Marcos 14

1Dua nga algaw laman ngin kallie ya Fiesta ya Nepattalebad en ya Fiesta ya Pan nga awan na nga Lebadura, ya panakallan ira kan ya papari en ya mestru ira kan ya dorob, pinalappanonot da nu annianna/kunnasi/manna ya angngaresta ra kan y Jesus en ya ammatay ra kan iggina kan sekreto. 2Kunda nga nerergo, "Mari tera kuan yan kan ya tiempo ya fiesta, gafu ta, nu kuan tera yan, maggulu ya totolay." 3Kattu hinnian/asan da Jesus ngin kan ya poblasion ya Betania kan ya balay y Simon nga nalleproso kattun, hinnian babay nga minaranni kan iggina nga nangivulun kan isa nga alabastro nga fraskita nga konsu pabangug nga puro nga nardo nga nanginingina. Kinaltung na ya pansaw ya fraskita, en nevurud na ya pabangug kan ya ulu y Jesus kannia iggina nga maddaggun nga mangan. 4Hinnian dudduma/karruan nga totolay nga nallussaw kan ya kiningngua na, en kunda nga nerergo, "O, kenga laman! Ka-am ta zinaral na laman yan nga pabangug? 5Awayya na nga nalaku zinan yan nga pabangug kan aru nga kuartu, en meddan ya kalakuan na kan ya pobre ira." En nevuya ra iggina kan ya kiningngua na. 6Ngam kunna nga nakkahi y Jesus, "Ka-am ta nevuya nu iggina? Porrian nu iggina. Nakasta mamba ya kiningngua na kan yakan. 7Kanakanayun nga hinnian pobre ira kan ikayu, en maski hanna nga orat nga ikayat nu, awayya nu nga uffunan ira, ngam mari kanayun ya kasan ku kan ikayu. 8Kiningngua ya babay ya panda mawayya na. Vinururan na ya baggik nga pangiparan na kan ya ketanam ku kallie ya appatek. 9Kurug ya kayan ku kan ikayu, maski kanna be tiaw nga lugar kan ya interu mundo nga kepalappatan ya napia nga dumug, makahi pay kannay ya kiningngua yaw nga babay kan panandamman kan iggina." 10Sangaw, y Judas Iscariote nga isa kan ya mafulu se dua nga disipulo y Jesus, minang kan ya panakallan ira kan ya papari tase makittaratu kan ira me-annung kan ya angngiyalawat na kan y Jesus kan ira. 11Kannia nepakagina ra kan ya kinahi na, nayayat da, en netabba ra nga pagan da iggina kan kuartu. Sangaw, nanafataful iggina kan napia nga tiansa na nga mangiyalawat kan y Jesus kan ira. 12Kan ya unna nga algaw nga angngan ya Judio ira kan pan nga awan na nga lebadura, namarti ra kan mabbing nga karneru para kan ya Fiesta ya Nepattalebad. Pinovutan ya disipulo ira y Jesus kan iggina, "Kanna be tiaw ya ikayat mu nga pamaranan mi kan ya kanan tera kan ya Fiesta ya Nepattalebad?" 13Nabbon iggina kan dua kan ya disipulo na ira, en kunna nga nakkahi, "Angkayu kan ya siudad ya Jerusalem. Hinnian tolay nga madafung nu nga aggakattu kan tanga-angang nga danum. Vulunan nu iggina, 14en maski kanna be tiaw nga pattallungan na, kayan nu kan ya makabbalay kan yan, 'Ipapovut ya Mestru nu kanna be tiaw ya dian ya kuarto nga panganan na en ikami pay nga disipulo na kan ya Fiesta ya Nepattalebad.' 15Sangaw, ipasingan na kan ikayu ya isa nga alawa nga kuarto kan ya utun ya balay ra nga hinnian kannay ngin ngammin ya ganagannud nga mawag tera. Paranan nu ya kanan tera kannay." 16Sangaw, minang ya dua nga disipulo na kan ya siudad, en nasimmuan da ya megitta kan ya kinahi y Jesus kan ira, en pinaran da kannay ya kanan da kan ya fiesta. 17Kattu maggabi ngin, minang y Jesus en ya disipulo na ira kan yan nga kuarto ngin. 18Kannia aggatuttud da nga mangan, kunna nga nakkahi y Jesus, "Kurug ya kayan ku kan ikayu, hinnian isa kan ikayu nga mangiyalawat kan yakan kan ya mangontra ira kan yakan, isa iggina nga makipangan kan yakan." 19Sangaw, narandam da, en ya kada isa kan ira, natturubbat da nga kunda nga namovut kan iggina, "Bakkan kan yakan, azze/awan kasi?" 20Kunna nga siminabbag, "Isa iggina kan ikayu nga mafulu se dua nga disipulok, isa iggina nga mangidassam kan pan kan ya palangganita nga pangidassamman ku. 21Mapatay nak nga Anak Tolay segun kan ya neturak kan ya Sagrado nga Turak nga me-annung kan yakan, ngam anakkue/pakallallak pay yan nga tolay nga mangiyalawat kan yakan nga Anak Tolay kan ira. Mas napia laman ngin kan yan nga tolay nu mari na zinan ne-anak." 22Sangaw, kannia ira nga maddaggun nga mangan, nangalak y Jesus kan pan, en binendisionan na. Ginaddagaddua na, en neddan na kan ira nga kunna nga nakkahi, "Yaw ya baggik. Alakan nu en kanan nu." 23Sangaw, nangalak iggina kan kopa, en kattu nappabalat iggina kan y Afu Dios, neddan na kan ira, en mininum da ngammin kan yan. 24Kallie na yan, kunna nga nakkahi, "Yaw ya dahak, ya daha ya taratu, nga matturut para kan napakaru nga totolay. 25Kurug ya kayan ku kan ikayu, marik uli minum kan ya daggat vunga ubas ngin addet kan ya algaw nga uli agginum ku kan yan, en kuan ku yan kan ya appatul y Afu Dios." 26Sangaw, nakkansion da kan paddayarayaw kan y Afu Dios, en kabalin na, napanaw ra kannay en minang da kan ya Bakulud Olivo. 27Sangaw, kunna nga nakkahi y Jesus, "Pakkapanawan dak ngammin, gafu ta neturak kan ya Sagrado nga Turak, 'Ipapatek ya minappastor, en mawwarawarak sangaw ya karneru ira,' 28Ngam magginnolay nak balalaman, en kabalin na, monna nak annek/ngam kan ikayu nga umang kan ya probinsia ya Galilea." 29Kunna nga siminabbag y Pedro, "Maski nu pakkapanawan da ka ngammin ya kakavulun ku, ngam kan yakan, awan." 30Ngam kunna y Jesus nga nakkahi, "Kurug ya kayan ku kan ikaw, kan yaw nga gabi, kallie ya assikkarallok ya isa nga lalung kan mamiddua, namilu ngin nga nelimad mu ya pakakammum kan yakan." 31Ngam netaggat nga kinahi y Pedro, "Maski nu mawag kan makipappatay nak kan ikaw, marik ilimad ya pakakammuk kan ikaw." Kunna tian pay ya kinahi ra ngammin. 32Sangaw, nakakaddet y Jesus en ya disipulo na ira kan ya isa nga lugar nga nangahanan kan Getsemane, en kunna nga nakkahi, "Manuttud kayu kanniaw, gafu ta annak maddasal." 33Nevulun na ira Pedro, Santiago, en y Juan. Namegafu nga nelot/nafulotan ya dandam na, en natenap na nga naddammat ya tagang na. 34Sangaw, kunna nga nakkahi, "Kuru marandam ya futuk nga alale ipatek. Mattalan/Mabbattang kayu kanniaw, en mari nu makkaturug." 35Minarayyu iggina kan bissang/bissut, en nallakab kan ya lusak, en nedasal na nga nu awayya na zinan, mari lumabbet ya orat nga kapazapaziyat na. 36Kunna nga nangidasal, "Ama! Ama! Makuam ngammin ya ganagannud. Kazzen ta ilisi nak kan ya mappanget nga kapazapaziyat ku. Ngam bakkan kan ya urek ya matumpal nu azzi ya urem pe laman." 37Sangaw, nanoli iggina kan ira nay nga tallu nga disipulo na, en nadatangngan na ira nga aggakaturug. Linukag na ira, en kunna nga namovut kan y Pedro, "Simon, ka-am ta nakkaturug ka? Marim kazze mattamman ya mari makkaturug kan maski tangorat laman? 38Mawag kan aggalukag kayu, en idasal nu nga mari nu ituluk ya katentasion nu. Kurug nga ikayat ya ginnonotan nu ya mangngua kan napia, ngam nakafi ya gibbaggian nu." 39Sangaw, minarayyu iggina manin kan bissang, en nedasal na ya negitta kan ya unna nga nedasal na. 40Kattu uli nanoli iggina kan ira, nadatangngan na ira manin nga aggakaturug, gafu ta mari ra mattamman ngin, gafu ta kuru sikkaturug dan, en mari ra ammu ya itabbag da kan iggina. 41Minang iggina manin nga naddasal, en kan ya mekatallu nga nepannoli na kan ira, kunna nga nakkahi, "Aggakaturug en mamangat kayu peba balattan. Fustu ngin ya nepammangat nu. Luminabbet ngin ya orat nga ke-alawat ku nga Anak Tolay kan ya paka-awayya ya minalliwat ira. 42Gumangun kayun, gafu ta mapanaw teran. Innan nu, diu, umang ngin ya mangiyalawat kan yakan." 43Kannia y Jesus nga maddaggun nga mergo peba, insigida luminabbet y Judas nga isa kan ya mafulu se dua nga disipulo na en ya napakaru nga totolay nga gitattammitan kan ispada en paluk nga binon ya panakallan ira kan ya papari, ya mestru ira kan ya dorob en ya panakallan nga lalakay ira. 44Kallie na yan, kinahi y Judas kan ira nga iddannan na ira kan sennial nga kunna nga nakkahi, "Ya tolay nga amman ku, iggina yan. Gafutan nu iggina, en ipanaw nu nga maguardian." 45Kattu luminabbet da Judas kan ya dian da Jesus, nerame na nga minaranni kan iggina, en kunna nga nakkahi, "Mestru," en inamman na iggina. 46Ginafut ya kakavulun y Judas y Jesus, en inarestan da. 47Ya isa kan ya totolay nga aggatadag kan aranni kan iggina, sinakkut/kinasut na ya ispada na, en nesiwad na kan ya kohung ya pari nga katanangan ya kekuentan na, en napingngaddan na ya daranggang/talinga na. 48Sangaw, kunna nga namovut y Jesus kan ya totolay, "Minang kayu kazze kanniaw nga alale tulisan nak nga gitattammitan kayu kan ispada en paluk nga manggafut kan yakan? 49Kagalgaw hinnian nak kan ikayu kan ya lalantaran ya templo nga mattuttuldu, en mari rak ginafut kannay. Ngam mawag kan matumpal ya neturak kan ya Sagrado nga Turak." 50Sangaw, nakkapanawan ngammin ya disipulo na iggina, en pinaladdiawan dan. 51Hinnian bagitolay nga siminunud kan iggina nga ulolat laman ya nesinnun na. Ginafut da iggina, 52ngam nakapaladdiaw iggina nga natalan na ya ulolat na nga awan na nga sissinnun. 53Sangaw, ne-angay ra y Jesus kan ya pari nga katanangan ya kekuentan na. Narammung kannay ngammin ya panakallan ira kan ya papari, ya panakallan nga lalakay ira, en ya mestru ira kan ya dorob. 54Mediu arayyu y Pedro nga tumunutunud kan ira Jesus addet kan ya patio ya pari nga katanangan ya kekuentan na. Nakipattuttud iggina kan ya guardia ira nga nakipaggarenu kan ira. 55Sangaw, ya panakallan ira kan ya papari en ya interu konseho, nanafataful da kan mattestigu ira kan kontra kan y Jesus tase ipapatay ra iggina, ngam awan da nga natafulan. 56Aru ya nattestigu kan falso nga kontra kan iggina, ngam mari naggiritta ya netestigu ra. 57Hinnian dudduma nga laddud nga nattestigu kontra kan iggina nga kunda, 58"Nagina mi iggina nga kunna nga nakkahi kan me-annung kan iggina pe laman, 'Darallan ku yaw nga templo nga pinatadag totolay, en kan tallu nga algaw, mamatadag nak kan isa nga mari patadaggan totolay.' " 59Ngam mari naggiritta ya netestigu ra. 60Sangaw, nanadag ya pari nga katanangan ya kekuentan na kan ya paratubangan da, en kunna nga namovut kan y Jesus, "Awan kazze nga metabbag mu kan yan? Hanna yan nga netestigu ira yaw nga totolay nga kontra kan ikaw?" 61Ngam nemamak y Jesus en mari na siminabbag. Namovut manin ya pari nga katanangan ya kekuentan na nga kunna, "Ikaw kazze ya Cristo nga Anak y Afu Dios nga Madayarayaw?" 62Kunna nga siminabbag y Jesus, "On, yakan, en masingan dak nattaruk nga Anak Tolay nga aggatuttud kan ya ziwanan y Afu Dios nga Makapangngua. Manoli nak en masingan dak kan ya kunam ira kan langit." 63Ya pari nga katanangan ya kekuentan na, kattu nagina na yan, binerget na ya sinnun na pe laman, en kunna nga namovut kan ya konseho, "Ka-am ta mawag tera peba laman ya mattestigu ira? 64Nagina nu mismu ya kinahi na nga kontra kan y Afu Dios. Hanna gafen ya uray nu?" Sangaw, kinondena ra ngammin y Jesus nga mepangngat nga mapatay. 65Sangaw, hinnian dudduma nga linusulusaban da iggina, sinakkuban da ya mata na, binubbubbug da, en kunda nga nakkahi, "Kayan mu ya ipakammu y Afu Dios nu innia ya nangngua kan yan." Inalak ya guardia ira iggina, en linappalappag da. 66Kannia kasan y Pedro kan ya patio kan gukab, hinnian maginganay nga serbidor ya pari nga katanangan ya kekuentan na nga minaranni kannay. 67Kattu nasingan na y Pedro nga maggarenu, zinulangngan na, en kunna nga nakkahi kan iggina, "Isa ka pay nga kavulun y Jesus nga taga Nazaret." 68Kunna nga nallimad y Pedro, "Marik ammu onu mantindian yan nga kinahim." Sangaw, nallawan y Pedro nga minang kan ya daddalanan kan ya trangka, en nassikkarallok ya isa nga lalung. 69Nasingan manin yan nga maginganay iggina, en kunna nga nakkahi kan ya totolay nga aggatadag kannay, "Yan nga tolay, isa pay kan ya kakavulun y Jesus." 70Ngam nallimad manin y Pedro. Kan mari kuru nabbayag, ya totolay nga aggatadag kannay, kunda nga nakkahi manin kan y Pedro, "Siguradu, isa ka kan ira, gafu ta taga Galilea ka pay." 71Sangaw, kunna y Pedro nga nakkahi, "Iged/Ibanu/Ilunud nak zinan y Afu Dios nu malladdud/mabbusid nak," en kunna peba nga nangihuramento, "Marik inamammu yan nga tolay nga kayan nu." 72Nerame nassikkarallok ya isa nga lalung kan mekaddua. Nerandamman/Natannaw y Pedro ya kinahi y Jesus kan iggina nga kunna, "Kallie ya assikkarallok ya isa nga lalung kan mamiddua, namilu ngin nga nelimad mu ya pakakammum kan yakan," en nattangatangit iggina.

will be added

X\