Efeso 6

1Ikayu nga anak ira, paraparulotan nu ya gimmanakan nu kannia neketadday nu kan y Afu gafu ta mepangngat yan. 2Kunna kan ya Sagrado nga Turak, "Ikakuam ya amam en ya inam." Iggina yaw ya unna nga dorob nga napavulunan kan tabba, 3"tase awayya na nga napia ya mapasapasan mu, en maddetan mu ya aru nga dahun kan ya utun lusak." 4Ikayu nga ama ira, mari nu kuru passosobran ya addisiplina nu nga makapalussaw kan ya gi-anakan nu, nu azzi padakallan nu ira lahud kan ya tuldu en tabarang nga me-annung kan y Afu. 5Ikayu nga kohung ira, paraparulotan nu ya gi-amowan nu nga totolay nga napavulunan kan talaw en pilpig nga napafutu ya assesserbi nu kan ira nga arig y Cristo ya serbian nu. 6Kanakanayun nga kuan nu yan, mari megafu ta ikayat nu nga mapayayat da kan ikayu nu masingan da kayu nga mamaraparulot kan ira, nu azzi gafu ta kohung y Cristo ikayu nga maka-angngua kan yan nga uray y Afu Dios kan napafutu. 7Massesserbi kayu kan napia nga nonot nga arig y Afu ya sesserbian nu, mari kan tolay. 8On, gafu ta ammu nun nga balattan y Afu nattaruk ya hanna laman nga napia nga kuan ya kada isa kan ikayu, maski kohung onu mari kohung. 9Ikayu nga amo ira, kuan nu pay ya napia kan ya gikkohungan nu. Mari nu tantalawan ira, gafu ta ammu nu nga isissa balalaman ya Afu ra en ya Afu nu pay, en hinnian/asan iggina kan langit, en mari na mappadumuruma. 10Kan pangultimuan, pasikannan nu ya angngurug nu megafu kan ya neketadday nu kan y Afu en megafu pay kan ya dakal nga pakapangngua na. 11Alakan nu ya interu nga armas nga iddan y Afu Dios, tase maturiya nu ya pangilohot y Satanas. 12On, gafu ta ya labanan tera, mari kan tolay nu azzi ya makapangngua ira, ya maka-awayya ira, ya mammoray ira kan yaw nga kokopan/kallap nga mundo en ya narakat/napot nga espiritu ira nga hinnian kan ya angin kan ya pallehut tera. 13Gaggafen, alakan nu ngammin ya armas ira nga iddan y Afu Dios, tase metaggat nu ira yan nga narakat kan ya maziyat nga algaw, en so nu mabalin nu ngammin, aggatadag kayu peba. 14Gaggafen, manadag kayu nga kuenta nesintaron nu ya kakurruan, en kuenta netallab nu ya kinatunung kan ya gittagangan nu. 15Kuenta nesapatut nu ya keprepara nu nga mangipakammu kan ya napia nga dumug nga mangiddan kan imamak. 16Kan ngammin nga situasion ira, ya angngurug nu ya kuenta kalatag nga aggatammit nu nga makakaddap kan ngammin nga umafa-afi nga pana y Satanas. 17Alakan nu ya kuenta helmet nu, yan ya nekapalliad nu, en ya kuenta ispada ya Espiritu Santo, yan ya ergo y Afu Dios. 18Kanakanayun nga makadasadasal kayu kannia angngigiya ya Espiritu Santo kan ikayu, en kiddawan nu ya uffun y Afu Dios. Nu me-annung kannia angngigiya na kan ikayu, siggaparan kayu zinan nga massige nga mangidasal kan ngammin nga totolay y Afu Dios. 19Idasadasal nu yakan pay tase iddan y Afu Dios kan yakan ya fustu nga ergo nga ipakahi na kannia akkiergok kan ya innia laman nga hinnian gutuk/turid/taggad ku nga mangipakammu kan ya napia nga dumug nga mari ra peba nammuan kattun. 20Nabon nak nga mangibaggi/mangitadag kan y Afu nga mangipalappat kan yan, en kuenta nakadenan nak megafu kan ya kanakanayun nga nepangnguak kan yan. Idasadasal nu nga maggutuk nak nga mangikahakahi kan yan, gafu ta yan ya mawag kan kukukuan ku. 21Bonan ku kan ikayu y Tikico nga medduk nga wahi tera kan pangurug nga mapammakatalakkan nga serbidor y Afu. Iyangay na yaw nga turak ku kan ikayu, en ipakammu na kan ikayu ngammin ya situasion ku kanniaw en ya kukukuan ku. 22Yaw ya gafu na kan bonan ku iggina kan ikayu, tase mammuan nu ya me-annung kan ikami, en tase pasikannan na ya ginnonotan nu. 23Y Dios Ama en y Afu tera nga Jesu Cristo, pare zinan ta iddannan da ikayu nga wawwahik kan pangurug kan imamak en ayat en hinnian angngurug. 24Pare zinan ta hinnian ya allak y Afu Dios kan ngammin nga mangayat ira kan y Afu tera nga Jesu Cristo kan ayat nga mari mapawan.

will be added

X\