Efeso 2

1Megafu kan ya liwaliwat nu en ya zi nu nepammaraparulot kan ya uray y Afu Dios kattun, nekuenta kayu kan natay. 2Kan yan nga tiempo, vinuluvulun nu ya narakat/napot nga kustumbre ira ya totolay kan yaw nga mundo. Vinuluvulun nu ya mammoray kan ya hinnian/asan paka-awayya ra nga hinnian kan ya angin, iggina ya espiritu nga mattrabahu kan ya totolay nga minannuriya kan ya uray y Afu Dios. 3Kunna tian ya nepattolay tera ngammin pay kattun segun kan ya narakat nga keluhan ya gibbaggian tera, en vinuluvulun tera ya negagangay nga keluhan ya gibbaggian en ya ginnonotan tera. Gaggafen, ya negagangay nga situasion tera, mepangngat nga makastigo tera pay kan kagitta ya dudduma/karruan. 4Ngam y Afu Dios, nelot/nafulotan ya allak na megafu kan ya dakadakal nga ayat na kan ittera. 5Maski nekuenta tera kan natay megafu kan ya zi tera nga nepammaraparulot kan ya uray na, iniddannan na ittera kan bahu nga attolay kan kagitta ya nepammaginnolay na kan y Cristo. Napalliad kayu megafu kan ya allak na. 6Kuenta netangepaginnolay en netangepatuttud na ittera kan iggina kan ya nelangitan nga lugar ira megafu kan ya neketadday tera kan y Jesu Cristo. 7Kiningngua na yan tase, kan ya mannanayun nga tiempo nga mappanget, mepasingan na kan ittera ya kadakal ya allak na nga mari magukugukud kannia angnga-angngua na kan napia kan ittera megafu kan y Jesu Cristo. 8On, gafu ta, megafu kan ya allak na, pinalliad na ittera megafu kan ya angngurug tera. Ya nekapalliad tera, yan ya regalu y Afu Dios, bakkan kan ittera ya naggafanan na, 9en mari megafu kan ya kinikkingngua tera, tase awan nga mappeddarayaw. 10On, gafu ta ittera ya trabahuan na, en sinalibahu na nga pinaratu ittera megafu kan y Jesu Cristo tase maka-angngua tera kan ya napia ira nga ginakkad y Afu Dios kattun nga ipakapakua na kan ittera. 11Ikayu nga ne-anak nga mari Judio, makahi kan mari nakugit kan ikami nga Judio nga nangahanan kan nakugit, yan ya makua kan ya baggi ya innia laman nga lalaki. Dandamman nu 12nga kattun, awan kayu peba kan y Cristo. Mari nu nesipat kan ikami kattun nga Israelita nga totolay na nga pinili na. Dayu ya nekuentan nu kan ya taratu y Afu Dios nga nebase kan ya netabba na. Nattolay kayu kan ya utun lusak nga awan nu nga agginnanama onu pakakammu kan iggina. 13Ngam kan sangaw, megafu kan ya neketadday nu kan y Jesu Cristo, ikayu nga arayyu kattun kan y Afu Dios, ne-aranni na kayu kan iggina pe laman megafu kan ya daha y Cristo. 14On, gafu ta mismu y Cristo ya nappemamak kan ikami nga Judio en ikayu nga mari Judio, en kan ya baggi na, zinaral na ya dana hinnian kan ya naddatanan/nallatanan tera, yan ya akkorontra tera. Pinattangesa na itteran 15kannia nepangngazza na kan ya paka-awayya ya dorob ya Judio ira nga bilin en mandu ira, tase pakesan na ikami nga Judio en ikayu nga mari Judio kannia ketadday tera kan iggina, en yan ya appemamak na kan ittera. 16Kiningngua na ira yan kannia nepappatay na kan ya kurut, en pinawan na ya negafanan ya nepakkorontra tera, en pinattangesa na ittera kan isa nga baggi, en nesippoli/nepattoli na ittera kan y Afu Dios. 17Ya kiningngua na sangaw, minang iggina nga nangipalappat kan imamak kan ikayu nga mari Judio nga arayyu kan y Afu Dios en kan ikami nga Judio nga aranni kan iggina. 18Megafu kan iggina, parehu tera ngammin nga me-aranni kan y Dios Ama megafu kan ya isissa nga Espiritu Santo. 19Gaggafen, ikayu nga mari Judio, mari nu mebilang ngin kan dayu onu totolay nga makipaddian kan tanakkuan nga babalay, nu azzi permanente kayu pay ngin kan kagitta mi nga totolay y Afu Dios kattun, en miembro kayun kan ya famillia na. 20Ne-arig tera kan balay nga napatadag kan ya isissa nga fundasion nga nekkua/neppay mi nga apostol en profeta ira, en y Jesu Cristo mismu ya patunak. 21Megafu kan iggina, kuenta matturuvvud ngammin ya parte ira kan ya interu balay, en dumakal nga mabbalin kan nasantuan nga templo y Afu. 22Megafu kan ya neketadday nu pay nga mari Judio kan iggina, netangepatadag kayu kan ikami kan yan nga templo nga paddianan y Afu Dios kannia addian ya Espiritu Santo na kan ittera.

will be added

X\