Lucas 2

1Kan ira nay nga algaw, namottad y Emperador Augusto kan dorob nga mawag kan makilista ngammin ya totolay kan ya nasion ira nga pammorayan ya taga Roma ira. 2Yan ya unna nga appalista kattu y Quirinio ya gubernador kan Siria. 3Minang gafen nakilista ngammin ya totolay kan ya babalay ra pe laman. 4Naggannukat da Jose kan ya babalay ya Nazaret kan ya probinsia ya Galilea. Minang da kan ya babalay ya Betlehem kan ya probinsia ya Judea nga ne-anakan y David, gafu ta isa iggina kan ya gakagaka y David. 5Nevulun na y Maria nga kittaratu na nga atawan na nga aggamanak, en minang da nga dua tase makilista ra. 6Kannia kasan da kannay, luminabbet ya orat nga agganak na, 7Sangaw, ne-anak na ya paluntarad nga lalaki. Inulolattan na en nepedda na kan lutung, gafu ta awan nga lugar nga para kan ira kan ya pakkaserowan. 8Kan yan nga lugar, hinnian/asan minappastor ira nga manalattaron kan ya karneru ra ira kan gabi kan ya appastoran. 9Gavvat nga hinnian anghel y Afu Dios nga nappasingan kan ira, en nazilahan da kan ya nawag y Afu Dios, en nelot/nafulotan ya talaw ra. 10Ngam kunna nga nakkahi kan ira, "Mari nu mattalaw, gafu ta hinnian napia nga ipadumug ku kan ikayu nga mangiddan kan dakadakal nga payayat kan ngammin nga totolay nattaruk. 11On, gafu ta, kan yaw nga algaw kan ya babalay y David, hinnian ne-anak para kan ikayu nga Minammalliad, iggina ya Cristo nga Afu. 12Yaw ya sennial nga pakakammuan nu: Hinnian kalabit nga bahu ne-anak nga matafulan nu nga nololattan nga agga-idda kan lutung." 13Gavvat nga hinnian napakaru nga anghel nga naggafu kan langit nga nakipappasingan pay kan ya unna. Kunda nga naddayarayaw kan y Afu Dios, 14"Dayaw kan y Afu Dios kan katanangan, en imamak kan ya totolay nga faboran na kan ya utun lusak." 15Kattu napanaw ya anghel iran kan ira nga nanoli kan langit, nerergowan ya minappastor ira, "Antera kan Betlehem nga innan yan nga nesimmu nga nepakahi y Afu Dios kan ittera!" 16Nalistu ra nga minang iningan, en natafulan da y Maria en y Jose en ya kalabit pay nga agga-idda kan lutung. 17Kattu nasingan da ya kalabit, pinakoli ra ya kinahi ya anghel kan ira nga me-annung kan iggina. 18Ngammin ya nakagina, nalagat da megafu kan ya pinakoli ra. 19Ngam y Maria, inarimanan na ngammin ira yan nga ganagannud kan ya nonot na, en pinatalattap na. 20Sangaw, kannia annoli tu minappastor ira, ikakakakua en dayarayawan da y Afu Dios megafu kan ngammin nga nagina en nasingan da nga megitta kan ya kinahi tu anghel kan ira. 21Kattu luminabbet ya mekawalu nga algaw ya kalabit, nepakugit da iggina, en nginahanan da iggina kan Jesus gafu ta yan ya kinahi ya anghel nga mengahan kan iggina kallie na peba nga nebussit. 22Luminabbet ya algaw nga kapakarenu ya baggi y ina na nga mawag kan kuan da kannia ammarulot da kan ya dorob y Moises. Ne-angay ra ya kalabit kan Jerusalem tase ipresenta ra kan y Afu Dios. 23On, gafu ta neturak kan ya dorob y Afu Dios, "Kada paluntarad nga lalaki, mekuenta kan nasantuan kan y Afu Dios." 24Nangiyofresi/Nangidedika ra pay kan ofresi segun kan ya neturak kan ya dorob y Afu Dios, tangaparit nga paloma onu dua nga pittion. 25Kan nay nga tiempo, hinnian tolay kan Jerusalem nga mangngahan kan Simeon nga natunung en makadios. Sinalattaronan na ya algaw nga angnguffun kan ya Israelita ira. Hinnian ya Espiritu Santo kan iggina, 26en dana nepakammu na kan iggina nga mari na matay addet zi masingan na ya Cristo nga netabba y Afu Dios. 27Negiya ya Espiritu Santo iggina kan ya nonot na nga tumallung iggina kan ya lalantaran ya templo, en nesimmu sangaw pay nga kalalabbet y Jose en y Maria nga mangitallung kan ya kalabit tase kuan da para kan iggina ya neturak kan ya dorob. 28Inalak y Simeon ya kalabit en inabban na, en kunna nga naddayarayaw kan y Afu Dios, 29"Afu, gafu ta natumpal ngin ya netabbam kan yakan, awayyam sangaw nga ipamavulun ya appatek nga minasserbi kan ikaw nga sigga-imamak. 30On, gafu ta nasingan ku mismu ngin ya Minammalliad 31nga pinaran mu nga masingan ngammin ya totolay. 32Iggina ya nawag nga mangipakammu kan ya urem kan ya nasion ira, en kedayawan ya totolem nga Israelita." 33Nappabbaw ya manak ya kalabit kan ya kinahi y Simeon nga me-annung kan iggina. 34Sangaw, binendisionan y Simeon ira, en kunna nga nakkahi kan y Maria nga ina y Jesus, "Yaw nga kalabit, napili nga kegafanan nattaruk ya kadaral ya aru en ya kapalliad ya aru nga Israelita en sennial nga naggafu kan y Afu Dios nga paraparakattan ya napakaru nga totolay. 35Megafu kan iggina, mammuan ya hinnian kan ya ginnonotan da. tase mepakammu ya hinnian kan ya giffutuan ya maru. En ikaw mismu, nelot ya dandam mu nattaruk nga alale maduddug ya karalluam kan ispada." 36Hinnian pay babakat nga profeta nga mangngahan kan Anna nga anak y Fanuel nga isa kan ya gakagaka y Aser. Hinnian atawa na kattun, ngam pitu rahun laman ya nepaggatawa ra, 37gafu ta nabalu iggina. Walufulu se appat ya dahun nan. Kanakanayun nga hinnian iggina kan ya lalantaran ya templo kan algaw en gabi nga makadasadasal en maya-ayuno kannia addayarayaw na kan y Afu Dios. 38Kan nay mismu nga orat, nadatangngan na ira Jose. Nappabalat iggina kan y Afu Dios, en nekahakahi na pay ya me-annung kan y Jesus kan ngammin nga totolay nga nasimmuan na nga mattalattaron kan ya katavvut ya Jerusalem. 39Kattu kiningngua y Jose en y Maria ngammin ya ipakua ya dorob y Afu Dios, nanoli ra kan Nazaret nga babalay ra kan ya probinsia ya Galilea. 40Ziminakal en nabbalin kan nasikan ya abbing, en nabbalin kan nelot ya sirib na, en hinnian ya fabor y Afu Dios kan iggina. 41Kada dahun, umang ya manak y Jesus kan Jerusalem kan ya fiesta ra nga Judio nga nangahanan kan Nepattalebad. 42Kattu mafulu se dua ngin ya dahun y Jesus, nevulun dan iggina kannay, gafu ta yan ya kustumbre ya Judio ira. 43Kattu nabalin ngin ya walu nga algaw ya fiesta, mallabbet ya manak nan, ngam napanawan da y Jesus nga abbing. Nattalan/Nabbattang iggina kan Jerusalem nga mari ra ammu, 44gafu ta inabbat da nga nevulun igginan kan ya tangavurulun nga mallabbet. Kabalin ya patangalgaw nga nepannaladalan dan, pinovopovutan da iggina kan ya papparrientes da en ya inamammu ra. 45Kattu mari ra natafulan iggina, nattoli ra kan Jerusalem tase umang da tafulan. 46Kan ya mekatallu nga algaw, natafulan da iggina kan ya lalantaran ya templo nga aggatuttud kan ya dian ya mestru ira nga maggiggina en mappopovut kan ira. 47Ngammin ya totolay nga nakagina kan iggina, nakkapalat da kan ya nototakkan na en ya tabatabbag na kan ira. 48Nakkapalat pay ya manak na kattu nasingan da iggina. Kunna y ina na nga nangallang kan iggina, "Anak ku, ka-am ta kiningnguam ya kunna tian kan ikami? Nelot ya vurung ku en ya amam nga nanafataful kan ikaw." 49Siminabbag iggina nga kunna nga namovut, "Ka-am ta tafulan dak? Mari nu ammu kazze/pano nga mawag kan hinnian nak kan ya balay y Amak?" 50Ngam mari ra nantindian ya kebalinan ya kinahi na kan ira. 51Sangaw, nevulun y Jesus kan ira nga nanoli kan Nazaret. Minammarulot iggina kan ira. Pinatalattap ya ina na kan napia ngammin ira yan. 52Ziminakal y Jesus, en mas namungan ya sirib na en ya fabor y Afu Dios en ya tolay ira kan iggina.

will be added

X\