Colosas 3

1Gaggafen, nu netangepaginnolay kayu kan y Cristo, ira yan zinan ya keluhan nu, ya hinnian/asan ira kan langit nga dian y Cristo nga aggatuttud kan ya ziwanan y Afu Dios. 2Panapanonotan nu ya hinnian ira kan langit, bakkan kan ya ganagannud kan ya utun lusak. 3On, gafu ta kuenta natay kayun, en kuenta narimanan ya gi-angattan nun kan y Afu Dios megafu kan ya neketadday nu kan y Cristo. 4Nattaruk nu mappasingan y Cristo nga paggafanan ya kurug nga gi-angattan nu, metangepasingan kayu pay nga megitta kan iggina nga megloria. 5Gaggafen, immangan nun ya nemundowan nga ikayat ya gibbaggian nu: aggangarrian: addallaw, narakat/napot nga appanapanonot, napatu nga addahadaha, akkelug nga mangngua kan narakat, en assamsam/ahagum gafu ta yan, kuenta addayarayaw kan rebultu. 6Megafu kan ira yan nga narakat, kastigowan y Afu Dios ya minannuriya ira. 7Ikayu pay, kattun, kinikkingngua nu ira yan kattu nattolay kayu kan kunna tian. 8Ngam kan sangaw, azzan nu ngammin ira yaw ngin kan ya ginnonotan nu: allussaw, aggaba-aburidu, takit nonot kan ya ikattolay, ammaraparakat en narakat nga ergo nga mallawan kan ya simuk. 9Mari nu makkaraladdaladdud/makkarabusubusid ngin gafu ta inazzan nu ya dana nga katakatolay nun en ya narakat nga kinikkingngua nu pay, 10en arig neguhu nu ya bahu nga katakatolay nun nga kanakanayun nga mapabahu kan pakakammu nga mabbalin kan mas megitta kan ya Namaratu kan yan nga bahu nga katakatolay nu. 11Kan yaw nga situasion tera, awan ngin nga padduman ya Judio en ya mari Judio, ya nakugit en ya mari nakugit, ya dayu, ya mengal nga totolay nga maddian kan arayyu, ya kohung en ya mari kohung. Ya neketadday tera kan y Cristo, yan ya ka-importanteyan, gafu ta hinnian iggina kan ngammin. 12Gaggafen, ikayu nga pinili y Afu Dios, nasantuan en medduk, mawag kan minangngikallak, minangngidduk, nasimpat, minappakalinak, en minaggatta-attam kayu. 13Makkarapasapasensia kayu, en nu hinnian pangakusan ya isa kan ya ikattolay na, pakoman na zinan kan kagitta ya nepammakoma y Afu kan ikayu. 14Iyamung nu peba kan ngammin ira yan ya akkara-aya-ayat nu, gafu ta yan ya mamakesa kan ira yan nga bahu neturak ku nga awan da nga pakkurangan. 15Ya imamak nga iddan y Cristo, pammorayan nu kan ya giffutuan nu gafu ta yan ya nangakkulan na kan ikayu, tase mabbalin kayu kan isissa nga baggi. En mappabalat kayu kan y Afu Dios. 16Paddianan nu ya ergo y Cristo kan ikayu kan napafutu. Masirib kayu zinan nga makkaratuttuldu en makkaratabatabarang, en makkakkansion kayu kan Salmo ira, kan himno ira en kan na-espirituan nga kakkansion, en kan ya giffutuan nu, hinnian zinan appabalat nu kan y Afu Dios. 17En ya hanna laman nga kayakayan en kukukuan nu, mawag kan mepangngat ngammin kan ya neketadday nu kan y Afu Jesus, en mappabalat kayu kan y Dios Ama megafu kan iggina. 18Ikayu nga babbay, tumuluk kayu kan ya gi-attawan nu, gafu ta yan ya mepangngat kan ya neketadday nu kan y Afu Jesus. 19Ikayu nga lallaki, ayatan nu ya gi-attawan nu, en mari nu tattazzian ira. 20Ikayu nga anak ira, paraparulotan nu ngammin ya kayan ya gimmanakan nu kan ikayu, gafu ta yan ya makapayayat kan y Afu. 21Ikayu nga ama ira, mari nu patakitan ya ginnonotan ya gi-anakan nu tase mari makkafi ya ginnonotan da. 22Ikayu nga kohung ira, paraparulotan nu ya gi-amowan nu nga totolay, mari megafu ta ikayat nu nga mapagustuan da kan ikayu nu masingan da kayu nga mamaraparulot kan ira, nu azzi megafu kan napia nga futu nga hinnian attalaw nu kan y Afu. 23Ya hanna laman nga kuan nu, trabahuan nu yan kan napafutu nga arig y Afu ya serbian nu, mari na kan tolay. 24Dandamman nu nga alawatan nu kan iggina ya netabba na nga premio nga pappabalat kan ya trabahu nu. Y Afu ya kurug nga pakikohungan nu, iggina y Cristo. 25On, gafu ta, ya maka-angngua kan narakat, mebalat kan iggina pe laman nattaruk ya narakat nga kinikkingngua na, gafu ta y Afu Dios, mari na mappadumuruma.

will be added

X\