Colosas 2

1Ikayat ku nga mammuan nu nga nelot/nafulotan ya nepabbannabannag ku para kan ikayu en para kan ya wawwahi tera kan pangurug kan ya siudad ya Laodicea en kan ya innia laman nga mari peba nakasingan kan yakan. 2Kukukuan ku yan tase mapagutuk/mapaturid/mapataggad kayu, en mattangesa kayu kan ayat, senannu dakal ya kesiguradu nu nga maggafu kan ya pakantindi nu kan ya kurug, yan ya pakakammu nu kan ya sekreto y Afu Dios nga mari na nepakammu kattun, iggina balalaman y Cristo. 3Ngammin ya nanginingina nga sirib en pakakammu, hinnian/asan kan iggina. 4Kinahik ira yan tase mari nu melohot kan ya ergo ira nga napia ya kagina ra ngam laddud/busid mamba. 5On, gafu ta, maski awan nak kan ikayu, kuenta hinnian nak gafu ta kanakanayun nga agganonot ta kayu. Mayayat nak gafu ta ammuk nga napia ya attaradday nu en naladda pay ya angngurug nu kan y Cristo. 6Gafu ta inalawat nu y Jesu Cristo kan Afu nu, mattolay kayu kan mepangngat kan ya neketadday nu kan iggina. 7Megitta kayu kan mula nga napagamut kan iggina, en megitta kayu pay kan balay nga nepatadag kan iggina nga napatuyag ya angngurug nu kan ya kurug nga netuldu kan ikayu, en umara-aru ya appabalat nu kan y Afu Dios. 8Mappalan/Memuhud kayu tase awan nga makelohot kan ikayu megafu kan ya affilifilosofo en angngili-illoko ra nga awan da mamba nga serbi segun kan ya maggafu laman kan ya appanapanonot ya totolay, segun kan ya unna nga ganagannud ya mundo, mari na kan segun kan y Cristo. 9On, gafu ta, ya interu Kinadios y Afu Dios, hinnian kan y Cristo nga nabbalin kan tolay. 10En megafu kan ya neketadday nu kan iggina nga pangulu kan ngammin nga espiritu ira nga mammoray en espiritu ira nga maka-awayya, meddannan kayu kan attolay nga awan na nga pakkurangan. 11Kattu netadday kayu kan y Cristo, inazzan nu ya negagangay nga alliwaliwat nu nga kuenta nakugit kayu kan ya nekakugit nga mari kiningngua ya ima tolay nu azzi kan ya nekakugit nga kiningngua y Cristo. 12Kattu nabawtisowan kayu, kuenta netangetanam kayu kan iggina. En kannia nekabawtiso nu, kuenta netangepaginnolay kayu pay kan iggina megafu kan ya angngurug nu kan ya pakapangngua y Afu Dios nga nappaginnolay kan iggina. 13Nekuenta kayu kattun kan natay megafu kan ya narakat/napot nga kinikkingngua nu en gafu ta mari nu Judio. Ngam netangepattolay na kayu y Afu Dios kan y Cristo kattu pinakoma na ngammin ya narakat nga kinikkingngua tera. 14Pinawan na ya dorob nan nga nangontra kan ittera nga neturakan ya reglamento ira nga makkahi kan ya annungan tera, en pinabbalin na kan awan nga serbi nan kattu kuenta nepepatak na yan nga dorob kan ya kurut. 15Kuenta inazzan na ya armas ya espiritu ira nga maka-awayya en makapangngua kabalin ya nepangngaffut na kan ira megafu kan iggina, en nepagiraw na ira nga neparada kan ya paratubangan ya maru. 16Gaggafen, awan zinan nga mangiyuray kan ikayu kan me-annung kan ya mepamavulun nga makan, onu menum, onu me-annung kan ya asselebra nu kan fiesta onu kan ya kalgawan nga bahu allattuad ya vulan onu kan ya angngilin kan Sabadu. 17Ira yaw, arig alinaw laman ya netunud nga ganagannud, ngam y Cristo balalaman ya kurug. 18Awan zinan makkahi nga mari nu mapremiowan kan langit, en iyuray na ya appakalinak nu en ya ammakakua nu kan anghel ira. Kayan da nga hinnian nappasingan kan ira, en bayahan da nga ipakapakanawag yan. Ipalagopog da ya nemundowan nga appanapanonot da maski awan nga gafu na. 19Negungay ra y Cristo nga arig ulu. Megafu kan ya neketadday tera kan y Cristo, ya interu baggi, meddannan kan ya mawag en mapaturuvvud kan ya naddarafungan tulutulang en pikipikar/pikipikal na, en dumakal segun kan ya ikayat y Afu Dios nga addakal na. 20Kuenta nesipat kayu kan ya nepappatay y Cristo nga nasueltan kan ya unna nga ganagannud ya mundo. Ka-am gafen ta mattolay kayu kan ya mundo, en tumuluk kayu kan ya unna nga reglamento ira? 21Aggangarrian, "Marim tammitan yaw." "Marim sinsiman yan." "Marim tukkallan nay." 22Ira yaw nga reglamento, me-aplika kan ganagannud nga madaral kannia ke-usa ra, en segun kan ya mandu ira en tuttuldu tolay laman. 23Kan ya pangabbattan ya totolay, hinnian sirib kan ira yan nga reglamento nga masingan kannia ammakakua ra segun kan ya uray ra, kannia appakalinak da, en kannia ammazapaziyat da kan ya gibbaggian da pe laman. Ngam awan da nga serbi kan ya angngifuwad ya innia laman kan ya ammagustu na kan ya baggi na pe laman.

will be added

X\