Mateo 10

1Inakkulan y Jesus ya mafulu se dua nga disipulo na, en iniddannan na ira kan pakapangngua nga mamappaw kan narakat/napot nga espiritu ira nga minafun kan ya totolay en mappammapia ra kan ngammin nga klase tulahan onu takit da. 2Ira yaw ya gingngahanan ya mafulu se dua nga apostol na; ya unna, y Simon nga nangahanan pay kan Pedro, en y Andres nga wahi na; y Santiago en y Juan nga mawwahi nga anak y Zebedeo; 3ira Felipe, Bartolome, Tomas, Mateo nga minakkolekta kan bienes/vuwit kattun, Santiago nga anak y Alfeo, Tadeo, 4Simon nga Cananeo, en y Judas Iscariote nga mangiyalawat nattaruk kan y Jesus kan ya mangontra ira kan iggina. 5Binon y Jesus ira yan nga mafulu se dua nga disipulo na nga kunna nga nakkahi, "Mari nu umang kan ya totolay nga mari Judio, onu kan ya hanna laman nga babalay kan ya probinsia ya Samaria, 6nu azzi angkayu kan ya Israelita ira nga arig karneru nga nakkawawan. 7Angkayu ipalapalappat kan ira, 'Aranni ngin ya appatul y Afu Dios.' 8Mappammapia kayu kan makkatakit ira; mappaginnolay kayu kan natay ira; mappammapia kayu kan malleproso ira; en mamappaw kayu kan narakat nga espiritu ira nga minafun kan ya totolay. Inalawat nu yan nga pakapangngua nga awan na nga paga; iyusa nu yan pay gafen nga awan na nga paga. 9Mari nu mangivulun kan hanna laman nga kuartu, vulawan, pirak onu tansu kan ya pitaka nu. 10Mari nu pay mangivulun kan pakkargan para kan ya mawag nu kannia annaladalan nu, onu pattallian nu, onu tali ya sandallia nu, onu baston, gafu ta, ya mattrabahu ira, mepangngat nga meddan kan ira ya mawag da. 11"Ya hanna laman nga poblasion onu barrio nga pakakaddetan nu, manaful kayu bitan kan isa nga napia nga tolay, en ya balay na yan nga tolay laman ya pakipaddianan nu addet kannia appanaw nu kan yan nga lugar. 12So nu tumallung kayu kan ya isa nga balay, kunnu kan ya totolay kannay, 'Pare zinan ta hinnian/asan imamak kan ikayu.' 13Nu alaban da kayu, maddian kan ira ya imamak nga kinahi nu kan ira. Ngam nu mari ra alaban ikayu, manoli kan ikayu ya imamak nga kinahi nu kan ira. 14Nu hinnian tolay onu babalay nga mari mangalaba kan ikayu, en nu mari ra ginan ya ituldu nu, kannia appanaw nu kan nay nga balay onu babalay, tattakan nu ya gahuk kan ya taka nu. 15Kurug ya kayan ku kan ikayu, nattaruk kan ya algaw nga ammanunut y Afu Dios kan ya totolay, mas nadammat peba ya ammanunut na kan ya totolay kan yan nga babalay annek/ngam kan ya ammanunut na kan ya totolay kan ya narakat nga siudad ya Sodoma en ya siudad ya Gomorra nga zinaral na kattun." 16"Yaw ya panonotan nu. Ikayu nga disipulok, megitta kan nasimpat nga karneru. Ya totolay nga pabbonan ku kan ikayu, megitta kan naporay nga tanam/tanang nga atu. Gaggafen, mawag kan masirib kayu nga megitta kan ziriyan, en nasimpat nga megitta pay kan paloma. 17Mappalan/Memuhud kayu kan ya totolay gafu ta hinnian dudduma/karruan nga mangidemanda kan ikayu nattaruk kan husgadu, en hinnian dudduma pay nga mallatigu kan ikayu kan ya unag ya sinagoga ra ira. 18Me-atubang kayu nattaruk kan ya gubernador en patul ira megafu kan ya angngurug nu kan yakan, en yan ya tiansa nun nga mangipakammu kan me-annung kan yakan kan ya paratubangan da en ya totolay nga mari Judio pay. 19So nu iyalawat da kayu nga mapanunutan, mari nu kavurungan nu hanna ya kayan nu onu nu annianna/kunnasi/manna ya aggergo nu, gafu ta kan yan nga orat, ikkua/ippay y Afu kan ya ginnonotan nu ya kayan nu, 20gafu ta bakkan kan ikayu ya paggafanan ya kayan nu, nu azzi kan ya Espiritu Santo nga maggafu kan y Ama nu. 21"Hinnian nattaruk totolay nga iyalawat da ya wawwahi ra pe laman tase ipapatay ra, en kunna tian pay ya kuan ya dudduma nga ama nattaruk kan ya gi-anakan da. Hinnian pay totolay nga marrebelde nattaruk kan ya gimmanakan da, en ipapatay ra ira. 22Ngammin ya totolay, ikalussaw ra kayu megafu kan ya angngurug nu kan yakan, ngam ya innia laman nga makakattam addet kan ya panumpalan, mapalliad. 23Nu pazapaziyatan da kayu kan isa nga babalay, malit kayu kan tanakkuan nga babalay, gafu ta kurug ya kayan ku kan ikayu, mari nu me-addet ya napia nga dumug kan ngammin nga babalay kan ya nasion ya Israel kallie ya annolik nga Anak Tolay. 24"Awan nga maggilammu nga mas atanang ya kekuentan na annek kan ya mestru na, en awan nga kohung nga mas atanang ya kekuentan na annek kan ya paki-afuan na. 25Kontento zinan ya maggilammu nga megitta kan ya mestru na, en ya kohung pay nga megitta kan ya paki-afuan na. Nu kayan ya totolay nga y Beelzebub ya panakallan kan ya isa nga balay, yammanno kan ya kabbalay na ira, azzi mas paraparakattan da." 26"Gaggafen, mari nu mattalaw kan totolay, gafu ta awan nga matakkuban kan sangaw nga mari mavukatan nattaruk, en awan nga mesussuk kan sangaw nga mari mammuan nattaruk. 27Ya kayan ku kan ikayu kan sekreto, kayan nu nattaruk kan ya paratubangan ya totolay; en ya nagina nu nga ne-ananabid, ipalapalappat nu nattaruk kan ya utun ya atap ya gibbalayan. 28Mari nu italaw ya totolay nga mamatay kan baggi, ngam mari ra mamba mapatay ya karallua. Ngam italaw nu zinan ya makapatay kan baggi en karallua pay kan infiernu. 29Mari kazze/pano malaku ya dua nga zinnat kan bissang/bissut nga kantidad? Maski nu kunna tian, ni isa kan ira nga matay nga mari uray y Ama nu. 30Maski peba ya bilang ya ahuk nu, ammu na ngammin. 31Gaggafen, mari nu mattalaw gafu ta kan iggina, mas nangina kayu annek kan ya napakaru nga zinnat." 32"Ya innia laman nga mangikahi kan ya angngurug na kan yakan kan ya paratubangan ya totolay, kunna tian pay ya kuan ku nattaruk kan iggina kan ya atubang y Amak nga hinnian kan langit. 33Ngam ya innia laman nga mangilimad kan ya angngurug na kan yakan kan ya paratubangan ya totolay, kunna tian pay ya kuan ku nattaruk kan iggina kan ya atubang y Amak nga hinnian kan langit." 34"Mari nu zinan abbattan kan minang nak kan ya utun lusak nga mangiyangay kan imamak. Bakkan kan imamak ya ne-angek nu azzi ispada? 35Megafu kan ya nepaggangek kan ya utun lusak, hinnian lallaki nga manuriya kan ya gi-aman da, en hinnian babbay nga manuriya kan ya gi-inan da, en hinnian babbay nga manuriya kan ya gikkatuanganan da nga babbay, 36en ya kabbalay ira ya isa nga tolay, mabbalin kan kontra na. 37"Ya innia laman nga mas ayatan na ya ama na onu ya ina na annek kan yakan, mari na mepangngat nga mabbalin kan disipulok. En ya innia laman nga mas ayatan na ya anak na nga lalaki onu babay annek kan yakan, mari na pay mepangngat nga mabbalin kan disipulok. 38Ya innia laman nga mari na kattuan ya kurut na pe laman en mari na me-evulun kan yakan, mari na pay mepangngat nga mabbalin kan disipulok. 39Ya innia laman nga makkakenga kan ya angat na, mapawan na nattaruk, en ya innia laman nga mapawan na ya angat na megafu kan ya angngurug na kan yakan, matafulan na." 40"Ya innia laman nga mangalaba kan ikayu, kuenta alaban nak pay. En ya mangalaba kan yakan, kuenta alaban na pay ya nabbon kan yakan. 41Ya innia laman nga mangalaba kan profeta gafu ta profeta ya alaban na, mangalawat iggina pay kan premio nga megitta kan ya premio nga meddan kan ya profeta. En ya innia laman nga mangalaba kan natunung nga tolay gafu ta natunung ya alaban na, mangalawat iggina pay kan premio nga megitta kan ya premio nga meddan kan ya natunung nga tolay. 42Ya innia laman nga mangiddan kan maski tangabasu laman nga nalammin nga danum kan ya innia laman kan ira yaw nga alinak ya kekuentan da, en kuan na yan gafu ta disipulok iggina, kurug ya kayan ku kan ikayu, siguradu, alawatan na nattaruk ya premio na."

will be added

X\