Marcos 15

1Kattu mammataruk ngin, ya panakallan ira kan ya papari, ya panakallan nga lalakay ira, ya mestru ira kan ya dorob, en ngammin ya miembro kan ya konseho ya Judio ira, nerergowan da ya kuan da kan y Jesus. Nepabalud da iggina, en nepanaw ra iggina kannay en ne-angay ra kan y Pilato. 2Kunna y Pilato nga namovut kan y Jesus, "Ikaw kazze/pano ya patul ya Judio ira?" Kunna nga siminabbag y Jesus, "Nakahi mun." 3Aru ya nangakusan ya panakallan ira kan ya papari kan y Jesus. 4Kunna nga namovut manin y Pilato, "Marim kazze matabbag ira yan? O, innan mu ya karu ya pangakusan da kan ikaw!" 5Ngam awan ngin nga netabbag y Jesus, en nalagat y Pilato. 6Kada dahun, kan ya Fiesta ya Nepattalebad, aggangngua y Pilato nga manuelta kan isa nga presu nga ikiddaw ya totolay. 7Hinnian/Asan tolay nga mangngahan kan Barabas nga nekarsel en ya kakavulun na gafu ta narrebelde ra kan ya gubiernu, en namatay ra kan tolay. 8Sangaw, minaranni ya totolay kan y Pilato, en nekiddaw ra kan iggina nga kuan na ya megitta kan ya aggangngua na para kan ira. 9Kunna nga namovut y Pilato kan ira, "Ikayat nu kazze nga sueltan ku y Jesus nga Patul nu nga Judio para kan ikayu?" 10Pinovutan na yan kan ya totolay gafu ta ammu na nga, ya panakallan ira kan ya papari, ne-angay ra y Jesus kan iggina megafu kan ya passil da. 11Ngam ya panakallan ira kan ya papari, binensi ra ya totolay nga ikiddaw ra kan y Pilato nga sueltan na y Barabas imbes kan y Jesus. 12Kunna nga namovut y Pilato manin, "Hanna ya ikayat nu nga kuan ku kan yaw nga tolay nga kayan nu nga Patul nu nga Judio?" 13Kunda nga nangikarriaw, "Ipepatak mu iggina kan kurut!" 14Ngam kunna y Pilato nga namovut, "Ka-am? Hanna kazze ya narakat/napot nga kiningngua na?" Ngam mas kunda nga nangikakkarriaw, "Ipepatak mu iggina kan kurut!" 15Sangaw, gafu ta ikayat y Pilato nga pagustuan ya totolay, sinueltan na y Barabas para kan ira, en kabalin ya nepappalatigu na kan y Jesus, nemandu na kan ya suddalu ira nga ipatak da iggina kan kurut. 16Netallung ya suddalu ira y Jesus kan ya palasio ya gubernador, en inakkulan da ngammin ya suddalu ira nga guardia kan ya palasio nga marammung da. 17Sininnunan da iggina kan anaddu nga kulor ubi. Nanalatalapid da kan korona nga nasasit, en nekorona ra kan ya ulu na. 18Sinaludowan da iggina nga kunda, "Diot mi kan ikaw, Patul ya Judio ira!" 19Sinissibatan da ya ulu na kan baston, linusulusaban da iggina, en nappalentud da kan ya atubang na nga arig pammakakua ra kan iggina. 20Kabalin da nga nangaffugete kan iggina, inazzan da ya nesinnun da nga kulor ubi, en uli nesinnun da kan iggina ya sinnun na pe laman. Sangaw, nelawan da iggina kan ya palasio tase iyangay en ipatak da iggina kan kurut. 21Hinnian tolay nga mangngahan kan Simon nga taga siudad ya Cirene nga nadafung da. Iggina ya ama y Alejandro en y Rufo. Naggafu iggina kan barrio nga mappanget kan ya siudad. Finersa ya suddalu ira nga kattuan na ya kurut y Jesus. 22Ne-angay ra y Jesus kan ya lugar nga nangahanan kan Golgota, ya kebalinan na, Lugar ya Baritottok. 23Sangaw, iniddannan da iggina kan daggat vunga ubas nga nakihuan kan uru nga mirra, ngam mari na ininum. 24Sangaw, nepatak ya suddalu ira iggina kan kurut. Nabbirillayan da ya sinnun na ira nga narririfan da nu hanna ya alakan ya kada isa kan ira. 25Alas nuebe ngin kan mataruk kattu nepatak da y Jesus kan kurut. 26Yaw ya pangakusan da kan iggina nga neturak nga nekkua/neppay ra kan ya kurut kan ya utun ya ulu na, YA PATUL YA JUDIO IRA 27Hinnian dua pay nga tulisan nga negindan kan y Jesus nga nepatak kan kurut, ya isa kan ya ziwanan na, en ya isa kan ya zimigi na. 28Yan ya natumpalan ya neturak kan ya Sagrado nga Turak, "Nekuenta ra nga isa iggina kan ya kriminal ira." 29Ya totolay nga nattatalebad kannay, nawwarawarangiwang da, en kunda nga nangaffugete kan iggina, "Ala! Ikaw nga nakkahi nga darallan mu ya templo en patadaggan mu uli kan tallu nga algaw, 30palliaran mu ya baggim pe laman ngin, en mazzittag ka kan ya kurut ngin!" 31Kunna tian pay ya nepangngaffugete ya panakallan ira kan ya papari en ya mestru ira kan ya dorob kan iggina nga kunda nga nerergo, "Pinalliad na kanu ya dudduma/karruan, ngam mari na mapalliad iggina pe laman! 32Iggina kanu ya Cristo nga patul ya Israel; mazzittag iggina zinan kan ya kurut nan, tase masingan tera en mangurug tera!" Ira nay nga negindan kan y Jesus nga nepatak kan kurut, kunna tian pay ya nepangngaffugete ra kan iggina. 33Kan tangnga algaw, nakkokopan/nakkallap ya interu lugar kannay addet kan alas tres kan giram. 34Kan alas tres, kunna y Jesus nga nangikullet, "Eloi, Eloi, lama sabaktani," ya kebalinan na, "Dios ku, Dios ku, ka-am ta pinorrian nak?" 35Ya dudduma nga totolay nga aggatadag kannay, nagina ra iggina nga nakkul, en kunda nga nakkahi, "O! Inakkulan na y Elias!" 36Hinnian tolay nga nappaladdiaw nga minang nangalak kan ispongha nga nedassam na kan nalsam nga daggat vunga ubas. Nekkua na kan ya pansaw ya isa nga takkuel, en negawat na kan ya simuk y Jesus, en nepasappat na kan iggina. Kunna nga nakkahi kan ya kakavulun na, "Mattaron tera! Innan tera nu umang y Elias nga mangizittag kan iggina kan ya kurut." 37Sangaw, nakkarriaw y Jesus kan nasikan, en natay igginan. 38Sangaw, ya kurtina nga aggabesin kan ya unag ya templo, napissang nga naggaddua nga namegafu kan utun addet kan gukab. 39Aggatadag ya kapitan ya suddalu ira kan ya atubang y Jesus, en nasingan na ya nepappatay na. Kunna nga nakkahi, "Kurug nga Anak ya Dios yaw nga tolay!" 40Hinnian pay babbay nga mediu arayyu kannay nga naggiraw. Ya dudduma kan ira yan nga babbay, ira Maria Magdalena, Salome, en y Maria nga ina y Santiago nga uzzan en y Jose. 41Ira yan nga babbay ya ne-evulun en nassesserbi kan ira Jesus namegafu peba kan ya probinsia ya Galilea. Aru peba ya babbay kannay nga nevulun kan iggina kannia nepaggangay na kan Jerusalem. 42Kan gireram kan yan nga algaw nga apprepara ra kan ya algaw nga angngilinan da, 43hinnian tolay nga mangngahan kan Jose nga taga babalay ya Arimatea nga mekakua nga miembro ya konseho, nga nennanama pay kan ya ammegafu ya appatul y Afu Dios. Negutuk/Neturid/Netaggad na ya minang kan y Pilato, en nekiddaw na nga ipamavulun na nga alakan na ya baggi y Jesus. 44Ngam nalagat y Pilato nga natay ngin y Jesus. Nepakkul na gafen ya kapitan ya suddalu ira, en pinovutan na kan iggina nu nabayag nga natay ngin y Jesus. 45Kattu nammuan y Pilato kan ya kapitan nga natay igginan, nepamavulun na kan y Jose nga alakan na ya baggi y Jesus. 46Sangaw, minang y Jose nga guminatang kan lino nga tela. Sangaw, zinittag da ya baggi y Jesus, en vinukkutan da kan yan nga lino, en nekkua ra kan ya attanamman y Jose nga dana nepakokkob na nga sinan kueba kan ya gatab nga batu. Sangaw, nangarolig da kan isa nga dakal nga batu nga netallab da kan ya attallungan kan ya netanamman y Jesus. 47Nasingan y Maria Magdalena en y Maria nga ina y Jose ya nangitanamman da kan ya baggi na.

will be added

X\