Marcos 12

1Sangaw, pinegafanan manin y Jesus nga sinulduan ya totolay, en pangngarrian ya ne-usa na. Kunna nga nakkahi, "Hinnian/Asan tolay nga nammula kan ubas kan ya koman na. Ginibaw na ya pallehut na, en nangavvut iggina kan para pangazzan kan ya daggat ya vunguvunga ya ubas. Nappapatadag iggina kan torre kan para pagguardian, en kabalin na, nepatanggaw na ya koman na kan dudduma/karruan nga minakkikoman, en napanaw iggina nga minang kan tanakkuan nga nasion. 2Kattu luminabbet ngin ya tiempo nga appupusit kan ubas, nabbon iggina kan isa nga kohung na kan ira yan nga minakkikoman tase ipalak na ya billay na. 3Ngam kattu nakakaddet iggina kan ya koman, ginafut da, binubbubbug da, en pinapanaw ra nga awan nga nelabbet na. 4Nabbon iggina manin kan isa nga kohung na, ngam biniaran da ya ulu na, en pinasapasiranan da. 5Nabbon iggina manin kan tanakkuan, ngam pinatay ra iggina. Kunna tian manin ya kiningngua ra kan ya kohung na ira nga binon na. Hinnian dudduma nga binubbubbug da, en hinnian dudduma nga pinatay ra. 6Hinnian peba isa nga natalan/nabattang nga awayya na nga bonan. Iggina ya ideddukan na nga anak na nga lalaki. Kan nangultimuan, binon na malappay/mabbit ya anak na kan ira, gafu ta kunna kan ya nonot na, 'Ikakua ra ya anak ku.' 7"Ngam ira yan nga minakkikoman, kunda nga nerergo, 'Iggina ya mangerensia kan ya koman. Antera patayan iggina, tase kua teran ya erensian na.' 8Ginafut da iggina gafen, pinatay ra, en nelappak da ya baggi na kan ya liwan ya koman. 9"Sangaw, hanna ya kuan ya makakkua kan yan nga ka-ubassan? Umang na sangaw nga patayan ira yan nga minakkikoman, en ipatanggaw na malappay ya ka-ubassan na kan tanakkuan ira. 10Mari nu kazze/pano peba nabibbid yaw kan ya Sagrado nga Turak? 'Ya batu nga nepamammari ya minamabbalay ira, nabbalin kan patunak balalaman. 11Y Afu Dios ya nangngua kan yan, en mekapakkapalat yan kan ittera.' " 12Napanonot ya panakallan ira kan ya Judio ira nga kinahi y Jesus yan nga pangngarrian mekontra kan ira balattan. Ikayat da gafen nga arestan iggina, ngam nakatalaw ra kan ya totolay. Pinanawan da gafen y Jesus. 13Hinnian dudduma nga Fariseo en dudduma nga totolay y Herodes nga nabon kan y Jesus tase gafutan da kan ya ergowan na pe laman. 14Minang da kan y Jesus, en kunda nga nakkahi, "Mestru, ammu mi nga kayan mu ya kurug, en marim mavurung kan ya panonotan ya totolay, gafu ta marim mappadumuruma, en ituttuldum ya fustu nga ikayat y Afu Dios nga kuan ya totolay. Kazzen ta kayan mu kan ikami nu ipamavulun kazze ya dorob tera nga mappaga tera kan bienes/vuwit kan y Emperador kan Roma, onu awan? Mawag kazze kan mappaga tera onu awan?" 15Ammu y Jesus nga appen napia/aginpipia ra, en kunna nga siminabbag, "Ka-am ta puppurban dak? Iddannan dak kan isa nga sinsilliu tase innan ku." 16Iniddannan da iggina kan isa, en kunna nga namovut kan ira, "Innia ya makammuyung/makammukat en makangngahan kan yaw?" Kunda nga siminabbag, "Y Emperador!" 17Sangaw, kunna nga nakkahi, "Iddan nu kan y Emperador ya kua na, en iddan nu kan y Afu Dios ya kua na pay!" Nakkapalat da kan ya netabbag na. 18Hinnian dudduma nga Saduceo nga minang kan y Jesus. Ira nay ya makkahi nga mari magginnolay ya nakkakatay ira. Kunda nga nakkahi, 19"Mestru, neturak y Moises kan ya dorob tera, 'Nu hinnian lalaki nga matay nga awan na nga anak, mawag kan atawan ya wahi na ya balu tase manak da kan kuenta anak ya wahi na nga natay.' 20"Hinnian kattun pitu nga maggurwahi nga lallaki. Nangatawa ya kaka, ngam natay nga awan na nga anak. 21Inatawa ya uzzan na nay nga balu, ngam natay pay iggina nga awan na nga anak. Kunne na pay kan ya mekatallu 22en kan ya dudduma nga wawwahi ra pay. Ngammin ira nay nga pitu nga maggurwahi, inatawa ra ya babay, en nakkakatay ra nga awan da nga anak. Kan panguzzanan, natay ya babay pay. 23Nattaruk kan ya algaw nga agginnolay ngammin ya nakkakatay ira, innia gafen kan ira ya maka-atawa kan nay nga babay? On, gafu ta, ira ngammin nga pitu nga lallaki nga maggurwahi, inatawa ra nay nga babay." 24Kunna nga siminabbag y Jesus, "Nakaliwat kayu, en yaw ya gafu na. Mari nu ammu ya Sagrado nga Turak onu ya pakapangngua y Afu Dios. 25Nattaruk nu magginnolay ya nakkakatay ira, mari ra maratawa onu me-atawa, ngam megitta ran kan ya anghel ira kan langit. 26En nu me-annung kan ya agginnolay ya nakkakatay ira, mari nu kazze peba nabibbid kan ya neturak y Moises kattun kan ya parte nga neturakan ya me-annung kan ya isa nga dakal nga mula nga gumatagatang? Kunna y Afu Dios nga nakkahi kan iggina kannay, 'Yakan ya Dios y Abraham, ya Dios y Isaac, en ya Dios y Jacob.' 27Ikayat na nga kayan nga ya Dios, mari na kan Dios ya nakkakatay ira, nu azzi Dios ya siggamatolay ira. Kurug nga nakaliwat kayu." 28Hinnian mestru kan ya dorob nga luminabbet kannay, en nagina na ya addiriskusion da. Napanonot na nga fustu ya netabbag y Jesus kan ya Saduceo ira, en sangaw, kunna nga namovut kan y Jesus, "Kan ngammin nga dorob, hanna ya ka-importanteyan?" 29Kunna nga siminabbag y Jesus, "Yaw ya ka-importanteyan, 'Ikayu nga totolay nga nasion ya Israel, ginan nu yaw! Y Afu nga Dios tera, iggina laman ya Afu! 30Ayatan mu y Afu Dios kan ya interu futum, kan ya interu karalluam, kan ya interu nonot mu, en kan ya interu sikan mu.' 31En yaw ya mekaddua, 'Ayatan mu ya ikattolem kan kagitta ya angngayat mu kan ya baggim pe laman.' Awan nga tanakkuan nga dorob nga mas importante annek/ngam kan ira yaw." 32Sangaw, kunna nga nakkahi ya mestru kan ya dorob kan y Jesus, "Fustu yan, Mestru! Kurug ya kinahim nga isissa laman iggina nga Dios, en awan nga tanakkuan nga Dios. 33Mawag kan ayatan ya tolay y Afu Dios kan ya interu futu na, kan ya interu nonot na, en kan ya interu sikan na, en mawag kan ayatan na ya ikattolay na kan kagitta ya angngayat na kan ya baggi na pe laman. Mas importante nga maparaparulot ira yaw nga dua nga dorob annek kan mangiddan iggina kan ayam nga mapatay en masidug para kan y Afu Dios en mangiyofresi/mangidedika iggina kan maski hanna nga ofresi kan y Afu Dios." 34Ammu y Jesus nga napia ya nepannabbag na. Kunna gafen nga nakkahi, "Nalohon nga parulotan mu ya uray y Afu Dios." Kattu nagina ra ya netabbag na, awan ngin nga nakegutuk/naketurid/naketaggad nga namovut kan iggina kan maski hanna laman. 35Kannia attuldu y Jesus kan ya totolay kan ya lalantaran ya templo, kunna nga namovut kan ira, "Ka-am ta kayan ya mestru ira kan ya dorob tera nga gaka y David ya Cristo? 36Y David mismu, neturak na yaw nga nepeturak ya Espiritu Santo, 'Kinahi y Afu Dios kan ya Afuk, "Manuttud ka kan ya ziwanan ku addet zi patulukan ku ya kontram ira kan ikaw." ' 37Ya kinahi y David mismu nga me-annung kan ya Cristo, ya Cristo ya Afu na. Ka-am gafen ta kayan ya mestru ira kan ya dorob nga gaka y David ya Cristo?" Nayayat ya totolay kattu nagina ra ya kinahi y Jesus. 38Kunna nga nangituldu kan ira, "Mappalan/Memuhud kayu kan ya mestru ira kan ya dorob. Ikakayat da ya manaladalan nga anaddu ya gissinnunan da, en ikakayat da pay nga diotan ya totolay ira kan ya plasa. 39Nu umang da kan ya sinagoga, ikakayat da ya kapianan ira nga tuttud, en nu umang da kan langan, ikakayat da pay ya manuttud kan ya lugar ira nga kekakuan. 40Ngam apa-aprobettian da nga tagikukuan ya gibbalayan ya babalu nga babbay, en appen/agin relihioso ra kannia addasal da kan anaddu. Siguradu, mas nadammat ya kakastigo ra nattaruk." 41Sangaw, nanuttud y Jesus kan aranni kan ya angngikkuayan/angngippayan kan kuartu kan ya lalantaran ya templo. Giniraw na ya totolay nga mangitanag/mangikabok kan kuartu ra kan ya angngikkuayan. Aru ya riku nga nangitanag kan aru nga kuartu. 42Hinnian pay pobre nga balu nga babay nga minang kannay nga nangitanag kan dua nga sinsilliu nga bissang/bissut laman ya balor da. 43Inakkulan y Jesus ya disipulo na ira, en kunna nga nakkahi, "Kurug ya kayan ku kan ikayu, nay nga pobre nga balu, mas aru ya netanag na annek kan ira ngammin nga nangitanag kan kuartu kan ya angngikkuayan. 44On, gafu ta ira ngammin, sobra laman kan ya kukua ra ya netanag da, ngam nay nga balu nga nelot/nafulotan ya kapobre na, netanag na ya guggunay nga hinnian kan iggina nga pakkatolay na."

will be added

X\