Kinikkingngua 21

1Kattu nakapappakammu kamin kan ya taga Efeso ira, nattakay kami kan dakadakal nga barangay nga nakkawat kan ya fugu ya Coos. Kan ya netunud nga algaw, minang kami kan ya fugu ya Rodas, en kan ya mekatallu nga algaw, nakakaddet kami kan ya siudad ya Patara. 2Nasimmuan mi kannay ya isa nga dakadakal nga barangay nga umang kan ya probinsia ya Fenicia, en nattakay kami kan yan nga napanaw. 3Kattu nelahiban mi ya fugu ya Chipre kan ya zimigi, nattalebad kami kan ya ziraya na. Nassige kami kan ya nasion ya Siria, en naffundu kami kan ya siudad ya Tiro, gafu ta diskargan da kannay ya karga nga hinnian/asan kan ya barangay. 4Sinaful mi ya disipulo ira, en kattu natafulan mi ira, nakipaddian kami kan ira kan pitu algaw. Nepakahi ya Espiritu Santo nga nekahi ra kan y Pablo nga mari na zinan umang kan Jerusalem. 5Kabalin ya algaw ira nga nepaddian mi kannay, naggannukat kami nga mapanaw tase isige mi ya abbiahe mi. Ngammin ya disipulo ira en ya gi-attawan da en ya gi-anakan da, netulud da kami kan ya liwan ya siudad. Nappalentud kami ngammin kan ya dappit ya bebay en naddasal kami. 6Sangaw, nakkarapakapakammu ya kada isa, en nattakay kami kan dakadakal nga barangay, en nattoli ran kan ya gibbalayan da. 7Napanaw kami kan ya siudad ya Tiro, en nassige kami en naffundu kami kan ya siudad ya Tolemaida. Binisita mi ya wawwahi kan pangurug kannay, en nakipaddian kami kan ira kan patangalgaw. 8Kan ya netunud nga algaw, napanaw kami kannay, en nakakaddet kami kan ya siudad ya Cesarea. Nakipaddian kami kan ya balay y Felipe nga minangngipalappat kan ya napia nga dumug. Isa iggina kan ya pitu nga napili kattun kan ya iglesia kan Jerusalem. 9Hinnian appat nga anak na nga mammaginganay nga profeta ira. 10Kannia nepaddian mi kannay kan pia nga algaw, hinnian profeta nga mangngahan kan Agabo nga naggafu kan ya probinsia ya Judea, 11nga nakalabbet kan ikami. Inalak na ya sintaron y Pablo, en binalud na pe laman ya taka en ima na, en kunna nga nakkahi, "Yaw ya kayan ya Espiritu Santo, 'Kunna tiaw ya ammalud ya Judio ira kan Jerusalem kan ya makassintaron kan yaw, en iyalawat da iggina kan ya mari Judio ira.' " 12Kattu nagina mi yan, kinakkapan mi en ya totolay kannay nga bensian y Pablo nga mari na umang kan Jerusalem. 13Ngam kunna nga siminabbag, "Ka-am ta mattangatangit kayu nga pakarandamman nu laman ya futuk? Siggaparan nak nga mari laman nga mekarsel, ngam maski pay mapatay nak kan Jerusalem para kan y Afu Jesus." 14Kattu mari mi nabensi iggina, pinorrian min, en kummi nga nakkahi, "Matumpal gafen ya uray y Afu Dios." 15Kabalin na ira yan nga algaw, naggannukat kami nga umang kan Jerusalem. 16Hinnian pay dudduma/karruan nga disipulo nga taga Cesarea nga nevulun kan ikami. Netulud da kami kan ya balay y Mnason nga taga Chipre nga nabayag ngin nga disipulo nga pakipaddianan mi kan Jerusalem. 17Kattu nakalabbet kami kan Jerusalem, nayayat ya wawwahi tera kan pangurug nga nangalaba kan ikami. 18Kan ya netunud nga algaw, nevulun kami kan y Pablo nga minang nabbisita kan y Santiago, en hinnian pay kannay ngammin ya lalakay.ira nga panakallan kan ya iglesia. 19Zinniotan na ira, en pinakoli na kan ira kan napia ya kinikkingngua y Afu Dios kan ya mari Judio ira kannia nepassesserbi na kan iggina. 20Kattu nagina ra ira yan, zinayarayaw ra y Afu Dios, en kunda nga nakkahi kan y Pablo, "Wahi, ammum nga minarivu kan ya Judio ira ya nangurug ngin kan y Afu Jesus. Ira ngammin, napafutu ya ammaraparulot da kan ya Dorob y Moises. 21Nadumug da yaw nga me-annung kan ikaw: Ituttuldum kanu kan ya Judio ira nga maddian kan ya lugar ira ya mari Judio ira nga likuran dan ya neturak y Moises, ikayat na nga kayan, kayakayan mu kanu nga mari ra ipakugit ya gi-anakan da onu vuluvulunan ngin ya kustumbre tera nga Judio. 22Siguradu nga mammuan dan nga hinnian kan kanniaw. Hanna gafen ya kuan tera? 23Kunna tiaw gafen ya kayan mi nga kuan mu: Hinnian appat nga lallaki kan ikami nga hinnian nehuramento ra kan y Afu Dios. 24Alakan mu ira, en metadday ka kan ira kannia akkipakarenu ra, en ikaw ya mappaga kan ya gastos da kannia kapakarenu ra, tase awayya ra nga mappakulukkut/mappakurukkup. Nu kuan mu yan, mammuan ngammin ya totolay nga mari kurug ya nadumug da nga me-annung kan ikaw, nu azzi napia ya ammuluvulun mu kan ya Dorob y Moises. 25Ngam nu me-annung kan ya mari Judio ira nga nabbalin kan mangurug, neturak tera kattun kan ira ya nakkara-anahutan tera nga mawag kan mari ra mangan kan ne-ofresi/nededika kan rebultu ira, onu daha, onu ayam nga mari napadaha, en mari ra maddallaw." 26Kan ya netunud nga algaw, inalak y Pablo ya appat nga lallaki, en nattaradday ra nga namakarenu kan ira pe laman. Kabalin na, siminallung da kan ya lalantaran ya templo tase ipakammu ra kan ya pari nu pia nga algaw peba ya kabalin ya kapakarenu ra, gafu ta, kabalin na yan, iyofresi ra ya ofresi nga para kan ya kada isa kan ira. 27Kattu aranni nga mangultimu ya pitu algaw nga kapakarenu ra, hinnian dudduma nga Judio nga taga probinsia ya Asia nga nakasingan kan y Pablo kan ya lalantaran ya templo. Ginafut da iggina, en sinuntusak da ngammin ya totolay 28nga kunda nga nangikullet, "Lallaki nga Israelita, uffunan nu ikami! Iggina yaw ya tolay nga mattuttuldu kan ya totolay kan ngammin nga lugar nga mekontra kan ittera nga Judio, kan ya Dorob y Moises, en kan yaw nga templo pay. Mari kan yan laman, nangitallung iggina kan mari Judio ira kan yaw nga lalantaran ya templo, en pinabbalin na gafen yaw nga sagrado nga lugar kan mari narenu." 29Kinahi ra yan gafu ta dana nasingan da iggina en y Trofimo nga kavulun na nga taga Efeso kan ya siudad ya Jerusalem, en inabbat da nga netallung y Pablo iggina kan ya lalantaran ya templo. 30Nagulu ya interu nga siudad, en nappaladdiaw ya totolay nga minang nanggafut kan y Pablo, en zinedelag da iggina nga nelawan kan ya lalantaran ya templo. Nerame ra sinerran ya trangka na ira. 31Kannia ammatay ra zinan kan iggina, nedanug kan ya medior ya suddalu ira nga taga Roma nga magulugulu ngammin ya totolay kan Jerusalem. 32Nerame na nangakkul kan suddalu ira en kapitan ira, en nappaladdiaw ra nga nazzittag nga minang kan ya dian ya gulu. Kattu nasingan ya totolay ya medior en ya suddalu ira, inimmangan da nga binubbug y Pablo. 33Sangaw, minaranni ya medior kan y Pablo, inaresta na iggina, en nemandu na nga makawaran iggina kan dua. Pinovutan na nu innia y Pablo en nu hanna ya kiningngua na. 34Naddumuruma ya nekukkullet ya maddumuruma nga totolay, en mari na nammuan ya kurug nga nesimmu megafu kan ya gulu ra. Gaggafen, nemandu na nga me-angay y Pablo kan ya baraks da. 35Kattu nakakaddet da kan ya addan, fersadu nga inakkat ya suddalu ira y Pablo gafu ta nelot/nafulotan ya gazzit ya totolay kan iggina. 36Napakaru ya totolay nga nevulun kan ira nga kunda nga nangikukkullet, "Patayan nu iggina!" 37Kannia pappangetan da nga itallung y Pablo kan ya baraks da, kunna nga nakkahi kan ya medior kan perergo Griego, "Hinnian ikayat ku nga kayan kan ikaw." Kunna nga nakkahi ya medior, "Ammum balattan ya mergo kan Griego. 38Bakkan kan ikaw gafen tu taga Egipto nga bahu narrebelde, nga nangigiya kan ya appattarivu nga lallaki nga grupo nga nangahanan kan Minammatapatay, en negiya na ira kan ya disierto." 39Kunna y Pablo nga siminabbag, "Isa nak nga Judio nga taga siudad ya Tarso kan ya probinsia ya Cilicia nga totolay ya isa nga siudad nga paddumurumug. Ikiddok kan ikaw nga ipamavulun mu nga makiergo nak kan ira yaw nga totolay." 40Pinavulunan ya medior iggina nga makiergo kan ira. Nanadag iggina kan ya addan, en nesenniat na kan ira nga memamak da. Kattu nemamak da ngammin ngin, nakiergo iggina kan ira kan perergo Hebreo.

will be added

X\