Lucas 11

1Kan isa nga algaw, hinnian/asan y Jesus kan isa nga lugar nga maddasal. Kabalin na, hinnian disipulo na nga nakkahi kan iggina, "Afu, kazzen ta tulduan mu ikami nga maddasal kan kagitta pay ya nepattuldu y Juan nga Minabbawtiso kan ya disipulo na ira." 2Y Jesus, kunna nga nakkahi, "Nu maddasal kayu, kunna tiaw ya addasal nu: 'Ama, madayarayaw zinan ya ngahan mu. Pare zinan ta mamegafu ya appatul mu kan ya utun lusak. 3Iddan mu ya kanan nga mawag mi kan yaw nga algaw, 4en pakoman mu ikami kan ya liwaliwat mi, gafu ta pakoman mi pay ngammin ya nalliwat kan ikami. Marim ipamavulun nga megiya kami kan tentasion.' " 5Sangaw, hinnian peba pangngarrian nga kinahi na kan ira nga kunna, "Aggangarrian, nu hinnian bisita nga lumabbet kan ya balay ya innia laman kan ikayu, ngam mesimmu nga awan nga ipakan mu, sangaw, angka kan ya balay ya isa nga kofun mu maski tangnga gabi en kummu nga makkahi, 'Kofun, iddannan nak be laman kan tallu nga pan. 6On, gafu ta hinnian kalalabbet nga bisitak nga hinnian angayan na, en awan ku nga ipakan kan iggina.' 7"Ngam ya tolay nga hinnian kan ya unag ya balay, kunna sangaw nga tumabbag, 'Mari nak istorbowan! Naserran ya puerta iran, en agga-idda kami ngammin ngin en ya anak ku ira pay. Marik awayya gumangun ngin nga mangiddan kan hanna laman nga mawag mu.' " 8Nabalin y Jesus ya pangngarrian na nga kunna nga nakkahi, "Kayan ku kan ikayu, maski peba nu mari na ikayat ya gumangun nga mangiddan kan ikaw kan hanna laman nga mawag mu, en kuan na yan zinan megafu kan ya pakakkofun na kan ikaw, gumangun iggina balalaman, en iddan na ngammin ya mawag mu gafu ta marim immangan ya akkikkiddom. 9Makakikkiddaw kayu, en meddannan kayu. Makatafataful kayu, en makataful kayu. Makatottottok kayu kan ya puerta y Afu, en mavukatan para kan ikayu. 10On, gafu ta, ngammin ya makakikkiddaw, meddannan; ya makatafataful, makataful; en ya makatottottok, mavukatan para kan iggina. 11Nu makkiddaw ya anak ya innia laman kan ikayu nga ama kan manangat/isira, innia kan ikayu ya mangiddan kan ziriyan imbes kan manangat? 12Onu nu makkiddaw iggina kan ilug, malagama/alakkra kazze/pano ya iddan mu kan iggina? 13Ikayu peba nga narakat/napot, nu ammu nu ya mangiddan kan napia nga regeregalu kan ya gi-anakan nu, yammanno kan y Ama tera kan langit, iddan na ya Espiritu Santo kan ya innia laman nga makakikkiddaw kan iggina." 14Kan isa nga algaw, namappaw y Jesus kan narakat nga espiritu nga nappomal kan ya isa nga tolay. Kattu napappaw ya narakat nga espiritu, nakakergo ya umal, en nalagat ya totolay. 15Ngam hinnian dudduma/karruan kan ira nga kunda nga nakkahi, "Y Beelzebub nga prinsipe ya narakat nga espiritu ira, iggina ya nangiddan kan iggina kan ya pakapangngua na nga makapappaw kan narakat nga espiritu ira kan ya totolay." 16Hinnian dudduma kan ira nga nayat nga namurba kan y Jesus nga mangngua kan dakal nga milagro nga pakasinnan kan naggafu ya pakapangngua na kan langit. 17Ngam ammu y Jesus ya hinnian kan ya ginnonotan da, en kunna nga nakkahi gafen, "Kada pappatulan nga makkorontra ya totolay na pe laman, madaral en mangultimu. En ya makkarabbalay nga makkorontra ra pe laman, maggurungay. 18Kunna tian pay, nu kontran y Satanas ya baggi na pe laman, annianna/kunnasi/manna ya annayun ya pappatulan na? Kinahik yan gafu ta kinahi nu nga y Beelzebub ya nangiddan kan ya pakapangnguak nga makapappaw kan narakat nga espiritu ira kan ya totolay. 19"Nu makapappaw nak kan narakat nga espiritu ira megafu kan ya pakapangngua nga neddan y Beelzebub kan yakan kan kagitta ya kinahi nu, innia sangaw ya abbattan nu nga nangiddan kan ya kakavulun nu kan ya pakapangngua ra nga makapappaw kan narakat nga espiritu ira, y Beelzebub onu y Afu Dios? Ammu ra nga bakkan kan y Beelzebub, nu azzi y Afu Dios ya nangiddan kan ya pakapangngua ra. Gaggafen, ya kakavulun nu mismu ya mamakurug nga mari kurug ya kinahi nu nga me-annung kan yakan. 20Ngam nu ya Espiritu Santo y Afu Dios ya nangiddan kan ya pakapangnguak nga makapappaw kan narakat nga espiritu ira, yan gafen ya sennial nga luminabbet ngin kan ikayu ya tiempo nga appatul y Afu Dios kan ya totolay. 21"Nu hinnian tolay nga nasikan en kompleto ya armas na, en guardian na ya balay na, awan nga mesimmu kan ya kukua na. 22Ngam nu hinnian tolay nga mas nasikan annek/ngam kan iggina nga manallung kan iggina, affutan na iggina, en alakan na ya armas ya makabbalay nga nammakatalakkan na nga pangitalak kan iggina. Sangaw, bibillayan na kan ya kakavulun na ya inalak na. 23"Ya innia laman nga mari mevulun kan yakan, mangontra kan yakan; en ya innia laman pay nga mari makipanguffun kan yakan nga mangammung kan ya totolay nga mevulun kan yakan, mappagurungay mamba." 24"Nu hinnian narakat nga espiritu nga mapanaw kan ya tolay nga inafunan na, mattotoyang iggina kan namaha nga lugar ira nga makatafataful kan pamangattan na. Nu awan na nga matafulan, kunna kan ya nonot na pe laman 'Manoli nak kan ya tolay nga dana inafunan ku.' 25Kannia allabbet na, masingan na nga narenu en nenggud ngin. 26Sangaw, umang iggina nga mangarut kan pitu nga narakat nga espiritu nga mas narakat annek kan iggina pe laman tase umang da ngammin nga umafun nga maddian kan yan nga tolay, en mas narakat gafen sangaw ya attolay na kan ya panguzzanan annek kattun." 27Kabalin ya nepakkahi y Jesus kan ira yan, hinnian babay kan ya ammung nga kunna nga nangikullet kan iggina, "Mabendisionan ya inam nga nangiyanak en nappasusu kan ikaw." 28Ngam kunna y Jesus nga nakkahi, "Mas mabendisionan ya tolay ira nga maggiggina en mamaraparulot kan ya ergo y Afu Dios!" 29Kattu umara-aru ya totolay, kunna y Jesus nga nakkahi, "Avva/Hanna ma ya dakkut nu nga totolay nga matolay kan sangaw! Ikayat nu ya makasingan kan milagro, ngam awan nga milagro nga mepasingan kan ikayu nu azzi laman ya milagro nga megitta kan ya nesimmu kan y Jonas kattun. 30On, gafu ta, ya nesimmu kattun kan y Jonas, yan ya pamakurug kan ya totolay kan ya siudad ya Nineve nga binon y Afu Dios iggina kan ira. Kunna tian pay, hinnian mesimmu kan yakan nga Anak Tolay nga pamakurug kan ya totolay nga matolay kan sangaw nga binon nak y Afu Dios kan ikayu. 31Nattaruk kan ya algaw nga ammanunut y Afu Dios kan ya totolay kan yaw nga mundo, ya babay nga patul kattun kan ya isa nga nasion kan ziraya, manadag iggina nga mamakurug nga narakat kayu nga matolay kan sangaw, gafu ta alale ya pamandanan ya lusak ya naggafanan na tase umang na ginan ya nasirib nga ergo ira y Solomon nga patul ya nasion tera kattun. Kayan ku kan ikayu nga hinnian mas atanang ya kekuentan na annek kan y Solomon nga hinnian kanniaw ngin. 32Nattaruk kan ya algaw nga ammanunut y Afu Dios kan ya totolay kan yaw nga mundo, ya totolay nga naddian kan ya siudad ya Nineve kattun, manadag da nga mamakurug nga narakat kayu nga matolay kan sangaw, gafu ta nabbabawi ra kan ya liwaliwat da kannia nepakagina ra kan ya nepalapalappat y Jonas. Kayan ku kan ikayu nga hinnian mas atanang ya kekuentan na annek kan y Jonas nga hinnian kanniaw ngin." 33"Awan nga tolay nga mangisibat kan allamparan en isussuk onu takkuban na kan laba, nu azzi ikkua/ippay na pe laman kan ya aggipotunan tase ya tolay ira nga tumallung, masingan da ya nawag na. 34Ya matam, kuenta zilag kan ya baggim. Nu napia ya matam, arig manawahan ya interu baggim. Ngam nu mari napia ya matam, arig kokopan/kallap ya interu baggim. 35Memmuhud ka gafen tase mari kokopan ya nawag nga hinnian kan ya unag ya baggim. 36Gaggafen, nu manawahan ya interu baggim nga awan vulvua/pulus parte nga kokopan, manawahan ka kan napia nga megitta kan zilag nga mangnawag kan ikaw." 37Kabalin y Jesus nga nergo, hinnian Fariseo nga nangimbita kan iggina nga umang makipangan kan iggina. Kattu siminallung da kan ya balay na, nanuttud da kan ya bikat ya lamesa. 38Ngam mari vinulun y Jesus ya kustumbre ra segun kan ya relihion da kannia abbaggu ra kallie ra mangan. Nakkapalat ya Fariseo kattu nasingan na yan. 39Kunna y Afu Jesus gafen nga nakkahi kan iggina, "Ikayu nga Fariseo, ya kustumbre nu, baggawan nu mamba kan napia ya liwan ya agginuman en pinggan nu ira, ngam kan ya kononaggan nu, nelot/nafulotan ya darogat en dakkut nu. 40Ulapa kayu! Y Afu Dios nga namaratu kan ya liwan, bakkan kazze kan iggina ya namaratu kan ya unag pay? 41Iddan nu lahud kan ya pobre ira ya hinnian kan ya agginuman en pinggan nu ira, en nu kuan nu yan, marrenu kayu, mari laman kan ya liwan nga kasinnan nu, nu azzi kan ya kononaggan nu pay. 42"Anakkue/Kallallak kayu pay nga Fariseo. Iddan nu mamba kan y Afu Dios ya pakkamafulu ya kappattan nga parrikadu nu, ngam popporrian nu mamba nga kuan ya natunung kan ya ikattolay nu, en awan nga ayat nu kan y Afu Dios. Kiningngua nu zinan ira yaw nga popporrian nu, en mari nu zinan porrian ya paddaggunan nu nga kukukuan. 43Anakkue kayu pay nga Fariseo, gafu ta, nu angkayu kan ya sinagoga, ikakayat nu ya manuttud kan ya kapianan ira nga tuttud. En nu angkayu kan plasa, ikakayat nu ya kakiddiot nu kan ya totolay. 44Anakkue kayu pay, gafu ta megitta kayu kan livun ira nga mari namarkan nga ibatabatay laman ya totolay nga mari ra ammu." 45Hinnian mestru kan ya dorob nga kunna nga nakkahi kan y Jesus, "Mestru, kannia nepakkahim kan ira yan, pinasiranan mu ikami pay." 46Kunna y Jesus nga nakkahi, "On, ikayu nga mestru ira kan ya dorob, anakkue kayu pay, gafu ta pakattuan nu ya totolay kan nadaddammat nga karga nga nararriat nga kattuan, ngam mari nu mamba vulvua tukkallan ira, maski kan ya isa laman nga kuramay nu. 47"Anakkue kayu pay, gafu ta maka-angngua kayu kan pantion ira para kan ya profeta ira nga pinatay ya ginafu nu ira kattun. 48Nu kunna tian gafen, kurug nga ipasingan nu nga umanahut kayu kan ya kiningngua ya ginafu nu ira, gafu ta ira ya namatay kan ya profeta ira, en ikayu ya mappabahu kan ya netanamman da ira. 49Y Afu Dios nga masirib, ammu na kattun nga mesimmu ira yan. Kunna gafen nga nakkahi, 'Mabbon nak nattaruk kan profeta ira en apostol ira kan ya totolay. Hinnian dudduma kan ira nga patayan da, en hinnian dudduma kan ira nga tattazzian da.' 50Megafu kan yan, ya totolay nga matolay kan sangaw ya mapaliwat megafu kan ya nepammatay ya ginafu nu ira kan ngammin ira nay nga profeta kattun namegafu kattu nekaparatu ya mundo, 51namegafu kattu nekapatay y Abel nga anak y Adan addet kattu nekapatay y Zacarias kan ya lalantaran ya templo kan Jerusalem kan ya naddatanan/nallatanan ya angngiyofresian/angngidedikan kan aya-ayam en ya Nasantuan nga Kuarto. On, kayan ku manin kan ikayu, mapaliwat kayu nga matolay kan sangaw megafu kan ya nekapatay ra ngammin. 52"Anakkue kayu pay nga mestru ira kan ya dorob, gafu ta nelimad nu kan ya totolay ya pakakammu kan ya uray y Afu nga alale inazzan nu ya annusi kan ya paddianan ya pakakammu. Ikayu, mari nu mamba tumallung, en ya mayat ira nga tumallung, ginamman nu." 53Kannia appanaw y Jesus kannay, ya mestru ira kan ya dorob en ya Fariseo ira, pinegafanan dan ya nelot nga annuriya ra kan iggina, en pinurba ra iggina nga mergo kan me-annung kan aru nga ganagannud 54kannia annaful da kan pamaliwatan da kan iggina nu hinnian makahi na nga mari mepangngat.

will be added

X\