Lucas 18

1Hinnian/Asan pangngarrian nga kinahi y Jesus kan ira tase kanakanayun nga maddasal da, en mari ra molang. 2Kunna nga nakkahi kan ira, "Hinnian hues kan isa nga siudad nga awan na nga attalaw kan y Afu Dios, en awan na nga angngikakua kan ya ikattolay na. 3Hinnian pay balu nga babay kan nay nga siudad nga nakatotoli kan iggina, en kunna nga nakimemallak kan iggina, 'Senior hues, kazzen ta italak nak kan ya mangakusa kan yakan.' 4"Nabayag nga ne-ammari ya hues, ngam kan panguzzanan balalaman, kunna kan ya nonot na, 'Maski awan nga attalok kan y Afu Dios onu angngikakuak kan ya ikattolek, 5gafu ta isti-istorbowan nak nay nga balu, faboran ku kan ya mangakusa kan iggina, tase mari na makatotoli kan yakan nga mamatakit kan ya uluk.' " 6Kunna peba y Jesus nga nakkahi, "Patalattappan nu ya napanonot tu narakat/napot nga hues. 7Y Afu Dios pay, faboran na ya mangurug ira kan iggina nga makadasadasal kan iggina kan algaw en gabi. Mari na bayahan, azze?/awan kasi? 8Kayan ku kan ikayu nga alistuan na nga italak ira. Ngam nattaruk nu manoli nak nga Anak Tolay kan ya utun lusak, hinnian kazze/pano madatangngan ku nga angngurug ya totolay?" 9Hinnian dudduma/karruan nga totolay nga mangabbat kan natunung da pe laman, ngam imemenos da ya ikattolay ra mamba. Kinahi na yaw nga pangngarrian na kan ira nga kunna, 10"Hinnian dua nga totolay nga minang naddasal kan ya lalantaran ya templo. Fariseo ya isa, en minakkolekta kan bienes/vuwit ya isa. 11Nesissa nga aggatadag ya Fariseo, en kunna nga naddasal, 'O Dios, mappabalat nak kan ikaw, gafu ta marik megitta kan ya dudduma nga totolay nga darogat, onu mari natunung, onu maddallaw, onu maski nay nga minakkolekta kan bienes. 12Mayuno nak kan mamiddua kan tangaligguan, en ngammin nga matafulan ku, iddan ku kan ikaw ya pakkamafulu ra.' 13"Ngam aggatadag ya minakkolekta kan bienes kan mediu arayyu nga ne-ammari na nga siminangug kan langit. Binitibitug na ya tagang na, en kunna nga naddasal, 'O Dios, kazzen ta ikallak nak nga minalliwat.' 14Kayan ku kan ikayu, yan nga minakkolekta kan bienes, luminabbet kan ya balay na nga napakoma imbes kan ya Fariseo. On, gafu ta, ya innia laman nga mappakatanang, me-alinak, en ya innia laman nga mappakalinak, me-atanang." 15Hinnian dudduma nga totolay nga nangiyangay kan ya anak da ira kan y Jesus tase ipotun na ya ima na kan ira. Kannia nepakasingan ya disipulo na ira kan yan, ginamman da ira. 16Ngam inakkulan y Jesus ya anak ira en kunna nga nakkahi kan ya disipulo na ira, "Pavulunan nu ya anak ira nga me-angay kan yakan, en mari nu gamman ira, gafu ta ya kunna tiaw ira ya mesipat kan ya appatul y Afu Dios. 17Kurug ya kayan ku kan ikayu nga ya innia laman nga mari mangalawat kan ya appatul y Afu Dios kan kagitta ya angngalawat ya abbing, mari na mesipat kan ya appatul na." 18Hinnian isa nga mammoray nga kunna nga namovut kan y Jesus, "Napia nga Mestru, hanna ya kuan ku tase malawat ku ya angat nga awan na nga panda?" 19Kunna y Jesus nga siminabbag, "Ka-am ta kinahim nga napia nak? Awan nga napia nu azzi y Afu Dios laman. 20Ammum ya dorob ira: 'Marim manallaw onu makidallaw. Marim mamatay. Marim makkokot. Marim mattestigu kan laddud/busid. Ikakuam ya amam en ya inam.' " 21Kunna nga siminabbag ya mammoray, "Pinaraparulot ku ngammin ira yan namegafu peba kattu kabbing ku." 22Kattu nagina y Jesus yan, kunna nga nakkahi, "Ngam hinnian isa peba nga pakkurangan mu. Ilakum ngammin ya kukuam, en iddan mu ya pallakuan mu kan ya pobre ira, en nu kuan mu yan, hinnian nattaruk karikum kan langit. Kabalin na, manoli ka en me-evulun ka kan yakan." 23Kannia nepakagina na kan yan, nakkarandam, gafu ta rikiriku iggina. 24Iningan y Jesus iggina, en kunna nga nakkahi, "Avva/Hanna ma ya ziyat ya attallung ya riku nga totolay kan ya pappatulan y Afu Dios! 25Mas nalohon ya attallung ya isa nga kamellio kan ya lattuk dahum annek/ngam kan ya attallung ya isa nga riku nga tolay kan ya pappatulan y Afu Dios." 26Kannia nepakagina ya totolay kan yan, kunda nga namovut kan iggina, "Innia gafen ya mapalliad?" 27Kunna nga siminabbag, "Ya mari makua ya tolay, makua y Afu Dios." 28Sangaw, kunna y Pedro nga nakkahi, "Pinanawan mi ya gibbalayan mi tase me-evulun kami kan ikaw." 29Kunna nga siminabbag y Jesus, "Kurug ya kayan ku kan ikayu, awan nga tolay nga pinanawan na ya balay na, ya atawa na, ya wawwahi na, ya manak na, onu ya anak na ira, tase masserbi iggina kan ya appatul y Afu Dios, 30nga mari mangalawat kan maming aru kan ira yan kan yaw nga attolay, en kan ya mappanget nga attolay, malawat na ya angat nga awan na nga panda kan langit." 31Ne-arayyu y Jesus kan bissang/bissut ya mafulu se dua nga disipulo na, en kunna nga nakkahi, "Ginan dak! Maddaggun tera nga umang kan Jerusalem, en ngammin ya neturak ya profeta ira kattun nga me-annung kan yakan nga Anak Tolay, matumpal kannay. 32Me-alawat nak kan ya totolay nga mari Judio. Uyu-uyawan dak, tattazzian dak, lusulusaban dak, 33latalatiguan dak en patayan dak. Ngam kan ya mekatallu nga algaw, magginnolay nak balalaman." 34Ngam awan vulvua/pulus nantindian ya disipulo na ira, gafu ta adalam ya kebalinan ya ergo na ira, en mari ra ammu ya ikayat na nga kayan. 35Kattu nakaranni ra Jesus kan ya poblasion ya Jerico, hinnian isa nga vulaw nga minakkilelimut nga aggatuttud kan ya bikat ya dalan. 36Kannia pakagina na kan ya aru nga mattatalebad, pinovutan na nu hanna ya maddaggun nga mesimmu. 37Kunda nga nakkahi kan iggina, "Mattalebad y Jesus nga taga Nazaret." 38Sangaw, kunna nga nangikukkullet, "Jesus, Gaka y David, kazzen ta ikakkallak nak!" 39Ya totolay nga nonna annek kan y Jesus, nevuya ra iggina tase mari na makassag. Ngam mas lallaman ngin nga nekukkullet na nga kunna, "Gaka y David, kazzen ta ikakkallak nak!" 40Sangaw, nemmang y Jesus, en kinahi na nga iyangay ra ya vulaw kan iggina. Kattu nakaranni iggina kan y Jesus, kunna y Jesus nga namovut, 41"Hanna ya ikayat mu nga kuan ku para kan ikaw?" Kunna nga siminabbag, "Afu, ikayat ku nga makasingan nak!" 42Kunna y Jesus nga nakkahi, "Megafu kan ya angngurug mu, makasingan kan." 43Nerame na nga nakasingan. Sangaw, nevulun iggina kan y Jesus nga zinayarayaw na y Afu Dios. Kannia nepakasingan ngammin ya totolay kan yan, zinayarayaw ra pay y Afu Dios.

will be added

X\