Lucas 24

1Kan matamataruk Liggu, minang ira nay nga babbay kan ya netanamman y Jesus, en nevulun da ya pabangug nga pinaran da. 2Nadatangngan da nga nakarolig ngin ya batu nga tallab ya netanamman na. 3Siminallung da, ngam awan ya baggi y Afu Jesus kannay. 4Kannia ira nga sikkapabbaw kan me-annung kan yan, gavvat nga hinnian/asan dua nga tolay nga makatulang ya sinnun da nga aggatadag kan aranni kan ira. 5Nakatalaw ya babbay, en nakkumad da. Ngam ya dua nga anghel, kunda nga nakkahi, "Ka-am ta tafulan nu ya matolay kan ya dian ya nakkakatay ira? 6Awan iggina kanniaw, gafu ta nagginnolay ngin. Dandamman nu nga kattu hinnian kayu peba kan Galilea, kunna nga nakkahi kan ikayu, 7'Yakan nga Anak Tolay, mawag kan me-alawat kan ya minalliwat ira en mepatak kan kurut, ngam kan ya mekatallu nga algaw, magginnolay nak balalaman.' " 8Sangaw, nerandamman da yan nga kinahi y Jesus. 9Napanaw ra gafen kan ya netanamman na, en nanoli ra kan ya mafulu se isa nga apostol na en ngammin ya kakavulun na, en pinakoli ra ngammin ira yan. 10Ya nappakoli kan ira yan nga ganagannud kan ya apostol ira, ira Maria Magdalena, Juana, Maria nga ina y Santiago, en ya dudduma/karruan peba. 11Ngam ya narammung ira, inabbat da nga paraparatu ra laman ya pinakoli ra. Gaggafen, mari ra nangurug kan ira 12Ngam maski peba nu kunna tian, luminakkat y Pedro en nappalapaladdiaw nga minang kan ya netanamman y Jesus. Minukuk iggina, en yan laman ya nasingan na, ya sinnun nga nebabbad kan ya baggi y Jesus. Sangaw, luminabbet iggina nga siggapakkapalat megafu kan ya nesimmu. 13Mismu kan yan nga algaw, hinnian dua kan ya ne-evulun ira kan y Jesus kattun nga manaladalan nga umang kan ya barrio ya Emaus nga mammafulu se isa kilometro ya karayyu na kan Jerusalem. 14Nergowan da ya me-annung kan ngammin ira nay nga nesissimmu kan y Jesus. 15Kannia paddaggunan da nga pergowan ira nay, minaranni y Jesus mismu en nevulun kan ira. 16Nasingan da iggina, ngam mari ra nakata/namukatan iggina. 17Kunna nga namovut kan ira, "Hanna ya pergowan nu kannia ikayu nga manaladalan?" Nemmang da nga siggarandam. 18Ya isa kan ira nga mangngahan kan Cleopas, kunna nga siminabbag, "Kan ya tolay ira kan Jerusalem, ikaw kazze/pano laman ya mari makakammu kan ya bahu nga nesissimmu kannay?" 19Kunna nga namovut kan ira, "Hanna ira yan?" Kunda nga siminabbag, "Ya ganagannud nga me-annung kan y Jesus nga taga Nazaret. Isa iggina nga profeta nga makapangngua. Mammuan yan kan ya kinikkingngua en kinahakahi na kan ya atubang y Afu Dios en ngammin pay nga totolay. 20Ya panakallan ira kan ya papari tera en ya mammoray ira kan ittera, ne-alawat da iggina tase masentensian kan patay. Sangaw, nepatak iggina kan kurut. 21Ngam ikami, dana innanaman mi nga iggina ya manavvut kan ya totolay ira nga Israelita. Mari na kan yan laman, ngam yaw ya mekatallu nga algaw nan kan ira yan nga nesimmu. 22En yaw peba, hinnian dudduma nga babbay kan ya kakavulun mi nga nappalagat kan ikami. Naggaggammia ra nga minang kan ya netanamman na, 23en awan kanu ya baggi nan kannay. Sangaw, nanoli ra, en pinakoli ra pay nga hinnian anghel ira nga nappasingan kan ira nga nakkahi nga nagginnolay igginan. 24Hinnian dudduma kan ya kakavulun mi nga minang kan ya netanamman na, en nadatangngan da pay ya megitta kan ya kinahi tu babbay, ngam mari ra nasingan iggina." 25Kunna nga nakkahi y Jesus, "Avva/Hanna ma ya taggat ya gi-ulluan nu en ya bayag nu nga mangurug kan ngammin nga neturak ya profeta ira kattun. 26Mari kazze fersadu kan napazapaziyat ya Cristo kan kunna tian, en kabalin na, madayarayaw?" 27Sangaw, nepakanawag na kan ira ya neturak nga me-annung kan iggina pe laman kan ngammin nga Sagrado nga Turak, namegafu kan ya neturak ira y Moises en ya neturak ngammin ya profeta ira pay. 28Kattu umara-aranni ran kan ya barrio nga angayan da nga dua, makkakkawat zinan y Jesus nga alale tanakkuan ya angayan na. 29Ngam finuwaddan da iggina nga kunda, "Makiyedda ka laman ngin kan ikami, gafu ta gireram en maggabi ngin." Nevulun iggina gafen nga alale makiyedda kan ira. 30Kattu naratubang da kan ya panganan da, inalak na ya pan, en nappabalat iggina kan y Afu Dios. Kabalin na, ginaddua na ya pan, en neddan na kan ira. 31Sangaw, kuenta navukatan ya gimmatan dan, en nakata ran nga iggina y Jesus, ngam gavvat nga awan igginan. 32Kunda sangaw nga nakka-ergo, "Yan balattan gafu ta nakasta ya natenap ta kannia nepakkiergo na kan itta kannia kasan tera peba kan ya dalan en kannia nepangngipakanawag na kan itta kan ya Sagrado nga Turak!" 33Nerame ra nga luminakkat, en nanoli ra kan Jerusalem. Nadatangngan da kannay ya narammung nga mafulu se isa nga apostol na en ya dudduma peba nga kakavulun da. 34Ya narammung ira, kunda nga nakkahi kan ira nay nga dua, "Siguradu, nagginnolay y Afu Jesus, en nappasingan kan y Simon Pedro." 35Sangaw, pinakoli ya dua pay ya nesimmu kan ira kan ya dalan en ya nepakakata ra kan y Jesus kannia nepaggaddua na kan ya pan. 36Kannia ira nga maddaggun nga mappakoli peba kan ira yan nga ganagannud, gavvat nga aggatadag y Jesus mismu kan ya nattarangngan da, en kunna nga nakkahi, "Pare zinan ta hinnian imamak kan ikayu." 37Ngam nalagat en nakatalaw ra, gafu ta inabbat da nga amang/banig ya nasingan da. 38Kunna y Jesus nga nakkahi kan ira, "Ka-am ta mattalaw kayu? Ka-am ta madduda kayu? 39Innan nu ya imak en ya takak tase masiguradu nu nga yakan mismu yaw. Karalapan dak tase mammuan nu nga marik amang, gafu ta, ya amang, awan na nga pattag en tulang, ngam yakan, hinnian nga aggasinnan nu." 40Kattu kinahi na yan, nepasingan na kan ira ya ima na en ya taka na. 41Kannia ira nga mari peba kuru mangurug megafu kan ya aggayayat en akkapalat da, kunna y Jesus nga namovut kan ira, "Hinnian kazze makan kanniaw?" 42Sangaw, iniddannan da iggina kan tangakallat nga nalutu nga manangat/isira, 43en inalak na en kinnan na kan ya paratubangan da. 44Sangaw, kunna nga nakkahi, "Ira yaw ya dana kinahakahik kattu kasan ku peba kan ikayu: Mawag kan matumpal ngammin ya me-annung kan yakan nga neturak y Moises en ya profeta ira en ya hinnian kan ya Salmo ira." 45Sangaw, nepakanawag na kan ira ya Sagrado nga Turak tase mantindian da. 46Kunna nga nakkahi, "Ira yaw ya neturak: Mawag kan mapaziyariyat en mapatay ya Cristo, en kan ya mekatallu nga algaw, magginnolay iggina balalaman. 47En megafu kan ya paka-awayya na, mepalapalappat kan ya totolay kan ngammin nga nasion mamegafu kan Jerusalem nga mabbabawi ra tase mapakoma ya liwaliwat da. 48Ikayu ya mamakurug kan ira yan nga ganagannud. 49Bonan ku mismu kan ikayu ya netabba y Amak, ngam mattaron kayu kan yaw nga siudad, Jerusalem, addet zi meddannan kayu kan pakapangngua nga maggafu kan langit." 50Sangaw, ne-unna y Jesus nga nelawan ira kan ya siudad. Kattu umara-aranni ran kan ya poblasion ya Betania, netayad y Jesus ya ima na, en binendisionan na ira. 51Kannia ammendision na kan ira, pinanawan na iran, en minutun igginan kan langit. 52Zinayarayaw ra iggina, en nelot/nafulotan ya payayat da nga nanoli kan Jerusalem. 53Kanakanayun nga umang da kan ya lalantaran ya templo nga maddayarayaw kan y Afu Dios.

will be added

X\