Lucas 23

1Sangaw, luminakkat ngammin ya konseho, en ne-angay ra y Jesus kan y Pilato. 2Pinegafanan da nga inakusan iggina nga kunda, "Nadatangngan mi yaw nga tolay nga mamensi kan ya kalugaran mi ira nga turiyan da ya gubiernu. Negamma na kan mappaga ra kan bienes/vuwit kan y Emperador, en kinahi na peba nga iggina mismu ya Cristo nga patul." 3Sangaw, kunna y Pilato nga namovut kan y Jesus, "Ikaw kazze/pano ya patul ya Judio ira?" Kunna nga siminabbag, "Nakahi mun." 4Kunna y Pilato nga nakkahi kan ya panakallan ira kan ya papari en kan ya aru nga totolay, "Awan ku nga natafulan nga naliwatan na yaw nga tolay." 5Ngam kunda nga nangi-insisti, "Pagapagulluan na ya totolay kan ya interu probinsia ya Judea megafu kan ya ituttuldu na. Pinegafanan na nga kuan yan kan ya probinsia ya Galilea, en ne-addet na kanniaw." 6Kattu nagina y Pilato yan nga kinahi ra, kunna nga namovut, "Taga Galilea kazze yaw nga tolay?" 7Kattu nammuan na nga y Jesus, taga Galilea nga pammorayan y Herodes, binon na iggina kan y Herodes gafu ta hinnian/asan iggina kan Jerusalem kan ira nay nga algaw. 8Dana nagiggina y Herodes ya me-annung kan y Jesus, en nabayag ngin nga ikayat na nga innan iggina. Ikayat na nga masingan iggina nga mangngua kan milagro. Nayayat iggina gafen kannia nepakasingan na kan y Jesus. 9Aru gafen ya pinovutan na kan iggina, ngam mari na sinattabbag iggina. 10Hinnian pay ya panakallan ira kan ya papari en ya mestru ira kan ya dorob nga aggatadag kannay. Nelot/Nafulotan ya poray ra nga nangakusa kan iggina. 11Sangaw, y Herodes en ya suddalu na ira, inaffugeteyan en inuyu-uyaw ra iggina nga pinassinnun da kan nakasta, en nepetoli na iggina kan y Pilato. 12Kallie na yan, nakkontra y Herodes en y Pilato, ngam namegafu kan yan nga algaw, nakkofun dan. 13Inammung uli y Pilato ya panakallan ira kan ya papari, ya mammoray ira en ya totolay, 14en kunna nga nakkahi, "Ne-angay nu yaw nga tolay kan yakan, en kinahi nu nga bensian na ya totolay nga kontran da ya gubiernu. Inimbistigak iggina kan ya paratubangan nu, en awan vulvua/pulus natafulan ku nga naliwatan na kan ya pangakusan nu kan iggina. 15Kunna tian pay kan y Herodes, awan nga natafulan na nga naliwatan na, en nepetoli na iggina gafen kan ittera. Nanawag gafen nga awan nga kiningngua na nga mepangngat nga kegafanan ya kapatay na. 16Ipalapalatiguk iggina laman ngin gafen, en kabalin na, sueltan kun iggina." 17Kada dahun kan ya Fiesta ya Nepattalebad, mawag kan manuelta ya gubernador kan isa nga presu nga ikiddaw ya totolay kan iggina. 18Sangaw, naggirindan ya totolay nga nangikullet, "Ipapatem iggina, en y Barabas ya sueltan mu!" 19Nekarsel iggina megafu kan ya neparrebelde na kan ya gubiernu nga kiningngua na kan Jerusalem en megafu kan ya nepammatay na kan tolay peba. 20Nakiergo manin y Pilato kan ya totolay, gafu ta ikayat na nga sueltan y Jesus. 21Ngam kunda nga nangikukkullet, "Ipepatak mu iggina kan kurut! Ipepatak mu iggina kan kurut!" 22Pinilluan y Pilato ya nakiergo kan ya totolay nga kunna nga namovut kan ira, "Ka-am? Hanna kazze ya narakat/napot nga kiningngua na? Awan ku nga natafulan nga mepangngat kan ya kapatay na. Ipalapalatiguk iggina laman ngin gafen, en sueltan kun." 23Ngam mas nekukkullet da nga ne-insisti nga nekiddaw nga mepatak y Jesus kan kurut. Megafu kan ya nepangngikukkullet da, 24zinisidi y Pilato nga makua ya nekiddaw ra. 25Sinueltan na gafen y Barabas nga nekikkiddaw ra nga nekarsel megafu kan ya neparrebelde en nepammatay na, ngam ne-alawat na y Jesus tase makua kan iggina ya uray ra. 26Sangaw, kannia nepangngipanaw ya suddalu ira kan y Jesus, hinnian tolay nga nadafung da nga mangngahan kan Simon nga taga siudad ya Cirene nga naggafu kan barrio. Ginafut da, nepakattu ra kan iggina ya kurut, en pinatunud da iggina kan y Jesus. 27Aru ya nanunutunud kan ira. Hinnian dudduma/karruan nga babbay nga nattangatangit en nabbinibinunga/guminuggunggul megafu kan ya mesissimmu kan iggina. 28Nallipay y Jesus kan ira, en kunna nga nakkahi, "Babbay nga maddian kan Jerusalem, mari rak tangitan, nu azzi tangitan nu ikayu en ya anak nu ira pe laman. 29On, gafu ta lumabbet nattaruk ya algaw ira nga akkahi ya totolay, 'Mapalad ya babbay nga lupat, en ya mari vulvua nanak en mari vulvua nappasusu.' 30Nattaruk kan yan nga tiempo, kunda ya totolay nga makkahi kan ya attanang nga bakulud ira, 'Makkarnud kayu kan ikami,' en kunda nga makkahi kan ya balabbakulud ira, 'Tavvanan nu ikami!' 31On, gafu ta, nu makua ira yaw kan yakan nga awan ku nga liwat nga me-arig kan kayu nga nata peba, yammanno kan ya minalliwat ira nga me-arig kan kayu nga nagangu/nakatang ngin." 32Hinnian pay dua nga kriminal nga dana inalak ya suddalu ira nga megindan kan y Jesus nga mapatay. 33Kattu nakakaddet da kan ya lugar nga nangahanan kan Baritottok, nepatak da y Jesus kan kurut. Nepatak da pay ya dua nga kriminal kan kurut, ya isa kan ya ziwanan y Jesus, en ya isa kan ya zimigi na. 34Sangaw, kunna y Jesus nga nangidasal, "Ama, pakoman mu ira, gafu ta mari ra ammu ya paddaggunan da nga kuan." Narririfan ya suddalu ra nga nabbirillayan ya sinnun y Jesus. 35Aggatadag ya totolay kannay nga maggiraw, ngam ya mammoray ira kan ya Judio ira, inuyu-uyaw ra y Jesus nga kunda, "Pinalliad na kanu ya dudduma, palliaran na zinan gafen iggina pe laman nu kurug nga iggina ya Cristo y Afu Dios, ya Pinili na." 36Minaranni ya suddalu ira kan iggina, en pinasappattan da iggina kan daggat vunga ubas nga nalsam. Inuyaw ra pay iggina nga 37kunda nga nakkahi, "Nu ikaw ya Patul ya Judio ira, palliaran mu ikaw pe laman!" 38Hinnian neturak nga nekkua/neppay kan ya utun ya ulu y Jesus kan ya kurut, YAW YA PATUL YA JUDIO IRA 39Sangaw, isa kan ya dua nga kriminal nga negindan kan y Jesus nga nepatak kan kurut, kunna nga nanguyaw kan iggina, "Mari kazze ikaw ya Cristo? Palliaran mu ikaw pe laman en ikami pay gafen!" 40Ngam ya isa nga kriminal, kunna nga nangivuya kan ya kavulun na, "Marim kazze mattalaw kan y Afu Dios? Mattalaw ka zinan gafu ta negitta ya nekasentensiam kan ikami kan patay. 41Mepangngat ya kapatay ta, gafu ta, ya makua kan itta, kepangngattan na kan ya liwaliwat ta. Ngam yaw nga tolay, awan na nga liwat." 42Sangaw, kunna nga nakkahi kan y Jesus, "Jesus, kazzen ta dandamman nak nattaruk nu mammoray ka." 43Kunna nga siminabbag y Jesus, "Kurug ya kayan ku kan ikaw, makipaddian ka kan yakan kan paraiso kan sangaw nga algaw." 44Kan tangnga algaw, nakkokopan/nakkallap ya interu nga lugar kannay addet kan alas tres kan giram, gafu ta nakkokopan ya sinag. 45Ya kurtina nga aggabesin kan ya unag ya templo, napissang nga nakkaddua. 46Sangaw, kunna nga nangikullet y Jesus kan nasikan, "Ama, iyalawat ku ya karalluak kan ikaw." Kabalin na nga nakkahi kan yan, natay igginan. 47Kannia nepakasingan ya kapitan ya suddalu ira kan ya nesimmu, kunna nga naddayaw kan y Afu Dios, "Siguradu, natunung yaw nga tolay." 48Ya napakaru nga totolay nga dana narammung kannay nga maggiliggiraw, kattu nasingan da ya nakanakua, luminabbet da nga bitibituhan da ya gittagangan da megafu kan ya dandam da. 49Ngam ngammin ya makakammu kan y Jesus en ya babbay nga ne-evulun kan iggina namegafu kan Galilea, nattalan/nabbattang da nga aggatadag kan mediu arayyu. Nasingan da pay ya nesissimmu. 50Hinnian tolay nga mangngahan kan Jose nga taga Arimatea nga isa nga babalay kan ya probinsia ya Judea. Napia en natunung iggina, en miembro kan ya konseho, 51ngam mari na minanahut kan ya zinisidi ra nga kuan kan y Jesus. Ininnanama na pay ya ammegafu ya appatul y Afu Dios. 52Minang iggina kan y Pilato, en nekiddaw na nga ipamavulun na nga alakan na ya baggi y Jesus. 53Sangaw, zinittag na ya baggi na, en binabbaddan/vinukkutan na kan lino, en nepekkua/nepeppay na kan ya attanamman na pe laman nga dana nepakokkob na nga sinan kueba kan ya gatab nga batu nga awan peba vulvua netanam kannay. 54Gireram ngin kan yan nga algaw nga apprepara ra kan ya algaw nga angngilinan da nga mappanget nga mamegafu. 55Ya babbay nga ne-evulun kan y Jesus namegafu kan Galilea, sinunud da y Jose, en nasingan da ya netanamman y Jesus en ya neketanam ya baggi na kannay. 56Sangaw, luminabbet da, en napparan da kan pabangug en mira nga pamalsamu ra kan ya baggi na. Namangat da kan ya kalgawan angngilinan da segun kan ya nemandu kan ya dorob.

will be added

X\