Kinikkingngua 27

1Kattu zinisidi y Festo nga mattakay kami kan dakadakal nga barangay nga umang kan ya nasion ya Italia, ne-alawat da y Pablo en dudduma/karruan peba nga presu kan isa nga kapitan nga mangngahan kan Julio nga isa kan ya grupo ya suddalu ira nga nangahanan kan Batallion y Emperador. 2Hinnian/Asan dakadakal nga barangay nga nattakayan mi nga nerehistro kan ya siudad ya Adrumeto nga maggannukat nga mapanaw nga umang kan ya lugar ira kan ya dappit ya probinsia ya Asia, en nallakkat kamin nga napanaw. Kavulun mi y Aristarco nga taga siudad ya Tesalonica kan ya probinsia ya Macedonia. 3Kan ya netunud nga algaw, nakakaddet kami kan ya siudad ya Sidon. Napia ya kiningngua y Julio kan y Pablo, en nepamavulun na nga umang na bisitan ya kakkofun na kannay, en awayya ra nga iddan kan iggina ya mawag na. 4Nattakay kami manin kan dakadakal nga barangay nga napanaw kannay, en gafu ta turiyan mi ya angin, sinuntul mi ya lingaddan ya fugu ya Chipre. 5Kattu nattalebad kami kan ya bebay nga aranni kan ya probinsia ya Cilicia en ya probinsia ya Pamfilia, naffundu kami kan ya siudad ya Mira kan ya probinsia ya Licia. 6Hinnian dakadakal nga barangay kannay nga nammuan ya kapitan nga nerehistro kan ya siudad ya Alejandria nga umang kan Italia, en pinatakay na kami kan nay. 7Nabayabayag ya nepabbiahe mi kan aru nga algaw, en nararriatan kami nga nakakaddet kan aranni kan ya siudad ya Gnido, ngam gafu ta turiyan ya angin ikami kannia aggabante mi kan taggappan, nappaziraya kami nga minang kan ya lingaddan ya fugu ya Creta kan ya tangapingit ya siudad ya Salmon nga parte ya Creta. 8Nappaggid kami kan ya dappit, ngam nararriatan kami nga minabante kannay peba panda kan ya nepakakaddet mi kan ya isa nga lugar nga nangahanan kan Nalumamak nga Affunduan nga aranni kan ya siudad ya Lasea. 9Aru nga tiempo ya nadaral mi kannay, en peligro nu isige mi ya abbiahe mi gafu ta nappasa ngin ya Algaw ira nga Aggayuno. Kunna y Pablo nga nangitabarang kan ira, 10"Lallaki, kan ya pappangetan tera nga pabbiaheyan, masingan ku nga aru ya madaral en mapawan kan ittera, mari laman kan ya karga en ya barangay, nu azzi maski pay kan ya gi-angattan tera." 11Ngam ya kapitan ya suddalu ira, mas ginina na ya kinahi ya makakkua kan ya barangay en ya kapitan na annek/ngam kan ya kinahi y Pablo. 12Gafu ta mari napia yan nga lugar nga pangifunduan mi kan ya barangay kan ya tiempo baddiaw, mas aru kan ya lallaki ya nangitabarang nga napia nu mapanaw kami kannay tase, nu awayya na, makakaddet kami kan ya isa nga lugar nga nangahanan kan Fenix nga affunduan kan ya fugu ya Creta nga mari na atubangan ya angin nga maggafu kan ya naddatanan/nallatanan ya zilod en silawan en kan ya naddatanan ya ziraya en silawan, en maddian kami kannay kan ya tiempo baddiaw. 13Sangaw, kattu mala-angin nga maggafu kan ziraya, napanonot da nga awayya ra nga kuan ya pinalano ra. Finunifun da gafen ya lubid ya angkla kan ya dakadakal nga barangay, en nappaggid kami kan ya dappit ya bebay, en minabante kami nga nattalebad kan ya bikat ya fugu ya Creta. 14Ngam kattu mari nabbayag, nabbaddiaw kan nasikan nga naggafu kan ya fugu kan ya naddatanan ya zilod en silawan. 15Kattu nakanna ya barangay, en mari na awayya nga atubangan ya angin, netuluk mi ya angngipayad na kan ikami. 16Minang kami nallingad kan ya ziraya ya isa nga bissang/bissut nga fugu nga nangahanan kan Cauda. Kannia kasan mi kan yan nga lugar, nararriatan kami nga nangisiguradu kan ya takuli nga ginuggunggun ya barangay. 17Kattu finunifun ya bugador ira ya lubid ya takuli kan ya barangay, ginalagalutan da ya barangay kan lubid, tase mari na masassat. Gafu ta italaw ra nu meddagarra ya barangay kan ya kaginattan nga nangahanan kan Sirte, inakun da ya bela, en netuluk da laman ngin ya angngipayad ya angin kan ya barangay. 18Kan ya netunud nga algaw, gafu ta nelot/nafulotan ya nekepalapalung ya barangay mi, pinegafanan da nga nepagilappak ya karga ira kan ya bebay. 19Kan ya mekatallu nga algaw, kan ya gi-iman da pe laman, nelappak da ya dudduma nga rumienta ya barangay. 20Kan aru nga algaw, mari mi nasingan ya sinag en ya bittuan ira, en kattu nassige ya baddiaw nga nasikisikan, awan nga innanama min nga matolay kami. 21Kabalin ya nabayag nga tiempo nga mari ra nanganangan, minang y Pablo nga nanadag kan ya pattarangngan da, en kunna nga nakkahi, "Lallaki, naggina kayu zinan kan yakan nga mari tera zinan napanaw kan Creta. Nu vinulun nu zinan ya netabarang ku, awan zinan nga nadaral onu napawan. 22Ngam itabarang ku kan ikayu nga pasikannan nu ya ginnonotan nu gafu ta awan kan ikayu nga matay, nu azzi ya barangay laman ya madaral. 23Ammuk nga kunna tian ya mesimmu, gafu ta hinnian isa nga anghel ya Dios nga makakkua kan yakan en passesserbian ku nga nappasingan kan yakan kattu gabi, 24en kunna nga nakkahi, 'Pablo, marim mattalaw, gafu ta mawag kan me-angay ka kan y Emperador. En megafu kan ya allak y Afu Dios, palliaran na pay ya gi-angattan ngammin ya totolay nga makipabbiahe kan ikaw nga kuenta regalu nga iddan na kan ikaw.' 25Gaggafen, lallaki, pasikannan nu ya ginnonotan nu, gafu ta mangurug nak kan y Afu Dios nga mesimmu yan nga nepakahi na kan yakan. 26Ngam meddagarra tera kan ya isa nga fugu." 27Kan ya mekamafulu se appat nga gabi, me-ana-anud kami peba kan ya Bebay ya Adriatico. Kan mattangnga gabi, inabbat ya bugador ira nga umara-aranni kamin kan ya dappit. 28Ginukud da ya kadalam ya danum, en nammuan da nga tallufulu se annam nga metro ya kadalam na. Mari nabbayag, ginukud da manin, en nammuan da nga duafulu se pitu nga metro ya kadalam na. 29Megafu kan yan, nakatalaw ra nu meddagarra kami kan kabatuan nga lugar. Sangaw, minang da kan ya likud ya barangay, en nangizittag da kan appat nga angkla, en nedasal da nga, nu awayya na, mammataruk ngin. 30Ikayat ya bugador ira ya mattammang, en zinittag da ya takuli kan ya bebay nga appen/agin mangizittag da peba kan angkla ira kan ya atubang ya barangay. 31Ngam kunna y Pablo nga nakkahi kan ya kapitan en ya suddalu ira, "Ira yan nga totolay, nu mari ra massige nga maddian kan yaw nga barangay, mari nu mapalliad." 32Gaggafen, ginattat ya suddalu ira ya lubid nga negalut kan ya takuli, en pinorrian dan. 33Kattu mappanget nga mammataruk ngin, pinasikan y Pablo ya ginnonotan da ngammin tase mangan da nga kunna nga nakkahi, "Mafulu se appat nga algaw ngin nga mari nu nanganangan. 34Pasikannan nu gafen ya ginnonotan nu tase mangan kayu en massikan kayu, gafu ta awan nga mesimmu kan ikayu." 35Kabalin na nga nakkahi kan yan, nangalak iggina kan pan, nappabalat iggina kan y Afu Dios kan ya paratubangan da ngammin, namissang iggina kan bissang, en namegafu iggina nga mangan. 36Sangaw, napasikan ya ginnonotan da ngammin, en nangan da pay. 37Duangatut se pitufulu se annam kami ngammin kan ya barangay. 38Kattu nabattug dan, nepagilappak da ya trigu kan ya bebay, tase malampawan ya barangay. 39Kattu nammataruk ngin, nelahiban ya bugador ira ya lusak, ngam nay peba laman ya nepakasingan da kan yan nga lugar. Hinnian nasingan da nga sipi nga kaginattan ya dappit na, en napanonot da nga paffunduan da ya barangay kannay nu awayya na. 40Ginattat da gafen ya lubid ya angkla nga pinorrian da kan ya bebay, binabbaran da ya galut ya timon ira, en netullu ra ya bela kan ya parte kan ya atubang ya barangay, tase mepayad en mapadappit. 41Ngam neddagarra ya barangay kan ababbaw nga lugar nga navuttulan ya ginat. Nelumang ya atubang na, en mari na nakapalit ngin. Ya parte ya likud ya barangay, namegafu nga masassat, gafu ta nasikan ya assibat ya palung ira. 42Napanonot ya suddalu ira nga patayan da ya presu ira tase awan nga mattafug nga umang kan ya dappit en mattammang. 43Ngam ginamman ya kapitan ya suddalu ira, gafu ta ikayat na nga palliaran y Pablo. Nemandu na kan ya makakammu nga mattafug nga mattuvvu/mattabbraw ra, en monna ra nga umang kan ya dappit, 44en netunud ya dudduma nga gumafut kan kayu onu parte ya barangay, en kunna tian ya nepakakaddet mi ngammin kan ya dappit nga napalliad.

will be added

X\