Marcos 10

1Napanaw ra Jesus kannay nga minang da kan ya probinsia ya Judea en kan ya tangapingit ya Kayan/Wangag Jordan. Napakaru ya totolay nga narimummung manin kan ya dian na. Sinulduan na ira manin gafu ta yan ya aggangngua na. 2Hinnian/Asan dudduma/karruan nga Fariseo ira nga minang kan y Jesus, tase purban da iggina kan ya kayan na. Kunda gafen nga namovut kan iggina, "Mepangngat kazze/pano nu igungay ya lalaki ya atawa na?" 3Kunna y Jesus nga siminabbag, "Hanna kazze ya nemandu y Moises?" 4Kunda nga siminabbag, "Nepamavulun y Moises kan awayya na nga mangngua ya isa nga lalaki kan neturakan ya angngigungay na kan ya atawa na, en papanawan na igginan." 5Kunna nga nakkahi y Jesus, "Gafu ta nataggat ya giffutuan nu, neturak na yan nga dorob para kan ikayu. 6Ngam namegafu kattun kannia nepammaratu y Afu Dios kan ya mundo, pinaratu na ira nga lalaki en babay. 7Megafu kan yan, panawan ya lalaki ya ama na en ya ina na, en metadday kan ya atawa na, 8tase mabbalin da nga dua kan kuenta isa laman nga baggi ngin. Gaggafen, mari ra nga dua ngin nu azzi isa nga baggi ran. 9Ya pinattadday y Afu Dios, mari zinan paggungayan tolay." 10Kattu hinnian da Jesus manin kan ya lahum ya balay, pinovutan ya disipulo na ira manin kan iggina nu hanna ya kebalinan ya kinahi na. 11Kunna nga siminabbag, "Ya innia laman nga lalaki nga mangigungay kan ya atawa na, en mangatawa uli kan tanakkuan, mebilang kan mamabay, en mekontra yan kan ya unna nga atawa na. 12En ya innia laman nga babay nga negungay kan ya atawa na, en makitawa kan tanakkuan, mebilang kan makilalaki." 13Sangaw, hinnian totolay nga nangiyangay kan ya gi-anakan da ira kan y Jesus tase ipotun na ya ima na kan ira, ngam negamma ya disipulo na ira kan ira. 14Ngam kattu nasingan y Jesus yan, nallussaw iggina. Kunna nga nakkahi kan ira, "Pavulunan nu ya anak ira nga me-angay kan yakan, en mari nu gamman ira, gafu ta ya totolay nga megitta kan ira yaw, ira ya mesipat kan ya appatul y Afu Dios. 15Kurug ya kayan ku kan ikayu, ya innia laman nga mari mangalawat kan ya appatul y Afu Dios kan kagitta ya angngalawat ya isa nga abbing kan yan, mari na mesipat kan ya appatul na." 16Sangaw, ginakkap y Jesus ya anak ira, en kabalin na, nepotun na ya ima na nga namendision kan ira. 17Kannia appanaw ra Jesus kannay, hinnian isa nga tolay nga nappaladdiaw kan iggina nga nappalentud kan ya atubang na, en kunna nga namovut kan iggina, "Napia nga Mestru, hanna ya kuan ku tase hinnian angat ku nga awan na nga panda?" 18Kunna y Jesus nga siminabbag, "Ka-am ta kinahim nga napia nak? Awan nga napia nu azzi y Afu Dios laman. 19Ammum ya dorob ira: 'Marim mamatay; marim mamabay onu makilalaki; marim makkokot; marim mattestigu kan laddud/busid; marim maddaradarogat; ikakuam ya amam en ya inam.' " 20Kunna nga siminabbag, "Mestru, pinaraparulot ku ira yan namegafu peba kattu kabbing ku." 21Zinulangngan y Jesus iggina en iddukan na. Kunna nga nakkahi, "Hinnian isa peba nga pakkurangan mu. Angka ilaku ngammin ya kukuam, en iddan mu ya pallakuan mu kan ya pobre ira. Nu kuan mu yan, hinnian karikum nattaruk kan langit. Kabalin na, manoli ka en me-evulun ka kan yakan." 22Kattu nagina na yan, natturriang iggina en napanaw nga nakkarandam, gafu ta rikiriku iggina. 23Nallipay y Jesus kan ya pallehut na, en kunna nga nakkahi kan ya disipulo na ira, "Avva/Hanna ma ya ziyat ya attallung ya ririku nga totolay kan ya pappatulan y Afu Dios!" 24Nakkapalat ya disipulo na ira kan ya kinahi na. Kunna nga nakkahi y Jesus manin, "Anak ku ira, avva ma ya ziyat ya attallung ya totolay kan ya pappatulan y Afu Dios! 25Mas nalohon ya attallung ya isa nga kamellio kan ya lattuk ya dahum annek/ngam kan ya attallung ya riku nga tolay kan ya pappatulan y Afu Dios." 26Nelot/Nafulotan ya nepakkapalat da, en kunda nga namovut, "Innia gafen ya mapalliad?" 27Iningan y Jesus ira, en kunna nga siminabbag, "Mari makua ya tolay ya kunna tian, ngam makua y Afu Dios, gafu ta, ngammin nga ganagannud, makua y Afu Dios." 28Sangaw, kunna nga nakkahi y Pedro, "Pinanawan mi ngammin ya kukua mi tase me-evulun kami kan ikaw." 29Kunna nga siminabbag y Jesus, "Kurug ya kayan ku kan ikayu, ya innia laman nga tolay nga panawan na ya balay na, ya wawwahi na nga lallaki onu babbay, ya ina na onu ya ama na, ya anak na ira, onu ya lusak na ira megafu laman kan ya asserbi na kan yakan en kan ya napia nga dumug 30awan nga mari mangalawat kan mamim matut kan yaw nga attolay kan balay ira, wawwahi nga lallaki en babbay, ina ira, anak ira, en lusak ira, en kapazapaziyat na pay, en kan ya mappanget nga attolay, malawat na ya angat awan na nga panda kan langit. 31Ngam aru ya totolay nga attanang ya kekuentan da kan yaw nga mundo nga me-alinak nattaruk, en aru ya totolay nga alinak ya kekuentan da kan yaw nga mundo nga me-atanang nattaruk." 32Hinnian da Jesus kan ya dalan nga umang kan ya siudad ya Jerusalem. Nanaladalan iggina kan ya atubang ya disipulo na ira, en siggapabbaw ra. Ira nay nga tumunutunud kan ira, siggatalaw. Ne-arayyu na manin ya mafulu se dua nga disipulo na kan bissang/bissut nga ira laman, en kinahi na kan ira ya mappanget nga mesimmu kan iggina. 33Kunna nga nakkahi, "Ginan dak! Maddaggun tera nga umang kan Jerusalem, en sangaw, me-alawat nak nga Anak Tolay kan ya panakallan ira kan ya papari en kan ya mestru ira kan ya dorob, en sentensian dak kan patay. Sangaw, iyalawat dak kan ya totolay nga mari Judio. 34Uyu-uyawan dak, lusulusaban dak, latalatiguan dak, en patayan dak. Ngam kabalin ya tallu algaw, magginnolay nak balalaman." 35Sangaw, y Santiago en y Juan nga anak y Zebedeo, minang da kan y Jesus, en kunda nga nakkahi, "Mestru, hinnian ikayat mi nga ikiddaw kan ikaw." 36Kunna nga namovut, "Hanna ya ikayat nu nga kuan ku para kan ikayu?" 37Kunda nga siminabbag, "Nattaruk nu mappatul ka nga maglorian, kazzen ta ipamavulun mu nga manuttud ya isa kan ikami kan ya ziwanan mu en ya isa kan ya zimigim." 38Kunna nga siminabbag y Jesus, "Mari nu ammu ya ikiddaw nu. Awayya nu kazze nga attamman ya kapazapaziyat nu nga megitta kan ya kapazapaziyat ku? Awayya nu kazze nga attamman ya nelot nga ziyat nu nga megitta kan ya ziyat ku?" 39Kunda nga siminabbag kan iggina, "Awayya mi." Kunna nga nakkahi y Jesus, "Kurug nga attamman nu ya kapazapaziyat nu nga megitta kan ya kapazapaziyat ku, en attamman nu ya nelot nga ziyat nu nga megitta kan ya ziyat ku. 40Ngam awan nga paka-awayyak nga maddisidi nu innia ya manuttud kan ya ziwanan ku en kan ya zimigik, ngam neprepara yan nga meddan kan ira nay nga napili." 41Kattu nagina ya mafulu nga disipulo ya nekiddaw y Santiago en y Juan, nallussaw ra kan ira. 42Inakkulan gafen y Jesus ira nga umaranni ra kan iggina, en kunna nga nakkahi, "Ammu nu nga, ya mammoray ira kan ya mari Judio ira, ikayat da nga ipasingan ya pakapangngua ra kan ya totolay nga pammorayan da; en ya panakallan da ira, ikayat da nga iyuray ya totolay nga hinnian kan ya paka-awayya ra. 43Ngam mari nu zinan parrian yan nga kukukuan da. Ya innia laman kan ikayu nga mayat nga me-atanang ya kekuentan na, mawag kan mabbalin kan serbidor nu. 44En ya innia laman pay nga mayat nga mangidakal, mawag kan mabbalin iggina kan kohung para kan ngammin. 45On, gafu ta, yakan nga Anak Tolay, minang nak kan ya utun lusak nga mari na kan maserbian nu azzi kan masserbi, en ipamavulun ku nga mapatay nak tase mapalliad ku ya maru." 46Sangaw, nakakaddet da Jesus kan ya poblasion ya Jerico. Kannia appanaw na en ya disipulo na ira en ya napakaru nga totolay kannay, hinnian vulaw nga minakkilimut nga mangngahan kan Bartimeo nga anak y Timeo nga aggatuttud kan ya bikat ya dalan. 47Kattu nagina na nga hinnian y Jesus nga taga Nazaret, kunna nga nangikukkullet, "Jesus, Gaka y David, kazzen ta ikakkallak nak!" 48Nevuya ya totolay iggina tase mari na makassag. Ngam mas lallaman ngin nga kunna nga nangikukkullet, "Gaka y David, kazzen ta ikakkallak nak!" 49Sangaw, nemmang y Jesus, en kunna nga nakkahi, "Akkulan nu iggina." Sangaw, inakkulan da iggina nga kunda nga nakkahi, "Mayayat kan! Lumakkat kan! Ipakkul na ka!" 50Inazzan en newalin na ya lutud ya sinnun na, luminakkat nga nallattu, en minang kan y Jesus. 51Kunna nga namovut y Jesus, "Hanna ya ikayat mu nga kuan ku kan ikaw?" Kunna nga siminabbag ya vulaw, "Mestru, ikayat ku ya makasingan." 52Kunna nga nakkahi y Jesus, "Mammapia kan megafu kan ya angngurug mu. Awayyam ya mapanaw ngin." Insigida nakasingan, en ne-evulun kan ira Jesus.

will be added

X\