Lucas 13

1Kan yan nga tiempo, hinnian/asan dudduma/karruan nga totolay nga minang nakkahi kan y Jesus kan me-annung kan ya taga Galilea ira nga nepapatay y Pilato en nepekivu na ya giddahan da kan ya daha ya aya-ayam nga iyofresi/idedika ra kan y Afu Dios. 2Kunna y Jesus nga namovut kan ira, "Abbattan nu kazze/pano nga mas nadammat ya liwaliwat ira nay nga taga Galilea annek/ngam kan ya dammat ya liwaliwat ya kagitta ra nga taga Galilea gafu ta kunna tian ya nekapatay ra? 3Awan! Kayan ku kan ikayu nga nu mari nu mabbabawi, matay kayu pay nga megitta kan ira. 4En hanna pay ya pangabbattan nu nga me-annung kan ya mafulu se walu nga totolay nga inazzilan ya natomba nga torre kan ya Siloe en nakkakatay ra? Abbattan nu kazze nga mas nadammat ya liwaliwat da annek kan ya dammat ya liwaliwat ya kagitta ra nga maddian kan Jerusalem? 5Awan! Uli kayan ku kan ikayu nga, nu mari nu mabbabawi, matay kayu pay nga megitta kan ira." 6Sangaw, kinahi y Jesus yaw nga pangngarrian kan ira nga kunna, "Hinnian tolay nga hinnian tangafun nga igos na nga nemula kan ya koman na. Minang na iningan nu hinnian vunga na, ngam awan. 7Sangaw, kunna nga nakkahi kan ya mananggaw kan ya koman na, 'O, innan mu yaw nga igos! Kan tallu rahun, minang ku iningan nu navvunga, ngam awan. Gaggafen, tukaran en atturan mun, gafu ta awan nga serbi ya lusak nga nemulan na.' 8"Ya mananggaw kan ya koman, kunna nga nakkahi, 'Afu, porrian mu be laman kan yaw nga dahun gafu ta kokkoban ku ya pallehut na en abonowan ku. 9Nu mavvunga kan ya mappanget nga dahun, napia, ngam nu awan, ipatukad mun.' " 10Kan isa nga algaw nga angngilinan ya Judio ira, maddaggun y Jesus nga mattuldu kan ya isa nga sinagoga. 11Hinnian babay kannay nga inafunan narakat/napot nga espiritu kan mafulu se walu rahun ngin nga pinattalattakit na iggina. Pinaddungkug na iggina, gaggafen, mari na nga makapattadag kan natunung. 12Kattu nasingan y Jesus iggina, inakkulan na, en kunna nga nakkahi, "Babay, mammapia kan!" 13Sangaw, nepotun y Jesus ya ima na kan iggina, en nerame na nga nanadag kan natunung, en zinayarayaw na y Afu Dios. 14Ngam nallussaw ya panakallan kan ya sinagoga, gafu ta nappammapia y Jesus kan tolay kan ya algaw nga angngilinan da. Sangaw, kunna ya panakallan nga nakkahi kan ya totolay, "Hinnian annam nga algaw kan tangaligguan nga mepangngat kan ya attrabahu. Awayya nu ya umang kanniaw nga mapammapia kan maski hanna kan ira yan nga algaw, ngam mari na kan ya algaw nga angngilinan tera." 15Ngam kunna nga siminabbag y Afu Jesus, "Appen napia/Aginpipia kayu gafu ta kada isa kan ikayu, nu mawwaw ya nuang na onu ya asno na, babbaran na en iyangay na nga penuman kan ya dian ya danum maski algaw nga angngilinan tera, azze/awan kasi? 16Kunna tian pay, yaw nga babay nga isa kan ya gakagaka y Abraham nga kuenta binalud y Satanas kan mafulu se walu rahun, mepangngat nga mababbaran iggina pay kan sangaw nga algaw nga angngilinan tera, azze?" 17Kattu kinahi y Jesus yan, ngammin ya nammari kan iggina, napasiranan da, ngam nayayat ya dudduma nga totolay kan ngammin nga mekapakkapalat nga ganagannud nga kinikkingngua na. 18Sangaw, kunna y Jesus nga namovut, "Hanna ya ke-angngarrian ya appatul y Afu Dios? Hanna ya pangiparrian ku kan yan? 19Yaw ya ke-angngarrian na. Megitta kan vukal mustasa nga inalak ya isa nga tolay, en nemula na kan ya laguerta na. Nattuhu en nabbalin kan dakal nga mula, en nattuhut/nassubut ya mammanuk ira kan ya pangapanga na." 20Kunna nga namovut manin, "Hanna peba ya pangiparrian ku kan ya appatul y Afu Dios? 21Megitta kan lebadura nga inalak ya isa nga babay nga netangelunaw na kan ya tallu salub nga arina, en nemasa na, en kabalin na, nappaf ya interu masa." 22Kannia annaladalan da Jesus nga umang kan Jerusalem, nassibisibal/naddahadahat iggina nga nattuttuldu kan ya poblasion en barrio ira. 23Hinnian tolay nga namovut kan iggina nga kunna, "Afu, bissang/bissut kazze/pano laman ya karu ya totolay nga mapalliad nattaruk?" Kunna y Jesus nga siminabbag, 24"Kakkapan nu ya tumallung kan ya atazzit/assilat nga puerta, gafu ta kayan ku kan ikayu, napakaru ya totolay nga kakkapan da ya tumallung, ngam mari ra makatallung. 25Megitta y Afu kan ya isa nga makabbalay nga minang na ne-annusi/netusi ya puerta ya balay na. Ikayu, kuenta aggatadag kan liwan nga makatottottok kan yan nga puerta, en kunnu sangaw nga makkul, 'Afu, vukatan mu ya puerta!' "Ngam kunna sangaw nga tumabbag, 'Mari ta kayu inamammu en nu taga innia kayu.' 26"Sangaw, kunnu nga mangiparandam, 'Ngam Afu, nakiyatubang kami kan ikaw nga nangan en mininum, en nattuttuldu ka kan ya babalay mi peba.' 27"Ngam kunna manin nga makkahi, 'Mari ta kayu inamammu en nu taga innia kayu. Umarayyu kayu kan yakan, ikayu ngammin nga maka-angngua kan narakat/napot!' 28Mattangatangit en mangngarangaritam/mangngaratenget kayu nattaruk nu masingan nu ira Abraham, Isaac en y Jacob en ngammin ya profeta ira pay kan ya pappatulan y Afu Dios, ngam ikayu, melappak kan liwan. 29Hinnian pay nattaruk totolay kannay nga maggafu kan silawan, taggappan, zilod en ziraya, en makipangan da ngammin kan ya pappatulan y Afu Dios. 30Ginan nu yaw! Hinnian totolay nga mapozzan kan sangaw nga maponna nattaruk, en hinnian totolay nga maponna kan sangaw nga mapozzan nattaruk." 31Mismu kan yan nga orat, hinnian Fariseo ira nga minang kan y Jesus nga kunda nga nakkahi, "Napia nu mapanaw ka tiaw, en angka kan tanakkuan nga lugar, gafu ta ikayat na ka nga ipapatay y Herodes." 32Ngam kunna nga siminabbag y Jesus, "Angkayu kan iggina nay nga minangngilohot, en kayan nu kan iggina nga massigisige nak nga mamappaw kan narakat nga espiritu ira en mappammapia kan totolay kan sangaw nga algaw en so nu mataruk, en so nu isa nga algaw, mabalin kun ya trabahuk. 33Kayan ku kan ikayu nga mawag kan isigek ya gakkad ku kan sangaw nga algaw, so nu mataruk, en kan ya metunud nga algaw peba. On, gafu ta mari na awayya nga hinnian profeta nga mapatay kan tanakkuan nga lugar, nu azzi kan Jerusalem laman. 34"Ikayu nga maddian kan Jerusalem, pinatay nu ya profeta ira, en binarabarad nu kan batu ira nay nga binon y Afu Dios kan ikayu addet zi nakkakatay ra. Naming aru ngin nga ikayat ta kayu nga ammungan kan kagitta ya angngammung ya isa nga bakat kan ya pipiyak na kan ya gannung ya payak na, ngam ne-ammari nu. 35Ginan dak! Megafu kan yan, mapanawan nattaruk ya balay nu. Kayan ku kan ikayu nga mari rak uli masingan ngin addet zi kayan nu yaw nga me-annung kan yakan, 'Mabendisionan ya umang kan ittera nga hinnian kan iggina ya paka-awayya y Afu Dios!' "

will be added

X\