Lucas 19

1Sangaw, manaladalan da Jesus nga mattalebad kan ya poblasion ya Jerico. 2Hinnian/Asan tolay kannay nga mangngahan kan Zakeo. Panakallan kan ya minakkolekta ira kan bienes/vuwit en riku iggina. 3Ikayat na nga innan nu innia y Jesus. Ngam mari na masingan iggina gafu ta pandak y Zakeo en katallabban kan ya totolay nga hinnian kan ya pallehut na. 4Nappalapaladdiaw iggina gafen nga nonna, en nakkalantay/nakkalay kan kayu nga sikomoro tase masingan na y Jesus nga mappanget nga mattalebad kannay. 5Kattu nakakaddet y Jesus kan nay nga dian y Zakeo, siminangug iggina, en kunna nga nakkahi, "Zakeo, alistuan mu ya mazzittag, gafu ta mawag kan annak kan ya balem kan sangaw nga algaw." 6Inalistuan na gafen nga nazzittag, en nayayat iggina nga namadulot kan y Jesus kan ya balay ra. 7Kattu nasingan ngammin ya totolay yan, kunda nga narreklamo, "Minang na binisita bitu ya isa nga minalliwat." 8Nanadag y Zakeo, en kunna nga nakkahi kan y Jesus, "Afu, iddan ku ya gaddua ya kukuak kan ya pobre ira, en nu hinnian zinarogat ku, itolik kan iggina kan maming appat peba ya karu na." 9Sangaw, kunna y Jesus nga nakkahi, "Kan sangaw nga algaw, mapalliad kayu nga makkarabbalay, gafu ta isa ka pay kan ya gakagaka y Abraham. 10On, gafu ta, yakan nga Anak Tolay, minang nak kan ya utun lusak tase tafulan en palliaran ku ya nawawan ira." 11Kannia aggina ra kan y Jesus, hinnian peba pangngarrian nga kinahi na kan ira gafu ta aranni ran kan Jerusalem, en gafu ta inabbat da nga mappanget nga mamegafu ya appatul y Afu Dios. 12Gaggafen, kunna nga nakkahi kan ira, "Hinnian tolay nga atanang ya kekuentan na nga naggannukat nga umang kan arayyu nga lugar tase matunnak iggina nga mappatul kan ya lugar na pe laman, en kabalin na, manoli iggina balalaman. 13Kallie na nga napanaw, hinnian mafulu kan ya kohung na ira nga nepakkul na, en iniddannan na ira kan kuartu, en kunna nga nakkahi, 'Inigosio nu yan addet kannia annolik.' 14"Ngam ya totolay na, ikalakalussaw ra iggina, en nabbon da gafen kan gumanat kan iggina nga mangibaggi/mangitadag kan ira nga makkahi kan ya manunnak, 'Ammari mi nga mappatul yan nga tolay kan ikami.' 15"Ngam natunnak igginan kan patul, en kabalin na, luminabbet igginan. Nepakkul na sangaw tu kohung na ira nga pinannigosio na, tase mammuan na nu pia ya naganansia ra. 16"Minaranni ya unna, en kunna nga nakkahi, 'Afuk, nakaganansia nak kan mafulu peba kan ya kuartu nga nepenigosiom kan yakan.' 17"Kunna ya patul nga nakkahi, 'Napia ya kiningnguam. Napia ka nga kohung. Gafu ta napammakatalakkan ka kan bissang/bissut, tunnakkan ta ka nga mangidakal kan mafulu nga babalay.' 18"Sangaw, nappatubbat nga minaranni ya mekaddua kan iggina, en kunna nga nakkahi, 'Afuk, nakaganansia nak kan lima peba kan ya kuartu nga nepenigosiom kan yakan.' 19"Kunna ya patul nga nakkahi, 'Tunnakkan ta ka pay nga mangidakal kan lima nga babalay.' 20"Sangaw, nappatubbat pay nga minaranni ya mekatallu, en kunna nga nakkahi, 'Afuk, die ya kuartum nga nepenigosiom kan yakan. Binitulan ku en inarimanan ku. 21Marik nenigosio gafu ta nattalaw nak kan ikaw, gafu ta ammuk nga istrikto ka. Maka-alak ka kan marim nekkua/neppay, en mangapa-apit ka kan marim nemula.' 22"Kunna ya patul nga nakkahi, 'Narakat/Napot ka nga kohung! Yan nga kinahim pe laman ya pamanunut ku kan ikaw. Kinahim nga ammum nga istrikto nak, en maka-alak nak kan marik nekkua, en mangapa-apit nak kan marik nemula. 23Ka-am gafen ta marim nebangku ya kuartuk tase kan sangaw kannia kasan kun, malawat ku zinan ya kuartuk en ya tuhu na pay?' 24Sangaw, kunna ya patul nga nakkahi kan ya aggatadag ira kannay, 'Alakan nu ya kuartu kan iggina, en iddan nu kan ya tolay nga hinnian mafulu nga kuartu na.' 25"Ngam kinahi ra kan iggina, 'O, Afu! Hinnian ngin mafulu kan iggina!' 26"Kunna nga nakkahi, 'Kayan ku kan ikayu, ya kada tolay nga hinnian kua na, mas aru peba ya meddan kan iggina. Ngam ya tolay nga awan na nga kua, maski ya bissang nga hinnian kan iggina, malak peba. 27Sangaw, iyangay nu kanniaw ira nay nga kontrak nga mari mayat nga mappatul nak kan ira, en patayan nu ira kan ya atubang ku.' " 28Kabalin ya nepakkahi y Jesus kan ira yan, nassige iggina nga naggadang nga umang kan Jerusalem, en nevulun ya disipulo na ira 29Kannia umara-aranni ran kan ya babalay ya Betfage en ya babalay ya Betania kan ya bikat ya Bakulud Olivo, nabbon iggina kan dua kan ya disipulo na ira 30nga kunna nga nakkahi kan ira, "Madderettio kayu nga umang kan ya metunud nga poblasion. Kannia pakakaddet nu kannay, hinnian masingan nu nga mabbing nga asno nga negalut nga mari peba vulvua/pulus natakayan. Babbaran nu, en iyangay nu kanniaw. 31Nu hinnian mamovut kan ikayu nu ka-am ta babbaran nu, kunnu nga makkahi kan iggina, 'Mawag y Afu.' " 32Sangaw, minang ya dua nga binon na, en nasimmuan da yan nga asno segun kan ya kinahi na kan ira. 33Kannia ira nga mamabbad, ya makakkua ira, kunda nga namovut, "Ka-am ta babbaran nu ya asno?" 34Kunda nga siminabbag, "Mawag y Afu." 35Sangaw, ne-angay ra ya asno kan y Jesus. Sinapinan da kan ya gilluturan ya gissinnunan da, en pinatakay ra y Jesus. 36Kannia annaladalan ya asno, hinnian totolay nga nangivulad kan ya gilluturan ya gissinnunan da kan ya panalanan na. 37Kattu aranni ran kan Jerusalem nga hinnian dan kan ya darahutan kan ya Bakulud Olivo, namegafu ngammin ya totolay nga naggaragarassia en naddayarayaw kan y Afu Dios kan nasikan nga ngaral megafu kan ngammin nga mekapakkapalat nga milagro nga kinikkingngua na nga nasingan da. 38Kunda nga nangikukkullet, "Mabendisionan ya Patul nga lumabbet kan ittera megafu kan ya paka-awayya y Afu Dios! Imamak kan langit, en madayarayaw y Afu Dios kan ya katanangan!" 39Hinnian dudduma/karruan nga Fariseo kan ira, en kunda nga nakkahi kan y Jesus, "Mestru, pemamakkan mu ya disipulom ira!" 40Ngam kunna nga siminabbag, "Kayan ku kan ikayu, nu memamak da, ya batu ira mismu ya mangikukkullet nga maddayarayaw." 41Kannia umara-aranni ran kan Jerusalem, nelahiban y Jesus yan nga siudad. Kattu napanonot na ya totolay kannay, nakalua iggina megafu kan ira 42nga kunna nga nakkahi, "Maski ikayu, kan yaw nga algaw, pare zinan ta ammu nu ya ganagannud nga mangiddan kan imamak, ngam nesussuk, en mari nu masingan. 43Lumabbet nattaruk ya tiempo nga umang ya kontra nu ira kan ya pallehut nu, en manummuk da kan batu en lusak kan ya pallehut ya siudad nu tase mari nu makatammang. 44Sangaw, isissibat da kayu en ya anak nu ira nga hinnian kan ya lahuman nu kan ya lusak, en dabbadabbakan da ya nakkaporotun nga batu ira nga hinnian kan ya lahuman ya siudad nu tase awan nga talanan/battangan da nga batu nga nepotun kan ya kagitta na nga batu. Mesimmu ngammin ira yan gafu ta mari nu nangurug nga yakan ya netabba en binon y Afu Dios kan ikayu tase mapalliad kayu." 45Siminallung da Jesus kan ya lalantaran ya templo, en sangaw, pinatavvar/pinatabbraw na ya minallaku ira nga hinnian kannay. 46Kunna nga nakkahi kan ira, "Neturak kan ya Sagrado nga Turak, 'Ya balek, balay nga addasallan.' Ngam pinabbalin nu kan parammungan ya tulisan ira." 47Kagalgaw, nattuttuldu y Jesus kan ya lalantaran ya templo. Ya panakallan ira kan ya papari en ya mestru ira kan ya dorob, en maski peba ya mangidakal ira kan ya totolay, nanafataful da nu annianna/kunnasi/manna ya ammatay ra kan iggina. 48Ngam mari ra nawayya gafu ta ngammin ya totolay kannay, ikakayat da ya maggina kan napia kan ya tuldu na.

will be added

X\