1 Sangaw, nakaranni ra Jesus ngin kan ya siudad ya Jerusalem en kan ya babalay ya Betfage en ya babalay ya Betania kan ya bikat ya Bakulud Olivo. Kunna nga nabbon kan ya dua kan ya disipulo na ira, 2 "Madderettio kayu nga umang kan ya metunud nga poblasion. So nu makakaddet kayu kannay, insigida masingan nu ya mabbing nga asno nga aggagalut nga mari peba vulvua/pulus natakayan. Babbaran nu, en iyangay nu kanniaw. 3 Nu hinnian/asan mamovut kan ikayu nu ka-am ta babbaran nu, kayan nu kan iggina, 'Mawag y Afu,' en ipetoli na kanniaw insigida balalaman." 4 Sangaw, minang ya binon na ira, en nasingan da ya asno kan ya kalsada nga aggagalut kan ya puerta ya isa nga balay kannay. Kannia ammabbad da, 5 hinnian totolay nga aggatadag kannay nga kunda nga namovut, "Ka-am ta babbaran nu ya asno?" 6 Netabbag ya dua kan ira ya nepakahi y Jesus, en nepamavulun da nga alakan da. 7 Sangaw, ne-angay ra ya asno kan y Jesus, en sinapinan da kan ya gilluturan ya gissinnunan da, en nattakay y Jesus. 8 Napakaru pay ya totolay nga nangivulad kan ya gilluturan ya sinnun da kan ya panalanan na. Hinnian dudduma/karruan pay nga totolay nga nanampat kan pangapanga nga inalak da kan katanapan, en nekkua/neppay ra kan ya panalanan na. 9 Ya totolay nga mononna annek/ngam kan y Jesus en ya tumunutunud ira kan iggina, kunda nga nangikukkullet, "Madayarayaw y Afu Dios! Mabendisionan ya luminabbet kan ittera kan ya paka-awayya y Afu Dios. 10 Mabendisionan ya mappanget nga appatul na nga megitta kan ya nepappatul y David nga ginafu tera kattun. Madayarayaw y Afu Dios kan ya katanangan!" 11 Nakakaddet da Jesus kan ya siudad ya Jerusalem, en siminallung da kan ya lalantaran ya templo. Iningan na ngammin ya hinnian kan ya pallehut na, en gafu ta gireram ngin, nallawan iggina en ya mafulu se dua nga disipulo na tase umang da kan Betania. 12 Kan kamatarukan na, napanaw ra Jesus kan Betania tase umang da kan Jerusalem. Nabisin y Jesus. 13 Hinnian kayu nga igos nga naddon ngin nga nelahiban na. Inarannian na gafen tase innan na nu hinnian vunga na, ngam panay don laman ya nasingan na, gafu ta mari peba tiempo avvunga ya igos. 14 Kunna nga nakkahi kan ya kayu, "Marim vulvua/pulus mavvunga ngin!" Nagina ya disipulo na ira ya kinahi na. 15 Kattu nakalabbet da Jesus kan Jerusalem, siminallung da kan ya lalantaran ya templo, en sangaw, pinatavvar/pinatabbraw na ya minallaku ira en ya gumatang ira nga hinnian kannay. Binalabalitu na ya gillamesan ya minannali ira kan kuartu en ya annutturan ira ya minallaku ira kan paloma. 16 Ya innia laman nga hinnian inakkat na, negamma y Jesus nga ikasat na kan ya lalantaran ya templo. 17 Kunna nga nangituldu, "Mari kazze/pano nepeturak y Afu Dios yaw kan ya Sagrado nga Turak? 'Ya balek, makahi kan balay nga addasallan para kan ngammin nga totolay kan ya utun lusak.' Ngam pinabbalin nu kan parammungan ya tulisan ira." 18 Sangaw, nadumug ya panakallan ira kan ya papari en ya mestru ira kan ya dorob ya kiningngua y Jesus, en nanafataful da kan kegafanan ya ammatay ra kan iggina, gafu ta italaw ra, gafu ta nappabbaw ngammin ya totolay kan ya netuldu na. 19 Kattu maggireram ngin, napanaw y Jesus en ya disipulo na ira kan Jerusalem. 20 Kan kamatarukan na, kannia ira nga mattalebad kan ya kayu nga igos, nasingan da nga nagangu ngin addet kan ya gamut na. 21 Nerandamman/Natannaw y Pedro ya nepangngiged/nepangngibanu/nepangngilunud y Jesus kan ya kayu, en kunna nga nakkahi, "Mestru, innan mu ya kayu nga neged mu. Nagangu ngin!" 22 Kunna nga siminabbag y Jesus, "Mangurug kayu kan y Afu Dios! 23 Kurug ya kayan ku kan ikayu, ya innia laman nga makkahi kan yaw nga bakulud, 'Mazza ka, en melappak ka kan ya bebay,' makua yan para kan iggina nu awan vulvua adduda na kan ya nonot na, nu azzi mangurug iggina nga makua ya kayan na. 24 Kayan ku kan ikayu gafen, ya hanna laman nga ikiddaw nu kannia addasal nu, kurruan nu nga nalawat nun, en meddan kan ikayu. 25 Kada manadag kayu nga maddasal, pakoman nu ya nakaliwat ira kan ikayu, tase pakoman na kayu y Ama nu nga hinnian kan langit. 26 On, gafu ta, nu mari nu pakoman ya nakaliwat ira kan ikayu, mari na kayu pay pakoman y Ama nu nga hinnian kan langit kan ya liwaliwat nu." 27 Nanoli ra Jesus manin kan Jerusalem. Kannia annaladalan y Jesus kan ya lalantaran ya templo, ya panakallan ira kan ya papari, ya mestru ira kan ya dorob en ya panakallan nga lalakay ira, minang da kan iggina. 28 Kunda nga namovut, "Hanna ya paka-awayyam nga nangngua kan ira yan nga kinikkingnguam? Innia ya nangiddan kan ikaw kan yan nga paka-awayyam nga nangngua kan ira yan?" 29 Kunna y Jesus nga siminabbag nga namovut, "Hinnian povutan ku pay kan ikayu. Nu matabbag nu yakan, kayan ku pay kan ikayu nu be tiaw ya naggafanan ya paka-awayyak nga nangngua kan ira yan. 30 Y Juan nga Minabbawtiso, kanna be tiaw ya naggafanan ya paka-awayya na nga namawtiso, kan y Afu Dios nga hinnian kan langit onu kan totolay? Tabbahan dak." 31 Sangaw, nerergowan da nga kunda, "Nu kayan tera nga naggafu kan y Afu Dios nga hinnian kan langit, povutan na sangaw kan ittera nu ka-am ta mari tera nangurug kan iggina. 32 Ngam mari tera pay makahi nga naggafu kan totolay." Kinahi ra yan gafu ta netalaw ra ya totolay, gafu ta kurruan ngammin ya totolay nga kurug nga profeta y Juan. 33 Gaggafen, kunda nga siminabbag kan y Jesus, "Mari mi ammu." Kunna gafen nga siminabbag y Jesus, "Gafu ta mari nu sinabbag ya povut ku, marik gafen pay kayan kan ikayu nu hanna ya paka-awayyak nga nangngua kan ira yan."
