Kinikkingngua 9

1Mismu kan yan nga tiempo, nesigisige peba y Saulo ya annantalaw na kan ya disipulo ira y Afu Jesus nga mapatapatay ra. Minang iggina kan ya pari nga katanangan ya kekuentan na, 2en nakkiddaw iggina kan turak ira nga mangiyam-ammu kan iggina kan ya panakallan ira kan ya sinagoga ira kan ya siudad ya Damasco nga hinnian/asan paka-awayya na nga manggafut kan ya tolay ira, lallaki onu babbay, nga matafulan na nga mangurug kan y Jesus, tase iyangay na ira nga aggabalud kan Jerusalem. 3Kannia umara-aranni ra Saulo kan Damasco, gavvat nga hinnian nawag kan ya utun da nga nangnawag kan ya pallehut da. 4Natomba iggina kan ya lusak, en hinnian ngaral nga nagina na nga kunna nga namovut kan iggina, "Saulo, Saulo, ka-am ta pazapaziyatan nak?" 5Ngam kunna nga namovut, "Afu, innia ka?" Kunna ya ngaral nga siminabbag, "Yakan y Jesus nga pazapaziyatan mu. 6Gumangun kan, en angkan kan ya siudad, en mekahi kan ikaw kannay ya mawag kan kuan mu." 7Ngam ya lallaki nga kakavulun na, aggatadag da nga nakalalang/nemanga da. Nagina ra ya ngaral, ngam awan nga tolay nga nasingan da. 8Sangaw, guminangun y Saulo, ngam kattu nalladdang iggina, mari na nakasingan ngin. Gaggafen, kinebit da iggina en ne-angay ra kan Damasco. 9Kan tallu algaw, mari na nakasingan, en mari na vulvua/pulus nangan onu mininum. 10Hinnian isa nga disipulo kan yan nga siudad nga mangngahan kan Ananias. Nappasingan y Afu Jesus kan iggina, en kunna nga nakkul, "Ananias!" Kunna y Ananias nga siminabbag, "Die nak, Afu." 11Kunna nga nakkahi y Afu Jesus, "Maggannukat ka en angka kan ya dalan nga nangahanan kan Natunung, en kan ya balay y Judas, povutan mu y Saulo nga taga siudad ya Tarso. Maddaggun iggina nga maddasal, 12en kan ya nonot na, nasingan na ya isa nga tolay nga mangngahan kan Ananias nga umang mangipotun kan ya ima na kan iggina tase makasingan iggina manin." 13Ngam kunna y Ananias nga siminabbag, "Afu, napakaru ya nagginan ku kan me-annung kan yan nga tolay nga napakaru ya kinikkingngua na nga narakat/napot kan ya totolem kan Jerusalem. 14En minang iggina kanniaw, Damasco, gafu ta iniddannan ya panakallan ira kan ya papari iggina kan paka-awayya na nga manggafut kan ngammin nga maddayarayaw kan ikaw." 15Ngam kunna nga nakkahi y Afu Jesus, "Angka kan iggina, gafu ta pinilik iggina nga masserbi kan yakan nga mangipalappat kan ya me-annung kan yakan kan ya Israelita ira, kan ya mari Israelita ira en kan ya papatul. 16En ipasingan ku mismu kan iggina ya aru nga kapazapaziyat nga mawag kan attamman na para kan yakan." 17Gaggafen, minang y Ananias, en siminallung kan ya balay ra. Nepotun na ya ima na kan y Saulo, en kunna nga nakkahi, "Wahik nga Saulo, y Afu Jesus nga nappasingan kan ikaw kan ya dalan kattu mappanget ka kanniaw, binon nak kan ikaw tase makasingan ka manin en mapannuan ka kan Espiritu Santo." 18Sangaw, hinnian megitta kan sirissik nga insigida nazza kan ya mata na, en nakasingan iggina manin. Luminakkat iggina en nabawtisowan. 19Sangaw, nangan igginan, en nanoli ya sikan na. Nakipaddian y Saulo kan ya disipulo ira kan Damasco kan pia nga algaw. 20Nerame na minang kan ya sinagoga, en nepalappat na y Jesus nga iggina ya Anak y Afu Dios. 21Nappabbaw ngammin ya naggina kan iggina, en kunda nga nakkaporovut, "Mari kazze/pano yaw tu tolay nga nanattazzi kan ya totolay kan Jerusalem nga mangurug kan y Jesus, en minang iggina kanniaw tase gafutan en iyangay na ira nga aggabalud kan ya paratubangan ya panakallan ira kan ya papari?" 22Ngam mas napasikan ya appalapalappat y Saulo, en awan nga metabbag ya Judio ira nga maddian kan Damasco kan iggina, gafu ta nasikan ya attestigu na nga y Jesus, iggina ya Cristo. 23Nappasa ya aru nga algaw, pinalano ya Judio ira nga patayan da y Saulo, 24ngam nammuan na ya plano ra. Sinilissifut da ya attallungan ira kan ya siudad kan algaw en gabi tase, so nu mallawan iggina, patayan da. 25Ngam kan isa nga gabi, inalak ya disipulo ira iggina gafen, en nekkua/neppay ra iggina kan kuribut, en zinittag da iggina kan ya liwan ya atanang nga pader nga hinnian kan ya lehut ya siudad. 26Kattu luminabbet y Saulo kan Jerusalem, kinakkapan na ya makipattangesa kan ya disipulo ira, ngam mattalaw ra ngammin kan iggina, en mari ra mangurug nga isa igginan nga disipulo. 27Ngam minang inalak y Bernabe iggina, en ne-angay na iggina kan ya apostol ira. Pinakoli na kan ira ya nepakasingan y Saulo kan y Afu Jesus kan ya dalan, ya nepakiergo y Afu Jesus kan iggina, en ya gutuk/turid/taggad na nga nangipalappat kan ya napia nga dumug kan Damasco megafu kan ya pakapangngua ya ngahan y Jesus. 28Inalaba ra gafen iggina. Minang iggina kan maski hanna nga ikayat na nga angayan kan Jerusalem nga nagutugutuk nga nappalapalappat megafu kan ya pakapangngua ya ngahan y Afu Jesus. 29Nakiergo en nakiddibate iggina kan ya Judio ira nga Griego ya perergo ra. Sangaw, negatak/negatab da nga patayan iggina. 30Ya wawwahi kan pangurug, kattu nammuan da yan, netulud da iggina nga naddahut da kan ya siudad ya Cesarea, en pinalabbet da iggina kan ya siudad ya Tarso. 31Sangaw, hinnian imamak kan ya iglesia ira kan ya interu probinsia ya Judea, ya Galilea en ya Samaria. Napasikan ya angngurug da, en nattolay ra nga maddayarayaw kan y Afu en mabannayan kan ya Espiritu Santo, en minara-aru ra. 32Kattu minang y Pedro kan ya lugar ira kannay, missa nga minang na binisita ya totolay y Afu Dios nga maddian kan ya babalay ya Lidda. 33Hinnian tolay kannay nga nasimmuan na nga mangngahan kan Eneas nga paralitiko nga agga-idda kan kattri kan walu rahun ngin nga mari makatadag. 34Kunna y Pedro nga nakkahi kan iggina, "Eneas, pammapian na ka y Jesu Cristo. Manadag kan, en lukutan mu ya abak mun." Insigida nanadag iggina. 35Ngammin ya maddian ira kan Lidda en kan ya Tanap ya Sarona, nasingan da nga napammapia igginan. Sangaw, nangurug da kan y Afu Jesus. 36Kan ya babalay ya Joppe, hinnian isa nga disipulo nga babay nga mangngahan kan Tabita kan perergo Hebreo. Ya ngahan na kan perergo Griego, Dorcas. Napakaru ya kinikkingngua na nga napia en ya nepangngikallak na kan ya pobre ira. 37Kan ira nay nga algaw nga kasan y Pedro kan Lidda, nattakit y Dorcas en natay. Zinihut da iggina, en nekkua ra kan ya isa nga kuarto kan ya utun ya balay. 38Gafu ta aranni ya Lidda kan Joppe, nabbon ya disipulo ira kan dua nga lallaki kan y Pedro kan Lidda gafu ta dana ammu ra nga hinnian iggina kannay nga kunda nga nakimemallak, "Kazzen ta alistuan mu ya mevulun kan ikami." 39Naggannukat y Pedro en nevulun kan ira. Kattu nakalabbet da kan Joppe, pinadulot da iggina. Aggatadag ngammin ya balu ira kan ya pallehut na nga mattangatangit, en nepasingan da kan iggina ya sinnun ira nga zinahet y Dorcas para kan ira kattu katolay na peba. 40Pinallawan y Pedro ira ngammin, en nappalentud iggina nga naddasal. Sangaw, nabbira iggina en inatubang na ya baggi y Dorcas, en kunna nga nakkahi, "Tabita, gumangun kan!" Nalladdang, en kattu nasingan na y Pedro, guminangun iggina nga nanuttud. 41Sinammit y Pedro ya ima na, en inuffunan na iggina nga luminakkat. Sangaw, inakkulan na ya totolay y Afu Dios nga mesipat ya balu ira, en nepasingan na kan ira nga matolay ngin. 42Nepaddumurumug yan kan ya interu nga babalay ya Joppe, en napakaru ya nangurug ira kan y Afu Jesus. 43Nabayag nga nakipaddian y Pedro kan ya isa nga tolay nga maddian kan Joppe nga mangngahan kan Simon nga minakkorti kan gaddang ayam.

will be added

X\