Marcos 16

1Kabalin ya algaw nga angngilinan ya Judio ira, ira Maria Magdalena, Salome, en y Maria nga ina y Santiago, guminatang da kan pabangug nga pamalsamu ra, tase umang da iyaffuriyat kan ya baggi y Jesus. 2Kan matamataruk Liggu, kalalattuad ya sinag, minang da kan ya netanamman y Jesus. 3Kannia annaladalan da, nakkaporovut da, "Innia pano ya mangarolig kan ya batu nga netallab kan ya attallungan kan ya netanamman na para kan ittera?" 4Kinahi ra yan gafu ta dakadakal ya batu. Kattu nelahiban da, nasingan da nga nakarolig ngin ya batu. 5Siminallung da kan ya unag ya netanamman na, en hinnian/asan bagitolay nga nasingan da nga aggatuttud kan ya ziwanan nga nassinnun kan furaw, en nakatalaw ra. 6Ngam kunna nga nakkahi, "Mari nu mattalaw! Ammuk nga tafulan nu y Jesus nga taga Nazaret nga nepatak kan kurut. Awan iggina kanniaw ngin, gafu ta nagginnolay igginan. Innan nu yaw nga nangikkuayan/nangippayan da kan ya baggi na. 7Angkayu kayan kan ya disipulo na ira, en isipat nu y Pedro, nga monna y Jesus nga umang kan ya probinsia ya Galilea annek/ngam kan ikayu. Masingan nu iggina kannay, gafu ta yan ya kinahi na kan ikayu kattun." 8Nallawan da kan ya netanamman na, en nappaladdiaw ra nga napanaw, gafu ta nalagat en namilpig da. En awan nga nakkayanan da bitan, gafu ta nakatalaw ra. 9Kabalin ya nepagginnolay y Jesus, kan matamataruk Liggu, nappasingan iggina kan unna kan y Maria Magdalena nga namappawan na kattun kan pitu nga narakat/napot nga espiritu. 10Minang kinahi y Maria yan kan ya siggarandam en mattangatangit nga kakavulun y Jesus. 11Kannia nepakagina ra nga nagginnolay y Jesus en nasingan y Maria iggina, mari ra nangurug. 12Kabalin na yan, nappasingan y Jesus kan ya dua nga disipulo na nga manaladalan nga umang kan barrio nga tanakkuan ya kasinnan na. 13Nanoli ra nga dua en minang da kinahi yan kan ya kakavulun da nga disipulo na, ngam mari ra nangurug kan ira manin. 14Sangaw, nappasingan iggina manin kan ya mafulu se isa nga disipulo na nga maddaggun nga mangan. Inallangngan y Jesus ira megafu kan ya kawan angngurug da en ya taggat ya ginnonotan da nga mari ra kinurug ya totolay nga nakasingan kan iggina nga nagginnolay. 15Kunna nga nakkahi kan ira, "Angkayu kan ya interu mundo, en ipalapalappat nu ya napia nga dumug kan ngammin nga totolay. 16Ya innia laman nga mangurug en mabawtisowan, mapalliad, ngam ya mari mangurug, makastigo nattaruk. 17Ira yaw ya milagro nga makua nattaruk ya mangurug ira kan yakan: Megafu kan ya ngahan ku, mamappaw ra kan narakat nga espiritu ira kan ya totolay nga inafunan da, en mergo ra kan perergo ira nga mari ra peba ginilammu. 18Nu makatammit da kan nazzita nga ziriyan, onu nu makakenum da kan tamay, awan nga mesimmu kan ira. Nu ipotun da ya gi-iman da kan ya makkatakit ira, mammapia ra." 19Kabalin y Afu Jesus nga nakiergo kan ya disipulo na ira, minutun iggina kan langit, en nanuttud iggina kan ya ziwanan y Afu Dios. 20Minang ya disipulo na ira nga nangipalapalappat kan ya napia nga dumug kan ngammin nga lugar ira. Nakipanguffun y Afu Jesus kan ira nga pinakurug na ya nepalapalappat da megafu kan ya milagro ira nga nepakapakua na kan ira.

will be added

X\