Kinikkingngua 24

1Kabalin ya lima nga algaw, y Ananias nga pari nga katanangan ya kekuentan na, ya dudduma/karruan nga panakallan nga lalakay ira en ya abugadu nga mangngahan kan Tertulo, minang da kan Cesarea. Minang da kan y Felix nga gubernador, en kinahi ra kan iggina ya pangakusan da kan y Pablo. 2Kattu nakkulan y Pablo, pinegafanan y Tertulo nga kinahi ya pangakusan da kan iggina nga kunna nga nakkahi kan ya gubernador, "Mekakua nga Gubernador! Megafu kan ya napia nga ammorem, nabayag ngin nga memamak kami, en napakaru ya nangullian na yaw nga nasion min. 3Kanakanayun en kan kada lugar, kerandamman mi ira yan, en mari mi makabalat kan ikaw. 4Ngam mari napia nu talantanan ta ka. Ikiddok kan ikaw gafen nga pasensian mu nga ginan ya kayan mi kan manganannuan laman. 5"Nammuan mi nga narakat/napot yaw nga tolay en pagapagulluan na ngammin ya Judio ira kan ya interu mundo, en isa iggina nga panakallan kan ya falso nga sekta ya Nazareno ira. 6Kinakkapan na pay nga pabbalinan ya templo kan mari narenu onu sagrado, ngam ginafut mi iggina. (Ikayat mi zinan nga panunutan iggina segun kan ya dorob mi pe laman, 7ngam minang y Lisias nga medior, en ginarut na iggina kan ikami. 8Kinahi na nga umang kan ikaw ya mangakusa ira kan iggina.) Nu imbistigan mu iggina, mammuan mu mismu kan iggina ya me-annung kan ngammin ira yaw nga ganagannud nga pangakusan mi kan iggina." 9Netadday ya Judio ira pay kan y Tertulo nga nangakusa kan iggina nga mangi-insisti nga kurug ira yan. 10Sangaw, nesenniat ya gubernador kan y Pablo nga mergo iggina. Kunna gafen nga nanefensa kan iggina pe laman, "Mekakua nga Gubernador! Ammuk nga natunung ka nga hues kan yaw nga nasion kan aru nga rahun ngin. Gaggafen, mayayat nak nga manefensa kan yakan pe laman kan ya atubang mu. 11Awayya na nga mammuan mu sangaw nga mari massobra kan mafulu se dua nga algaw nga nappasa kattu nakalabbet nak kan Jerusalem tase annak maddayarayaw. 12Ya mangakusa ira kan yakan, mari rak vulvua/pulus nasingan nga nakiddiskusion kan maski innia kan ya lalantaran ya templo, onu nappagulu kan totolay kannay onu kan ya sinagoga ira onu kan maski hanna nga lugar kan ya siudad. 13En mari ra awayya nga mapakurug kan ikaw ya nangakusan da ira kan yakan. 14Ngam umanahut nak nga, kannia assesserbik kan ya Dios ya ginafu mi ira, vuluvulunan ku yaw nga relihion nga kayan da nga falso nga sekta. Kurruan ku pay ngammin ya dorob y Moises en ya neturak ya profeta ira. 15Hinnian/Asan innanamak kan y Afu Dios nga pagginnolayan na nattaruk ngammin ya totolay, natunung ira onu narakat ira, en kunna tian pay ya innanaman da. 16Gaggafen, kanakanayun nga kuan ku ngammin ya panda mawayyak, tase narenu ya konsensiak kan ya atubang y Afu Dios en ya totolay. 17"Nappasa kan aru nga rahun nga kawan ku kan Jerusalem, nattoli nak kannay nga nangiyangay kan kuartu para kan ya kagittak nga Judio ira en tase mangiddan nak kan ofresi ira. 18Kannia paddaggunan ku nga kuan yan, en kabalin ku nga napakarennuan segun kan ya dorob mi, nasingan dak kan ya lalantaran ya templo, ngam awan mamba nga totolay onu gulu kan ya pallehut ku. 19Ngam hinnian dudduma nga Judio nga taga Asia nga nakasingan kan yakan kannay nga hinnian da zinan kanniaw atubang mu, en ira zinan ya mangakusa kan yakan nu hinnian pangontran da kan yakan. 20Gafu ta awan da kanniaw, ira yaw mismu nga hinnian kanniaw nga mangakusa kan yakan, kayan da zinan nu hanna ya liwat ku nga nammuan da kannia nepangngimbistiga ya konseho kan yakan, 21fera laman yaw nga isissa nga nekullet ku kannia aggatadag nak kan ya paratubangan da, 'Mapanunutan nak megafu kan ya innanamak nga mapaginnolay ya nakkakatay ira.' " 22Ngam y Felix, aru ya ammu na nga me-annung kan yaw nga relihion, en ne-uppat na ya kabista y Pablo nga kunna nga nakkahi, "So nu lumabbet y Lisias nga medior, disidian ku ya kasom." 23Sangaw, nemandu na kan ya kapitan nga ipaguardia na y Pablo, ngam mari ra kuru istriktowan onu gamman ya kakkofun na ira nga umang mangiddan kan ya mawag na. 24Kabalin ya pia nga algaw, luminabbet y Felix en y Drusila nga atawa na nga Judio. Nepakkul na y Pablo gafu ta ikayat na nga ginan ya kayan na nga me-annung kan ya angngurug kan y Jesu Cristo. 25Kannia angngipalappat y Pablo kan ya me-annung kan ya angngua kan natunung, kan ya annangngal kan ya baggi en kan ya ammanunut nattaruk y Afu Dios kan ya totolay, nakatalaw y Felix, en kunna nga nakkahi, "Awayyam mapanaw be laman. So nu hinnian lugar ku, ipakkul ta ka." 26En yaw peba, ininnanaman na nga kuartuan y Pablo iggina. Gaggafen, naming aru nga nepakkul na iggina tase mergo ra. 27Kabalin ya dua nga rahun, y Porcio Festo ya nanali kan y Felix. Ngam pinassige y Felix y Pablo nga nekarsel, gafu ta ikayat na nga pagustuan ya Judio ira.

will be added

X\