Hebreo 13

1Ikayu nga maggurwahi kan pangurug, massige kayu nga makkara-aya-ayat. 2Dandamman nu nga mangalaba kayu kan totolay nga mari nu inamammu. On, gafu ta kattun, hinnian/asan dudduma/karruan nga nangalaba kan totolay nga mari ra inamammu, en mari ra ammu nga anghel ira balattan ya inalaba ra. 3Dandamman nu ira nay nga nekarsel nga alale netangekarsel kayu pay kan ira. Dandamman nu pay ira nay nga matattazzian nga alale matattazzian kayu pay. 4Mawag kan mekakua ya attangabalay, en mawag kan narenu ya aggatawa, gafu ta panunutan y Afu Dios ya innia laman nga mamabay onu makilalaki. 5Parayyuan nu kan ya ginnonotan nu ya angngayat nu kan kuartu, en kontento kayu zinan kan ya hinnian kan ikayu. On, gafu ta nepeturak y Afu Dios kattun nga kunna, "Mari ta ka vulvua/pulus panawan onu porrian." 6Awayya tera gafen nga mammakatalak nga makkahi, "Y Afu Dios ya manguffun kan yakan, gaggafen, marik mattalaw. Hanna gafen ya makua ya innia laman kan yakan?" 7Dandamman nu ya panakallan ira kan ikayu kattun nga unna nga nangipakammu kan ya ergo y Afu Dios kan ikayu. Panonotan nu ya resulta ya nepattolay ra, en parrian nu ya angngurug da. 8Y Jesu Cristo, lumismu iggina balalaman kattun, kan sangaw, en kan awan na nga panda. 9Mari nu mappelohot kan ya maddumuruma nga tanakkuan nga tuldu. Mas napia nu mapasikan ya giffutuan tera kan ya allak y Afu Dios, mari na kan ya ammaraparulot tera kan ya narelihiosowan nga reglamento ira nga me-annung kan makamakan nga awan mamba pammakapianan ya totolay nga mamaraparulot kan ira yan nga reglamento. 10Hinnian angngiyofresian/angngidedikan tera, ngam ya papari nga masserbi kan ya templo segun kan ya dana nga taratu y Afu Dios, awan da nga paka-awayya nga mangan kan ya hanna laman nga me-ofresi kan ya angngiyofresian tera. 11Kattu namatay ra kan aya-ayam tase iyangay ya pari nga katanangan ya kekuentan na nga iyofresi ya daha ra kan ya Kasantuan nga Kuarto, sinidug da ya interu gibbaggian ya aya-ayam kan ya liwan ya lugar nga naddianan da. 12Kunna tian pay, napazapaziyat y Jesus nga napatay kan ya liwan ya trangka ya siudad, tase mismu kan ya daha na pe laman, pabbalinan na ya totolay kan nasantuan. 13Mallawan tera gafen kan ya lugar tera nga umang kan iggina nga mesipat nga matattam kan ya ka-uyu-uyaw en katattazzi tera kan kagitta na. 14On, gafu ta, kan ya utun lusak, awan nga mannanayun nga siudad tera, ngam talattaronan tera ya siudad nga mappanget. 15Gaggafen, megafu kan y Jesus, kanakanayun nga dayarayawan tera y Afu Dios nga kuenta yan ya iyofo-ofresi tera kan iggina, yan ya angngikahakahi tera kan ya angngurug tera kan iggina nga kuenta vunga ya gibbibihan tera. 16Dandamman nu nga maka-angngua kayu kan napia en mangibillay kayu kan ya hanna laman nga hinnian kan ikayu, gafu ta mapagustuan y Afu Dios kan ira yan nga arig me-ofresi kan iggina. 17Paraparulotan nu ya panakallan ira kan ikayu, en makimoray kayu kan ira, gafu ta ira ya mananggaw kan ya gikkaralluan nu, en ira ya tumabbag kan y Afu Dios megafu kan ikayu, tase awayya na pay nga mayayat da nga mangngua kan yan, en mari ra marandam, gafu ta, nu mari nu kuan yan, en mari ra gafen pay mayayat kannia annabbag da kan y Afu Dios, awan nga pammakapianan nga malak nu. 18Idasadasal nu ikami, gafu ta siguradu kami nga narenu ya gikkonsensian mi, gafu ta ikayat mi nga medayaw kami kan ngammin nga kukukuan mi. 19Kuru ipakimallak ku kan ikayu nga kuan nu yan, tase mas mallian nak nga makatoli kan ikayu. 20Y Afu Dios ya paggafanan ya imamak, en ya nappaginnolay kan y Afu tera nga Jesus nga Pastor ya karneru na ira nga katanangan ya kekuentan na megafu kan ya daha na nga nangiddan kan paka-awayya ya taratu nga awan na nga panda. 21Pare zinan ta iddan y Afu Dios kan ikayu ngammin ya napia, tase kanakanayun nga makua nu ya uray na. Pare zinan ta pabbalinan na ittera kan makapagustu kan iggina megafu kan y Jesu Cristo. Madayarayaw iggina kan awan na nga panda. Amen. 22Wawwahik ira, ikikkiddok kan ikayu nga mappasensia kayu nga maggina kan ya ergok nga mappagutuk/mappaturid/mappataggad kan ikayu, gafu ta pilippipia nga ergo mamba laman ya neturak ku. 23Ikayat ku nga mammuan nu nga napalawan ngin kan akkarselan y Timoteo nga wahi tera kan pangurug. Nu mallian iggina nga lumabbet kanniaw, ivulun ku iggina nga umang maningan kan ikayu. 24Diot mi kan ngammin nga panakallan ira kan ikayu en kan ikayu ngammin nga totolay y Afu Dios pay. Ya wawwahi tera kan pangurug nga maddian kanniaw Italia, ipedatang da pay ya diot da kan ikayu. 25Pare zinan ta hinnian ya allak y Afu Dios kan ikayu ngammin. Amen.

will be added

X\