Marcos 2

1Nappasa kan pia nga algaw, nattoli ra Jesus kan ya poblasion ya Capernaum. Nepadumug nga hinnian/asan iggina kan ya balay ra. 2Gafu ta hinnian iggina kannay, napakaru ya totolay nga minang narammung kan ya dian na, en awan ngin nga lugar maski kan ya aranni kan ya puerta. Kattu paddaggunan na nga ipalappat ya ergo y Afu Dios kan ira, 3hinnian appat nga lallaki nga luminabbet nga nangakkat kan ya isa nga paralitiko nga ne-angay ra kan y Jesus. 4Ngam mari ra me-aranni iggina kan y Jesus megafu kan ya karu ya totolay. Ne-unek da iggina gafen kan ya utun ya atap ya balay, en inavvutan/inabbutan da ya atap kan ya gannung y Jesus. Kattu navvutan dan ya atap, zinittag da ya paralitiko nga agga-idda kan ya doyan na. 5Kattu nasingan y Jesus ya sikan ya angngurug da, kunna nga nakkahi kan ya paralitiko, "Anak, napakoma ya liwaliwat mun." 6Hinnian pay dudduma/karruan nga mestru kan ya dorob nga aggatuttud kannay. Pinalappanonot da, 7"Ka-am ta kunna tian ya kayan yan nga tolay? Yan nga kinahi na, mekontra kan y Afu Dios. Innia ya makapakoma kan ya liwaliwat nu azzi y Afu Dios laman?" 8Ngam ammu y Jesus ya hinnian kan ya ginnonotan da, en kunna nga namovut, "Ka-am ta kunna tian ya napanonot nu? 9Hanna ya mas nalohon nga makahi kan ya paralitiko, 'Napakoma ya liwaliwat mun,' onu, 'Gumangun kan, alakan mu ya doyan mun, en manalan kan.'? 10Ngam hinnian kuan ku tase mammuan nu nga yakan nga Anak Tolay, hinnian paka-awayyak nga mamakoma kan liwaliwat kan ya utun lusak." Sangaw, kunna nga nakkahi kan ya paralitiko, 11"Kayan ku kan ikaw, gumangun kan, alakan mu ya doyan mun, en lumabbet kan." 12Nerame na guminangun, inalak na ya doyan nan, en napanaw igginan kan ya paratubangan da ngammin. Nappabbaw ra ngammin, en kunda nga naddayarayaw kan y Afu Dios, "Sangaw peba laman ya nepakasingan tera kan kunna tian!" 13Nattoli y Jesus manin kan ya dappit ya dakal nga danum ya Galilea. Minang ya aru nga totolay kan iggina, en sinulduan na ira. 14Kabalin ya nepattuldu na kan ira, kannia annalan na, nasingan na ya isa nga minakkolekta kan bienes/vuwit nga mangngahan kan Levi nga anak y Alfeo. Aggatuttud iggina kan ya ofisina na. Kunna y Jesus nga nakkahi, "Mevulun ka kan yakan." Nerame luminakkat y Levi en nevulun kan y Jesus. 15Kannia akkipangan da Jesus kan ya balay ra Levi, aru ya minakkolekta kan bienes en minalliwat ira nga minang nakipangan pay kan ira Jesus en ya disipulo na ira, gafu ta aru ya ne-evulun kan iggina. 16Hinnian pay Fariseo ira nga mestru kan ya dorob kannay. Kattu nasingan da nga makipangan y Jesus kan minalliwat ira en kan minakkolekta ira kan bienes, pinovutan da kan ya disipulo na ira, "Ka-am ta makipangan kayu kan minakkolekta ira kan bienes en kan minalliwat ira?" 17Nagina y Jesus yan, en kunna nga siminabbag kan ira, "Ya totolay nga napia ya gawagawayan da, mari ra mawag ya minangnguru. Bakkan kan ira nu azzi laman ya makkatakit ira ya makakawag kan minangnguru. Ya inangayan ku kan yaw nga mundo, mari na kan makkul kan ya natunung ira nga totolay nu azzi ya minalliwat ira." 18Kattu maddaggun nga mayuno ya disipulo ira y Juan nga Minabbawtiso en ya Fariseo ira, hinnian dudduma nga totolay nga minang kan y Jesus nga kunda nga namovut kan iggina, "Ka-am ta ya disipulo ira y Juan en ya disipulo ira ya Fariseo ira, maya-ayuno ra, ngam ya disipulom ira, mari ra mayuno?" 19Y Jesus, kunna nga siminabbag nga namovut, "Awayya na kazze/pano nga mayuno ya kakavulun ya nobio kan ya boda nu hinnian iggina peba kan ira? Awan! Nu hinnian peba ya nobio kan ira, mari ra awayya mayuno. 20Ngam lumabbet nattaruk ya algaw nga kepanaw ya nobio kan ira, en yan ngin ya aggayuno ra. 21"Awan nga tolay nga mangiyappit kan bahu nga girit tela kan ya dana nga sinnun, gafu ta, nu kuan na yan, makkarangkan ya bahu nga appit, en mas pissangan na ya dana nga sinnun. 22Awan pay tolay nga mangiluwan kan bahu nga daggat vunga ubas kan ya dana nga gaddang nga alluwanan ira, gafu ta, nu kuan na yan, battakan ya daggat ya gaddang ira, en madaral ya daggat en ya gaddang ira, nu azzi meluwan ya bahu nga daggat kan bahu nga gaddang pe laman." 23Kan isa nga algaw nga angngilinan ya Judio ira, nanaladalan da Jesus kan ya katriguan. Kannia annaladalan da, namegafu ya disipulo na ira nga narutut kan nataggatan nga dawa ya trigu. 24Hinnian dudduma nga Fariseo nga nakasingan kan ira nga kunda nga nakkahi kan y Jesus, "Innan mu ya disipulom ira! Ka-am ta kuan da ya megamma kan ya dorob tera nga makua kan algaw nga angngilinan tera?" 25Kunna y Jesus nga siminabbag, "Mari nu kazze nabibbid ya kiningngua ra David kattun kattu nabisin iggina en ya kakavulun na? 26Siminallung iggina kan ya balay y Afu Dios, nangan iggina kan ya pan nga ne-ofresi/nededika kan y Afu Dios, en iniddannan na pay ya kakavulun na. Segun kan ya dorob tera, ya papari laman ya hinnian paka-awayya ra nga mangan kan yan nga pan. Nesimmu yan kattu tiempo y Abiatar nga pari nga katanangan ya kekuentan na." 27Sangaw, kunna y Jesus peba nga nakkahi, "Sinunnak y Afu Dios ya algaw nga angngilinan para kan ya pammakapianan ya totolay ira, mari na kan para kan ya pammakapianan ya algaw nga angngilinan ya nepammaratu na kan ya totolay ira. 28Yakan nga Anak Tolay gafen ya Afu maski peba ya algaw nga angngilinan."

will be added

X\