Mateo 14

1Kan yan nga tiempo, y Herodes nga mammoray kan ya probinsia ya Galilea, nadumug na ya me-annung kan y Jesus. 2Sangaw, kunna nga nakkahi y Herodes kan ya minasserbi ira kan iggina kan me-annung kan y Jesus, "Iggina y Juan nga Minabbawtiso. Nagginnolay iggina, en yan ya gafu na kan hinnian/asan pakapangngua na nga mangngua kan milagro ira." 3Kunna tiaw ya nesimmu. Nappasa sinadday y Herodes y Herodias nga atawa bitan y Felipe nga wahi na. Sangaw, y Juan, kunna nga kanayun nga nakkahi kan y Herodes, "Igamma ya dorob tera ya nepannaddem kan iggina." Neparesta gafen y Herodes iggina, nepabalud na, en nepekarsel na megafu kan y Herodias. 5Ikayat y Herodes nga ipapatay iggina, ngam nakatalaw iggina kan ya totolay gafu ta ikuenta ra iggina kan profeta. 6Ngam kattu luminabbet ya kalgawan ya neke-anak y Herodes, nabbayle ya maginganay nga anak y Herodias kan ya paratubangan da Herodes en ya bisita na ira, en ikakayat y Herodes. 7Gaggafen, netabba na nga iddan na kan iggina ya maski hanna laman nga ikiddaw na kan iggina. 8Ya ina na, netuldu na kan iggina ya kayan na, en nekiddaw na kan y Herodes, "Iddan mu kan yakan ya ulu y Juan nga Minabbawtiso nga nekkua/neppay kan aggagaran/platon." 9Narandam ya patul, ngam gafu ta yan ya netabba na kan ya maginganay kan ya paratubangan ya bisita na ira, nemandu na nga meddan ya nekiddaw na. 10Nabbon iggina kan ya akkarselan en nepafutul na y Juan. 11Nekkua ya ulu na kan aggagaran, ne-angay en neddan kan ya maginganay, en ne-angay na kan y ina na. 12Ya disipulo ira y Juan, nammuan da yan, en minang da inalak ya baggi na, en netanam da. Sangaw, minang da kinahi yan kan y Jesus. 13Kattu nagina y Jesus ya nekapatay y Juan, nabbarangay iggina en ya disipulo na ira nga napanaw kannay, en minang da kan ya isa nga lugar nga kawanan totolay tase ira laman. Ngam kattu nadumug ya totolay ya nepappanaw ra, aru ya napanaw kan ya dudduma/karruan nga babalay nga nanalan da nga guminanat kan ira Jesus. 14Kattu nazzittag iggina kan ya barangay, nasingan na ya napakaru nga totolay, nekallak na ira, en pinammapia na ya makkatakit ira. 15Kattu maggireram ngin, minang ya disipulo na ira kan iggina, en kunda nga nakkahi, "Awan nga totolay nga maddian kan yaw nga lugar, en maggireram ngin. Papanawan mun ya totolay tase umang da gumatang kan kanan da kan ya barrio ira nga aranni kanniaw." 16Y Jesus, kunna nga nakkahi, "Mari mawag kan mapanaw ra; ikayu mismu ya mamakan kan ira." 17Kunda nga nakkahi kan iggina, "Afu, lima nga pan en dua nga manangat/isira laman ya hinnian kan ittera." 18Kunna nga siminabbag y Jesus, "Alakan nu kanniaw." 19Sangaw, pinattuttud na ya totolay kan ya kakaddattan. Inalak na ya lima nga pan en ya dua nga manangat, en siminangug iggina kan langit nga nappabalat kan y Afu Dios. Ginaddagaddua na ya pan ira en ya manangat ira, neddan na kan ya disipulo na ira, en netaned/ne-antet da kan ya totolay. 20Nangan da ngammin addet zi nabattug da. Pinagampat/Inampat da ya nagaddagaddua nga vuna, en mafulu se dua nga basket ya napannu ra. 21Mallimarivu nga lallaki ya nangan, en hinnian pay babbay en abbing ira. 22Kabalin na yan, pinabbarangay y Jesus ya disipulo na ira, pinonna na ira kan ya tangapingit ya dakal nga danum ya Galilea, en pinalabbet na ya totolay. 23Kabalin ya nepammalabbet na kan ira, naggadang iggina kan ya bakulud tase mesissa nga maddasal. Kattu maggabi ngin, hinnian peba iggina kannay nga mesissa. 24Ngam hinnian ngin ya barangay kan ya tangnga ya dakal nga danum nga massussukkayan/massissikkuayan kan daddakal nga palapalung gafu ta turiya ya angin kan ira. 25Kan albasu, nanalan y Jesus kan ya utun danum nga gumanat kan ira. 26Kattu nasingan da iggina nga manalan kan ya utun danum, nelot/nafulotan ya talaw ra, en kunda nga nakkarriaw, "Amang/Banig! Amang!" 27Ngam insigida kunna y Jesus nga nakkahi kan ira, "Pasikannan nu ya ginnonotan nu! Yakan yaw! Mari nu mattalaw!" 28Y Pedro, kunna nga nakkahi kan iggina, "Afu, nu kurug nga ikaw, pavulunan nak nga umang kan ikaw kan ya utun danum." 29Kunna y Jesus nga siminabbag, "Angka tiaw ngin!" Sangaw, nazzittag y Pedro kan ya barangay, en nanalan iggina kan ya utun danum nga umang kan y Jesus. 30Ngam kattu natenap na ya nasikan nga angin, nakatalaw en namegafu nga lumammad, en kunna nga nangikarriaw, "Afu, kararan nak!" 31Nerame negawat y Jesus ya ima na en ginafut na, en kunna nga nakkahi kan iggina, "O, avva/hanna ma ya kafi ya angngurug mu! Ka-am ta nadduda ka?" 32Kattu nakatakay ran nga dua kan ya barangay, nemmang ya angin ngin. 33Ira nay nga hinnian kan ya barangay, kunda nga naddayarayaw kan iggina, "Kurug nga ikaw ya Anak y Afu Dios!" 34Kattu naddakit da kan ya dakal nga danum ya Galilea, naffundu ra kan ya dappit na kan ya babalay ya Genesaret. 35Ya totolay kan nay nga lugar, kattu nakata ra iggina, nepadumug da kan ya totolay kan ya interu nga lugar ya kasan na kannay, en ne-angay ra ngammin ya makkatakit kan iggina. 36Nakimemallak da kan iggina nga tukkallan da maski laman ya barebay ya sinnun na, en nammapia gafen ngammin ya nakatukkal kan yan.

will be added

X\