Marcos 1

1Yaw ya napia nga dumug nga me-annung kan y Jesu Cristo nga Anak y Afu Dios. Kunna tiaw ya nepammegafu na. 2Natumpal yaw nga neturak y Isaias nga profeta kattun. "O, innan mu! Ponnan ku ya mensaheruk annek/ngam kan ikaw nga mangiparan kan ya dalanan mu." 3"Hinnian/Asan tolay kan ya disierto nga kunna nga mangikukkullet, 'Paranan nu ya dalan y Afu, en tunungan nu ya dalanan na.' " 4Hinnian tolay nga mangngahan kan Juan kan ya disierto. Nepalapalappat na kan ya totolay nga minang kannay nga maggiggina kan iggina nga mawag kan mabbabawi ra kan ya liwaliwat da, en makibawtiso ra tase pakoman y Afu Dios ira. 5Napakaru ya tolay kan ya probinsia ya Judea en kan ya siudad ya Jerusalem nga minang naggina kan y Juan. Kinahi ra ya liwaliwat da kan iggina, en kabalin na, binawtisowan na ira kan ya Kayan/Wangag Jordan. 6Dudut kamellio ya napanday nga sinnun na, en gaddang ya sintaron na. Durun en issi kalaba/ayukan ya nepakkatolay na. 7Kunna nga nakkahi kan ya totolay, "Hinnian tumunud nga mas makapangngua annek kan yakan. Marik mepangngat nga mappalentud nga mamabbad kan ya galut ya sandallia na. 8Bawtisowan ta kayu kan danum, ngam bawtisowan na kayu kan Espiritu Santo." 9Kan ira yan nga algaw, napanaw y Jesus kan ya babalay ya Nazaret kan ya probinsia ya Galilea nga minang kan y Juan tase makibawtiso kan iggina kan ya Kayan Jordan. 10Kattu luminafang y Jesus kan ya danum, nasingan na nga navvukat ya langit, en ya Espiritu Santo nga maddaggun nga mappagukab nga megitta kan paloma, en neppa/nassippa kan iggina. 11Hinnian ngaral nga naggafu kan langit nga kunna nga nakkahi, "Ikaw ya ideddukan ku nga Anak ku nga kuru makapayayat kan yakan." 12Insigida negiya ya Espiritu Santo y Jesus kan ya disierto. 13Kannia kasan na kannay kan appattafulu nga algaw, sinentasion y Satanas iggina. Hinnian iggina kan ya dian ya ayam ira nga tanam/tanang, en sinerbian ya anghel ira iggina. 14Nekarsel y Juan, en kabalin na yan, minang y Jesus kan ya probinsia ya Galilea, en nepalapalappat na ya napia nga dumug y Afu Dios kannay. 15Kunna nga nakkahi kan ya totolay, "Luminabbet ngin ya tiempo; aranni ngin ya appatul y Afu Dios. Mabbabawi kayu kan ya liwaliwat nu, en mangurug kayu kan ya napia nga dumug." 16Kannia annaladalan y Jesus kan ya dappit ya dakal nga danum ya Galilea, nasingan na y Simon en y Andres nga mawwahi nga minaggimmanangat/minaggesesira. Maddaggun da nga memmanangat. 17Y Jesus, kunna nga nakkahi, "Mevulun kayu kan yakan, en pabbalinan ta kayu kan minaggimmanangat kan totolay." 18Insigida pinanawan da ya sonsoru ra, en nevulun da kan iggina. 19Kattu nakarayyu ra kan bissang/bissut, nasingan da y Santiago en y Juan nga mawwahi nga anak y Zebedeo. Hinnian da kan ya barangay ra nga paddaggunan da nga politan ya sonsoru ra. 20Insigida inarut y Jesus ira, en pinanawan da kan ya barangay ya ama ra en ya totolay nga natandanan, en nevulun da kan y Jesus. 21Minang da Jesus kan ya babalay ya Capernaum. Kan ya algaw nga angngilinan ya Judio ira, siminallung da Jesus kan ya sinagoga, en namegafu iggina nga nattuldu. 22Nappabbaw ya totolay kan ya nepattuldu na, gafu ta hinnian paka-awayya na nga mattuldu nga mari megitta kan ya attuldu ya mestru ira kan ya dorob. 23Hinnian tolay nga inafunan narakat/napot nga espiritu nga hinnian kan ya sinagoga nga kunna nga nangikarriaw, 24"Jesus nga taga Nazaret, hanna ya ikayat mu nga kuan kan ikami? Angka kazze/pano darallan ikami? Ammuk nu innia ka. Ikaw ya Nasantuan nga binon y Afu Dios!" 25Ngam kunna y Jesus nga nammandu kan ya narakat nga espiritu, "Memamak kan! Panawan mu igginan!" 26Pinanuruturayag ya narakat nga espiritu ya tolay, nakkarriaw iggina, en pinanawan na ya tolay. 27Nalagat ngammin ya totolay, en kunda nga nakkaporovut, "Hanna yan? Bahu kazze nga tuldu? Hinnian pano paka-awayya na yan nga tolay nga manduan na maski ya narakat nga espiritu ira, en parulotan da iggina." 28Insigida nepadapadumug da ya me-annung kan y Jesus kan ya interu probinsia ya Galilea. 29Sangaw, napanaw ra Jesus kan ya sinagoga, en minang da kan ya balay ya Simon en y Andres nga makabbalay. Nevulun pay ya Santiago en y Juan. 30Agga-idda nga makkulikug ya babay nga katuangan y Simon, en insigida kinahi ra yan kan y Jesus. 31Minaranni y Jesus kan iggina, sinammit na ya ima na, en binangun na. Nerame nemmang ya kulikug na, en sinerbian na ira. 32Kattu maggabi ngin, kabalin ya nepallammad ya sinag, ne-angay ya totolay kan y Jesus ngammin ya makkatakit en ya totolay nga inafunan narakat nga espiritu ira pay. 33Ngammin ya totolay kan ya babalay, narammung da kan ya atubang ya balay ra Simon. 34Aru ya totolay nga maddumuruma ya tulahan da nga pinammapia y Jesus. Aru pay ya narakat nga espiritu nga pinappaw na, ngam mari na pinavulunan ira nga mergo, gafu ta ammu ra nu innia iggina. 35Kan matamataruk, kokopan/kallap peba, guminangun y Jesus nga minang naddasal kan ya lugar nga kawanan totolay. 36Sangaw, ira Simon en ya kakavulun na, minang da sinaful iggina. 37Kattu natafulan da, kunda nga nakkahi, "Tafatafulan da ka ngammin ya totolay." 38Kunna y Jesus nga siminabbag, "Antera kan ya dudduma/karruan nga babalay nga aranni kanniaw, tase mappalapalappat nak pay kannay, gafu ta yan lahud ya inangayan ku kan ya utun lusak." 39Minang da gafen kan ngammin nga lugar kan ya probinsia ya Galilea, en nappalapalappat iggina kan ya sinagoga ira, en pinappaw na ya narakat nga espiritu ira kan ya totolay nga inafunan da. 40Hinnian tolay nga malleproso nga minang kan y Jesus. Nappalentud iggina, en kunna nga nakimemallak, "Hinnian kan ikaw ya pakapangngua nga mappammapia kan yakan. Nu ikayat mu, pammapian nak." 41Nekallak y Jesus iggina. Sinoyat na ya ima na, sinukkal na, en kunna nga siminabbag, "Ikayat ku. Mammapia kan!" 42Nerame nammapia ya leproso na. 43Sangaw, pinapanaw y Jesus iggina nga kunna nga nangitaddan kan iggina kan napia, 44"Ginan nak! Marim kayakayan kan ya innia laman yaw nga nesimmu kan ikaw, nu azzi angka ipasingan ngin ya baggim kan ya pari, en iyofresim/idedikam ya ofresi nga nemandu y Moises kattun me-annung kan ya kapakarenu ya baggim tase hinnian pamakurug kan ya totolay nga napammapia kan." 45Imbes kan yan, minang na pinakapakoli kan ya totolay ya nekapammapia na, en nepadapadumug na. Megafu kan yan, mari awayya y Jesus ya tumallung ngin en mappasingan kan maski hanna nga babalay. Yan ya gafu na kan naddian iggina kan ya lugar nga kawanan totolay. Hinnian totolay nga naggafu kan maddumuruma nga lugar, en minang da kan iggina.

will be added

X\