Galacia 3

1O, ikayu nga maddian kan Galacia, avva/hanna ma ya kawan pakantindi nu! Innia ya nappafukaw kan ya ginnonotan nu? Nepalapalappat mi kan ikayu kan nanawag nga nepatak y Jesu Cristo kan kurut. 2Povutan ku kan ikayu nu neddan kazze/pano ya Espiritu Santo kan ikayu megafu kan ya nepammaraparulot nu kan ya dorob, onu megafu kan ya angngurug nu kan ya nagina nu nga napia nga dumug? 3Awan nu kazze nga pakantindi? Pinegafanan nu kazze ya bahu nga attolay nu megafu kan ya uffun ya Espiritu Santo? Abbattan nu kazze sangaw kan matumpal nu yan kan ya sikan ya gibbaggian nu? 4Awan nga serbi kazze ya nepappasa nun kan ya aru nga ganagannud, nu kurug nga awan da nga serbi? 5Neddan kazze y Afu Dios kan ikayu ya Espiritu Santo, en maka-angngua iggina kan milagro ira kan ya dian nu? Kukukuan na kazze ira yan megafu kan ya nepammaraparulot nu kan ya dorob, onu megafu kan ya angngurug nu kan ya nagina nu nga napia nga dumug? 6Nu me-annung kan y Abraham, kunna kan ya Sagrado nga Turak, "Nangurug y Abraham kan y Afu Dios, en megafu kan ya angngurug na, nebilang y Afu Dios iggina kan natunung." 7Antindian nu gafen nga, ya totolay nga hinnian/asan angngurug da, ira ya mekuenta kan kurug nga gakagaka y Abraham. 8Nepakammu kattun kan ya Sagrado nga Turak nga ibilang y Afu Dios ya mari Judio ira kan natunung megafu kan ya angngurug da, en nepakammu na yan kan y Abraham kattu kunna nga nakkahi kan iggina kan yaw nga napia nga dumug, "Mabendisionan ya totolay kan ngammin nga nasion megafu kan ikaw." 9Gaggafen, ngammin ya totolay nga mangurug nga megitta kan iggina, mabendisionan da pay nga megitta kan iggina. 10Ngam ngammin ya totolay nga mammakatalak kan mapalliad da megafu kan ya ammaraparulot da kan ya dorob, hinnian kakastigo ra. On, gafu ta kunna kan ya Sagrado nga Turak, "Ya innia laman nga mari massige nga mamaraparulot kan ngammin nga neturak kan ya dorob, makastigo." 11Manamanawag nga awan nga tolay nga mebilang kan natunung kan ya paningan y Afu Dios megafu kan ya ammaraparulot na kan ya dorob. On, gafu ta kunna kan ya Sagrado nga Turak, "Ya innia laman nga nebilang kan natunung megafu kan ya angngurug na, matolay." 12Ngam ya angngurug, tanakkuan kan ya ammaraparulot kan ya dorob, gafu ta kunna kan ya Sagrado nga Turak, "Ya innia laman nga mamaraparulot kan ya dorob, matolay megafu kan ya dorob." 13Sinavvut y Cristo ittera kan ya kastigo nga makua zinan kan ittera megafu kan ya dorob kattu nakastigo iggina para kan ittera. On, gafu ta kunna kan ya Sagrado nga Turak, "Ya innia laman nga mebesin kan kayu, mebilang kan makastigo kan y Afu Dios." 14Gaggafen, megafu kan y Jesu Cristo, ya bendision nga neddan y Afu Dios kan y Abraham, meddan pay kan ya mari Judio ira, tase awayya tera ngammin nga malawat ya Espiritu Santo nga netabba y Afu Dios, en malawat tera iggina megafu kan ya angngurug tera. 15Wawwahik ira, iyusak kan pangngarrian ya negagangay nga kukukuan ya totolay. Nu mangisiguradu ya innia laman kan taratu, awan nga tolay nga maka-awayya nga mamabbalin kan yan kan awan na nga kekuentan onu mangamung kan yan. 16Aru ya netabba y Afu Dios kan y Abraham en kan ya gaka na pay. Mari na kinahi kan "ya gakagaka na," nga arig napakaru ya ikayat na nga kayan, nu azzi kan isa laman, "ya gakam," kunna. Ya ikayat na nga kayan, y Cristo. 17Yaw sangaw ya ikayat ku nga kayan. Appattatut se tallufulu kan dahun kabalin ya nepangngisiguradu y Afu Dios kan yan nga taratu kan y Abraham, neddan na ya dorob na, en yan nga dorob, mari na awayya nga mapabbalin yan nga taratu kan awan na nga kuenta, gafu ta, nu mesimmu yan, mapabbalin pay kan awan nga serbi ya netabba na. 18On, gafu ta ya regalu y Afu Dios, nu meddan megafu kan ya ammaraparulot kan ya dorob, mari megafu ngin kan ya tabba na. Ngam neddan y Afu Dios ya regalu kan y Abraham segun kan ya netabba na. 19Hanna gafen ya serbi ya dorob? Ne-amung kan ya tabba tase mammuan nga hinnian dorob y Afu Dios nga turiyan ya totolay nga malliwat. Hinnian paka-awayya ya dorob kan ira addet kan ya nepallabbet ya gaka y Abraham nga neddannan kan ya tabba y Afu Dios. Nepesimmu na kan anghel ira ya mangiddan kan ya dorob kan isa nga mangibaggi/mangitadag. 20Ya kebalinan ya mangibaggi, maturuk kan isa. Ngam isissa y Afu Dios. 21Ikayat ku kazze nga kayan nga mekontra ya dorob kan ya netabba ira y Afu Dios? Mari na awayya! Gafu ta, nu awayya na nga hinnian dorob nga meddan nga makakeddan kan angat, siguradu nga mebilang zinan ya totolay kan natunung megafu kan yan nga dorob. 22Ngam kayan ya Sagrado nga Turak nga kuenta nefukuk y Afu Dios ya interu mundo kan ya paka-awayya ya liwat, tase ya regalu nga netabba megafu kan ya angngurug kan y Jesu Cristo, awayya na nga meddan kan ya mangurug ira. 23Kallie ya nepallabbet ya tiempo ya angngurug, kuenta nefukuk tera kan ya paka-awayya ya dorob addet kan ya nekepakammu ya angngurug. 24Ya dorob gafen, kuenta minannanggaw kan ittera nga nangigiya kan ittera kan y Cristo, tase mekuenta tera kan natunung megafu kan ya angngurug tera kan iggina. 25Ngam gafu ta luminabbet ngin ya tiempo ya angngurug, awan teran kan ya paka-awayya ya dorob nga kuenta minannanggaw kan ittera. 26Kannia neketadday nu kan y Jesu Cristo, anak na kayu ngammin ngin y Afu Dios megafu kan ya angngurug nu. 27On, gafu ta, ikayu ngammin nga nabawtisowan ira nga netadday kan y Cristo, nabbalin kayun kan megitta kan iggina. 28Awan ngin nga padduman ya Judio ira en ya mari Judio ira, kohung en mari kohung, lallaki en babbay, gafu ta paraparehu kayu ngammin megafu kan ya neketadday nu kan y Cristo. 29En nu totolay na kayu y Cristo, kuenta gakagaka na kayu gafen pay y Abraham, en mangalawat kan ya netabba y Afu Dios.

will be added

X\