Marcos 4

1Namegafu manin y Jesus nga nattuldu kan ya dappit ya dakal nga danum ya Galilea. Megafu kan ya karu ya totolay nga narammung kan ya dian na, nattakay iggina kan ya isa nga barangay nga hinnian/asan kan ya danum, en nanuttud iggina. Hinnian ngammin ya totolay kan ya dappit. 2Aru ya netuldu na kan ira kan pangngarrian. Kannia attuldu na, kunna nga nakkahi, 3"Ginan dak! Hinnian kusettieru nga minang nangiwarak kan bini kan ya koman na. 4Kannia iggina nga mangiwarak kan bini kan ya koman na, hinnian dudduma/karruan nga bini nga napakanna nga newarak kan ya daddalanan. Minang ya mammanuk ira, en kinnan da. 5Hinnian pay dudduma nga bini nga napakanna nga newarak kan ya kabatuan nga bissang/bissut ya lusak na. Nallian ya nepattuhu ra gafu ta ababbaw ya lusak. 6Ngam kattu nassinag, nallelelay en nakkakatay ra gafu ta mari ra nakapaggamut kan napia gafu ta nempit ya lusak nga nattuhuan da kan ya utun ya batu. 7Hinnian pay dudduma nga bini nga napakanna nga newarak kan ya kasitan, en kattu ziminakal ya asit ira, inayyungan da ya mula ira, en mari ra gafen navvunga. 8Ngam ya bini nga newarak kan ya napia nga lusak, napinipia ya nepattuhutuhu ra, ya nepaddawa ra, en ya nepavvunga ra. Navvunga ya dudduma kan taggitallufulu kan kada fun, ya dudduma kan taggi-annammafulu kan kada fun, en ya dudduma kan taggimatut kan kada fun." 9Y Jesus, kunna nga nakkahi, "Nu ikayat nu nga mantindian, panonotan nu gafen kan napia ya kinahik kan ikayu." 10Kattu mesissa y Jesus ngin, minang kan iggina ya mafulu se dua nga disipulo na ira en ya dudduma peba nga totolay. Nekiddaw ra kan iggina nga ipakanawag na ya kebalinan ya pangngarrian nga bahu kinahi na kan ira. 11Kunna y Jesus nga nakkahi kan ira, "Neddan kan ikayu ya pakakammu nu kan ya sekreto nga me-annung kan ya appatul y Afu Dios. Ngam kan ya dudduma nga totolay, makahi ngammin ya ganagannud kan pangngarrian en istoria laman nga katumpalan ya neturak ya isa nga profeta kattun, 12'Maski aggasinnan da, mari ra kuru masingan, maski aggaginan da, mari ra kuru magina, en mari ra mantindian. Mesimmu yan gafu ta, nu mari ra kunna tian zinan, manoli ra kan yakan tase pakoman ku ira.' " 13Sangaw, pinovutan y Jesus, "Mari nu kazze/pano mantindian yan nga pangngarrian? Annianna/Kunnasi/Manna ya pakantindi nu kan maski hanna laman nga pangngarrian nga kayan ku kan ikayu? 14Kunna tiaw ya kebalinan ya pangngarrian ku. Ya angngipalappat ya tolay kan ya ergo y Afu Dios kan ya totolay, yan ya kegittan ya angngiwarak ya kusettieru kan bini. 15"Ya daddalanan nga napakannan ya dudduma nga bini, yan ya kegittan ya totolay nga makagina kan ya ergo y Afu, ngam insigida umang azzan y Satanas ya ergo nga nagina ra kan kagitta ya annuttuk ya mammanuk ira kan ya bini nga napakanna kan ya daddalanan. 16"Ya kabatuan nga lusak nga napakannan ya dudduma nga bini, yan ya kegittan ya totolay nga makagina kan ya ergo y Afu, insigida alawatan da nga siggapayayat. 17Ngam mari na kuru mapagamut kan ya giffutuan da, en mari ra gafen mannayun. So nu hinnian kapazapaziyat onu katattazzi nga lumabbet kan ira megafu kan ya angngurug da kan ya ergo y Afu Dios, insigida likuran da ya angngurug da. 18"Ya kasitan nga napakannan ya dudduma nga bini, yan ya kegittan ya totolay nga makagina kan ya ergo y Afu, 19ngam hinnian peba tumallung kan ya giffutuan da, ya avvuruvurung da kan ya nemundowan nga attolay, ya angngayat da kan kukua ira en ya angngayat da kan dudduma nga ganagannud. Ira yaw nga ganagannud, gurunan da ya ergo kan kagitta ya angngayyung ya asit ira kan ya mula ira. Yan ya gafu na kan awan nga vunga ra. 20"Ya napia nga lusak nga newarakan ya dudduma nga bini, yan ya kegittan ya totolay nga makagina en mangalawat kan ya ergo y Afu, en mavvunga ra kan mamin tallufulu, onu maming annammafulu onu mamim matut." 21Kunna y Jesus peba nga nakkahi, "Awayya na kazze nga masibattan ya isa nga allamparan en matakkuban kan baldi onu mekkua/meppay kan gannung kattri? Awan! Ngam mekkua pe laman kan ya gagangay nga aggipotunan. 22Awan nga nesussuk kan sangaw nga mari mammuan nattaruk, en awan nga natakkuban kan sangaw nga mari mavukatan nattaruk. 23Nu ikayat nu nga mantindian, ginan nu gafen kan napia ya kayan ku kan ikayu." 24Nassige iggina peba nga kunna nga nakkahi, "Panonotan nu ya itulduk kan napia, gafu ta, ya karu ya iddan nu, yan pe laman ya malawat nu, en mas aru peba ya meddan kan ikayu. 25Kayan ku yaw gafu ta, ya tolay nga hinnian na, mamungan peba ya hinnian kan iggina. Ngam ya tolay nga awan na, malak peba ya maski bissang nga hinnian kan iggina." 26Kunna peba nga nakkahi, "Ya appatul y Afu Dios, megitta kan ya mesimmu nu mangiwarak ya isa nga tolay kan bini kan ya koman na. 27Kabalin na, makkaturug iggina kan kada gabi, en gumangun iggina kan kada mataruk. Mattutuhu ya vukal ira, en dumakal da, ngam mari na ammu nu annianna ya kesimmu na. 28Mesimmu yan gafu ta ya lusak pe laman ya mangngua kan ira yan. Kan unna, mattuhu. Sangaw, dumakal, maddawa en mammayan. 29So nu mataggat ngin ya vunga na ira, umang na apitan ngin, gafu ta lumabbet ya tiempo ran nga ma-apit." 30Kunna peba y Jesus nga nakkahi, "Hanna ya pangngarrian tera kan ya appatul y Afu Dios? Onu hanna ya usan tera nga pangngarrian tase mepakanawag ya appatul na? Yaw ya pangngarrian nga kayan ku kan ikayu. 31Megitta ya appatul na kan vukal mustasa nga kabissangngan kan ngammin nga vukal kan ya utun lusak. 32Nu memula, mattuhu, dumakal, en mabbalin kan isa pay kan ya kadakallan kan ngammin nga mula. Mappangapanga kan daddakal, en awayya na nga mattuhut/massubut ya mammanuk ira kannay." 33Nangiyusa iggina kan aru peba nga kunna tian nga pangngarrian kannia attuldu na kan ira segun kan ya awayya ra nga mantindian. 34Pangngarrian en istoria laman ya ne-usa na kannia nepattuldu na kan ya totolay. Ngam nu y Jesus laman en ya disipulo na ira, nepakanawag na ngammin kan ira. 35Kan yan nga algaw, kattu maggabi ngin, kunna nga nakkahi y Jesus kan ya disipulo na ira, "Maddakit tera kan ya tangapingit ya dakal nga danum." 36Pinanawan da gafen ya napakaru nga totolay kan ya dappit, en minang da nevulun nga nakipattakay kan y Jesus kan ya barangay. Hinnian pay dudduma nga nabbarangay nga nevulun kan ira. 37Mari nabbayag, nabbayabbag kan nasikan, nasukkayan/nasikkuayan ya barangay kan ya daddakal nga palapalung, en mapannu ngin ya barangay kan danum. 38Ngam hinnian y Jesus kan ya likud ya barangay, en naffungan nga aggakaturug iggina. Linukag da nga kunda nga nakkahi kan iggina, "Mestru, ituluk mu kazze nga makkalimat teran?" 39Sangaw, nalukag iggina, en nemandu na nga memmang ya angin, en kunna nga nakkahi kan ya danum, "Memparak kan! Memamak kan!" Insigida nemmang ya angin, en nakkalma ya danum. 40Kunna nga namovut kan ya disipulo na ira, "Ka-am ta mattalaw kayu? Awan kazze angngurug nu?" 41Sangaw, nelot/nafulotan ya talaw ra, en kunda nga nakkaporovut, "Hanna pano yaw nga tolay? Maski ya angin en ya danum, parulotan da iggina."

will be added

X\