Lucas 10

1Kabalin na yan, nanunnak y Afu Jesus kan pitufulu se dua nga tanakkuan kan ya mafulu se dua nga disipulo na, tase ponnan na ira nga umang nga taggidua kan kada poblasion en barrio nga pappangetan na nga angayan. 2En kunna nga nakkahi, "Napakaru ya ma-apit, ngam pilippipia ya mangapit ira. Idasal nu gafen kan y Afu Dios nga makakkua kan ya ma-apit, tase mabbon iggina peba kan mangapit ira nga makipangapit. 3Mappanget kayu nga mapanaw. Dandamman nu yaw: bonan ta kayu nga megitta kan karneru kan ya nattarangngan ya totolay nga megitta kan na-apporay nga tanam/tanang nga atu. 4Mari nu mangivulun kan pitaka, bayong onu pattallian nu nga sandallia, en mari nu mememmang nga makiddiot kan maski innia kan ya dalan. 5Kannia allabbet nu kan maski hanna nga balay, kayan nu bitan, 'Pare zinan ta imamak ya hinnian/asan kan yaw nga balay.' 6Nu hinnian tolay kannay nga mayat kan imamak, makipaddian kan iggina ya imamak nga itallung nu. Ngam nu awan nga mayat kannay, manoli ya imamak kan ikayu. 7Ya makabbalay nga mangalaba kan ikayu, yan laman ya pakipaddianan nu en ya pakipanganan en paki-enuman nu kan ya itunnad da kan ikayu, gafu ta mepangngat nga matandanan ya innia laman nga mattrabahu. Mamakesa kayu kan pamalayan. 8Maski hanna nga babalay nga labbetan nu nga alaban da kayu, kanan nu ya hanna laman nga metunnad kan ikayu. 9Pammapian nu ya makkatakit ira kan yan nga babalay, en kayan nu kan ira, 'Minaranni ngin ya appatul y Afu Dios kan ikayu.' 10"Ngam nu makalabbet kayu kan isa nga babalay nga mari ra kayu alaban, angkayu kan ya dalan en kunnu nga makkahi kan ya totolay, 11'Maski ya gahuk ya babalay nu nga guminafut kan ya gittakan mi, tattakan mi nga sennial nga nakaliwat kayu. Ngam mawag kan mammuan nu nga minaranni ya appatul y Afu Dios kan ikayu.' 12Kayan ku kan ikayu, mas nalampaw ya ammanunut y Afu Dios kan ya totolay nga naddian kan ya siudad ya Sodoma kattun annek/ngam kan ya ammanunut kan ya totolay kan yan nga babalay nattaruk kan ya algaw nga ammanunut na kan ya totolay." 13"Anakkue/Pakallallak kayu pay nga maddian kan ya babalay ya Corazin! Anakkue kayu pay nga maddian kan ya babalay ya Betsaida! Ya milagro ira nga kinikkingnguak kan ya gibbabalayan nu, nu nakua ra zinan kan ya siudad ya Tiro en ya siudad ya Sidon kattun, nabbabawi zinan ya totolay kannay, en nassinnun da zinan kan gonggoti/kustal, en nanuttud da zinan kan avu, en vinururan da zinan ya gi-ulluan da kan avu kannia angngipasingan da kan ya abbabawi ra kan ya liwaliwat da. 14Mas nalampaw ya ammanunut y Afu Dios kan ya maddian ira kan Tiro en kan Sidon kattun annek kan ya ammanunut na kan ikayu nattaruk kan ya algaw nga ammanunut na kan ya totolay. 15En ikayu pay nga maddian kan ya siudad ya Capernaum, abbattan nu kazze/pano nga me-utun kayu kan langit? Awan! Mapatuvvu/Mapatabbraw kayu nattaruk kan infiernu." 16Kunna y Jesus peba nga nakkahi kan ya bonan na ira, "Ya innia laman nga maggina kan ikayu, kuenta ginan nak pay. En ya innia laman nga mammari kan ikayu, kuenta ammari nak pay. En ya mammari kan yakan, kuenta ammari na pay y Afu Dios nga nabbon kan yakan." 17Nattoli ya pitufulu se dua nga siggapayayat. Kunda nga nakkahi kan y Jesus, "Afu, maski ya narakat/napot nga espiritu ira, pinarulot da ikami kannia nepammandu mi megafu kan ya ngahan mu nga mapanaw ra." 18Kunna y Jesus nga siminabbag, "Nasingan ku ya nekatanag/nekakabok y Satanas kan kagitta tallit nga naggafu kan langit. 19Kurug nga iniddannan ta kayu kan paka-awayya nga mangibatay kan ziriyan en malagama/alakkra ira en mamatuluk kan ngammin nga paka-awayya y Satanas nga kontra tera, en awan vulvua/pulus makapatakit kan ikayu. 20Ngam ya nepammarulot ya narakat nga espiritu ira kan ikayu, bakkan kan yan ya gafu na kan mayayat kayu zinan nu azzi ya neketurak ya gingngahanan nu kan langit." 21Kan yan nga orat, nelot/nafulotan ya payayat y Jesus megafu kan ya Espiritu Santo, en kunna nga nakkahi, "Ama, Afu ya langit en ya lusak, mappabalat nak kan ikaw, gafu ta marim nepakammu ira yaw nga ganagannud kan ya totolay nga mangabbat nga masirib en ma-utak da, nu azzi nepakammum kan ya abbing ira. On, Ama, gafu ta yan ya napia nga urem." 22Sangaw, kunna nga nakkahi kan ya tolay ira, "Neddan y Amak kan yakan ya paka-awayyak kan ngammin nga ganagannud. Awan nga makakammu nu innia nak nu azzi y Amak laman, en awan pay nga makakammu nu innia y Amak nu azzi yakan laman nga Anak na en ya innia laman nga ikayat ku nga pangipakammuan kan iggina." 23Sangaw, kattu ira laman, inatubang y Jesus ya disipulo na ira, en kunna nga nakkahi, "Mabendisionan ya makasingan ira kan ya masingisingan nu! 24Kayan ku kan ikayu nga aru ya profeta en patul ira kattun nga ikayat da nga masingan zinan ya masingisingan nu kan sangaw, ngam mari ra nasingan. Ikayat da pay nga magina zinan ya magiggina nu kan sangaw, ngam mari ra nagina." 25Hinnian isa nga mestru kan ya dorob nga nanadag gafu ta ikayat na nga purban y Jesus. Kunna nga namovut, "Mestru, hanna ya mawag nga kuan ku tase malawat ku ya angat nga awan na nga panda?" 26Ngam kunna bitan y Jesus nga namovut kan iggina, "Hanna ya kayan ya dorob? Hanna ya mabibbid mu kannay?" 27Kunna ya tolay nga siminabbag, "Ayatan mu y Afu nga Dios mu kan ya interu futum, interu karalluam, interu sikan mu en interu nonot mu. En ayatan mu ya karubam kan kagitta ya angngayat mu kan ya baggim." 28Kunna y Jesus nga nakkahi, "Fustu yan nga netabbag mu. Kanakanayun nga kuan mu ira yan, en malawat mu ya angat nga awan na nga panda." 29Ngam ikayat ya tolay nga ipasingan nga hinnian napia nga gafu na nay nga povut na, en kunna peba gafen nga namovut kan y Jesus, "Innia ya ikuentak kan karubak kannia ammulun ku kan yan nga dorob?" 30Kunna y Jesus nga siminabbag, "Hinnian tolay nga napanaw kan Jerusalem nga naddahut nga umang kan ya babalay ya Jerico. Hinnian tulisan ira nga nadafung na. Inazzan da ya sinnun na, pinalapaluk da, en pinanawan da iggina nga kekkemmatay. 31Sangaw, nesimmu nga hinnian pari nga nanalan kannay. Kannia nepakasingan na kan ya tolay, nakkani iggina kan ya tangapingit ya dalan en sinalebaran na iggina. 32Kunna tian pay ya kiningngua ya isa nga Levita. Kannia nepakasingan na kan ya tolay, nakkani pay kan ya tangapingit ya dalan en sinalebaran na. 33Ngam hinnian Samaritano nga manalan pay kan yan nga dalan nga nakasimmu kan yan nga tolay. Kattu nasingan na, nekallak na. 34Inarannian na iggina, pinakarennuan na ya biad na ira kan binarayang, vinururan na kan denu olivo, en binabbaddan na. Sangaw, netakay na kan ya asno na, ne-angay na kan pakkaserowan, en nesige na ya nepannanggaw na kan iggina kannay. 35Kan kamatarukan na, iniddannan na kan kuartu tu tolay nga makakkua kan ya pakkaserowan, en kunna nga nakkahi, 'Tanggawan mu yaw nga tolay. Nu mas aru ya magastom peba annek kan yaw, pagan ku kan ikaw so nu manoli nak.' " 36Kattu nabalin y Jesus yan nga istoria na, kunna nga namovut kan ya mestru kan ya dorob, "Kan ya pangabbattan mu, innia kan ira nay nga tallu ya nangipasingan kan fustu nga karuba ya tolay nga ginavvat ya tulisan ira?" 37Ya mestru kan ya dorob, kunna nga siminabbag, "Ya tolay nga nangikallak kan iggina." Kunna y Jesus nga nakkahi, "Angka gafen ngin, en kanakanayun nga kuan mu ya kunna tian." 38Kannia annaladalan da Jesus, nakalabbet da kan isa nga babalay. Hinnian babay kannay nga mangngahan kan Marta nga nangalaba kan ira kan ya balay na. 39Hinnian pay wahi na nga babay nga mangngahan kan Maria nga nanuttud kan ya datag kan ya atubang y Jesus nga maggina kan ya ituttuldu na. 40Ngam aru ya trabahu y Marta nga paraparanan na. Inarannian na gafen y Jesus, en kunna nga nakkahi, "Afu, mari kazze importa kan ikaw nga pinanawan nak ya wahik nga mesissa nga mattrabahu? Kazzen ta kayan mu bitan kan iggina nga umang nak uffunan." 41Ngam kunna y Afu Jesus nga siminabbag, "Marta, Marta, avva/hanna ma ya karu ya kavurungan en kagulluan mu! 42Isa laman ya mawag. Pinili y Maria ya napia, en awan nga makakalak kan yan kan iggina."

will be added

X\