1 Kabalin y Jesus nga nakkahi kan ngammin ira yan kan ya totolay nga naggina kan iggina, minang iggina kan ya poblasion ya Capernaum. 2 Hinnian/Asan kannay isa nga kapitan ya matut nga suddalu nga taga Roma, en hinnian ideddukan na nga kohung na nga lalaki nga matakit en kekkemmatay. 3 Kattu nadumug na ya me-annung kan y Jesus, nabbon iggina kan lalakay ira nga panakallan kan ya Judio ira nga mangikiddaw kan iggina nga umang na pammapian ya kohung na. 4 Kattu nakakaddet da kan y Jesus, kunda nga nakimemallak, "Kuru mepangngat nga uffunan mu nay nga tolay, 5 gafu ta ayatan na ya nasion tera, en iggina ya nappapatadag kan ya sinagoga mi." 6 Sangaw, nevulun y Jesus kan ira. Kattu aranni ran kan ya balay ya kapitan, hinnian nadafung da nga kakkofun ira ya kapitan nga binon na kan y Jesus tase kayan da kan iggina, "Afu, marim mabbannabannag nga umang ngin kan ya balay ra, gafu ta mari kanu mepangngat nga tumallung ka kan ya balay ra. 7 Mari na kanu mepangngat nga makiyatubang kan ikaw, ngam kayan mu kanu laman nga mammapia ngin ya kohung na, en matumpal. 8 On, gafu ta, maski iggina kanu, hinnian pay pakimorayan na, en hinnian pay kanu suddalu ira nga makimoray kan iggina. Nu kayan na kanu kan ya isa, 'Angka kannay,' umang iggina. Nu kayan na kan ya isa, 'Angka kanniaw,' umang iggina. En nu kayan na kan ya isa nga kohung na, 'Kuan mu yaw,' kuan na." 9 Nalagat y Jesus kannia nepakagina na kan yan. Sangaw, nabbira iggina kan ya totolay nga nevulun kan iggina, en kunna nga nakkahi, "Kayan ku kan ikayu, maski kan ya Israelita ira, marik peba nakasimmu kan tolay nga megitta ya angngurug na kan ya angngurug na nay nga tolay nga mari Israelita." 10 Kattu nakalabbet ya nabon ira kan ya balay ya kapitan, nadatangngan da nga nammapia ngin ya kohung na. 11 Kan mari nabbayag, minang y Jesus kan ya poblasion ya Nain. Nevulun kan iggina ya disipulo na ira en ya napakaru nga totolay. 12 Kannia ira nga umaranni kan ya attallungan kan ya poblasion, hinnian nadafung da nga umang mattanam. Ya natay, lalaki nga isissa nga anak ya isa nga babay nga balu. Napakaru ya kasibbabalay na nga nakipattanam. 13 Kannia nepakasingan y Afu Jesus kan ya balu, nekakkallak na, en kunna nga nakkahi, "Marim mattangit!" 14 Inarannian y Jesus ya natay, en sinukkal na ya lungun, en nemmang ya nangakkat ira. Kunna nga nakkahi kan ya natay, "Bagitolay, kayan ku kan ikaw, gumangun kan!" 15 Guminangun en nanuttud ya natay, en namegafu nga mergo. Sangaw, nekargo y Jesus iggina kan ya ina na. 16 Kuru napapabbaw ngammin ya totolay, en kunda nga naddayarayaw kan y Afu Dios, "Hinnian makapangngua nga profeta kan itteran." Kunda peba nga nakkahi, "Minang y Afu Dios nga manguffun kan itteran nga totolay na." 17 Sangaw, ngammin ya totolay kan Judea en kan ngammin nga lugar kan ya pallehut na, nadumudumug da ya me-annung kan y Jesus. 18 Ya disipulo ira y Juan, pinakoli ra kan iggina ngammin ira yan nga me-annung kan y Jesus. 19 Sangaw, nangakkul iggina kan dua kan ira, en binon na ira kan y Jesus, tase kunda nga mamovut kan iggina, "Mestru, ikaw kazze/pano ya netabba y Afu Dios nga bonan na, onu hinnian kazze peba tanakkuan nga innanaman tera nga umang?" 20 Kattu nakakaddet da kan y Jesus, kunda nga nakkahi, "Binon na kami y Juan nga Minabbawtiso gafu ta ipapovut na nu ikaw ya netabba y Afu Dios nga bonan na, onu hinnian pano peba tanakkuan nga innanaman tera." 21 Kan nay nga orat, aru ya totolay nga pinammapia y Jesus, ira nay nga maddumuruma ya takit en tulahan da, ira nay nga inafunan narakat/napot nga espiritu ira, en netoli na pay ya anningan ya vulaw ira. 22 Kunna y Jesus nga siminabbag kan ya nabon ira, "Manoli kayu kan y Juan, gafu ta angkayu kayan kan iggina ya nasingan en nagina nu: hinnian vulaw ira nga nakasingan ngin; hinnian mari nakadalan ira nga nakadalan ngin; hinnian nalleproso ira nga napammapia ngin; hinnian bangngag ira nga nakagina ngin; hinnian natay ira nga napaginnolay ngin; en mepalapalappat ya napia nga dumug kan ya pobre ira. 23 Mabendisionan ya innia laman nga awan na nga duda kan yakan nga kegafanan ya aggammari na kan yakan." 24 Kattu napanaw ya binon ira y Juan, kunna y Jesus nga nakkahi kan ya tolay ira kan me-annung kan y Juan, "Kattu minang kayu tase innan nu iggina kan ya disierto, hanna ya inabbat nu nga masingan nu? Tolay kazze nga megitta kan gahut nga mepallapallud/mepallapallayug? Mari na megitta kan yan. 25 Hanna sangaw ya inabbat nu nga masingan nu? Nassinnun kazze iggina kan nakasta? Mari na nassinnun kan kunna tian. Ya totolay nga nassinnun kan kunna tian en mappalappagustu, maddian da kan gippalasiowan ya patul ira. 26 Hanna peba gafen ya inabbat nu nga masingan nu? Isa kazze nga profeta? On, en mas peba annek/ngam kan profeta iggina. 27 Y Juan ya ikayat na nga kayan kan yaw nga neturak kan ya Sagrado nga Turak nga kunna, 'O, innan mu! Hinnian tolay nga bonan ku nga monna annek kan ikaw nga mangiparan kan ya dalanan mu.' 28 "Kayan ku kan ikayu, awan nga tolay nga ne-anak addet kan sangaw nga mas atanang ya kekuentan na annek kan y Juan, ngam ya kalinakkan ya kekuentan na nga mesipat kan ya appatul y Afu Dios, mas atanang ya kekuentan na annek kan y Juan. 29 "Napakaru ya Judio en maski ya minakkolekta ira kan bienes/vuwit, kannia nepakkibawtiso ra kan y Juan, nepasingan da nga nangurug da nga fustu ya uray y Afu Dios nga nepalappat y Juan. 30 Ngam ya Fariseo ira en ya mestru ira kan ya dorob, ne-ammari ra yan nga uray y Afu Dios para kan ira kannia zi ra nepakkibawtiso kan y Juan. 31 "Hanna ya pangiparrian ku kan ya totolay nga matolay kan sangaw? Hanna ya kegittan da? 32 Megitta ra kan ana-anak nga aggatuttud kan ya plasa nga inakkulan ya kakavulun da nga umang makipaggayam kan ira, ngam ne-ammari ra. Ya nakkul ira, kunda nga nakkahi kan ya kiggayam da, 'Nassunata kami para kan ikayu, ngam ne-ammari nu ya mabbayle. Sangaw, nakkansion kami kan kaddarandam, ngam ne-ammari nu ya mattangit.' 33 Y Juan nga Minabbawtiso, mari na nanganangan, en mari na vulvua/pulus mininum kan daggat vunga ubas nga alale nakkansion iggina kan kaddarandam; en kayan nu lallaman ngin nga hinnian narakat nga espiritu nga minafun kan iggina. 34 Yakan nga Anak Tolay, makipangapangan en maki-ini-inum nga alale massunata nak para kan ikayu, ngam kayan nu lallaman ngin kan me-annung kan yakan, 'Diu ya vutut en aggillellaw, en kofun ya minakkolekta ira kan bienes en ya dudduma peba nga minalliwat ira,' kunnu. 35 Maski nu kunna tian ya pangabbattan nu nga me-annung kan yakan en y Juan, napakurug nga fustu ya sirib y Afu Dios megafu kan ya resulta ya kinikkingngua na." 36 Hinnian Fariseo nga nangimbita kan y Jesus tase makipangan kan iggina. Minang iggina kan ya balay ra, en nattulpinat da tase mangan da. 37 Kan yan nga babalay, hinnian pay babay nga minakkipaga Nammuan na nga makipangan y Jesus kan ya balay ya Fariseo, en minang iggina. Nangivulun iggina kan nakasta nga fraskita nga napannu kan pabangug nga nanginingina, 38 en minang iggina nanadag kan aranni kan ya kuyatan y Jesus. Nanuruturut ya lua na nga namasa kan ya taka y Jesus, en finunatan na kan ya ahuk na. Inamma-amman na ya taka na, en vinururan na kan ya pabangug. 39 Kattu nasingan ya Fariseo yan, yaw ya napanonot na, "Nu kurug nga profeta yan nga tolay, ammu na zinan ya klase na yan nga babay nga mangaffaffurriat kan pabangug kan ya taka na, gafu ta minalliwat iggina." 40 Ngam ammu y Jesus ya napanonot na, en kunna nga nakkahi, "Simon, hinnian ikayat ku nga kayan kan ikaw." Kunna nga nakkahi y Simon, "On, Mestru, hanna yan?" 41 Sangaw, kunna y Jesus nga nakkahi, "Hinnian dua nga tolay nga naggatut kan kuartu kan ya isa nga minappagatut. Naggatut ya isa kan limangatut, en ya isa, limafulu. 42 Kattu mari ra nakapaga, kinahi ya minappagatut kan ira nga azzan nan kan ya nonot na ya ginatut da. Innia gafen kan ya dua ya mas mangayat kan iggina?" 43 Kunna y Simon nga siminabbag, "Kan yakan, ya tolay nga mas dakal ya ginatut na nga inazzan ya minappagatut kan ya nonot na." Kunna y Jesus nga nakkahi kan iggina, "Fustu ya kinahim." 44 Sangaw, linipay y Jesus ya babay, en kunna nga nakkahi kan y Simon, "Masingan mu yaw nga babay, azze/awan kasi? Kattu siminallung nak kan ya balem, ikaw, marim nangiddan kan danum kan pamagguk kan ya takak, ngam iggina, binaggawan na ya takak kan ya lua na, en finunatan na kan ya ahuk na. 45 Mari nak zinniotan kan amma, ngam iggina, namegafu kattu siminallung nak, mari na inimmangan nga inamma-amman ya takak. 46 Marim vinururan ya uluk kan denu olivo, ngam iggina, vinururan na ya takak kan pabangug. 47 Gaggafen, kayan ku kan ikaw, maski aru ya liwaliwat na, napakoma ngin gafu ta dakal ya ayat na. Ngam ya tolay nga pilippipia laman ya liwaliwat na nga mapakoma, bissang laman ya ayat na." 48 Sangaw, kunna y Jesus nga nakkahi kan ya babay, "Napakoma ya liwaliwat mun." 49 Ya totolay nga kagindan na nga nangan, kattu nagina ra yan, kunda nga narananabid, "Innia pano yan nga tolay nga maski mamakoma kan liwaliwat ya makua na?" 50 Kunna y Jesus peba nga nakkahi kan ya babay, "Megafu kan ya angngurug mu, napalliad kan. Awayyam mapanaw ngin nga sigga-imamak."
