Santiago 1

1Yakan y Santiago nga minasserbi kan y Afu Dios en y Afu Jesu Cristo. Diot ku kan ikayu nga mafulu se dua nga tribu nga nawwarawarak kan maddumuruma nga nasion. 2Wawwahik ira, nu labbetan da kayu ya maddumuruma nga azziyariyat, ikuenta nu kan kurug nga payayat nu, 3gafu ta ammu nu nga ya azziyariyat nu, ira yan ya kapurba ya angngurug nu, en marresulta kan aggatattam nu. 4Mabbalin zinan kan awan nga pakkurangan ya resulta ya aggatattam nu, tase mammanakam en makompleto ya angngurug nu en awan nga pakkurangan nu. 5Ngam nu hinnian/asan tolay kan ikayu nga makkurang kan sirib, makkiddaw iggina zinan kan y Afu Dios, gafu ta y Afu Dios, vukat ya ima na nga mangiddan kan ngammin nga totolay nga awan na nga dispresiowan, en iddan na yan kan iggina. 6Ngam mawag kan hinnian angngurug na kannia akkiddaw na nga mari na madduda, gafu ta ya madduda, megitta kan danum ya bebay nga mepalapalung en me-ana-anud megafu kan ya angin. 7Ya innia laman nga madduda, mari na zinan abbattan kan hinnian alawatan na kan y Afu Dios, 8gafu ta dua ya panonot na, en mari na awayya nga mannayun kan ngammin nga kukukuan na ira. 9Ya wahi nga pobre en alinak ya kekuentan na, mayayat iggina zinan kan ya neke-atanang ya kekuentan na. 10Ya riku, mayayat zinan pay kan ya neke-alinak ya kekuentan na, gafu ta mari na mannanayun kan kagitta lappaw ya kaddat. 11Lumattuad ya sinag nga nelot/nafulotan ya patu na, en pallelayan na ya kaddat, en mattattak/makkabok ya lappaw na, en madaral ya kasta na. Kunna tian pay ya riku, mapawan iggina kannia sobra nga aggasigura na. 12Mapalad ya innia laman nga makakattam kan ya kapurba na, gafu ta, nu mattamman na, malawat na nattaruk ya premio nga angat nga netabba y Afu Dios kan ya mangayat ira kan iggina. 13Nu matentasion ya innia laman, mari na zinan kayan nga kunna, "Y Afu Dios ya nanentasion kan yakan," gafu ta mari manentasion y Afu Dios, en mari na matentasion nga mangngua kan narakat/napot. 14Ngam matentasion ya innia laman kannia kelohot na en ya kalak ya nonot na megafu kan ya narakat nga akkelug na pe laman. 15Sangaw, gumamut ya narakat nga akkelug na en mabbalin kan liwat, en so nu dumakal ya liwat, marresulta kan patay. 16Wawwahik ira nga ideddukan ku, mari nu mappelohot. 17Ngammin ya napia nga meddan en regalu nga awan na nga kurang, maggafu kan langit, kan y Dios Ama nga namaratu kan ya mangnawag ira kan langit. Mari na vulvua/pulus manguli onu mappadumuruma kan ya kukukuan na kan ya totolay. 18Uru-uray na pe laman nga pinabbalin ittera kan anak na ira megafu kan ya kurug nga ergo na, tase mabbalin tera kan katanangan kan ya pinaratu na ira. 19Wawwahik ira nga ideddukan ku, takkilalan nu ira yaw. Siggaparan kayu zinan nga maggina, mari nu insigida mergo, en mari nu irame mallussaw. 20On, gafu ta ya lussaw ya tolay, mari na matumpal ya natunung nga uray y Afu Dios. 21Gaggafen, azzan nu ngammin ya sinapang en narakat ira, en alawatan nu kan natuluk nga nonot ya ergo y Afu Dios nga memula kan ya giffutuan nu nga makapalliad kan ikayu. 22Kanakanayun nga parulotan nu ya ergo y Afu Dios, mari na kan ginan nu laman, gafu ta, nu ginan nu laman, ilohot nu ikayu pe laman. 23On, gafu ta, nu hinnian tolay nga ginan na laman ya ergo na, en mari na kanakanayun nga parulotan, megitta iggina kan tolay nga mespeho, 24en kabalin na nga mespeho, mapanaw iggina en irame na malippanan ya nasingan na. 25Ngam ya innia laman nga mamatalattap kan ya dorob nga awan na nga kurang nga manuelta kan ya totolay, en massige iggina nga mamatalattap, en mari na isa nga maggina en makkalippan, nu azzi isa iggina nga mamaraparulot, mapalad iggina kan ya hanna laman nga kukukuan na. 26Ya innia laman nga mangabbat kan relihioso iggina pe laman, ngam mari na mafuwaddan ya zila na nga mergo kan narakat, ilohot na iggina pe laman, en awan nga serbi ya karelihioso na. 27Ya karelihioso nga puro en awan nga mantia na kan ya paningan y Afu Dios nga Ama, iggina yaw: manguffun kan ulila ira en babalu nga babbay kannia azziyariyat da, en mangibita kan narakat nga attolay kan yaw nga mundo.

will be added

X\