Galacia 2

1Kabalin ya mafulu se appat nga rahun, nattoli nak en y Bernabe kan Jerusalem, en nevulun mi pay y Tito. 2Minang nak kannay gafu ta nepakammu y Afu Dios nga uray na ya aggangek kannay. Sangaw, narammung kami en ya panakallan ira kan ya iglesia nga ikami laman, en nepakammuk ya napia nga dumug nga ipalapalappat ku kan ya mari Judio ira. Kiningnguak yan kan ya paratubangan da laman, gafu ta marakat/mapot laman nu awan nga serbi ya nappasa en ya maddaggun nga abbannabannag ku. 3Ngam y Tito nga kavulun ku, maski Griego iggina, mari na nafersa nga makugit. 4Ngam hinnian/asan dudduma/karruan nga falso nga wawwahi kan pangurug nga nallillimmang nga siminallung kan ya narammungan mi nga kuenta ispiya, en minang da tase turiyan da ya nekasuelta tera nga neddan kan ittera kannia neketadday tera kan y Jesu Cristo, tase kohungan da ittera. 5Ngam mari mi vulvua/pulus siminuluk kan ira, tase awayya na nga mannanayun ya kurug nga napia nga dumug para kan ikayu. 6Ngam ira nay nga mammuan nga me-ekakua kan ya iglesia, awan nga importa na kan yakan ya kekuentan da, gafu ta mari mappadumuruma y Afu Dios, awan nga ne-amung da kan ya ituttulduk. 7Ngam imbes kan yan, nammuan da nga sinunnak nak y Afu Dios tase ipalapalappat ku ya napia nga dumug kan ya mari Judio ira, en kunna tian pay kan y Pedro, iggina ya sinunnak na nga mangipalapalappat kan ya napia nga dumug kan ya Judio ira. 8On, gafu ta y Afu Dios ya namabbalin kan y Pedro kan apostol kan ya Judio ira, en ya namabbalin kan yakan kan apostol kan ya mari Judio ira. 9Ira Santiago, Pedro, en y Juan, nga nekuenta kan panakallan ira, kattu nantindian da nga neddan y Afu Dios kan yakan pay ya ka-apostol ku, inalamanu rak en y Bernabe nga sennial kan ya attangesa mi. Nakkara-ana-anahutan mi nga yakan en y Bernabe ya umang kan ya mari Judio ira, en ira ya umang kan ya Judio ira. 10Yaw laman ya nekiddaw ra nga takkilalan mi, ya pobre ira, en nalappat nak nga nangngua kan yan. 11Kattu minang y Pedro kan ya siudad ya Antiokia, hinnian naliwatan na, en megafu kan yan, zinerettiok nga nevuya iggina. 12Yaw ya situasion. Hinnian dudduma nga minang kannay nga naggafu kan y Santiago. Kallie ya nepakakaddet da kannay, nakipangapangan y Pedro kan ya mari Judio ira nga wawwahi tera kan pangurug. Ngam kattu nakakaddet ya naggafu ira kan y Santiago, nemmang iggina nga nakipangan kan ya mari Judio ira, en negungay iggina kan ira, megafu kan ya talaw na kan ira yan nga makkahi kan mawag kan makugit ya mari Judio ira. 13Ya dudduma nga Judio nga mangurug, pinarrian da iggina nga nangngua kan ya kituballiat/kibalittag ya ammu ra nga napia, en megafu kan yan, maski y Bernabe, nevulun kan ira nga nangngua kan kunna tian. 14Ngam kattu nalippawat ku nga, ya kuan da, mari segun kan ya kurug nga ituldu ya napia nga dumug balattan, kungku gafen nga nakkahi kan y Pedro kan ya paratubangan da ngammin, "Judio ka, ngam ya kustumbrem, mari megitta kan kustumbre Judio nu azzi megitta kan kustumbre mari Judio. Ka-am gafen ta ifersam kan ya mari Judio ira nga vulunan da ya kustumbre ya Judio ira?" 15Ne-anak kami nga Judio; mari mi ne-anak kan mari Judio nga ikuenta mi kan minalliwat. 16Maski kurug yan, nammuan mi nga ikuenta y Afu Dios kan natunung ya innia laman, mari megafu kan ya ammaraparulot na kan ya dorob, nu azzi megafu kan ya angngurug na kan y Jesu Cristo. Maski ikami nga Judio gafen, nangurug kami pay kan y Jesu Cristo, tase ikuenta y Afu Dios kan natunung kami megafu kan ya angngurug mi kan iggina, en mari megafu kan ya ammaraparulot mi kan ya dorob, gafu ta awan nga tolay nga ikuenta na kan natunung megafu kan ya ammaraparulot na kan ya dorob na. 17Kannia akkelug mi nga mekuenta kan natunung megafu kan ya neketadday mi kan y Cristo, nu mammuan nga minalliwat kami pay kan kagitta nu nga mari Judio, awayya na kazze/pano makahi kan minalliwat kami megafu kan y Cristo? Mari na awayya! 18Nu itulduk manin nga mawag kan maparaparulot ya dorob ira nga dana kinahik nga mari mawag kan maparaparulot, manamanawag nga nalliwat nak. 19Megafu kan ya dorob, nekuentak yakan pe laman kan natay ngin nga nasueltan kan yan, tase mattolay nak nga mamuluvulun kan ya uray y Afu Dios. 20Gaggafen, kuenta netangepatak nak kan y Cristo kan ya kurut na, en kan sangaw, bakkan kan yakan pe laman ngin ya mattolay kan ya baggik nu azzi y Cristo. En ya attolek kan sangaw, mattolay nak segun kan ya angngurug ku kan ya Anak y Afu Dios nga mangayat kan yakan, en nangituluk kan ya nekapatay na para kan yakan. 21Nu awayya na nga mebilang kan natunung ya innia laman megafu kan ya ammaraparulot na kan ya dorob, awan nga serbi ya nepappatay y Cristo. Ngam marik pabbalinan ya allak y Afu Dios kan awan na nga serbi.

will be added

X\