Lucas 12

1Hinnian/Asan minarivu nga totolay nga narammung kannian, en gafu ta napakaru ra, nakkarabatabatay ra. Namegafu y Jesus nga makiergo kan ira, diebit kan ya disipulo na ira. Kunna nga nakkahi, "Mappalan/Memuhud kayu kan ya aggappa-appen/aggaggusugusid ya Fariseo ira nga megitta kan lebadura. 2Awan nga natakkuban kan sangaw nga mari mavukatan nattaruk, en awan nga nesussuk kan sangaw nga mari mammuan nattaruk. 3On, gafu ta, ya hanna laman gafen nga kinahi nu kan sekreto, magina kan ya paratubangan nattaruk. En ya hanna laman nga ne-ananabid nu kan ya isa nga tolay kan ya unag ya balay, mepalapalappat nattaruk kan ya utun ya atap ira." 4"Kayan ku kan ikayu nga kakkofun ku, mari nu italaw ya totolay nga makapatay kan ya gibbaggian nu, en kabalin na, awan nga makua ran kan ikayu. 5Kayan ku kan ikayu ya italaw nu zinan. Italaw nu ya hinnian paka-awayya na nga mangilappak kan ya gikkaralluan nu kan infiernu kabalin ya ammatay na kan ikayu. On, kayan ku kan ikayu nga iggina zinan ya italaw nu. 6"Mari kazze/pano malaku ya lima nga zinnat kan bissang/bissut nga kantidad? Maski kunna tian, ni isa kan ira nga porrian y Afu Dios. 7Maski peba ya ahuk nu, nabilang ngammin. Mari nu mattalaw gafen, gafu ta mas nabalor kayu kan iggina annek/ngam kan ya napakaru nga zinnat." 8"Kayan ku kan ikayu, ya innia laman nga mangikahi kan ya angngurug na kan yakan kan ya paratubangan ya totolay, yakan nga Anak Tolay, kunna tian pay ya kuan ku nattaruk kan ya paratubangan ya anghel ira y Afu Dios. 9Ngam ya innia laman nga mangilimad kan ya angngurug na kan yakan kan ya paratubangan ya totolay, kunna tian pay ya kuan ku nattaruk kan iggina kan ya paratubangan ya anghel ira y Afu Dios. 10"Ya innia laman nga mergo kan narakat/napot nga mekontra kan yakan nga Anak Tolay, awayya na nga mapakoma. Ngam ya innia laman nga mergo kan narakat nga mekontra kan ya Espiritu Santo, mari na mapakoma. 11"Nu iyatubang da kayu kan ya totolay kan ya sinagoga ira onu ya mammoray ira onu ya hinnian paka-awayya ra, en kuan da yan megafu kan ya angngurug nu kan yakan, mari nu kavurungan nu hanna ya itabbag nu onu hanna ya kayan nu kan ira. 12On, gafu ta, kan yan nga orat, ya Espiritu Santo ya mangipakammu kan ikayu kan ya mepangngat nga kayan nu." 13Sangaw, hinnian tolay kan ya ammung nga kunna nga nakkahi kan y Jesus, "Mestru, kayan mu kan ya wahik nga mawag kan ibillay nak kan ya neperensia ya ama mi kan ikami." 14Ngam kunna y Jesus nga siminabbag, "Wahi, awan nga paka-awayyak nga maddisidi kan ya mepangngat nga billay nu, en marik natunnak nga mamillay kan ikayu kan ya erensian nu." 15Sangaw, kunna y Jesus nga nakkahi kan ira ngammin, "Ginan dak! Mappalan kayu kan ya akkelug nu kan hanna laman nga gannud. On, gafu ta bakkan kan ya karu ya kukua ya innia laman nga tolay ya paddependeyan ya kurug nga attolay na." 16Sangaw, kinahi y Jesus yaw nga pangngarrian nga kunna, "Hinnian riku nga napakaru ya na-apit kan ya koman na. 17Kunna nga nappanonot, 'Hanna pano ya kuan ku? Makkurang nak kan pangarimanan ku kan ngammin nga apit ku. 18Yaw gafen ya kuan ku! Ipasassat ku ya abayok/kamalig-ku ira, en mappapatadag nak kan mas daddakal nga pangarimanan ku kan ngammin nga apit ku en ya dudduma/karruan peba nga kukuak. 19Sangaw, kungku kan ya nonot ku, "Hinnian kan yakan ngammin ngin ya pammakapianan nga mawag ku kan aru nga dahun. Mari mawag kan mattrabahu nak kun. Ya kuan ku laman ngin, mangamangan, mamippissa, en maddibidibersion." ' 20"Ngam kunna y Afu Dios nga nakkahi, 'Ikaw nga ababbaw ya appanonot mu! Matay ka mismu kan yaw nga gabi. Innia gafen sangaw ya makakkua kan ngammin ira yan nga kukuam nga inarimanan mu?' " 21Sangaw, nebalin y Jesus nga kunna nga nakkahi kan ya totolay, "Kunna tian ya mesimmu kan ya innia laman nga mangariman kan napakaru nga kukua para kan iggina pe laman, ngam mari na riku kan ya pangikuentan y Afu Dios kan iggina." 22Kunna y Jesus nga nakkahi kan ya disipulo na ira, "Gaggafen, kayan ku kan ikayu, mari nu kavurungan ya attolay nu, nu hanna ya kanan nu, onu ya isinnun nu kan ya gibbaggian nu. 23On, gafu ta mas nabalor ya angat nu annek kan makan, en mas nabalor ya gibbaggian nu annek kan sinnun. 24Panonotan nu ya gayang ira. Mari ra mabbini onu mangapit, en awan da nga parimanan onu abayaw, ngam tolayan y Afu Dios ira. Azzi mas kan ikayu, gafu ta mas nabalor kayu annek kan ya mammanuk ira. 25"Awayya nu kazze mamba amungan ya kanaddu ya attolay nu maski kan tangorat megafu kan ya avvuruvurung nu? 26Gaggafen, gafu ta awan nga makua ya avvuruvurung nu kan me-annung kan yan nga bissang nga gannud, ka-am ta kavurungan nu ya dudduma nga pakkatolayan nu? 27Panonotan nu ya addakal ya maseta ira. Mari ra mattrabahu onu maddahet kan sinnun da. Ngam kayan ku kan ikayu, maski y Solomon nga riku nga patul kattun, kattu nabbisti iggina kan kakastan, mari negitta ya kasta ya sinnun na kan ya lappaw ya isa nga maseta kan ya tanap nga kuenta sinnun na. 28Nu kunna tian ya anninnun y Afu Dios kan ya maseta ira nga hinnian kan tanap kan sangaw nga algaw, en so nu mataruk medumbag/medungu kan afi, azzi mas kan ikayu, ikayu nga bissang ya angngurug nu. 29"En mari nu agganonot ya kanan nu en ya inuman nu, en mari nu mavvuruvurung. 30On, gafu ta, ya tolay ira nga mari makakammu kan y Afu Dios, agganonot da ngammin ira yan. Y Ama nu kan langit, ammu na mamba ya mawag nu. 31Ngam panapanonotan nu ya appatul y Afu Dios, en iddan na kan ikayu ira yan en ya dudduma peba nga mawag nu. 32"Ikayu nga pilippipia nga kakavulun ku, mari nu mattalaw, gafu ta ikayat y Afu Dios nga Ama nu nga isipat ikayu kan ya appatul na. 33Ilaku nu ya kukua nu, en mangiddan kayu kan ya pobre ira. Kannia angngua nu kan yan, kuenta mamanday kayu kan pitaka nu nga mari maddana. Ya ikayat ku nga kayan, arig mangunonud kayu kan kukua nu ira kan langit nga mari vulvua/pulus mofut. Awan nga akkokot nga makaranni kannay, onu angit/angngat nga makadaral. 34On, gafu ta, maski kanna be tiaw ya dian nga kononuran ya kukua nu ira, yan pay ya agganonot nu." 35"Mawag kan siggaparan kayu nga mattalattaron kan ya annolik nga megitta kan minasserbi ira nga siggaparan en aggasibat ya gi-allamparanan da nga mattalattaron kan ya allabbet ya afu ra nga maggafu kan boda. Nu lumabbet iggina nga mattottok, irame ra vukatan ya puerta. 37Mabendisionan ira nay nga minasserbi nga madatangngan ya afu ra nga aggalukag kannia allabbet na. Kayan ku kan ikayu, kabalin na nga mattali kan ya sinnun na, panutturan na ira kan ya bikat ya lamesa, en pakanan na ira. 38Uli kayan ku kan ikayu nga mabendisionan ira yan nga minasserbi nu madatangngan ya afu ra ira nga siggaparan maski kan tangnga gabi onu kabalin na. 39"Takkilalan nu yaw. Nu ammu zinan ya makabbalay ya orat nga aggangay ya akkokot, mari na ituluk nga matallung ya balay na. 40Kunna tian pay kan ikayu, mawag kan siggaparan kayu, gafu ta manoli nak nga Anak Tolay kan orat nga mari nu abbattan." 41Sangaw, kunna y Pedro nga namovut kan y Jesus, "Afu, kinahim kazze yan nga pangngarrian kan ikami laman onu kan ngammin nga totolay?" 42Kunna y Afu Jesus nga siminabbag, "Kinahik yan kan ya innia laman. Innia gafen ya mapammakatalakkan en masirib nga minasserbi nga sinunnak ya afu na nga ingkargadu kan ya balay na kannia kawan na nga iggina ya mangiddan kan ya kakavulun na kan ya billay ra nga kanan da kan ya gagangay nga orat? 43Iggina ya minasserbi nga madatangngan ya afu na kannia allabbet na nga mamaraparulot kan ya nepakua na kan iggina. Mapalad iggina. 44Kurug ya kayan ku kan ikayu, tunnakkan na iggina nga ingkargadu kan ngammin nga kukua na. 45Ngam nu kunna yan nga minasserbi kan ya nonot na, 'Mabayag peba ya allabbet ya afuk,' en nu pegafanan na sangaw nga palapalukan ya kakavulun na nga minasserbi nga lallaki en babbay, en nu mangamangan, mamippissa en melellaw laman iggina, 46madatangngan nattaruk ya afu na iggina kan algaw nga mari na abbattan en kan orat nga mari na ammu. Sangaw, nelot/nafulotan ya angngastigo ya afu na kan iggina, en ipetadday na iggina kan ya mari mamarulot ira. 47"Ya minasserbi nga makakammu kan ya uray ya afu na, ngam mari na napparan kan ya allabbet na, en mari na kiningngua ya uray na, nelot ya kakastigo na. 48Ngam ya minasserbi nga mari makakammu kan ya uray ya afu na, en nakakua kan ganagannud nga mepangngat kan ya kakastigo na, makastigo kan bissang. On, gafu ta, ya innia laman nga neddannan kan aru, aru pay nattaruk ya mennanaman nga malak kan iggina. En ya innia laman nga mapammakatalakkan kan mas aru, mas aru pay nattaruk ya mawag kan itoli na." 49Nassige y Jesus nga kunna nga nakkahi, "Minang nak kan ya utun lusak tase mangiwarak nak kan afi. Pare zinan ta gumatagatang ngin. 50Nelot ya dandam nga mawag kan pasan ku nattaruk nga alale kapalammaddan ku, en marik makapemamak addet kan ya kesimmu na. 51Abbattan nu kazze nga minang nak kan ya utun lusak nga mangiyangay kan imamak? Awan! Kayan ku kan ikayu nga mari kan imamak nu azzi aggurungay. 52Mamegafu kan sangaw, nu hinnian lima nga makkarabbalay, makkaratutturiya ra, tallu kontra dua, en dua kontra tallu. 53Makkaratutturiya ya ama ira en ya anak da ira nga lallaki. Makkaratutturiya ya ina ira en ya anak da ira nga babbay. Makkaratutturiya pay ya katuangan nga babbay en ya manuwang da ira nga babbay." 54Sangaw, kunna y Jesus nga nakkahi peba kan ya totolay, "Nu masingan nu nga makkunam kan ya taggappan, kayan nu mamba nga mappanget nga moran, en kurug nga moran. 55Nu maggafu ya angin kan ziraya, kayan nu mamba nga nelot sangaw ya patu, en kurug nga mapatu. 56Appen napia/Aginpipia kayu gafu ta ammu nu ya kebalinan ya masingan nu nga mesimmu kan ya utun lusak en kan langit, ngam ya kebalinan ya masingisingan nu nga mesissimmu kan ira yaw nga algaw, ka-am ta mari nu vulvua ammu?" 57"Ka-am ta mari nu madisidi ya mepangngat nga kuan nu? 58Nu hinnian mangakusa kan ikaw, kuan mu ya panda mawayyam nga makiyareglo kan iggina kannia annaladalan nu peba, tase mari na ka piddangngan nga iyatubang kan ya hues, en iyalawat na ka sangaw kan ya guardia nga mangikarsel kan ikaw. 59Kayan ku kan ikaw, marim vulvua makalawan kannay addet zi mapagan mu ya gatut mu, maski ultimu sentabo."

will be added

X\