Judas 1

1Yakan y Judas nga kohung y Jesu Cristo en wahi y Santiago. Natturak nak kan ikayu nga inakkulan y Dios Ama nga ayatan na en tangatangngallan y Jesu Cristo. 2Pare zinan ta bustante ya allak, imamak en ayat kan ikayu. 3Ideddukan ku ira, kan ya nelot/nafulotan nga akkelug ku nga matturak kan ikayu kan me-annung kan ya parehu nga kapalliad tera, napanonot ku nga mawag kan matturak nak kan sangaw ngin tase paggutukan/patturidan/pattaggaddan ku ya ginnonotan nu nga mangitadag kan ya kurug nga kurruan tera nga missa laman nga nepakammu y Afu Dios kan ya totolay na. 4On, gafu ta hinnian/asan dudduma/karruan nga totolay nga netadday maitu/kelattan kan ya iglesia tera ira nga mari tera nasifut nga awan nga attalaw ra kan y Afu Dios. Pabbalinan da ya allak y Afu Dios kan tiansa ra nga maka-angngua kan hanna laman nga keluhan ya gibbaggian da, en ilimad da peba y Jesu Cristo nga isissa laman nga Patul en Afu tera. Neturak kattun kan ya Sagrado nga Turak ya kakastigo ra. 5Hinnian dudduma nga ikayat ku nga iparandam kan ikayu bitan maski ammu nu ngammin ira yaw ngin. Ammu nu nga pinalliad y Afu Dios ya Israelita ira kannia nepappepanaw na kan ira kan ya nasion ya Egipto, ngam kabalin na, nepesimmu na ya nepappatay ira tunay nga mari nangurug kan iggina. 6Ammu nu peba nga maski ya anghel ira nga mari nassige nga maddian kan ya atanang nga puestu nga natunnakkan da nga pammorayan zinan, nu azzi pinanawan da ya fustu nga paddianan da, nepekarsel y Afu Dios ira nga aggakawad kan ya kakokopannan/kakallappan nga lugar addet kan ya dakal nga algaw nga kapanunut da. 7En ammu nu yaw peba. Kunna tian pay ya nesimmu kan ya totolay nga natolay kattun nga naddian kan ya siudad ya Sodoma en ya siudad ya Gomora en kan ya babalay ira kan ya pallehut da pay. Ya kinikkingngua ra, megitta kan ya kukukuan ira nay nga falso nga mestru. Naddallaw ra, en natawa ya parehu nga babbay en ya parehu nga lallaki. Makastigo ra kan afi nga mari maddap nga pa-ehemplowan kan ngammin nga totolay. 8Megitta kan ira yan pay ya kukukuan ira yan nga falso nga mestru. Alale mattatenap da. Pammarakattan da ya gibbaggian da pe laman. Iyammari ra ya hinnian paka-awayya ra kan ira. Paraparakattan da ya mas atanang ya kekuentan da annek/ngam kan ira pe laman. 9Ngam maski y Miguel nga isa nga panakallan kan ya anghel ira, mari na kiningngua ya kunna tian. Kattun, kattu natay y Moises, naddiskusionan y Miguel en y Satanas nu innia ya mangalak kan ya baggi na. Mari negutuk/neturid/netaggad y Miguel nga mamaraparakat nga mamanunut kan iggina, nu azzi kunna laman nga nakkahi, "Pare zinan ta allangngan na ka y Afu Dios." 10Ngam ira yan nga falso nga mestru, paraparakattan da ya hanna laman nga mari ra mantindian. En ya hanna laman nga ammu ra nga megitta kan ya ammu ya aya-ayam nga awan da nga appanonotan, yan ya kegafanan ya kakastigo ra. 11Anakkue/Kallallak da pay, gafu ta papparrian da ya narakat/napot nga kiningngua y Cain kattun. Megafu kan ya akkelug da kan kuartu, awan nga babang da nga mamarig kan ya liwat y Balaam nga natolay kattun. Marreberebelde ra kan y Afu Dios kan kagitta ya kiningngua y Kore nga natolay kattun, en makastigo ra pay nattaruk kan kagitta ya nekakastigo na. 12Ira yan nga totolay, megitta kan mantia kan ikayu kannia attaradday nu nga mangan. Awan nga pasiran da nga mappalappagustu. Ya gibbaggian da pe laman ya tanggawan da. Megitta ra kan kunam nga mepayapayad kan angin nga mari makakeddan kan uran. Megitta ra kan kayakayu nga mari mavvunga maski tiempo avvuvunga, en kan kayakayu nga kompleto nga natay nga nabadduak. 13Megitta ra pay kan daddakal nga palapalung ya bebay nga me-ana-anud ya guwak da nga kegittan ya kappasiran nga kukukuan da. Megitta ra pay kan bittuan ira nga tanakkuan ya dalanan da kan ya negagangay. Nangireserba y Afu Dios kan paddianan da kan ya lugar nga kakokopannan kan awan na nga panda. 14Y Enoc nga mekapitu kannia natturunud nga gakagaka namegafu kan y Adan, kunna nga nakkahi kan me-annung kan yan nga klase nga totolay, "O! Ginan nu! Umang nattaruk y Afu Dios en rinivirivu nga nasantuan nga anghel na, 15tase panunutan na ngammin ya totolay. En sentensian na ya kada isa nga nanuriya kan iggina megafu kan ngammin nga nepannutturiya ra kan iggina nga kinikkingngua ra kannia nepangngontra ra kan iggina, en megafu pay kan ngammin nga nadammat nga kinahakahi ira nay nga narakat nga totolay nga mekontra kan iggina." 16Ira nay nga totolay, minaddaladalimudung en minarrerreklamo ra. Vuluvulunan da ya narakat ira nga akkelug ya gibbaggian da. Mappalagopog da. Iyala-alak da ya ginnonotan ya ikattolay ra ira, tase malak da kan ira ya keluhan da. 17Ngam ikayu nga ideddukan ku, dandamman nu ya kinahi kattun ya apostol ira y Afu tera nga Jesu Cristo. 18Kunda nga nakkahi kan ikayu, "Kan ya panguzzanan nga tiempo, hinnian nattaruk minangngilloko ira. Vuluvulunan da ya akkelug da ira nga mekontra kan y Afu Dios." 19Paggurungayan da ikayu. Ya akkelug ya gibbaggian da laman ya vuluvulunan da, en awan kan ira ya Espiritu Santo. 20Ngam ikayu nga ideddukan ku, pakaladdan nu ya nasantuan nga angngurug nu. Maddasal kayu segun kan ya uray ya Espiritu Santo. 21Isige nu ya kasan nu kan ya ayat y Afu Dios kannia attalattaron nu kan ya annoli y Afu tera nga Jesu Cristo nga mangiddan kan ittera kan angat nga awan na nga panda megafu kan ya allak na. 22Ikallak nu ya totolay nga hinnian adduda ra. 23Kararan nu ya dudduma nga hinnian kan ya afi nga dukkamman nu ira. Ipasingan nu ya allak nu kan ya dudduma, ngam mappalan/memuhud kayu. Ikasakay/Ikarukkut nu maski ya gissinnunan da nga kuenta namantian kan ya gibbaggian da. 24Y Afu Dios nga hinnian pakapangngua na nga mangguardia kan ikayu tase awan nga keduffuan nu kan liwat, en mangiyaddet kan ikayu nattaruk kan ya atubang ya kekapalat na nga awan nu nga kapaliwatan nga siggapayayat, 25iggina laman ya isissa nga Dios nga mamalliad kan ittera megafu kan y Afu tera nga Jesu Cristo. Hinnian kan iggina ya kedayarayaw, ya nadiosan nga kekapalat, ya ammoray en ya paka-awayya namegafu kattu gafagafu, kan sangaw, en kan awan na nga panda. Amen!

will be added

X\