Santiago 2

1Wawwahik ira, kannia ammulun nu kan ya tuldu y Afu tera nga Jesu Cristo nga kurug nga me-ekakua, mari nu mappadumuruma. 2Aggangarrian, nu hinnian/asan dua nga tolay nga tumallung kan ya parammungan nu nga nassakklang ya isa kan vulawan en nassinnun kan nakasta, en pobre ya isa nga nassinnun kan guramemet, 3en nu mas ikakua nu ya nassinnun kan nakasta, en nu kunnu nga makkahi kan iggina, "Manuttud ka kan yaw nga napia nga lugar," en nu kunnu nga makkahi kan ya pobre, "Manadag ka kannay laman ngin," onu kunnu nga makkahi kan iggina, "Manuttud ka kan ya datag kan ya bikat ya takak," 4nu kuan nu yan, mappadumuruma kayu mamba, en mabbalin kayu kan alale hues nga narakat/napot ya appanapanonot nu. 5Wawwahik ira nga ideddukan ku, maggina kayu. Pinili y Afu Dios ya pobre ira kan yaw nga mundo nga mabbalin kan nasikan ya angngurug da, en makatallung da kan ya pappatulan nga netabba na kan ya mangayat ira kan iggina. 6Ngam mari nu nekakua ya pobre ira. Mari kazze/pano kan ya ririku, ira ya mamazapaziyat kan ikayu kannia attolay nu en ya mangiyatubang kan ikayu kan husgadu? 7Mari kazze kan ira ya mamaraparakat kan ya me-ekakua nga nengahan kan ikayu? 8Napia ya kuan nu nu paraparulotan nu yaw nga dorob ya patul nga hinnian kan ya Sagrado nga Turak nga kunna, "Ayatan mu ya ikattolem kan kagitta ya angngayat mu kan ya baggim pe laman." 9Ngam nu mappadumuruma kayu, makaliwat kayu, en mekuenta kayu kan minannuriya kan ya dorob na. 10On, gafu ta, ya innia laman nga mamaraparulot kan ngammin nga dorob ngam hinnian isa nga mari na parulotan, mabbalin kan turiyan na ngammin. 11On, gafu ta, ya nakkahi kan, "Marim mamabay onu makilalaki," kunna peba, "Marim mamatay." Nu marim mamabay onu makilalaki, ngam nu mamatay ka, mabbalin ka kan manuriya kan ya dorob. 12Napia zinan ya aggergo en ya katakatolay nu gafu ta mapanunutan kayu nattaruk segun kan ya dorob na nga manuelta kan ya totolay. 13On, gafu ta awan nga allak y Afu Dios kan ya innia laman nga awan na nga allak kan ya ikattolay na. Ngam hinnian allak na kan ya innia laman nga hinnian allak na kan ya ikattolay na kannia ammanunut na kan iggina nattaruk. 14Wawwahik ira, hanna ya serbi na nu kayan ya innia laman nga hinnian angngurug na, ngam awan mamba nga napia nga kuan na? Awayya na kazze nga mapalliad iggina megafu kan yan nga angngurug na? 15Aggangarrian, nu hinnian isa nga wahi nu kan pangurug nga makakawag kan sinnun en makan, 16en nu hinnian isa kan ikayu nga makkahi kan iggina, "Awayyam mapanaw ngin nga sigga-imamak, en pare zinan ta fustu ya patum en battug mu," ngam marim neddan kan iggina ya mawag ya baggi na, hanna ya serbi ya kinahim kan iggina? 17Kunna tian pay kan ya angngurug, nu mesissa nga awan nga napia nga kuan na, natay. 18Ngam hinnian sangaw makkahi, "Hinnian angngurug mu, en hinnian kukukuan ku." Ipasingan mu kan yakan ya angngurug mu nga awan nga napia nga kuan mu, en ipasingan ku kan ikaw ya angngurug ku kan ya napia nga kukukuan ku. 19Mangurug ka mamba kan isissa laman y Afu Dios. Napia yan. Mangurug pay ya narakat nga espiritu ira kan yan, en mamilpilpig da peba megafu kan ya talaw ra. 20Ikaw nga ababbaw ya appanonot mu, ikayat mu kazze nga pakurruan ku kan ikaw nga awan nga serbi ya angngurug nga awan nga napia nga kuan na? 21Mari kazze nebilang y Afu Dios y Abraham nga ginafu tera kan natunung megafu kan ya kinikkingngua na kattu ne-ofresi/nededika na y Isaac nga anak na kan ya pangiyofresian? 22Gaggafen, masingan mu nga nakipattrabahu ya kinikkingngua na kan ya angngurug na, en nabbalin ya angngurug na kan awan na nga pakkurangan megafu kan ya kinikkingngua na. 23Kannia nepangngua na kan kunna tian, natumpal ya neturak kan ya Sagrado nga Turak nga kunna, "Nangurug y Abraham kan y Afu Dios, en nebilang y Afu Dios kan natunung iggina megafu kan ya angngurug na." En nammuan nga iggina, kofun y Afu Dios. 24Ya kinikkingngua y Abraham, yan ya pakakammuan nu nga ibilang y Afu Dios kan natunung ya innia laman megafu kan ya napia nga kukukuan na pay, en mari megafu kan ya angngurug na laman. 25Kunna tian pay kan y Rahab nga minakkipaga nga babay kattun. Nebilang iggina kan natunung megafu kan ya kiningngua na kattu pinadulot na ya dua nga ispiya ya Israelita ira, en kinahi na kan ira nga manalan da kan tanakkuan nga dalan tase mari ra magafut. 26Nu awan ya karallua kan ya baggi, natay, en kunna tian pay, nu awan nga napia nga kuan ya angngurug, natay yan pay.

will be added

X\