Kinikkingngua 5

1Sangaw, hinnian/asan matawa nga mangngahan kan Ananias en Safira nga nallaku kan sular, 2en inarimanan y Ananias ya dudduma/karruan nga ngina na. Ammu ya atawa na yan, gafu ta nattaratuan da. Ne-angay na ya dudduma nga neddan na kan ya apostol ira. 3Kunna y Pedro nga namovut kan iggina, "Ananias, ka-am ta netuluk mu nga inaffut y Satanas ya nonot mu kannia nepalladdud/nepabbusid mu kan ya Espiritu Santo kannia nepangngariman mu kan ya dudduma nga ngina ya sular mu? 4Mari kazze/pano kan kuam ya sular kalliem nga nallaku? En kattu nelakum, marim kazze kua ya nallakuan mu? Ka-am ta napanonot mu nga kuan ya kunna tian? Bakkan kan tolay ya nalladduran mu nu azzi y Afu Dios." 5Kannia nepakagina y Ananias kan yan, natay en natomba iggina. Nelot/Nafulotan ya talaw ngammin ya totolay nga nakagina kan yan nga nesimmu. 6Luminakkat ya babbagitolay nga minang da binabbaddan ya baggi na, en inakkat da nga minang da netanam. 7Kabalin ya mattallu nga orat, siminallung pay ya atawa na nga mari na ammu ya nesimmu. 8Kunna y Pedro nga namovut kan iggina, "Kayan mu kan yakan nu yaw ngammin ya nallakuan nu kan ya sular nu." Kunna nga siminabbag, "On, yan ngammin ya ngina na." 9Kunna gafen y Pedro nga namovut, "Ka-am ta nakka-anahutan nu nga matawa kan purban nu ya Espiritu y Afu? Innan mu! Hinnian ngin kan ya puerta ya nangitanam ira kan ya atawam, en sangaw, akkatan da ka pay nga ilawan." 10Nerame na natay en natomba kan ya atubang na. Kannia nepattallung ya nangitanam ira kan y Ananias, nasingan da nga natay igginan. Inakkat da iggina en minang da netanam kan ya bikat ya atawa na. 11Nelot ya talaw ya interu iglesia en ngammin nga nakagina kan ira yan nga nesissimmu. 12Aru ya sennial ira en mekapakkapalat ira nga kinikkingngua ya apostol ira kan ya totolay. Ngammin ya mangurug ira, kanakanayun nga narammung da kan ya lugar nga nangahanan kan Portico y Solomon kan ya lalantaran ya templo. 13Awan nga tanakkuan nga nakegutuk/naketurid/naketaggad nga makipattangesa kan ya apostol ira, ngam ya totolay, nekakua ra ira. 14Ngam napakaru ya lallaki en babbay nga nangurug kan y Afu Jesus nga ne-amung kan ya iglesia. 15Nelawan ya totolay ya makkatakit da ira, en nepedda ra ira kan kattri en abak ira kan ya daladalan tase, nu mattalebad y Pedro kan ira, aber laman nu hinnian dudduma kan ira nga maliruman kan ya alinaw na. 16Napakaru pay ya naggafu kan ya babalay ira kan ya pallehut ya Jerusalem nga ne-angay ra ya makkatakit da ira en ya pinazapaziyat ira ya narakat/napot nga espiritu ira, en napammapia ra ngammin. 17Sangaw, nelot ya passil ya pari nga katanangan ya kekuentan na en ngammin ya kakavulun na, ira ya Saduceo ira, 18en nepagafut en nepekarsel da ya apostol ira. 19Ngam kan yan nga gabi, hinnian anghel y Afu nga minang nangivukat kan ya puerta ira ya akkarselan, nelawan na ira en kunna nga nakkahi, 20"Angkayu kan ya lalantaran ya templo, en ipalappat nu kan ya totolay kannay ya me-annung kan ya bahu nga attolay kan y Cristo." 21Kannia nepakagina ra kan yan, siminallung da kan ya lalantaran ya templo kan matamataruk, en nattuldu ra. Narammung ya pari nga katanangan ya kekuentan na en ya kakavulun na, en nepakkul na ya kakavulun na kan ya konseho en ngammin ya lalakay ira nga panakallan kan ya nasion ya Israel, en nabbon iggina kan ofisial ira kan ya akkarselan tase umang da alakan ya apostol ira. 22Kattu nakakaddet da kan ya akkarselan, awan nga nadatangngan da kan ira. Nattoli ra gafen en kunda nga nangipakammu, 23"Nadatangngan mi nga aggakandaru kan napia ya akkarselan, en aggatadag ya guardia ira kan ya puerta ira, ngam kattu vinukatan mi, awan dan kan ya unag!" 24Ya kapitan ya guardia ira kan ya templo en ya panakallan ira kan ya papari, kattu nagina ra ya kinahi ya ofisial ira, iggalavvunan da nu hanna ya nesimmu kan ya apostol ira. 25Sangaw, hinnian luminabbet nga nangipakammu kan ira, "Ginan nu! Tu lallaki nga nepekarsel nu, hinnian da kan ya lalantaran ya templo nga maddaggun nga mattuldu kan ya totolay." 26Sangaw, ya kapitan en ya ofisial ira, minang da nga inalak ira, ngam mari ra finersa ira, gafu ta italaw ra ya totolay nu batabatuan da ira. 27Kattu ne-angay ra ira, ne-atubang da ira kan ya konseho. Sangaw, ya pari nga katanangan ya kekuentan na, 28kunna nga nakkahi, "Nemandu mi kan napia kan ikayu nga mari nu mattuldu ngin kan me-annung kan ya ngahan y Jesus. Ngam ya kiningngua nu lallaman ngin, nesigisige nu nga netuttuldu yan kan ngammin nga totolay kan Jerusalem, en paliwatan nu peba ikami kan ya nekapatay na." 29Kunna y Pedro en ya kagitta na nga apostol ira nga siminabbag, "Mawag kan parulotan mi y Afu Dios imbes kan totolay. 30Ya Dios ya ginafu tera ira, pinagginnolay na y Jesus nga nepapatay nu mismu kannia nepappepatak nu kan iggina kan kurut. 31Ne-utun y Afu Dios iggina en pinaddian na kan ya ziwanan na pe laman nga kekakuan na nga Prinsipe en Minammalliad, tase iddannan na ya Israelita ira kan tiansa ra nga mabbabawi, en mapakoma ya liwaliwat da. 32En ikami en ya Espiritu Santo pay nga neddan y Afu Dios kan ya totolay nga mamaraparulot kan iggina, ikami ya mattestigu kan ira yan nga me-annung kan iggina." 33Kattu nagina ya konseho ya kinahi ra, nelot ya gazzit da, en ikayat da nga ipapatay ira. 34Ngam hinnian isa kan ira kan ya konseho nga Fariseo nga mangngahan kan Gamaliel nga mestru kan ya dorob nga me-ekakua kan ngammin nga totolay. Nanadag iggina en nemandu na nga melawan ya apostol ira kan manganannuan. 35Kunna nga nakkahi kan ya konseho, "Lallaki ira nga Israelita, panonotan nu kan napia ya pappangetan nu nga kuan kan ira yan nga lallaki. 36Dandamman nu nga kattun, hinnian tolay nga mangngahan kan Teudas nga nangikahi nga isa iggina nga mangidakal, en mappattatut nga lallaki ya ne-evulun kan iggina. Ngam napatay iggina, naggurungay ngammin ya ne-evulun kan iggina, en awan nga nabbalinan da. 37"Kabalin na yan, hinnian tolay nga mangngahan kan Judas nga taga Galilea nga luminabbet kan ira yan nga algaw nga appalista ya totolay, en hinnian manin dudduma nga totolay nga minang ne-evulun kan iggina. Ngam napatay iggina pay, en nawarawarak ngammin ya ne-evulun kan iggina. 38"Nu me-annung kan ira yan nga lallaki nga nepelawan teran, kayan ku kan ikayu nga porrian nu ira, en awan nga kuan nu kan ira, gafu ta, nu naggafu kan ya uray tolay laman yan nga gakkad da onu yan nga kukukuan da, awan nga pabbalinan na. 39Ngam nu naggafu kan ya uray y Afu Dios, mari nu awayya nga mapemmang ira, en nu turiyan nu ira, maffugab mesimmu kan turiyan nu pay maski y Afu Dios." 40Ginina ya konseho ya netabarang y Gamaliel. Gaggafen, pinatallung da uli ya apostol ira, nepalapalatigu ra ira, nemandu ra kan ira nga mari ra kayakayan ngin ya me-annung kan ya ngahan y Jesus, en sinueltan da iran. 41Kattu napanaw ya apostol ira kan ya atubang ya konseho, naggaragarassia ra gafu ta nekuenta y Afu Dios ira nga mepangngat nga mattam kan kepasapasiran megafu kan ya ngahan y Jesus. 42Kagalgaw kan ya lalantaran ya templo en kan ya gibbalayan ya totolay, mari ra nemmang nga nangituldu en nangipalappat kan ya napia nga dumug, nga y Jesus, iggina ya Cristo.

will be added

X\