Hebreo 7

1Yaw nga Melkisedec, patul kattun kan ya siudad ya Salem, en pari y Afu Dios nga Katanangan. Kattu luminabbet da Abraham nga naggafu kan ya nepakkiggerra ra nga nangaffut kan ya appat nga papatul en ya suddalu ra ira, zinafung y Melkisedec iggina, en binendisionan na iggina. 2Neddan y Abraham kan iggina ya pakkamafulu kan ngammin. Kan unna, ya kebalittaggan ya ngahan y Melkisedec, patul kinatunung. Ya kebalittaggan ya ergo nga Salem nga siudad nga nappatulan na, imamak. Iggina gafen ya patul imamak pay. 3Awan nga neturak kan me-annung kan ya ama na, ya ina na, ya gafagafu na, ya neke-anak na onu ya nepappatay na. Massigisige ya kapari na kan kagitta ya kapari ya Anak y Afu Dios. 4Panonotan nu ya katanang ya kekuentan na. Maski y Abraham nga ginafu tera, neddan na kan y Melkisedec ya pakkamafulu ya nalak da kan ya inaffut da ira. 5Kan ya dorob, nemandu nga, ya gakagaka y Levi nga natunnak kan papari, ira ya maka-awayya nga mangalawat kan ya pakkamafulu ya pakkatolay ya kagitta ra nga Israelita ira, nga mismu wawwahi ra, maski kagitta ra pay nga gakagaka y Abraham. 6Ngam y Melkisedec nga mari naggafu kan ya gakagaka y Levi, inalawat na ya pakkamafulu kan y Abraham, en binendisionan na iggina nga nangitabban y Afu Dios. 7Awan nga duda nga, ya tolay nga atanang ya kekuentan na, iggina ya mamendision kan ya tolay nga alinak ya kekuentan na. 8Nu me-annung kan ya kapari ya gakagaka y Levi, ya mangalawat ira kan pakkamafulu, totolay nga matay balalaman. Ngam nu me-annung kan ya kapari y Melkisedec, ya nangalawat kan pakkamafulu, ya neturak kan me-annung kan iggina, matolay. 9Gaggafen, awayya na nga makahi nga maski y Levi nga nangalawat kan pakkamafulu, neddan na pay kan y Melkisedec ya pakkamafulu, en kiningngua na yan kannia nepangngiddan y Abraham kan pakkamafulu kan iggina. 10On, gafu ta y Levi en ya gakagaka na, kuenta hinnian/asan da peba kan ya unag ya baggi y Abraham nga ginafu ra kattu zinafung y Melkisedec iggina. 11Neddan y Afu Dios ya dorob na kan ya ginafu tera ira, en mesipat kan yan ya kapari ya gakagaka y Levi. Nu awayya na zinan nga mabbalin ya totolay kan awan nga pakkurangan ya neketadday ra kan y Afu Dios megafu kan ya kapari ya gakagaka y Levi, mari mawag ngin kan hinnian peba pari nga megitta ya kapari na kan ya kapari y Melkisedec, en mari megitta ya kapari na kan ya kapari y Aaron. 12Nu matallian ya kapari, mawag kan matallian pay ya dorob. 13Ya tolay nga kayan ku kan ira yaw nga ganagannud, isa iggina kan ya tanakkuan nga tribu, en ni isa kan yan nga tribu ya nasserbi kan ya angngiyofresian/angngidedikan. 14On, gafu ta y Afu tera, nanawag nga isa iggina kan ya gakagaka y Juda, en awan nga neturak y Moises kan me-annung kan ya gakagaka na nga mappari. 15En mas nanawag peba nga kurug ya bahu kinahik nu hinnian isa nga pabbalinan y Afu Dios kan pari kan kagitta y Melkisedec. 16Ya gakagaka y Levi, mabbalin da kan pari megafu kan ya dorob y Afu Dios, gafu ta ya anak ira ya papari laman ya mapavulunan nga mabbalin kan pari. Ngam nabbalin y Jesus kan pari megafu kan ya pakapangngua ya angat na nga awan na nga panda. 17Nanawag nga nabbalin y Jesus kan pari gafu ta neturak kattun kan ya Sagrado nga Turak nga kunna, "Pari ka kan awan na nga panda kan kagitta ya kapari y Melkisedec." 18Ya dana nga dorob, napawan gafu ta mari na makua ya mawag nga makua para kan ya totolay, en awan gafen nga serbi na, 19gafu ta awan nga tolay nga mapabbalin ya dana nga dorob kan awan nga pakkurangan na kan ya neketadday na kan y Afu Dios. Imbes kan yan nga dorob, neddan kan ittera ya mas napia nga innanama, en megafu kan yan, awayya tera nga umaranni kan y Afu Dios. 20Nehuramento y Afu Dios kattun nga mabbalin y Cristo kan pari. Ngam ya gakagaka y Levi nga mabbalin kan papari, awan nga nehuramento na kan me-annung kan ya kapari ra. 21Ngam kattu nepakammu na nga pabbalinan na y Cristo kan pari, hinnian nehuramento na kattun nga me-annung kan iggina, en nepeturak na kan ya Sagrado nga Turak, "Nehuramento y Afu Dios, en mari manguli ya nonot na, 'Pari ka kan awan na nga panda.' " 22Gafu ta kurug yan, nabbalin y Jesus kan pakasiguraduan kan ya mas napia nga taratu y Afu Dios kan ya totolay annek/ngam kan ya dana nga taratu. 23Kan ya dana nga taratu na, aru ya matturubbat nga mabbalin kan pari gafu ta makkakatay ra balalaman, en mari ra awayya gafen nga mannayun nga mappari. 24Ngam y Jesus, awan nga mappatubbat kan iggina nga mappari, gafu ta matolay iggina kan awan na nga panda. 25Megafu kan yan, ya totolay nga umaranni kan y Afu Dios megafu kan ya angngurug da kan y Jesus, awayya na nga palliaran ira kan awan na nga panda, gafu ta matolay iggina kan awan na nga panda nga mangibaggi/mangitadag kan ittera kan y Afu Dios. 26Mepangngat nga kunna tiaw ya klase ya pari tera nga katanangan ya kekuentan na, nasantuan, awan na nga kapaliwatan onu mantia, neruma iggina kan ya minalliwat ira, en ne-utun iggina kan mas atanang kan langit. 27Mari na megitta kan ira nay nga papari kan ya dana nga dorob nga katanangan ya kekuentan da. Mari mawag ngin kan kagalgaw nga mangiyofresi iggina kan ayam nga patayan na, kan unna, megafu kan ya liwaliwat na pe laman, en kabalin na, megafu kan ya liwaliwat ya totolay. Mari mawag gafu ta kiningngua na yan kan missa laman kattu ne-ofresi na ya baggi na pe laman nga napatay, en mari uli mesimmu ngin. 28Ya totolay nga matunnak nga mabbalin kan papari nga katanangan ya kekuentan da, papari segun kan ya dorob, hinnian pakkafiyan da. Ngam ya natunnak nga nabbalin kan pari, pari nga katanangan ya kekuentan na segun kan ya ergo nga nehuramento y Afu Dios nga napozzan kan ya dorob, iggina ya Anak na nga napabbalin kan awan nga pakkurangan na kan awan na nga panda.

will be added

X\