Lucas 15

1Kan isa nga algaw, aru ya minakkolekta ira kan bienes/vuwit en minalliwat ira nga minang naggina kan y Jesus. 2Ya Fariseo ira en ya mestru ira kan ya dorob, kunda nga namaraparakat kan iggina, "Yan nga tolay, mangala-alaba kan minalliwat ira en makipangapangan peba kan ira." 3Gaggafen, kinahi na yaw nga pangngarrian kan ira nga kunna, 4"Nu hinnian/asan matut nga karneru ya isa kan ikayu, en nu mawawan ya isa, hanna ya kuan yan nga tolay? Panawan na ya siammafulu se siam kan ya appastoran, en umang na tafulan tu nawawan addet zi matafulan na, azze/awan kasi? 5So nu matafulan na, mayayat nga mangattu kan ya karneru, 6en ilabbet na. Sangaw, akkulan na ya kakkofun en kakaruba na, en kunna nga makkahi kan ira, 'Makipaggaragarassia kayu kan yakan, gafu ta natafulan ku ya karneruk nga nawawan.' 7Kayan ku kan ikayu, kunna tian pay, mas nelot/nafulotan peba ya payayat ya hinnian ira kan langit megafu kan ya isa nga minalliwat nga mabbabawi annek/ngam kan ya siammafulu se siam nga natunung nga totolay nga mari ra mawag ya mabbabawi." 8"Nu hinnian mafulu nga kuartu nga plata ya isa nga babay, en nu mawawan na ya isa, hanna ya kuan na? Mangisibat iggina kan allamparan, siratan na ya interu balay, en tafatafulan na kan napia addet zi matafulan na, azze? 9So nu matafulan na, akkulan na ya kakkofun en kakaruba na, en kunna nga makkahi kan ira, 'Makipaggaragarassia kayu kan yakan, gafu ta natafulan ku ya kuartuk nga nawawan.' 10Kayan ku kan ikayu, kunna tian pay, mayayat ya anghel ira y Afu Dios megafu kan ya isa nga minalliwat nga mabbabawi." 11Kunna peba y Jesus nga nakkahi, "Hinnian tolay nga hinnian dua nga anak na nga lallaki. 12Kan isa nga algaw, kunna ya uzzan nga nakkahi kan ya ama na, 'Ama, iddan mu kan yakan ngin ya erensiak kan ya kukuam.' Binillay gafen ya ama ya kukua na kan ya dua nga anak na. 13Kattu nappasa kan pia nga algaw, nelaku ya uzzan ngammin ya billay nan, en minang kan arayyu nga nasion. Ginasto na kannay ngammin ya kuartu na kan kinaloko. 14"Kattu nagasto na ngammin ngin, nesimmu kan hinnian dakal nga bisin kan nay nga interu nasion, en nabbisin igginan. 15Minang iggina sangaw gafen nakipaddian kan isa nga tolay nga maddian kan yan nga nasion. Binon na iggina kan ya pabbavian na ira tase ipatanggaw na ya bavi na ira. 16Megafu kan ya bisin na, ikayat na zinan ya mangan kan ya vunga karamansilit nga ipakapakan na kan ya bavi ira, ngam mari nepamavulun kan iggina. 17Kan panguzzanan, napanonot na ya napia kan iggina, en kunna sangaw kan ya nonot na, 'Ngammin ya babbonan y amak, massosobra ya mepakan kan ira, ngam yakan, hinnian nak kanniaw nga gunese matay kan bisin. 18Manoli nak kan y amak, en kayan ku kan iggina, "Ama, nakaliwat nak kan y Afu Dios kan langit en kan ikaw pay. 19Marik mepangngat nga mekuenta kan anak mun. Ngam kazzen ta alaban nak, en ikuenta nak laman ngin kan babbonan mu." ' 20"Sangaw, naggannukat iggina tase manoli kan ya ama na. Kannia arayyu peba iggina kan ya balay ra, nelahiban ya ama na iggina. Nasidduk ya futu na. Sangaw, nappaladdiaw iggina nga ziminafung kan iggina, en ginaggakkap en inamma-amman na iggina. 21Kunna nga nakkahi ya anak na, 'Ama, nakaliwat nak kan y Afu Dios kan langit en kan ikaw pay. Marik mepangngat nga mekuenta kan anak mun.' 22"Ngam ya kiningngua ya ama na, inakkulan na ya babbonan da ira, en kunna nga nakkahi, 'Alistuan nu nga alakan kanniaw tu kapianan nga sinnun, en isinnun nu kan iggina. Sakklangan en sapatutan nu iggina. 23Sangaw, angkayu alakan tu napataba nga mabbing nga baka, en partian nu. Masselebra tera, 24gafu ta yaw nga anak ku, nekuentak kan natay ngin, ngam sangaw, aggamatolay balattan. Nawawan iggina, ngam sangaw, natafulan ngin!' En namegafu ra nga nasselebra. 25"Kan yan nga orat, hinnian ya kaka nga anak na kan ya koman na. Kannia allabbet na nga minaranni kan ya balay ra, nagina na ya sunata, en nasingan na ya totolay nga mabbarayle. 26Sangaw, inakkulan na ya isa nga babbonan da, en pinovutan na nu hanna ya maddaggun nga mesimmu. 27"Kunna nga siminabbag, 'Luminabbet ngin ya wahim, en nepaparti ya amam tu napataba nga mabbing nga baka, gafu ta awan nga narakat/napot nga nesimmu kan iggina, en napia ya gawagawayan na nga luminabbet.' 28"Sangaw, nallussaw iggina, en ne-ammari na ya tumallung kan ya balay ra. Nallawan gafen ya ama na, en nekikkiddaw na kan iggina nga tumallung. 29Ngam kunna nga nakkahi kan ya ama na, 'Panonotan mu. Sinesserbian ta ka kan aru nga dahun, en ni kan missa nga zi ta ka pinarulot kan ya bilin mu. Maski kunna tian peba, awan vulvua/pulus neddan mu kan yakan maski laman mabbing nga kazzing tase awayyak en ya kakkofun ku nga masselebra. 30Ngam kattu luminabbet yan nga anak mu nga ginasto na ya kukuam kan minakkipaga nga babbay, minang mu lallaman ngin nepaparti tu napataba nga mabbing nga baka megafu laman kan iggina.' 31"Kunna ya ama na nga siminabbag, 'Anak ku, kanakanayun ka mamba nga hinnian kan yakan, en ngammin ya kukuak, kuam pay. 32Mepangngat kan masselebra en mayayat tera gafu ta yaw nga wahim, nekuentak kan natay ngin, ngam sangaw, aggamatolay balattan. Nawawan iggina, ngam sangaw, natafulan ngin.' "

will be added

X\