1 Yaw ya ikayat ku nga kayan. Nu hinnian/asan anak nga mangerensia kan ya kukua ya manak na, nu abbing peba iggina, awan nga neruman na kan ya isa nga kohung maski iggina ya makakkua kan ngammin. 2 Ngam hinnian iggina kan ya paka-awayya ya minannangngal ira kan iggina en ya ingkargadu ira kan ya kukua na addet kannia pakalabbet ya tiempo nga sinunnak ya ama na. 3 Kunna tian pay kan ittera, kattu kuenta abbing tera peba, nakohung tera kan ya unna nga ganagannud ya mundo. 4 Ngam kattu luminabbet ngin ya fustu nga tiempo, binon y Afu Dios ya Anak na kan ya utun lusak nga ne-anak ya isa nga babay. Ne-anak iggina kan ya paka-awayya ya dorob, 5 tase tavvutan na ittera nga hinnian kan ya paka-awayya na, senannu mapabbalin tera kan anak ira y Afu Dios. 6 Gafu ta anak ira y Afu Dios ittera, binon na ya Espiritu ya Anak na nga maddian kan ya giffutuan tera nga makkul kan iggina, "Ama, Ama." 7 Gaggafen, marim kohung ngin nu azzi anak na kan, en gafu ta anak na ka, merensia ka. 8 Ngam ikayu nga mari Judio, kattu mari nu peba ammu y Afu Dios, kohung da kayu ya ganagannud nga mari mamba dios. 9 Ngam kan sangaw, gafu ta nammuan nun y Afu Dios, onu kungku zinan nga nammuan ngin y Afu Dios ikayu, ka-am ta mattoli kayu manin kan ya unna nga ganagannud ya mundo nga nakafi en awan da nga serbi nga ikayat nu nga pakikohungan manin? 10 Hinnian iyangngilinan nu mamba nga algaw, vulan, tiempo en dahun. 11 Mavurung nak kan ikayu gafu ta marakat/mapot nu mabbalin kan awan nga serbi ya nabbannabannahan ku para kan ikayu. 12 Wawwahik ira, nabbalin nak kan kagitta nu. Ikiddok kan ikayu nga mabbalin kayu pay kan kagittak. Awan nga narakat nga kiningngua nu kan yakan. 13 Ammu nu nga, ya nepattakit ku, yan ya negafanan ya unna nga nepangngipalappat ku kan ya napia nga dumug kan ikayu. 14 En maski peba kunna tian ya situasion ku nga kapurban nu, mari rak zinispresio onu linikuran, nu azzi inalaba rak lahud nga arig isa nak nga anghel y Afu Dios en arig yakan y Jesu Cristo. 15 Hanna ya nesimmu kan ya payayat nga hinnian kan ikayu kattun? Testiguan ku nga, nu awayya na, linagguet nu zinan ya gimmatan nu en neddan nu zinan kan yakan. 16 Nabbalin nak kazze/pano kan kontra nun gafu ta kinahik ya kurug kan ikayu? 17 Ira yan nga totolay, ikayat da kayu nga bensian nga mevulun kan ira, ngam mari napia ya gakkad da, gafu ta ikayat da kayu nga igungay kan ikami, tase iddukan nu ira. 18 Napia nu hinnian totolay nga mangidduk kan ikayu basta napia ya gakkad da; kanakanayun nga napia yan en mari laman kannia kasan ku kan ikayu. 19 Ikayu nga ideddukan ku nga anak ku ira, alale ituliwan/ipasikal ta kayu manin kan kagitta ya attuliwan ya babay addet kan ya kavukal y Cristo kan ikayu. 20 Ikayat ku nga hinnian nak zinan kan ikayu kannian kan sangaw, tase ullian ku ya aggergok, gafu ta mavurung nak kan ikayu. 21 Ikayu nga mayat nga hinnian kan ya paka-awayya ya dorob, povutan ku kan ikayu nu mari nu mantindian ya kayan ya dorob? 22 Neturak kannay nga hinnian dua nga lallaki nga anak y Abraham. Ya isa, anak na kan ya kohung nga babay, en ya isa, anak na kan ya mari kohung nga babay. 23 Ya anak na kan ya kohung, ne-anak segun kan ya negagangay nga ke-anak. Ngam ya anak na kan ya mari kohung, ne-anak megafu kan ya netabba y Afu Dios. 24 Yaw ya pangiparrian ku kan ira yan. Ira yan nga dua nga babbay, ne-arig kan ya dua nga taratu y Afu Dios kan ya totolay. Ya isa nga taratu nga neddan kan ya totolay kan ya Bakulud Sinai, ne-anak nga kohung ya anak na ira. Yan nga taratu ya ne-angngarrian y Agar. 25 Y Agar, iggina ya Bakulud Sinai kan ya nasion ya Arabia, ne-arig kan ya maddaggun nga siudad ya Jerusalem nga nakohung en ya totolay nga maddian kannay pay nga kuenta anak na ira. 26 Ngam ya Jerusalem nga hinnian kan langit, mari na kohung, en iggina ya ina tera. 27 On, gafu ta kunna kan ya Sagrado nga Turak, "O, lupat nga mari manak, mayayat ka zinan. Ikaw nga mari peba nappasa nattuliwan, ikullet mu ya payayat mu. On, gafu ta, ikaw nga naporrian, mas napakaru nattaruk ya anak mu annek/ngam kan ya karu ya anak ya babay nga hinnian ya atawa na kan ya bikat na." 28 Wawwahik ira, nabbalin tera kan anak ira y Afu Dios megafu kan ya nekatumpal ya tabba na nga negitta kan y Isaac nga ne-anak megafu kan ya nekatumpal ya tabba na kan y Abraham. 29 Kattu tiempo ira yan nga dua nga anak y Abraham, ya ne-anak kan ya negagangay nga ke-anak, pinazapaziyat na ya wahi na nga ne-anak megafu kan ya pakapangngua ya Espiritu Santo, en kunna tian pay kan sangaw. 30 Ngam hanna ya kayan ya Sagrado nga Turak? Kayan na, "Papanawan mu ya kohung nga babay en ya anak na pay, gafu ta, ya anak ya kohung nga babay, mari na awayya nga makiperensia kan ya anak ya babay nga mari kohung." 31 Gaggafen, wawwahik ira, ittera, mari anak ira ya kohung nga babay nu azzi anak ira ya mari kohung.
