Efeso 4

1Gaggafen, yakan nga presu megafu kan ya assesserbik kan y Afu Jesus, ikikkiddok kan ikayu nga mattolay kayu kan mepangngat kan ya atanang nga kekuentan nga nangakkulan y Afu Dios kan ikayu. 2Kanakanayun nga mappakalinak kayu, massissimpat en mappasapasensia. Makkarapasapasensia kayu megafu kan ya akkara-aya-ayat nu. 3Kuan nu ya panda mawayya nu nga mappanayun kan ya attangesa nu nga neddan ya Espiritu Santo kan ikayu nga makkara-ana-anahut kayu nga sigga-imamak kayu. 4Isissa laman ya baggi, en isissa laman ya Espiritu Santo. Kunna tian pay, isissa laman ya innanama nga nakkulan nu. 5Isissa laman ya Afu; isissa laman ya pangurug; isissa laman ya bawtiso; 6en isissa laman ya Dios en Ama ngammin ya totolay, iggina ya mammoray kan ngammin, ya mattrabahu kan ngammin, en ya hinnian/asan kan ngammin. 7Maddumuruma ya ne-eruma nga pakapangngua nga neddan kan ya kada isa kan ittera segun kan ya angngitaned/angngiyantet na kan ya regalu na ira. 8Kunna kan ya Sagrado nga Turak, "Kannia nepaggutun na kan langit, aru ya kuenta presu nga nevulun na, en iniddannan na ya totolay kan regeregalu." 9Kattu neturak nga minutun iggina, hanna peba ya ikayat na nga kayan nu azzi ya nepazzittag na bitan kan ya kalinakkan nga lugar, yan ya lusak. 10Ya nazzittag, iggina balalaman tu minutun kan ya katanangan nga langit tase awayya na nga hinnian iggina en mammoray kan ngammin nga lugulugar. 11Iggina ya nangiddan kan ittera kan regeregalu. Ira yaw ya arig regeregalu na: apostol ira, profeta ira, minangngipalappat ira kan ya napia nga dumug, en pastor ira pay nga minattuldu. 12Kuenta neddan na ikami kan ikayu nga mangiprepara kan ikayu nga totolay y Afu Dios nga massesserbi kayu kan y Cristo, tase mapasikan ya angngurug nu nga arig baggi y Cristo, 13addet zi mattangesa tera kan pangurug en kan ya pakakammu kan ya Anak y Afu Dios, senannu mammanakam tera kan appanapanonot addet zi megitta ya katakatolay tera kan y Cristo nga awan nga pakkurangan na. 14Nu maddetan tera yan, mari tera megitta ngin kan abbing, en mari tera mepalapalung en mepayapayad kan kada angin nga mari fustu nga tuldu ya totolay nga narakat/napot ya gakkad en ya appanapanonot da nga illokowan da ya totolay, en iyarayyu ra ira kan ya kurug, 15nu azzi, kannia angngikahi tera kan ya kurug nga sigga-ayat tera, mammanakam tera zinan kan appanapanonot nga mabbalin kan mas megitta kan y Cristo nga pangulu tera. 16Ngammin ya maddumuruma nga parte nga nekkua/neppay kan baggi, napatturuvvud en napattangesa, en nu fustu ya attrabahu ya kada parte, megafu kan ya neketadday tera kan y Cristo, ya baggi, padakallan na iggina pe laman en pammanakamman na iggina pe laman kan appanapanonot megafu kan ayat. 17Gaggafen, kan ya paka-awayya y Afu Jesus, itabarang ku kan ikayu nga mari nu mattolay ngin nga megitta kan ya totolay nga mari makakammu kan y Afu Dios nga awan nga serbi ya appanapanonot da. 18Nakokopannan/Nakallappan ya ginnonotan da. Awan da nga kesipattan kan ya bahu nga attolay nga iddan y Afu Dios gafu ta ne-ammari ra nga ammuan iggina gafu ta nataggat ya giffutuan da. 19Awan da nga appasiran, en siminuluk da nga mamuluvulun kan ya gibbisiuan da ira pe laman, en mari ra mafuffuwaddan nga maka-angngua kan ngammin nga narakat. 20Ngam mari kunna tian ya nagilammu nu nga me-annung kan y Jesu Cristo. 21Manamanawag nga nagina nun ya me-annung kan iggina, en natulduan kayu kan me-annung kan iggina, en kurug ya napia nga dumug nga me-annung kan iggina. 22Gaggafen, azzan nun ya dana nga katakatolay nu nga nadaral megafu kan ya narakat nga bisiu ira nga mangilohot kan ikayu. 23Mawag kan mapabahu kayun kan ya appanapanonot nu en ya giffutuan nu. 24Mawag kan hinnian kan ikayun ya napabahu nga katakatolay nu nga naparatu kan kurug nga kinatunung en kinasanto nga mabbalin kan megitta kan y Afu Dios. 25Gaggafen, mari nu malladdaladdud/mabbusubusid ngin, nu azzi kanakanayun nga kayan ya kada tolay ya kurug kan ya ikattolay na, gafu ta ittera ngammin, parte ira kan ya baggi y Cristo. 26Nu mallussaw kayu, memmuhud kayu tase mari nu malliwat, en mari nu pabbayahan ya lussaw nu nga addetan na ya gabi. 27Mari nu iddannan y Satanas kan tiansa na nga mangaffut kan ikayu. 28Ya innia laman nga minakkokot, memmang zinan ngin nga makkokot. Imbes kan yan, mawag kan mattrabahu iggina kan napia megafu kan ya sikan na, tase hinnian pakkatolay na en tase hinnian meddan na pay kan ya innia laman nga makakawag. 29Mari nu mergo ngin kan hanna laman nga narakat, nu azzi perergowan nu ya napia ira para panguffun kan ya makakawag ira, tase mabendisionan ya maggina ira. 30Mari nu mangngua kan hanna laman nga mamakarandam kan ya Espiritu Santo y Afu Dios, gafu ta iggina ya sennial ya pakakkua y Afu Dios kan ikayu addet kan ya algaw nga katumpal ya katavvut nu. 31Azzan nu ngammin ya takit kan ya ginnonotan nun, aggaba-aburidu, allullussaw, attarabbag kan nadammat nga ergo, ammaraparakat, en hanna laman nga narakat. 32Imbes kan yan, massissimpat kayu, makkara-alla-allak kayu, en makkarapakapakoma kayu kan kagitta ya nepammakoma y Afu Dios kan ikayu megafu kan y Cristo.

will be added

X\