Lucas 8

1Kabalin na yan, nanaladalan da Jesus kan ya poblasion ira en ya barrio ira nga nangipalapalappat kan ya napia nga dumug nga me-annung kan ya appatul y Afu Dios. Nevulun kan iggina ya mafulu se dua nga disipulo na 2en ya dudduma/karruan pay nga babbay nga namappawan na kan narakat/napot nga espiritu ira en pinammapia na kan maddumuruma nga tulahan. Ira yaw: y Maria nga nengahanan kan Magdalena nga namappawan na kan pitu nga narakat nga espiritu, 3y Juana nga atawa y Cusa nga panakallan kan ya palasio y Patul Herodes, y Susana, en aru peba nga babbay. Ira yaw ya namalawan kan ya pakkatolay y Jesus en ya disipulo na ira nga naggafu kan ya kukua ra pe laman. 4Kan isa nga algaw, napakaru ya totolay nga naggafu kan maddumuruma nga babalay nga minang narammung kan ya dian y Jesus. Kinahi na yaw nga pangngarrian kan ira. 5"Hinnian/Asan kusettieru nga minang nangiwarak kan bini kan ya koman na. Kannia iggina nga mangiwarak kan bini kan ya koman na, hinnian dudduma nga bini nga newarak nga napakanna kan ya daddalanan, en nebatabatay laman en kinnan mammanuk ira. 6Hinnian pay dudduma nga bini nga newarak nga napakanna kan ababbaw nga lusak kan utun dakal nga batu. Nattutuhu ra, ngam natay ra balalaman gafu ta namaha ya lusak. 7Hinnian pay dudduma nga bini nga newarak nga napakanna kan ya kasitan. Nakipattuhu ya asit ira, en kattu ziminakal da, inayyungan da ya mula ira. 8Ngam ya bini nga newarak kan ya napia nga lusak, nattutuhu ra kan napia, en navvunga ra kan taggimatut kan kada fun." Nebalin na ya pangngarrian na nga kunna nga nakkahi kan ira kan nasikan, "Nu ikayat nu nga mantindian, ginan nu gafen kan napia." 9Sangaw, pinovutan ya disipulo na ira kan iggina ya kebalinan na yan nga pangngarrian na. 10Kunna nga nakkahi kan ira, "Nepamavulun y Afu Dios nga mammuan nu ya sekreto ira nga me-annung kan ya appatul na, ngam kan ya dudduma, makahi kan ira kan pangngarrian. Natumpal gafen kan ira ya neturak ya isa nga profeta kattun nga kunna, 'Maski aggasinnan da, mari ra kuru masingan, en maski aggaginan da, mari ra kuru mantindian.' " 11Kunna nga nakkahi y Jesus, "Yaw ya kebalinan na yan nga pangngarrian ku. Ya bini, ke-angngarrian ya ergo y Afu Dios. 12Ya daddalanan nga napakannan ya dudduma nga bini, ke-angngarrian ya totolay nga angayan ya diablo kannia pakagina ra kan ya ergo, en azzan na kan ya ginnonotan da tase mari ra mangurug en mari ra mapalliad. 13Ya ababbaw nga lusak, ke-angngarrian ya totolay nga mayayat nga mangalawat kan ya ergo na kannia pakagina ra, ngam mari na kuru mapagamut kan ya giffutuan da. Mangurug da kan mari mabbayag, ngam nu mapurba ra, likuran da ya angngurug da. 14Ya kasitan, ke-angngarrian ya totolay nga makagina kan ya ergo na, ngam ya avvuruvurung da, ya angngayat da kan kukua ira en ya appalappagustu ra, gurunan da ya ergo y Afu Dios kan kagitta ya angngayyung ya asit ira kan ya mula ira. Yan ya gafu na kan awan nga vunga ra kan ya katakatolay ra. 15Ya napia nga lusak, ke-angngarrian ya totolay nga napia en narenu ya giffutuan da. Kannia pakagina ra kan ya ergo na, arimanan da kan ya ginnonotan da, en megafu kan ya annayun ya angngurug da, mavvunga ra nga hinnian pasensia ra." 16"Awan nga tolay nga mangisibat kan allamparan en takkuban na kan palanggana onu ikkua/ippay na kan gannung kattri, nu azzi ikkua na kan ya fustu nga aggipotunan, tase ya totolay nga tumallung, masingan da ya nawag na. 17Kunna tian pay, awan nga nesussuk kan sangaw nga mari mepasingan nattaruk, en awan nga sekreto kan sangaw nga mari mammuan en magina nattaruk. 18Siguraduan nu gafen nga ginan nu kan napia ya ergo y Afu Dios, gafu ta, ya innia laman nga hinnian mantindian na, mamungan peba. Ngam ya innia laman nga mari makantindi, ya maski bissang/bissut nga abbattan na nga hinnian kan iggina, kalippanan na." 19Sangaw, ya ina en ya lallaki nga wawwahi y Jesus, minang da kan iggina, ngam mari ra nakaranni kan iggina megafu kan ya karu ya totolay kannay. 20Hinnian nakkahi kan iggina, "Mestru, aggatadag kanu ya inam en ya wawwahim kan ya liwan nga ikayat da kanu ya makiergo kan ikaw." 21Ngam kunna y Jesus nga nakkahi kan ya totolay, "Ya tolay ira nga maggina en mamaraparulot kan ya ergo y Afu Dios, ira ya inak en ya wawwahik." 22Kan isa nga algaw, nattakay y Jesus en ya disipulo na ira kan ya isa nga barangay. Kunna nga nakkahi kan ira, "Anteran kan ya tangapingit ya dakal nga danum." Sangaw, napanaw ran. 23Kannia addakit da, nakakaturug y Jesus. Mari nabbayag, gavvat nga nabbayabbag, en mappannu ngin ya barangay kan danum, en hinnian peligro na nga lumammad. 24Ya disipulo na ira, minang da linukag y Jesus nga kunda nga nakkahi, "Mestru, Mestru, malimat teran!" Kattu nalukag iggina, nemandu na kan memmang ya angin en ya palapalung, en nakkalma en nemmang dan. 25Sangaw, kunna nga nakkahi kan ira, "Be tiaw ya dian ya angngurug nu?" Ngam nakatalaw en nappabbaw ra, en kunda nga nakkaporovut, "Hanna pano ya klase na yaw nga tolay? On, gafu ta manduan na maski ya angin en ya palung ira, en parulotan da iggina!" 26Sangaw, nakakaddet da Jesus kan ya lugar nga paddianan ya Geraseno ira nga hinnian kan ya tangapingit ya dakal nga danum nga dammang ya probinsia ya Galilea. 27Kattu nakkazzat da kan ya barangay, hinnian tolay nga maddian kan yan nga babalay nga inafunan narakat nga espiritu ira nga ziminafung kan y Jesus. Nabayag ngin nga mari na nassissinnun, en mari na maddian kan unag balay nu azzi kan unag kueba ira nga attanamman. 28Naming aru nga inafunan ya narakat nga espiritu iggina. Naming aru nga kinawaran ya totolay ya taka en ima na, en ginuardian da iggina, ngam ginaltang na ya kawad ira, en negiya ya narakat nga espiritu iggina kan lugar nga kawanan totolay. Kattu nasingan na y Jesus, nappalentud iggina kan ya atubang na, en kunna nga nangikullet, "Jesus nga Anak ya Katanangan nga Dios, hanna ya kuan mu kan yakan? Ipakimallak ku kan ikaw nga mari nak kastigowan." Kinahi na ya kunna tian gafu ta minanduan y Jesus iggina nga panawan na ya tolay. 30Sangaw, kunna y Jesus nga namovut kan iggina, "Hanna ya ngahan mu?" Kunna nga siminabbag, "Minarivu," gafu ta napakaru ya narakat nga espiritu nga minafun kan iggina. 31Nepakimallak da kan y Jesus nga mari na pappawan ira nga umang kan ya lugar nga kakastigowan da kan awan na nga panda. 32Hinnian bakulud nga aranni kannay, en hinnian napakaru nga bavi kannay nga maddaggun nga mangan. Sangaw, nepakimallak ya narakat nga espiritu ira kan y Jesus nga pavulunan na ira nga umafun da laman ngin kan ya bavi ira. Sangaw, nepamavulun na. 33Nallawan gafen ya narakat nga espiritu ira kan ya tolay, en minafun da kan ya bavi ira. Nappalapaladdiaw ya bavi ira nga nakkakkawat kan ya dakal nga danum, en nakkalimat da. 34Kattu nasingan ya manaron ira ya nesimmu kan ya bavi ira, nappaladdiaw ra nga minang kan ya tolay ira kan ya poblasion en kan ya barrio ira kan ya babalay, en nepadapadumug da ya nesimmu. 35Sangaw, minang ya tolay ira tase innan da nu hanna ya nesimmu. Kattu nakakaddet da kan ya dian y Jesus, nasingan da ya tolay nga bahu pinanawan ya narakat nga espiritu ira. Nassinnun ngin iggina en napia ya nonot nan nga aggatuttud kan ya atubang y Jesus. Kattu nasingan da iggina, nakatalaw ra. 36Ira nay nga nakasingan kan ya nesimmu, pinakoli ra ya nekapammapia ya tolay nga nappasa nga inafunan ya narakat nga espiritu ira. 37Sangaw, ngammin ya maddian kan ya pallehut ya babalay ya Geraseno ira, minang da nepakimallak kan y Jesus nga panawan na ira, gafu ta nelot/nafulotan ya talaw ra kan iggina. Gaggafen, nattakay ra Jesus kan ya barangay. 38Kallie ra nga napanaw, ya tolay nga nappasa nga inafunan ya narakat nga espiritu ira, minang kan y Jesus, en nekiddaw na nga me-evulun iggina pay kan y Jesus, ngam pinalabbet y Jesus iggina nga kunna nga nakkahi, 39"Lumabbet kan, gafu ta angka ipadapadumug ya dakal nga kiningngua y Afu Dios kan ikaw." Sangaw, napanaw iggina, en minang na pinakapakoli kan ya interu babalay ya dakal nga kiningngua y Jesus kan iggina. 40Kattu nakakaddet da Jesus kan ya tangapingit ya dakal nga danum, napakaru ya totolay nga nattalattaron kan iggina. Inalaba ra iggina kan napia. 41Hinnian tolay nga mangngahan kan Jairo nga ofisial kan ya sinagoga nga minang kan y Jesus. Nappalentud iggina kan ya atubang na, en nepakimallak na nga umang iggina kan ya balay ra 42gafu ta kekkemmatay ya isissa nga anak na nga malammaginganay nga mammafulu se dua ya dahun na. Kannia aggangay ra Jesus kannay, napakaru ya totolay nga narammung kan ya pallehut na. 43Hinnian pay isa nga babay nga mafulu se dua rahun ngin nga massessessek/makadadaha, en awan nga nakapammapia kan iggina. 44Nakigguru iggina gafen nga minang kan ya likud y Jesus. Sinukkal na ya barebay ya sinnun na, en insigida nga nemmang ya assessessek na. 45Sangaw, kunna nga namovut y Jesus, "Innia ya nanukkal kan yakan?" Ngam kinahi ra ngammin nga mari ra sinukkal iggina, en kunna y Pedro nga nakkahi kan iggina, "Mestru, paddurummukan da ka ya tolay ira, en magguguru ra nga umaranni kan ikaw." 46Ngam kunna nga siminabbag y Jesus, "Hinnian nanukkal kan yakan. Ammuk yan gafu ta natenap ku nga hinnian pinammapia ya pakapangnguak." 47Kattu nammuan ya babay nga mari na awayya nga melimad ya kiningngua na, namilpilpig iggina en minang nappalentud kan ya atubang y Jesus. Kinahi na kan ya paratubangan ngammin ya totolay nu ka-am ta sinukkal na y Jesus en ya nekapammapia na insigida. 48Kunna y Jesus nga nakkahi kan iggina, "Anak ku, megafu kan ya angngurug mu, nammapia kan. Awayyam nga lumabbet ngin nga sigga-imamak." 49Kannia maddaggun peba laman y Jesus nga mergo, hinnian tolay nga minang kannay nga naggafu kan ya balay y Jairo, en kunna nga nakkahi, "Natay ngin ya anak mu. Marim talantanan ngin ya Mestru." 50Ngam nagina y Jesus yan, en kunna nga nakkahi kan y Jairo, "Marim mavurung! Mangurug ka laman, en mammapia iggina." 51Kattu nakalabbet da Jesus kan ya balay y Jairo, awan nga tanakkuan nga pinavulunan na nga mevulun kan iggina nga tumallung kan ya kuarto ya abbing nu azzi ira Pedro, Juan en y Santiago, en ya ama en ya ina ya abbing laman. 52Ngammin ya totolay kannay, sinangatangitan en bininibinungan/ginuggunggulan da ya abbing, ngam kunna y Jesus nga nakkahi kan ira, "Mari nu mattangit! Mari na natay, nu azzi nakkaturug laman." 53Negalagalak da lallaman ngin iggina, gafu ta ammu ra nga natay ngin ya abbing. 54Ngam sinammit na ya ima ya abbing, en kunna nga nakkahi kan nasikan, "Abbing, gumangun kan!" 55Nagginnolay iggina, en insigida guminangun en nanadag, en kinahi y Jesus kan pakanan da iggina. 56Nappabbaw ya manak na, ngam nemandu y Jesus kan ira nga mari ra kayakayan kan maski innia ya nesimmu.

will be added

X\