Kinikkingngua 26

1Sangaw, kunna y Agripa nga nakkahi kan y Pablo, "Awayya mun nga itadag ya katunungan mu." Netayad y Pablo ya ima na, en kunna nga nanefensa kan iggina pe laman, 2"Mekakua nga Patul Agripa, ikuentak nga mapalad nak kan sangaw nga algaw, gafu ta defensan ku yakan pe laman kan ya atubang mu kan ngammin nga pangakusan ya Judio ira kan yakan, 3nepatalluaring gafu ta ammum mamba ngammin ya kustumbre ira en ya paddiriskusionan ira ya Judio ira. Ikiddok gafen kan ikaw nga pasensian nak nga ginan. 4"Ammu ngammin ya Judio ira ya attolotolek namegafu kattu kabbing ku, kannia nepaddian ku kan ya nasion ku en kan Jerusalem pay. 5Nabayag ngin nga ammu rak, en nu ikayat da, awayya ra nga testiguan nga nattolay nak segun kan ya kustumbre ira ya Fariseo ira nga ka-istriktowan nga sekta kan ya relihion tera nga Judio ira. 6Sangaw, aggatadag nak kan ya paratubangan nu nga membistigan megafu kan ya agginnanamak kan ya netabba y Afu Dios kan ya ginafu tera ira. 7Yaw ya tabba nga innanaman ya mafulu se dua nga tribu tera nga natumpal kan ittera nga napafutu ya assesserbi tera kan y Afu Dios kan gabi en algaw. Megafu kan yaw nga innanama, Mekakua nga Patul, akusan dak ya Judio ira. 8Ikayu nga hinnian/asan kanniaw, ka-am ta maziyatan kayu nga mangurug nga pagginnolayan y Afu Dios ya nakkakatay ira? 9"Kattun, siniguraduk mismu nga aru ya ganagannud nga mawag kan kuan ku nga mekontra kan ya ngahan y Jesus nga taga Nazaret. 10Naming aru nga kiningnguak ya kunna tian ira kan Jerusalem. Kan ya paka-awayyak nga inalawat ku kan ya panakallan ira kan ya papari, napakaru ya mangurug ira kan y Jesus nga nepekarsel ku, en mari na kan yan laman, ngam maski pay kannia nekabista ra kallie ya nekapatay ra, nabboto nak kan kontra kan ira. 11En naming aru nga pinazapaziyat ku ira kan ngammin nga sinagoga ira, en kinakkapan ku nga finersa ira kan likuran da ya angngurug da kan y Jesus. Megafu kan ya nelot/nafulotan nga lussok kan ira, minang nak maski kan ya siudad ira kan ya tanakkuan nga nasion, tase pazapaziyatan ku ira kannay." 12"Minang nak kan ya panakallan ira kan ya papari, en sinunnak dak nga iniddannan kan paka-awayyak. Sangaw, namegafu nak nga umang kan ya siudad ya Damasco. 13Kan mattangnga algaw, Mekakua nga Patul, kannia kasan ku kan ya dalan, nasingan ku ya isa nga nawag nga naggafu kan langit nga mas nanawanawag annek/ngam kan ya sinag nga nangnawag kan ya pallehut mi en ya kakavulun ku nga nakipanalan kan yakan nga umang kan Damasco. 14Natomba kami ngammin kan ya lusak, en hinnian ngaral nga naginak nga kunna nga nakkahi kan yakan kan perergo Hebreo, 'Saulo! Saulo! Ka-am ta pazapaziyatan nak? Ya baggim pe laman mamba ya patapatakitan mu kannia angngikukkuttad mu kan ya sihud.' 15"Sangaw, kungku nga namovut, 'Afu, innia ka?' "Kunna nga siminabbag, 'Yakan y Jesus nga pazapaziyatan mu. 16Gumangun ka, en manadag kan. On, gafu ta yaw ya gafu na kan nappasingan nak kan ikaw tase tunnakkan ta ka nga masserbi kan yakan en tettestiguan mu ya nepakasingan mu kan yakan en ya uli appasingan ku kan ikaw nattaruk. 17Palliapalliaran ta ka kan ya Judio ira en kan ya mari Judio ira nga pabbonan ku kan ikaw. 18Bonan ta ka kan ira tase palladdangan mu ya gimmatan da kan ya kakurruan, en kuan da yan tase likuran da ya kokopan/kallap en atubangan da ya nawag, en tase likuran da pay ya pakapangngua y Satanas en umang da kan y Afu Dios. Kuan da ira yan tase mapakoma ra kan ya liwaliwat da, en tase mesipat da pay kan ya totolay nga pinabbalin y Afu Dios kan nasantuan megafu kan ya angngurug da kan yakan.' " 19"Gaggafen, Mekakua nga Patul Agripa, pinaraparulot ku ya naggafu kan langit nga nappasingan kan yakan. 20Kan unna, kan ira nay nga maddian kan ya siudad ya Damasco, en kabalin na, kan Jerusalem en kan ngammin nga lugar ira kan ya probinsia ya Judea en kan ya mari Judio ira pay, nepalapalappat ku nga mawag kan mabbabawi ra kan ya liwaliwat da, en vuluvulunan da ya uray y Afu Dios, en kanakanayun nga kuan da ya napia nga mepangngat kan ya nepabbabawi ra. 21Megafu kan ira yan nga kinikkingnguak, ginafut dak ya Judio ira kan ya lalantaran ya templo, en kinakkapan dak nga patayan. 22Ngam addet kan sangaw nga algaw, inuffu-uffunan nak y Afu Dios, en yan ya gafu na kan hinnian nak kanniaw nga aggatadag nga mappalapalappat kan ikayu, alinak onu atanang ya kekuentan na, nga yan laman ya kinahakahik, ya kinahi ya profeta ira en ya kinahi y Moises kattun nga mesimmu. 23Yaw ya kinahi ra, mawag kan mapazapaziyat ya Cristo, en iggina ya unna nga magginnolay, en megafu kan yan, awayya na nga iyangay na ya nawag kan ya kagitta na nga Judio ira en kan ya mari Judio ira." 24Kannia y Pablo nga manefensa kan iggina pe laman kan kunna tian, kunna y Festo nga nangikullet, "Ulapa ka, Pablo! Pinolapa na ka ya kadakal ya ginilammum!" 25Ngam kunna nga siminabbag y Pablo, "Mekakua nga Festo, marik ulapa, nu azzi kurug en maggafu kan napia nga nonot ya kayakayan ku. 26En y Patul Agripa nga pakiergowan ku pay nga awan ku nga babang, ammu na ya me-annung kan ira yan nga ganagannud, gafu ta siguraduan ku nga awan kan ira yan nga mari nepakammu kan iggina, gafu ta mari ra nakua kan sekreto. 27Mekakua nga Patul Agripa, mangurug ka kazze/pano kan ya neturak ya profeta ira? Ammuk nga mangurug ka." 28Kunna nga siminabbag y Agripa, "Abbattan mu kazze nga kan manganannuan laman, pabbalinan nak kan Cristiano?" 29Ngam kunna y Pablo nga nakkahi, "Kunne nu manganannuan onu mabayag, idasal ku kan y Afu Dios nga mari na kan ikaw laman, nu azzi maski pay ngammin ya maggiggina ira kan yakan kan sangaw nga algaw, nga mabbalin kayu zinan kan kagittak fera laman kan ira yaw nga nekakawad ku." 30Sangaw, nanadag ya patul, ya gubernador, y Bernice, en ya dudduma/karruan nga nakipattuttud kan ira, 31en kattu nallawan da, nerergowan da nga kunda, "Awan nga kiningngua nay nga tolay nga mepangngat kan kapatayan na onu kekarselan na." 32Kunna y Agripa nga nakkahi kan y Festo, "Awayya na zinan nga masueltan nu mari na zinan napila kan y Emperador."

will be added

X\