Colosas 1

1Yakan y Pablo nga apostol y Jesu Cristo megafu kan ya uray y Afu Dios. Yakan en y Timoteo nga wahi tera kan pangurug, 2diot mi kan ikayu nga totolay y Afu Dios nga maddian kan ya siudad ya Colosas nga mapammakatalakkan nga wawwahi mi kan pangurug kan y Cristo. Pare zinan ta hinnian kan ikayu ya allak en imamak nga iddan y Afu Dios nga Ama tera. 3Kanakanayun nga mappabalat kami kan y Afu Dios nga Ama y Afu tera nga Jesu Cristo kannia angngidasadasal mi kan ikayu. 4Mappabalat kami gafu ta nadumug mi ya angngurug nu kan y Jesu Cristo en ya ayat nu kan ngammin nga totolay y Afu Dios 5megafu kan ya innanama nu kan ya narimanan kan langit para kan ikayu. Nammuan nu yan nga innanama kattu nagina nu ya kurug nga ergo y Afu Dios, yan ya napia nga dumug 6nga nepakammu kan ikayu. Umara-aru ya mangurug ira kan yan, en yan ya makakeddan kan napia nga alale mavvunga kan ya interu mundo nga megitta kan ya kukukuan na kan ikayu namegafu kattu unna nga algaw nga nepakagina nu en nepakantindi nu kan ya kurug nga me-annung kan ya allak y Afu Dios. 7Nammuan nu yan kan y Epafras nga medduk nga kagitta mi nga kohung, en mapammakatalakkan iggina nga mangibaggi/mangitadag kan ikami nga minasserbi kan y Cristo. 8En nepakammu na kan ikami ya ayat nu nga neddan ya Espiritu Santo kan ikayu. 9Gaggafen, namegafu kattu unna nga algaw nga nepakadumug mi kan ira yan nga me-annung kan ikayu, mari mi memmang nga mangidasadasal kan ikayu nga mangikikkiddaw kan pannuan na kayu kan pakakammu kan ya uray na kan ya na-espirituan nga sirib en pakantindi nu. 10Idasadasal mi ira yan tase awayya nu nga mattolay kan mepangngat kan ya neketadday nu kan y Afu Jesus, en mapayayat nu iggina kan kompleto kannia angnga-angngua nu kan hanna laman nga napia, en dumakal pay ya pakakammu nu kan y Afu Dios. 11En idasadasal mi peba nga mapasikan ya angngurug ya kada isa kan ikayu segun kan ya mekapakkapalat nga pakapangngua na, tase pasensian nu en attamman nu ya ziyariyat nu nga siggapayayat kayu 12nga mappabalat kan y Dios Ama nga namabbalin kan ikayu kan mepangngat nga mesipat kan ikami kan ya meddan kan ya totolay na kan ya pappatulan ya nawag. 13Pinalliad na ittera en inazzan na itteran kan ya paka-awayya ya kokopan/kallap, en ne-alit na ittera kan ya appatul ya ideddukan na nga Anak na. 14En megafu kan iggina, natavvut tera, yan ya nekapakoma ya liwaliwat tera. 15Y Cristo ya kasinnan y Afu Dios nga mari masingan, en ya panakallan kan ngammin nga pinaratu ira. 16On, gafu ta, megafu kan iggina, naparatu ngammin ya ganagannud nga hinnian kan langit en kan ya utun lusak, ya masingan ira en ya mari masingan ira, mesipat ya espiritu ira nga mappatul onu mammoray onu makapangngua onu maka-awayya. Ngammin ya ganagannud, naparatu megafu kan iggina en para kan iggina. 17Dana aggahinnian iggina kallie peba ya nekaparatu ngammin ya ganagannud, en ngammin ya ganagannud, fustu ya akkararelasion da megafu kan iggina. 18Iggina ya ulu ya baggi, yan ya iglesia na. Iggina ya naggafanan ya angat tera en ya unna nga nagginnolay, tase makapabbalin iggina kan panakallan kan ngammin. 19Napayayat y Afu Dios nga hinnian kan y Cristo ya interu Kinadios na. 20En megafu kan y Cristo, isippoli/itoli y Afu Dios kan iggina pe laman ngammin ya pinaratu ira nga hinnian kan ya utun lusak en kan langit, en pinabbalin na kan hinnian imamak kan ya relasion na kan ngammin megafu kan ya daha y Cristo nga natturut kattu nepatak iggina kan kurut. 21Arayyu kayu kan iggina kattun, en mekontra kan iggina ya appanapanonot nu en ya narakat/napot nga kinikkingngua nu. 22Ngam kan sangaw, megafu kan ya nekepatak y Cristo kan kurut, pinabbalin na kayu kan kakkofun y Afu Dios tase me-atubang na kayu kan iggina nga nasantuan en awan nu nga mantia onu kapaliwatan. 23Basta massige kayu nga mangurug nga natuyag en naladda ya angngurug nu nga mari nu pawanan ya innanama nu nga hinnian kan ikayu megafu kan ya napia nga dumug nga nagina nu. Nepalapalappat yan kan ngammin nga totolay kan ya utun lusak, en yakan, Pablo, napabbalin nak kan minangngipalappat kan yan. 24Sangaw, mayayat nak gafu ta awayyak ya mapazapaziyat para kan ikayu, gafu ta kan ya baggik, lannappan ku ya kurang kan ya nekapazapaziyat y Cristo para kan ya baggi na, yan ya iglesia na. 25Nabbalin nak kan minasserbi kan ya iglesia, gafu ta yan ya nasantuan nga trabahu nga nanunnakkan y Afu Dios kan yakan para kan ikayu, tase ipakammuk ya ergo na kan kompleto. 26Yan nga ergo ya sekreto y Afu Dios nga mari na nepakammu kan ya totolay kan ya nappasa nga tiempo, ngam kan sangaw, nepakammu na kan ya totolay nan, 27gafu ta ya plano y Afu Dios, ipakammu na kan ya totolay na ya kadakal ya kekapalat yan nga sekreto nga para kan ikayu nga mari Judio, yan ya kasan y Cristo kan ya kononaggan ya kada isa kan ikayu, en megafu kan yan, hinnian innanama nu nga megloria kayu nattaruk. 28Ipalapalappat mi y Cristo gafen nga tuttulduan en tabatabarangngan mi ya kada tolay nga awan nga pakkurangan ya sirib mi, tase mepresenta mi kan y Afu Dios ya kada tolay nga awan nga pakkurangan na kan ya neketadday na kan y Cristo. 29Mabbannabannag nak nga mattrabahu segun kan ya dakadakal nga pakapangngua na nga mamasikan kan yakan tase matumpal ku yan nga trabahuk.

will be added

X\