira." 35Sangaw, pinattuttud y Jesus ya totolay kan ya lusak. 36Inalak na ya pitu nga pan en ya manangat ira, nappabalat iggina kan y Afu Dios, ginaddagaddua na, neddan na kan ya disipulo na ira, en netanataned/ne-anta-antet da kan ya tolay ira. 37Sangaw, nangan da ngammin addet zi nabattug da. Pinagampat/Inampat ya disipulo na ira ya vuna, en pitu nga basket ya napannu ra kan ya sobra ra nga nangan. 38Mappattarivu nga lallaki en babbay en abbing ira pay ya nangan. 39Sangaw, pinalabbet na ya totolay, nattakay ra Jesus kan ya barangay, en naddakit da nga naffundu kan ya dappit nga aranni kan ya babalay ya Magadan.

will be added

X\