Kinikkingngua 28

1Kabalin mi nga nakakaddet kan ya dappit nga napalliad, nammuan mi nga yan nga fugu, nangahanan kan Malta. 2Ya totolay kannay, ne-eruma ya allak nga nepasingan da kan ikami, en inalaba ra ikami ngammin, en nappakinit da kan paggarennuan mi, gafu ta moran en malammin. 3Namagampat y Pablo kan mattangasippil nga kayu, en kattu nedumbag/nedungu na, hinnian/asan ziriyan nga nallawan kan ya kayu megafu kan ya patu ya afi, en kinassib na ya ima y Pablo nga mari na inibbattan. 4Ya totolay ira nga maddian kannay, kattu nasingan da nga aggabesin ya ziriyan kan ya ima na, nerergowan da nga kunda, "Siguradu, minammatapatay yan nga tolay, gafu ta maski nu napalliad kan ya bebay, mari na mekani ya kallit na pay." 5Ngam sinattak na ya ziriyan kan ya afi, en awan nga nesimmu kan iggina. 6Sinalattaronan ya totolay nga lumattag ya baggi na onu gavvat laman nga matomba nga matay. Ngam kattu nabayag ya nepattaron da kan yan nga awan nga nasingan da nga nesimmu kan iggina nga neruma kan ya negagangay, nanguli ya ginnonotan da, en kinahi ra nga isa iggina nga dios. 7Ya panakallan kan ya totolay kan yan nga fugu, mangngahan kan Publio. Kua na ya dudduma/karruan nga sular ira nga aranni kan ya lugar mi. Inalaba na ikami, en sinanggaw na ikami kan napia kan ya balay ra kan tallu algaw. 8Ngam nekanna nga agga-idda ya ama y Publio nga makkulikug en makkursu. Siminallung y Pablo nga minang kan iggina, naddasal, en nepotun na ya ima na kan iggina, en pinammapia na. 9Kattu nesimmu yan, ngammin ya makkatakit ira kan yan nga fugu, minang da pay kan iggina, en pinammapia na ira. 10Napakaru ya regalu ira nga neddan da kan ikami, en kallie ya nepappanaw mi, nekarga ra kan ya dakadakal nga barangay ya ganagannud nga mawag mi kannia abbiahe mi. 11Kabalin ya nepaddian mi kan yan nga fugu kan tallu vulan, nattakay kami kan dakadakal nga barangay nga nangahanan kan Ziping nga Dios nga nerehistro kan ya siudad ya Alejandria nga naddian kan yan nga fugu kan ya tiempo baddiaw. 12Naffundu kami kan ya siudad ya Siracusa, en naddian kami kannay kan tallu nga algaw. 13Napanaw kami kannay, en naddakit kami kan ya siudad ya Regio. Kan ya netunud nga algaw, hinnian angin nga naggafu kan ziraya, en kan ya mekaddua nga algaw, nakakaddet kami kan ya poblasion ya Puteoli. 14Hinnian nasimmuan mi kannay nga wawwahi kan pangurug nga nangimbita kan ikami nga makipaddian kan ira kan tangaligguan. Sangaw, napanaw kami kannay nga umang kan Roma tase maddian kami kannay. 15Ya wawwahi tera kan pangurug nga maddian kan Roma, kattu nadumug da nga aranni kamin, minang da zinafung ikami. Ya dudduma kan ira, zinafung da ikami kan ya Plasa ya Appio, en ya dudduma kan ira, zinafung da ikami kan ya Tres Tavernas. Kattu nasingan y Pablo ira, nappabalat iggina kan y Afu Dios, en napasikan ya nonot na. 16Kattu nakakaddet kamin kan Roma, nepamavulun nga mesinna y Pablo kan paddianan nga guardian ya isa nga suddalu iggina. 17Kabalin ya tallu nga algaw, nepakkul y Pablo ya panakallan ira kan ya Judio ira, en kattu narammung da, kunna nga nakkahi, "Wawwahik ira, awan vulvua/pulus kiningnguak nga mekontra kan ya kasijudio tera ira onu kan ya kustumbre ira ya ginafu tera ira. Ngam maski nu kurug yan, ne-alawat dak kan ya taga Roma ira nga nangipanaw kan yakan kan Jerusalem. 18Kattu inimbistiga rak, awan nga natafulan da nga kegafanan ya kapatek, en nekayat dak nga sueltan. 19Ngam ya Judio ira, sinuriya ra yan, en nafersa nak gafen nga napila kan y Emperador, maski awan nga pangakusan ku kan ya kagitta tera nga Judio ira. 20Kakurruan na, nakawaran nak megafu kan ya angngurug ku nga minang ngin ya innanaman tera nga Israelita nga bonan y Afu Dios, iggina y Jesus. Yan ya gafu na kan nepakkul ta kayu tase masingan ta kayu en makiergo nak kan ikayu." 21Kunda nga nakkahi, "Awan vulvua nalawat mi nga turak nga me-annung kan ikaw nga naggafu kan Judea. En awan pay nga minang kanniaw nga kagitta tera nga Judio ira nga nangipadumug onu nangikahi kan maski hanna nga narakat/napot nga me-annung kan ikaw. 22Ngam ikayat mi nga ginan ya kayan mu nga me-annung kan yan nga sekta nga mangurug kan y Jesus, gafu ta ammu mi nga paraparakattan ya totolay yan nga sekta kan kada lugar." 23Nanunnak da kan algaw nga akkiparammung da manin kan iggina, en napakaru ya totolay nga minang kan ya paddianan y Pablo kan yan nga algaw. Namegafu kan mataruk addet kan gabi, nepakapakanawag na kan ira ya appatul y Afu Dios kan ya totolay. Kinakkapan na nga binensi ira nga mangurug da kan y Jesus kannia angngiyusa na kan ya dorob y Moises en ya neturak ya profeta ira. 24Hinnian dudduma kan ira nga nabensi kan ya kinahi na, ngam hinnian dudduma kan ira nga mari nangurug. 25Mari ra nakkara-anahut, en kattu maggannukat da nga mapanaw, kunna peba y Pablo nga nakkahi, "Me-aplika kan ikayu pay ya nepakahi ya Espiritu Santo kan y Isaias nga profeta kattun kan ya ginafu tera ira nga kunna, 26'Angka kayan kan ira yaw nga totolay, "Aggaginan nu mamba kan napia, ngam mari nu makantindi, Duludulangngan nu mamba kan napia, ngam mari nu masingan." 27On, gafu ta nataggat ya gi-ulluan ira yaw nga totolay, en pinabbangngag da ya giddaranggangan/gittalingan da pe laman, en pinakkidam da ya gimmatan da pe laman. Kiningngua ra yan tase mari makasingan ya gimmatan da, onu makagina ya giddaranggangan da, onu makantindi ya ginnonotan da. Nu mari ra zinan kiningngua ya kunna tian, manoli ra zinan kan yakan, tase pammapian ku ira.' " 28Kunna peba y Pablo nga nakkahi, "Mammuan nu gafen nga yaw nga ergo nga me-annung kan ya ammalliad y Afu Dios kan ya totolay, ne-addet kan ya mari Judio ira, en ginina ra." 29Kabalin ya nepakkahi na kan ira yan, napanaw ya Judio ira nga naddiriskusion da. 30Kan lugar dua rahun, naddian y Pablo kan ya balay nga inarkilan na, en inalaba na ngammin ya minang nabbisita kan iggina. 31Nepalapalappat na ya appatul y Afu Dios kan ya totolay, en nagutuk/naturid/nataggad iggina nga nattuttuldu kan me-annung kan y Jesu Cristo nga awan nga naggamma kan iggina.

will be added

X\