Hebreo 9

1Kan ya unna nga taratu, hinnian/asan reglamento ira nga me-annung kan ya addayarayaw, en hinnian pay nasantuan nga kuarto nga nemundowan. 2Yan nga lugar, tolda nga pinatadag tolay. Ya unna nga kuarto na, nangahanan kan Nasantuan nga Kuarto nga dian ya kandelero, ya lamesa en ya sagrado nga pan nga ne-ofresi/nededika kan y Afu Dios nga nepotun kannian. 3Kan ya likud ya mekaddua nga kurtina, hinnian kuarto nga nangahanan kan Kasantuan nga Kuarto. 4Kan ya atubang ya mekaddua nga kurtina, hinnian ya vulawan nga angngiyofresian nga kasiduhan ya insensu, en kan ya likud ya kurtina, hinnian ya kaban nga simbulo ya taratu y Afu Dios kan ya totolay. Navukkutan ngammin ya bikat na kan vulawan. Kan ya unag ya kaban, hinnian vulawan nga balabbanga nga nekkuayan/neppayan ya dudduma/karruan nga manna, en ya baston y Aaron nga nattarengit, en ya dua nga dampet nga batu nga neturakan ya mafulu nga dorob nga taratu y Afu Dios kan ya totolay. 5Ya takkub na yan nga kaban, nangahanan kan Tuttud Allak. Kan ya utun na, hinnian dua nga estatua kerubin nga kuenta maningan kan ya nawag y Afu Dios nga nappasingan kannay, en aggavulad ya payak da nga manglirum kan yan. Kurang ya tiempok nga mangipakanawag kan ya kebalinan ya kada isa kan ira yaw nga ganagannud. 6Nakua ira yan nga ganagannud kan kunna tian, en kagalgaw tumallung ya papari kan ya unna nga kuarto, tase kuan da ya annungan da. 7Ngam ya pari nga katanangan ya kekuentan na laman ya tumallung kan ya mekaddua nga kuarto, en kuan na yan kan missa laman kan kada dahun. Mawag kan mangitallung iggina kan daha ayam nga napatay nga ne-ofresi kan y Afu Dios megafu kan ya liwaliwat na pe laman en ya liwaliwat ya totolay pay nga mari ra ammu ya naliwatan da. 8Kan yan nga reglamento, nepakammu ya Espiritu Santo nga mari peba navukatan ya dalan nga tumallung kan ya Kasantuan nga Kuarto, gafu ta hinnian peba ya unna nga kuarto. 9Ira yan nga ganagannud, kegittan laman ya situasion tera kan yaw nga tiempo. Segun kan ira yan nga dorob, mangiyofo-ofresi ra kan regeregalu en kan aya-ayam nga napatay nga mari mamba makapakarenu kan ya konsensia ya maddayarayaw. 10Ira yan nga reglamento, me-aplika kan makan, menum en maddumuruma nga narelihiosowan nga abbaggu ra laman. Ira yan, reglamento para kan ya baggi tolay nga nemandu addet kan ya tiempo nga kapabahu ra laman. 11Ngam y Cristo, nabbalin ngin kan pari nga katanangan ya kekuentan na, en megafu kan iggina, hinnian napia nga ganagannud nga meddan ngin. Hinnian Nasantuan nga Kuarto nga nattallungan na nga mas atanang ya kekuentan na, en mas peba awan nga pakkurangan na nga mari pinatadag tolay, ikayat ku nga kayan, yan nga kuarto, mari na parte kan yaw nga naparatu nga mundo. 12Nakkawat iggina nga siminallung kan missa kan ya Kasantuan nga Kuarto kan langit nga nangivulun kan daha, mari na kan daha kazzing en uvvun baka nu azzi mismu ya daha na pe laman, en mari metotoli yan ngin. Megafu kan yan, mapalliad na ya totolay na kan awan na nga panda. 13Ya baggi ya innia laman nga kuenta narelihiosowan nga mari narenu, mapabbalin kan nasantuan tase kuenta narelihiosowan nga naparrenu kannia kewarsi ya daha kazzing, ya daha baka en ya avu abbay nga baka nga nasidug. 14Y Cristo, megafu kan ya mannanayun nga espiritu na, ne-ofresi na kan y Afu Dios ya baggi na pe laman nga awan vulvua/pulus diferensia na. Nu makua ya daha aya-ayam ya kuan na, yammanno ya ammakarenu ya daha y Cristo kan ya gikkonsensian tera kan ya kinikkingngua tera nga awan da nga kebalinan, tase sesserbian tera y Afu Dios nga siggamatolay. 15Gafu ta kiningngua na yan, pinabbalin na ya bahu nga taratu y Afu Dios kan ittera kan hinnian paka-awayya na, tase ittera nga nakkulan, mabbalin kan totolay na, en malawat tera ya netabba na nga erensian tera nga awan na nga panda. On, gafu ta, ya nepappatay y Cristo, yan ya makatavvut kan ya totolay, tase mari ra makastigo megafu kan ya liwaliwat da nga kinikkingngua ra kannia kasan da kan ya paka-awayya ya dana nga taratu. 16Nu me-annung kan ya testamento, mawag kan hinnian pamakurug nga natay ngin ya mapperensia. 17Hinnian paka-awayya ya isa nga testamento laman nu natay ngin ya mapperensia. Awan peba nga paka-awayya na nu matolay peba iggina. 18Yan ya gafu na kan maski ya unna nga taratu y Afu Dios, hinnian paka-awayya na megafu kan ya natturut nga daha ya isa nga natay. 19Kabalin ya nepangngikahi y Moises kan ngammin nga mandu y Afu Dios nga hinnian kan ya dorob kan ngammin nga totolay, nangalak iggina kan isa nga panga isopo en kan dudut karneru nga nakuloran kan raggang nga negalut na kan ya pansaw ya panga isopo, nedassam na yan kan ya daha uvvun baka en daha kazzing nga nakihuan kan danum, en newarsi na yan kan ya neturakan ya dorob en kan ngammin nga totolay. 20Kannia angngua na kan yan, kunna nga nakkahi, "Yaw ya daha ya taratu y Afu Dios nga nemandu na kan ittera." 21En megitta pay kan ya tolda en kan ngammin nga rumienta nga me-usa kannia addayarayaw ra, winarsian na ira nay pay kan daha. 22Kakurruan na, segun kan ya dorob, gunese ngammin nga ganagannud, mapabbalin kan narelihiosowan nga narenu megafu kan daha, en nu awan nga mapaturut nga daha, awan nga kapakoma ya liwat. 23Ira yan nga ganagannud nga negittan ya ganagannud kan langit, mawag kan napakarennuan da kan ira yan nga seremonia. Ngam ya ganagannud mismu kan langit, ya daha nga namakarenu kan ira, mawag kan maggafu kan ya isa nga ne-ofresi nga mas atanang ya kekuentan na annek/ngam kan aya-ayam. 24Siminallung y Cristo kan ya kurug nga Kasantuan nga Kuarto nga hinnian mismu kan langit, bakkan kan ya Kasantuan nga Kuarto nga pinatadag tolay nga megitta kan ya kurug nga kuarto, en kan sangaw, itadag na ittera kan ya atubang y Afu Dios. 25Missa kan kada dahun, tumallung ya pari nga katanangan ya kekuentan na kan ya Kasantuan nga Kuarto nga mangivulun kan daha nga iyofresi na nga bakkan kan ya daha na pe laman. Ngam y Cristo, mari mawag kan manotoli iggina nga tumallung kan ya Kasantuan nga Kuarto kan langit tase iyofresi na ya daha na pe laman kannay. 26Nu mari zinan kurug yan, namegafu kattu nekaparatu ya mundo, fersadu zinan nga naming aru nga napatay iggina. Ngam kakurruan na, kan yaw nga pangultimuan nga tiempo, missa laman nga minang iggina kan ya utun lusak, tase azzan na ya liwaliwat ya totolay megafu kan ya nepangngiyofresi na kan ya baggi na pe laman nga napatay nga mari uli mesimmu ngin. 27Natunnak nga matay ya kada tolay kan missa laman, en kabalin na, mapanunutan. 28Kunna tian pay kan y Cristo, missa laman nga ne-ofresi iggina nga nangattu kan ya liwaliwat ya napakaru nga totolay. Manoli iggina manin nattaruk, ngam mari na uli iyofresi ya baggi na pe laman megafu kan ya liwaliwat, nu azzi tase palliaran na ittera nga mattalattaron kan iggina.

will be added

X\