Kinikkingngua 7

1Sangaw, ya pari nga katanangan ya kekuentan na, kunna nga namovut kan y Esteban, "Kurug kazze/pano nga kinahim ira nay nga ganagannud?" 2Kunna nga siminabbag, "Wawwahik en amak ira, ginan nu ya kayan ku. Y Afu Dios nga mekapakkapalat, nappasingan kattun kan y Abraham nga ginafu tera kattu hinnian/asan peba iggina kan Mesopotamia kallie na minang naddian kan Haran, 3en kunna nga nakkahi, 'Panawan mu ya nasion mun en ya papparrientes mu, en malit ka kan ya lugar nga ipasingan ku kan ikaw.' 4"Pinanawan da gafen ya Mesopotamia nga naddianan ya Caldeo ira, en minang da naddian kan Haran. Kattu natay ya ama y Abraham, pinalit y Afu Dios ira kan yaw nga lugar nga paddianan tera kan sangaw. 5Awan nga neddan y Afu Dios kan iggina nga lusak nga kua na pe laman maski laman zinan tangadakkuat, nu azzi netabba na nga iddan na yaw nga lugar kan iggina tase mabbalin kan kua na en ya gakagaka na maski awan peba nga anak na. 6"En kunna tiaw peba ya kinahi y Afu Dios kan iggina, 'Maddayu nattaruk ya gakagakam kan tanakkuan nga nasion, en ya totolay nga maddian kannay, kohungan en pazapaziyatan da ira kan appattatut kan dahun. 7Kastigowan ku ya totolay nga passerbian da, en kabalin na, mapanaw ya gakagakam kan nay nga lugar, en umang dak dayarayawan kan yaw nga lugar.' 8"Pinottad na kan y Abraham ya isa nga taratu, en megafu kan yan, nakugit da Abraham nga sennial ya taratu na kan iggina. Ginaka y Abraham y Isaac, en kabalin ya neke-anak na, kinugit na iggina kattu mekawalu nga algaw na. Kunna tian pay ya kiningngua y Isaac kan y Jacob nga anak na, en kiningngua y Jacob yan pay kan ya mafulu se dua nga anak na ira nga lallaki nga ginafu ira ya tribu ira kan ya nasion tera. 9"Megafu kan ya passil ira nay nga ginafu tera kan y Jose nga uzzan da, nelaku ra iggina, en ne-angay iggina nga nakohung kan Egipto. Ngam mari pinorrian y Afu Dios iggina, 10en pinalliad na iggina kan ngammin nga nekapazapaziyat na. Iniddannan na iggina kan fabor en sirib kattu ne-angay iggina kan ya atubang y Faraon nga patul ya Egipto, en sinunnak y Faraon iggina kan gubernador ya Egipto en kan ingkargadu kan ya interu palasio na. 11Nesimmu ya nelot/nafulotan nga bisin kan ya interu Egipto en kan Canaan, en nelot ya ziyat ya totolay. Awan nga makan nga matafulan ya ginafu tera ira. 12Kattu nagina y Jacob nga hinnian makan kan Egipto, binon na ya anak na ira nga ginafu tera. Yan ya unna nga nepaggangay ra kannay. 13Kan ya piddua nga nepaggangay ra kannay, nepakammu y Jose kan ya wawwahi na nu innia iggina, en y Faraon, nammuan na pay ya me-annung kan ya famillia y Jose. 14Sangaw, nabbon y Jose kan umang mangalak kan y Jacob nga ama na en ngammin nga papparrientes na nga pitufulu se lima ra ngammin. 15Sangaw, minang y Jacob en ya anak na ira nga ginafu tera kan Egipto, en naddian da kannay addet kannia nepappatay ra. 16Ya gibbaggian da, ne-angay kan ya babalay ya Sikem en netanam kan ya attanamman nga ginatang y Abraham kattun kan pirak kan ya anak ira y Hamor kannay. 17"Kattu umaranni ngin ya tiempo nga ammarulot y Afu Dios kan ya netabba na kan y Abraham, minaru ya bilang ya ginafu tera ira kan Egipto. 18Sangaw, hinnian tanakkuan nga nappatubbat nga nappatul kan Egipto nga mari na ammu y Jose. 19Inaprobettia na ya ginafu tera ira, en pinazapaziyat na ira. Nemandu na nga ikkua/ippay ra ya kalabit da ira kan ya liwan tase makkakatay ra. 20Kan yan nga tiempo, ne-anak y Moises, en napayayat y Afu Dios kan iggina. Natebi iggina kan ya balay ya ama na kan tallu vulan. 21Kattu nekkua ra iggina kan ya liwan, nasimmuan ya babay nga anak y Faraon iggina, sinefufut na en sinebi na iggina. 22Natulduan y Moises kan ngammin nga ammu ya Egipcio ira, en nabbalin iggina kan makapangngua kannia aggergo na en kan ya kukukuan na. 23"Kattu appattafulu ya dahun na, napanonot na nga umang na bisitan ya kagitta na nga Israelita ira. 24Kattu nakalabbet iggina kan ya dian da, hinnian isa kan ira nga nasingan na nga tattazzian ya isa nga Egipcio, en netalak na iggina, en nabbalat iggina nga pinatay na ya Egipcio. 25Inabbat na nga nantindian ya kagitta na nga Israelita ira nga iyusa y Afu Dios iggina kannia appasuelta na kan ira, ngam mari ra nantindian yan. 26Kan kamatarukan na, minang iggina kan ira manin. Hinnian dua nga maddaggun nga massintut/makkaddug, en kinakkapan na nga areglowan ira nga kunna nga nakkahi, 'Lallaki, mawwahi kayu! Ka-am ta massintut kayu?' 27"Ngam tu nakaliwat kan ya kavulun na, netubang/netubblak na iggina, en kunna nga nakkahi, 'Innia ya nanunnak kan ikaw nga mammoray en mamanunut kan ikami? 28Ikayat nak kazze pay nga patayan kan kagitta ya nepammatem kan ya Egipcio kattu kabi?' 29Kannia nepakagina y Moises kan yan, napanaw iggina en minang kan ya nasion ya Midian, en naddian iggina nga dayu kannay. Naggaka iggina kan dua nga lallaki kannay. 30"Nappasa kan appattafulu kan dahun, kattu hinnian y Moises kan ya disierto nga aranni kan ya Bakulud Sinai, hinnian anghel nga nappasingan kan iggina kan ya gumangagangat nga afi kan ya tangafun nga mula. 31Kattu nasingan na yan, nalagat iggina, en minaranni nga umang na iningan, en nagina na ya ngaral y Afu Dios nga kunna nga nakkahi, 32'Yakan ya Dios ya ginafum ira, ya Dios y Abraham, ya Dios y Isaac en ya Dios y Jacob.' Namilpig y Moises kan ya talaw na, en mari na negutuk/neturid/netaggad nga innan. 33Kunna nga nakkahi y Afu Dios peba kan iggina, 'Azzan mu ya sandalliam gafu ta nasantuan ya lugar nga nanadaggan mu. 34Kurug nga nasingan ku ya nekatattazzi ya totolek kan Egipto, en naginak ya daharahin da. Nazzittag nak tase ipasueltak ira. Angka kanniaw, gafu ta bonan ta ka kan Egipto.' 35"Yan nga Moises balalaman ya nepamammari ra kattu kunda nga nakkahi kan iggina kattun, 'Innia ya nanunnak kan ikaw nga mammoray en mamanunut kan ikami?' Iggina balalaman ya binon y Afu Dios tase mammoray en mappasuelta kan ira megafu kan ya pakapangngua ya anghel nga nappasingan kan iggina kan ya tangafun nga mula nga gumangagangat. 36Iggina balalaman ya nangipanaw kan ira kan Egipto en naka-angngua kan milagro ira en sennial ira kan Egipto kannia kasan da peba kannay, en kan appattafulu kan dahun kabalin ya nepappanaw ra kannay, kan ya Raggang nga Bebay en kan ya disierto. 37Yan nga Moises balalaman ya nakkahi kan ya Israelita ira, 'Mangiyatanang y Afu nga Dios tera kan profeta para kan ikayu nga maggafu kan ikayu pe laman nga megitta kan yakan.' 38Iggina balalaman tu hinnian kan ya ammung ya Israelita ira kan ya disierto en ya anghel nga nakiergo kan iggina kan ya Bakulud Sinai en kan ya ginafu tera ira. Iggina balalaman ya nangalawat kan ya ergo ira nga mannanayun, tase iddan na kan ittera. 39"Ngam ne-ammari ya ginafu tera ira nga parulotan iggina. Imbes kan yan, linikuran da iggina, en mas nekayat da ya mattoli kan Egipto. 40Kunda nga nakkahi kan y Aaron, 'Mamanday ka kan rebultu ira nga dios para kan ittera nga mangi-unna kan ittera, gafu ta mari tera ammu nu hanna ya nesimmu kan nay nga Moises nga nangipanaw kan ittera kan Egipto.' 41Kan ira nay nga algaw, namanday ra kan rebultu nga megitta ya forma na kan uvvun baka, en inofresian/zinedikan da kan ayam nga pinatay ra, en sinelebra ra ya pinanday ra pe laman. 42Linikuran y Afu Dios ira, en pinorrian na ira nga maddayarayaw kan ya bittuan ira. Nesimmu yan kan kagitta ya neturak ya isa nga profeta nga kunna, 'Ikayu nga Israelita! Kannia kasan nu kan ya disierto kan appattafulu kan dahun, Yakan kazze ya inofresian nu kan ofresi en ayam ira nga napatay? 43Awan! Inakkat nu ya paddayarayawan nu kan ya rebultu nga nangahanan kan Molek, en zinayarayaw nu ya bittuan y Refan nga dios nu. Ira yan ya rebultu nga pinanday nu tase dayarayawan nu ira. Gaggafen, palitan ta kayu kan ya tangapingit ya nasion ya Babilonia.' 44"Kattu hinnian ya ginafu tera ira kan ya disierto, hinnian kan ira ya tolda nga pakasinnan kan ya kasan y Afu Dios kan ira. Nepapatadag y Moises yan nga tolda kan kagitta ya nepappapatadag y Afu Dios kan iggina segun kan ya pamarrian nga nepasingan na kan iggina. 45Kabalin ya pia nga rahun, y Josue en ya ginafu tera ira nga anak ira ya naddayarayaw ira kan ira nay nga rebultu, en nevulun da yan nga tolda nga nepapatadag y Moises kan yaw nga lugar nga paddianan tera kan sangaw nga ginarut da kan ya totolay kan ya tanakkuan nga nasion ira nga pinappaw y Afu Dios kannia nepakkiggerra ra kan ira. Hinnian peba yan kan ira addet kattu tiempo y David. 46"Napayayat y Afu Dios kan y David, en nekiddaw y David nga ipamavulun y Afu Dios ya appapatadag na kan paddianan para kan ya Dios y Jacob. 47Ngam y Solomon ya nappapatadag kan yan nga balay. 48Ngam y Afu Dios nga Katanangan, mari na awayya nga maddian kan balay ira nga pinatadag tolay kan kagitta yaw nga neturak ya isa nga profeta nga kunna, 49'Ya langit ya tronok, en ya lusak ya abbatayan ku. Hanna ya klase ya balay nga patadaggan nu para kan yakan?' kunna y Afu, 'Onu be tiaw ya lugar nga pamangattan ku? 50Bakkan kazze kan yakan ya namaratu kan ngammin ira yaw nga ganagannud?' " 51Nesige y Esteban nga kinahi kan ya konseho, "Ikayu nga nataggat ya uray nu, en ibangngabangngag nu ya ergo y Afu Dios! Kanakanayun kayu mamba nga makittalataggat kan ya Espiritu Santo kan kagitta ya kinikkingngua ya ginafu nu ira. 52Hinnian kazze isa kan ya profeta ira nga mari pinazapaziyat ya ginafu nu ira? Pinatapatay ra peba ya binon ira y Afu Dios kattun nga nangipakammu kan ya allabbet ya Natunung. Luminabbet igginan, en ya kiningngua nu, ne-alawat en nepapatay nu iggina. 53Inalawat nu ya dorob y Afu Dios nga nepeddan na kan ya anghel na ira, ngam mari nu pinaraparulot." 54Kattu nagina ya konseho ya kinahi y Esteban, nangngarangaritam/nangaratenget da nga nelot ya gazzit da. 55Ngam napannuan iggina kan Espiritu Santo, siminangug iggina kan langit, en nasingan na ya kekapalat y Afu Dios en y Jesus nga aggatadag kan ya ziwanan y Afu Dios. 56Kunna nga nakkahi, "Innan nu! Masingan ku nga aggavukat ya langit, en ya Anak Tolay nga aggatadag kan ya ziwanan y Afu Dios." 57Ngam sinallabban da ya giddaranggangan/gittalingan da, nakkarriaw ra kan nasikan, en naggirindan da nga nappaladdiaw nga minang kan iggina. 58Ginuggunggun da iggina nga nelawan kan ya siudad, en binatabatu ra iggina. Ya testigu ira, newalang da ya gilluturan ya gissinnunan da kan ya atubang ya isa nga mabbing nga lalaki nga mangngahan kan Saulo. 59Kannia ammatabatu ra kan y Esteban, kunna nga naddasal, "Afu Jesus, alawatan mu ya karalluak." 60Nappalentud iggina en kunna nga nangikullet, "Afu, marim ipaliwat kan ira yaw nga liwat nga kiningngua ra." Kattu kinahi na yan, natay igginan.

will be added

X\