Efeso 5

1Gaggafen, ikayu nga ideddukan nga anak ira y Afu Dios, parrian nu iggina. 2Mattolay kayu nga sigga-ayat kan ya ikattolay nu kan kagitta ya nepangngayat y Cristo kan ikayu nga nepasingan na kannia nepangngituluk na kan ya angat na para kan ittera nga kuenta nabangug nga ofresi en idedika na kan y Afu Dios. 3Awan zinan nga ke-evuyatan nu kan addallaw, nadaping nga attolay, onu assamsam/ahagum, gafu ta mari mepangngat ira yan kan ikayu nga totolay y Afu Dios. 4Mari nu mergo kan sinapang nga ergo onu kan ergo ira nga awan da nga serbi onu kan ergo ira nga megiligilabak nga mari mepappangngat, nu azzi mappabalat kayu kan y Afu Dios. 5On, gafu ta masiguradu nu yaw: ya innia laman nga mamabay onu makilalaki onu nadaping ya attolay na onu massamsam, awan nga kesipattan na kan ya appatul y Cristo en y Afu Dios, gafu ta mekuenta ya assamsam na kan addayarayaw na kan rebultu. 6Mari nu ipamavulun nga melohot kayu kan ergo ira nga awan da nga kebalinan, gafu ta ira yan nga liwaliwat ya kegafanan ya aggazzit nattaruk y Afu Dios kan ya totolay nga minannuriya kan ya ergo na ira. 7Gaggafen, mari nu metadday kan ira. 8On, gafu ta kattun, hinnian/asan kayu kan ya kokopan/kallap, ngam kan sangaw, hinnian kayun kan ya nawag megafu kan ya neketadday nu kan y Afu. Gaggafen, mattolay kayu kan ya mepangngat kan ya kasan nu kan ya nawag. 9On, gafu ta, ya resulta ya nawag nga kuenta vunga na, ya angnga-angngua kan ngammin nga napia, natunung en kurug. 10Kakkapan nu nga ammuan ya makapayayat kan y Afu. 11En mari nu metadday kan ya kukukuan ya totolay nga maggafu kan kokopan nga awan nga meddan da nga napia, nu azzi ipakammu nu nga narakat ya kukukuan da. 12On, gafu ta makappasiran maski ya kekahi ya kukukuan da kan sinussukan. 13Ngam ya hanna laman nga mapalattuad kan ya nawag, masingan. 14On, gafu ta, ya hanna laman nga masingan, nawag. Gaggafen, nakahi yaw: "Ikaw nga aggakaturug, malukag kan; ikaw nga natay, magginnolay kan, tase nawahan na ka y Cristo." 15Gaggafen, immuhuran nu kan napia ya attolay nu, tase mari nu megitta kan ya totolay nga mari masirib, nu azzi megitta kayu kan ya totolay nga masirib. 16Nu hinnian tiansa nu nga mangngua kan napia, kuan nu yan panda ya mawayya nu, gafu ta narakat/napot ira yaw nga maddaggun nga algaw. 17Gaggafen, mari nu mabbalin kan kurang ya appanapanonot nu, nu azzi antindian nu ya uray y Afu Dios. 18Mari nu melellaw gafu ta yan ya makadaral kan ya katakatolay nu, nu azzi mawag kan mapannu kayu kan ya Espiritu Santo. 19Kannia aggerergo nu, iyusa nu ya Salmo ira, himno ira en kansion ira nga na-espirituan. Makkaransion en massalmo kayu kan y Afu kan napafutu. 20Kanakanayun nga mappabalat kayu kan y Dios Ama kan ngammin nga ganagannud kan ya ngahan y Afu tera nga Jesu Cristo. 21Makkaratulutuluk kayu megafu kan ya addayarayaw nu kan y Cristo. 22Ikayu nga babbay nga sigga-atawan, tumuluk kayu kan ya gi-attawan nu kan kagitta ya attuluk nu kan y Afu Jesus, 23gafu ta ya lalaki, iggina ya pangulu ya babay kan kagitta y Cristo nga iggina ya pangulu ya iglesia, en iggina mismu ya Mamalliad kan ya iglesia nga kuenta baggi na. 24Tumuluk kayu nga babbay kan ya gi-attawan nu kan ngammin nga ganagannud kan kagitta ya attuluk ya iglesia y Cristo kan iggina. 25Ikayu nga lallaki, ayatan nu ya gi-attawan nu kan kagitta ya angngayat y Cristo kan ya iglesia na, en megafu kan ya ayat na, netuluk na ya nekapatay na para kan ya iglesia na. 26Kiningngua na yan tase pabbalinan na ya iglesia kan nasantuan kannia nepammakarenu na kan ya iglesia kannia nekabaggu na kan danum megafu kan ya ergo. 27Kiningngua na yan tase iddan na kan iggina pe laman ya iglesia nga mekapakkapalat nga awan na nga mantia onu arig kumal onu hanna laman nga megitta kan yan, senannu awayya na nga mabbalin kan nasantuan en awan na nga kapaliwatan. 28Kunna tian pay kan ikayu nga lallaki, ayatan nu ya gi-attawan nu kan kagitta ya angngayat nu kan ya gibbaggian nu pe laman. Ya lalaki nga mangayat kan ya atawa na, ayatan na pay ya baggi na pe laman. 29On, gafu ta awan vulvua/pulus mangikalussaw kan ya baggi na pe laman, nu azzi tanggawan na en immuhuran na kan kagitta ya kukukuan y Cristo kan ya iglesia na 30gafu ta ittera ya parte ira kan ya baggi na. 31Kunna kan ya Sagrado nga Turak, "Megafu kan yan, panawan ya lalaki ya ama na en ya ina na, en metadday iggina kan ya atawa na, en mabbalin da nga dua kan kuenta isa nga baggi." 32Hinnian adalam nga kebalinan na yan nga ipakanawag ku, iggina yaw, kayan na ya akkarelasion y Cristo en ya iglesia na. 33Maski peba aggangarrian kunna tian, ya kada isa kan ikayu nga lallaki, ayatan nu ya gi-attawan nu kan kagitta ya angngayat nu kan ya gibbaggian nu pe laman. En ikayu nga babbay, ikakua nu ya gi-attawan nu.

will be added

X\