Marcos 8

1Missa kan ira yan nga algaw, napakaru ya totolay manin nga narammung kan ya dian y Jesus. Awan nga kanan dan. Inakkulan na ya disipulo na ira, en kunna nga nakkahi, 2"Ikakkallak ku ya totolay, gafu ta hinnian/asan da kan yakan kan tallu algaw ngin, en awan nga kanan dan. 3Nu palabbetan ku ira gafen kan ya gibbalayan da nga mabisin, makkafakafi ra en mattomba ra kan ya dalan, gafu ta hinnian dudduma/karruan kan ira nga naggafu kan arayyu." 4Kunda nga siminabbag ya disipulo na ira nga namovut kan iggina, "Awan nga gibbalayan mamba kan yaw nga lugar. Be tiaw ya pangalakan tera gafen kan ipakan tera kan ira yaw nga napakaru nga totolay?" 5Kunna nga namovut, "Pia kazze/pano ya pan nga hinnian kan ikayu?" Kunda nga netabbag, "Pitu." 6Sangaw, pinattuttud y Jesus ya totolay kan ya lusak. Inalak na ya pitu nga pan, nappabalat iggina kan y Afu Dios, ginaddagaddua na, en nesigisige na nga neddan kan ya disipulo na ira tase itaned/iyantet da kan ya totolay ira. Sangaw, netanataned da. 7Hinnian pay pia nga aggat nga bibbisang/bibbisut nga manangat/isira. Nappabalat iggina manin kan y Afu Dios, en neddan na kan ya disipulo na ira, en netanataned da kan ya totolay. 8Nangan da addet zi nabattug da. Pinagampat/Inampat ya disipulo na ira ya vuna ra, en pitu nga basket ya pinannu ra kan ya sobra ra nga nangan. 9Mappattarivu ya totolay ira nga nangan. Sangaw, pinalabbet y Jesus ira. 10Nerame nattakay y Jesus en ya disipulo na ira kan ya barangay, en naddakit da nga naffundu kan ya lugar nga nangahanan kan Dalmanuta. 11Hinnian dudduma nga Fariseo nga minang nakiddiskusion kan y Jesus. Ikayat da nga purban iggina. Kinahi ra gafen nga ikayat da nga mangipasingan iggina kan ira kan milagro nga maggafu ya pakapangngua na kan langit. 12Nangangat iggina kan dakal, en kunna nga nakkahi, "Ya totolay nga matolay kan sangaw, ka-am ta ikayat da ya makasingan kan milagro? Kurug ya kayan ku kan ikayu, awan nga milagro nga mepasingan kan ya totolay nga matolay kan sangaw." 13Sangaw, pinanawan da Jesus ira, en nattakay ra kan ya isa nga barangay manin, tase maddakit da kan ya tangapingit ya dakal nga danum ya Galilea. 14Ya disipulo na ira, nalippanan da ya mangivulun kan pan. Isissa laman ya pan nga hinnian kan ira kan ya barangay. 15Kunna y Jesus nga nakkahi, "Ginan dak! Mappalan/Memuhud kayu kan ya lebadura ya Fariseo ira en ya lebadura y Herodes." 16Nerergowan ya disipulo na ira ya kinahi y Jesus kan ira nga kunda, "Awan nga pan nga nevulun tera. Siguru, yan ya gafu na kan kinahi na yan kan ittera." 17Ngam ammu y Jesus ya nerergowan da, en kunna nga namovut, "Ka-am ta perergowan nu ya kawan pan kan ikayu? Mari nu kazze peba malippawat onu mantindian? Kuru nakafi kazze ya appanonotan nu? 18Hinnian mata nu, ngam mari nu kazze makasingan? Hinnian daranggang/talinga nu, ngam mari nu kazze makagina? Mari nu kazze kerandamman ira yaw nga kiningnguak? 19Kattu ginaddagadduak tu lima nga pan, en nepetanataned ku kan ya mallimarivu nga lallaki, pia nga basket ya pinannu nu kan ya sobra nga pinagampat nu kabalin da nga nangan?" Kunda nga siminabbag, "Mafulu se dua." 20Kunna nga namovut manin, "Kattu ginaddagadduak tu pitu nga pan nga nepepakan ku kan ya mappattarivu nga totolay, pia nga basket ya pinannu nu kan ya sobra nga pinagampat nu kabalin da nga nangan?" Kunda nga siminabbag, "Pitu." 21Kunna nga namovut, "Mari nu kazze peba mantindian?" 22Kattu nakakaddet da Jesus kan ya poblasion ya Betsaida, hinnian totolay nga vulaw nga ne-angay ya dudduma nga totolay kan iggina, en nakimemallak da kan tukkallan y Jesus laman iggina. 23Sangaw, kinebit na ya vulaw, en nelawan na iggina kan ya poblasion. Linusaban na ya dua nga mata na, en nepotun na pay ya ima na kan iggina. Kunna nga namovut, "Makasingan ka kazze?" 24Nalladdang iggina, en kunna nga siminabbag, "On! Makasingan nak kan totolay, ngam megitta ya kasinnan da kan kayakayu nga manalan." 25Nepotun y Jesus gafen manin ya ima na kan ya mata na. Nalladdang ya vulaw kan napia, en nanoli ya negagangay nga anningan na kan ngammin. 26Pinalabbet y Jesus iggina, en kinahi na nga mari na massibal/maddahat kan yan nga babalay. 27Nassige y Jesus en ya disipulo na ira nga minang kan ya barrio ira nga aranni kan ya poblasion ya Cesarea Filipos. Kannia annaladalan da, kunna nga namovut kan ya disipulo na ira, "Hanna ya kayan ya totolay ira kan me-annung kan yakan?" 28Kunda nga siminabbag, "Hinnian dudduma kan ira nga makkahi nga ikaw kanu y Juan nga Minabbawtiso. Hinnian dudduma nga makkahi nga ikaw kanu y Elias. Hinnian dudduma pay nga makkahi nga isa ka kanu kan ya profeta ira nga natolay kattun." 29Y Jesus, kunna nga namovut, "Ngam hanna ya pangabbattan nu kan me-annung kan yakan?" Kunna y Pedro nga siminabbag, "Ikaw ya Cristo." 30Sangaw, nemandu y Jesus kan ya disipulo na ira kan napia nga awan vulvua/pulus pakkayanan da kan ya me-annung kan iggina. 31Sangaw, pinegafanan y Jesus nga netuldu kan ya disipulo na ira nga, iggina nga Anak Tolay, mawag kan matattam nattaruk kan aru nga kapazapaziyat, en ya panakallan nga lalakay ira, ya panakallan ira kan ya papari en ya mestru ira kan ya dorob, pamammari ra iggina, en ipapatay ra iggina, ngam kabalin ya tallu algaw, magginnolay iggina balalaman. 32Kinahi na yan kan manamanawag. Sangaw, ne-arayyu y Pedro y Jesus kan bissang/bissut tase ira laman, en nevuya na iggina. 33Ngam nabbira y Jesus, en nasingan na ya disipulo na ira, en nevuya na y Pedro nga kunna, "Satanas, panawan nak; bakkan kan ya uray y Afu Dios ya palappanonotan mu mamba nu azzi ya ikayat ya totolay." 34Sangaw, inammung y Jesus ya totolay en ya disipulo na ira, en kunna nga nakkahi, "Ya innia laman nga mayat nga me-evulun kan yakan, mawag kan panawan na ya ganagannud nga ikayat ya baggi na, en kattuan na ya kurut na pe laman, en vuluvulunan nak. 35Kayan ku yaw gafu ta, ya innia laman nga makkakenga kan ya angat na, mapawan na. Ngam ya innia laman nga mapawan na ya angat na megafu kan yakan en ya angngikahi na kan ya napia nga dumug, palliaran na ya angat na pe laman. 36Hanna ya serbi na kan ya innia laman nga tolay nu matagikukua na ya interu mundo ngam mapawan na mamba ya angat na kan panguzzanan? Awan! Inutil! 37Hanna ya meddan ya innia laman nga tolay tase meddannan iggina kan angat? 38Ya innia laman nga mangipasiran kan yakan en ya ergok ira kan ya paratubangan ya totolay nga matolay kan sangaw nga minalliwat en awan da nga angngurug, yakan nga Anak Tolay, ipasiran ku iggina pay nattaruk nu manoli nak kan ya utun lusak nga vulunan ya nasantuan nga anghel ira, en hinnian kan yakan ya gloria y Amak."

will be added

X\