1 Sangaw, kunna y Jesus nga nakkahi kan ya disipulo na ira, "Siguradu, hinnian/asan tentasion ira nga kegafanan ya alliwat ya totolay, ngam anakkue/pakallallak pay ya innia laman nga paggafanan ya tentasion ira. 2 Mas napia nu mabesinan ya karalong na kan aggilingan nga batu en melappak iggina kan bebay annek/ngam kan iggina ya paggafanan ya tentasion nga kegafanan ya alliwat ya isa laman kan ira yaw nga abbing. 3 Gaggafen, mappalan/memuhud kayu! "Nu hinnian isa nga wahim kan pangurug nga makaliwat kan ikaw, ivuyam iggina, en nu mabbabawi iggina, pakoman mu. 4 Aggangarrian, nu mamim pitu nga makaliwat iggina kan ikaw kan patangalgaw, en kada makaliwat iggina, nu umang na kayan kan ikaw nga kunna, 'Mabbabawi nak,' pakoman mu." 5 Sangaw, kunda nga nakkahi ya apostol na ira, "Pasikannan mu ya angngurug mi." 6 Kunna nga siminabbag y Afu Jesus, "Nu hinnian angngurug nu nga maski megitta laman kan vukal mustasa ya kadakal na, awayya nu nga kayan kan yaw nga kayu nga dakal, 'Mororay ka nga mabantul, en malit ka nga uli memula kan bebay,' en parulotan na kayu." 7 "Aggangarrian. Nu hinnian isa kan ikayu nga hinnian kohung na nga maradu kan ya koman onu mappastor kan karneru ira, nu lumabbet iggina nga maggafu kan ya koman, hanna ya kayan mu kan iggina? 'Manuttud ka gafu ta mangan kan,' kummu kazze/pano? 8 Awan, nu azzi kummu sangaw nga makkahi kan iggina, 'Paranan mu ya kanan ku, mattali ka, en serbian nak kannia angngan en agginum ku, en kabalin na, mangan en minum ka pay ngin.' 9 Mappabalat ka kazze kan ya kohung mu megafu kan ya nepammarulot na kan ya nabbonan mu kan iggina? 10 Kunna tian pay kan ikayu, kabalin ya ammarulot nu kan ngammin nga ipakua y Afu Dios kan ikayu, kunnu nga makkahi, 'Kohung kami laman nga awan nga kekuentan mi; kiningngua mi laman ya annungan mi.' " 11 Kannia aggangay y Jesus kan ya siudad ya Jerusalem, nattalebad iggina kan ya nakkapingitan ya probinsia ya Samaria en ya probinsia ya Galilea. 12 Kannia iggina nga tumallung kan ya isa nga barrio, hinnian mafulu nga totolay nga nadatangngan na nga hinnian leproso ra. Aggatadag da kan mediu arayyu, 13 en kunda nga nangikukkullet, "Jesus, Mestru! Kazzen ta ikallak mu ikami!" 14 Kattu nasingan na ira, kunna nga nakkahi, "Angkayu ipasingan ya gibbaggian nu kan ya papari." Kannia annaladalan da peba laman, nammapia ran. 15 Ya isa kan ira, kattu natenap na ya nepammapia na, nerame na nattoli kan y Jesus nga nakkukkullet nga naddayarayaw kan y Afu Dios. 16 Nallakab iggina kan ya lusak kan ya atubang y Jesus nga nappabalat kan iggina. Samaritano iggina. 17 Sangaw, kunna y Jesus nga nakkahi, "Mafulu ya napammapia, azze?/awan kasi? Be ya dian tu siam? 18 Ka-am ta yaw nga dayu laman ya nanoli nga mappabalat kan y Afu Dios?" 19 Sangaw, kunna nga nakkahi kan ya tolay, "Awayyam manadag en lumabbet kan. Megafu kan ya angngurug mu, napammapia kan." 20 Hinnian dudduma/karruan nga Fariseo nga namovut kan y Jesus nu so nu innia ya ammegafu ya appatul y Afu Dios. Kunna nga siminabbag kan ira, "Awan nga sennial nga pakakammuan kan ya mappanget nga ammegafu ya appatul na. 21 Mari awayya nga makahi ya innia laman, 'Innan nu! Die kanniaw!' onu 'Diu kannay!' gafu ta hinnian ya appatul y Afu Dios kan ya kononaggan nu." 22 Kunna y Jesus nga nakkahi kan ya disipulo na ira, "Ammuk nga lumabbet nattaruk ya algaw ira nga ikayat nu nga hinnian nak nga Anak Tolay kan ikayu maski kan patangalgaw laman, ngam mari na awayya. 23 Hinnian nattaruk makkahi kan ikayu, 'Diu iggina,' onu 'Die iggina.' Ngam mari nu umang onu mevulun kan ira, 24 gafu ta, so nu lumabbet nak nga Anak Tolay kanniaw, megitta nak kan ya kilikilat nga mangnawag kan ya utun lusak addet kan ya arayyu nga lugar ira. 25 Ngam kallie na yan, mawag kan aru ya kapazapaziyat ku, en ya totolay nga matolay kan sangaw, pamammari rak. 26 "Ya nesissimmu kattun kattu katolay y Noe, megitta kan yan pay ya mesissimmu nattaruk kan ya algaw ira kallie ya annolik nga Anak Tolay. 27 Kattu nay nga tiempo, mangamangan en merenum ya totolay, maratawa en mapparatawa ra addet kan ya algaw nga nepattallung da Noe kan ya dakadakal nga barangay. Sangaw, nazzivak/nallum en nakkalimat da ngammin. 28 Kunna tian pay, nadaral ya siudad ya Sodoma kattun, kattu katolay y Lot. Ya tolay ira, mangamangan en merenum da, maggatagatang en mallakalaku, mammulumula en mabbalabalay ra. 29 Ngam kan ya algaw nga nepappanaw ra Lot kan ya siudad, noran kan afi en asuffri, en nakkasidug ngammin ya totolay. 30 Kunna tian pay ya mesimmu nattaruk kan ya algaw nga appasingan ku nga Anak Tolay. 31 Kan yan nga algaw, ya innia laman nga hinnian kan ya atap ya balay na, en hinnian ya kukua na kan ya unag ya balay, mari na zinan tumallung ngin nga mangalak kan yan. Kunna tian pay kan ya tolay nga hinnian kan ya koman na, mari na zinan umang tollian ngin ya pinanawan na. 32 Dandamman nu tunay nga nesimmu kan ya atawa y Lot kattun. 33 Ya innia laman nga kakkapan na nga italak ya angat na pe laman kan ya utun lusak, mapawan na ya angat na nga awan na nga panda. Ngam ya innia laman nga mangituluk kan ya angat na pe laman kan ya utun lusak megafu kan yakan, meddannan kan angat nga awan na nga panda. 34 "Kayan ku kan ikayu, nu lumabbet nak kan gabi, en nu hinnian dua nga tolay kan ya isa nga kattri, malak ya isa, ngam matalan/mabattang ya isa. 35 En nu hinnian dua nga babbay nga makka-uffun nga maggiling, malak ya isa, ngam matalan ya isa. 36 En nu hinnian dua nga lallaki kan ya koman, malak ya isa, ngam matalan ya isa." 37 Kunda nga namovut, "Afu, kanna be tiaw ya kesimmuan na ira yan?" Kan isa nga ononi, kunna nga siminabbag, "Maski kanna be tiaw ya dian ya baggi nga natay, yan pay ya dian nga parammungan ya gayang ira."
